23M

嘩嘩嘩...不經不覺, 我家的小魔怪已經23個月大啦!!

雖然媽媽我向來鮮有寫小B的成長報告...但媽媽我知你每天都一直在進步, 所以好難將所有事情一一記低嘛 (其實說到底都只不過是想掩飾媽媽懶惰, 哈哈).

23個月大的小B, 雖然不算非常叻, 但亦未至於要令我們擔心, 有時見她所知所識的, 遠遠超乎我們想像...所以大家對妳都非常放心.  加上小B爸認為, 以她這樣小小的年紀, 無需特別進行催谷特訓, 所以在學習知識方面, 一直以來都是採取順其自然的態度, 結果還總算過得去.  不過只要當妳將來入學後, 媽媽我就真的好擔心自己會變得怪獸啦, 到時...希望我和妳都不會有太大壓力, 因為我只想你可以在這短短3, 4年的幼稚園生活中, 過得輕輕鬆鬆, 開開心心.

說話方面
這一環小B依然是比較弱, 跟同齡小朋友比較, 又未至於好差好差, 但就未能成功講得出完整句子囉, 不過開始能夠跟我們有問有答已經好不錯啦.

另外最近特別愛跟人口水尾, 你說什麼她就跟著說什麼, 非常好笑.  有次小B在家食早餐時, 要求爸爸拿東又拿西, 害得肚餓到打鼓的爸爸遲遲未能開餐, 結果爸爸就拋下了一句, 你真是麻Q煩呢, 誰不知小B望著爸爸又跟著說"麻Q煩", 雖然大家都覺得好好笑, 但從那一刻開始我們就知道, 往後在小B面前要小心說話嚕, 否則她將不好的都記進腦中就大大鑊, 自此我們在她面前講話都不太敢亂來~

作息方面
一如以往...繼續做夜鬼!!

每天早上約10時起床, 直至下午4時左右午睡, 午睡時間一般為2小時, 至於晚上...婆婆話經常要打要鬧才肯上床食奶, 因為顧住玩囉, 不過婆婆一家都是夜鬼, 所以又難怪小B晚晚唔願上床啵, 一般11時左右上床食奶, 但好多時都要玩到12時才睡.

但如果跟著爸爸媽媽回家, 早上約9時起床, 爸爸會於下午2時左右就迫她午睡, 一般都有2.5小時或以上, 由於早了午睡, 晚上則可以10時半左右乖乖上床食奶覺覺豬, 所以好多時爸爸都話寧願小B跟在自己身邊, 那麼她的作息時間才可以調較得好一點.

食方面
大食妹一名, 可惜食極唔長肉...暫時未算揀食, 最愛食魚, 瓜和菜, 希望可以一直維持落去.   

早, 午, 晚3餐奶, 明明下午已經戒奶多時, 但今個星期突然要求婆婆開奶奶食才肯午睡, 但既然小B想食就由她吧, 反正食得是福!!

早奶及午睡後, 會食少量麵包, 餅餅或水果.

Lunch好多時婆婆都會煮飯, 可以食一大碗, 如果婆婆約了朋友飲茶, 小B就跟大人食.

晚餐食大半碗飯, 但爸爸媽媽卻最憎餵小B食飯, 因小B有個壞習慣 - 周屋走, 但婆婆話Lunch小B好乖會坐定定, 即是擺明蝦我和爸爸啦.  由於每次都是小B食完才到我們食, 當我們開飯時, 小B又要一起同枱再食, 所以正確來說, 晚餐小B會食兩次.  而且早於幾個月前, 小B就已經進展到可用大人筷子夾餸啦, 雖然手勢錯誤, 但她能夠自行夾餸又唔准人幫, 我們都覺得她好叻好獨立呢.  究竟應該何時才去糾正小B用筷子的正確手勢才是呢?

晚飯後會飲約6oz湯水, 除了花旗蔘...所有湯水都好Like.

水果每天飯後都有食, 所有生果都喜歡.

食飯都不忘裝可愛, 哈哈~

健康方面
剛於一星期前突然發燒, 但食過一次退燒藥後就痊癒了, 不過因為燒到102.x度的關係, 所以還是去看看醫生比較好.  雖然醫生說有點少感冒, 幸好小B未見有嚴重流鼻水, 經此一病...婆婆和媽媽都覺得小B好像又長高了.

基本上大致正常!!

如廁訓練方面
雖然已經進入冬天, 仍然未能成功戒片, 但小B間中要尿尿時都會自己跟我們說...暫時10次有9次中, 叻女!!  當然間中我們都會主動問她有否尿尿需要啦...  至於便便就完全未能成功喇, 最多都只會在便便完後才跟我們說, 唯有繼續努力.


下個月小B就2歲大啦, 媽媽期待著妳給我的另一番驚喜, 哈哈~