小眼晴看大世界之Hae遊清邁 @ Day 1

21.03.2016

半年前已經Confirm好嘅清邁之旅終於出發啦...

今次我哋坐廉航, 係因為我哋後Join朋友, 為咗唔想分開起程, 所以無得選擇, 但如果有得揀, 爸爸話最好唔好再坐廉航喎.  原因係因為爸爸太大隻, 覺得座位迫坐得唔舒服, 而小B亦因為廉航無飛機餐而覺得有少少唔開心.

今次我哋早機時間係早上7:05出發, 我哋全家都只係小睡三小時左右就要起身出門, 而倆姊妹就因為知道去旅行, 所以相當興奮, 即使眼瞓都無扭計, 而且滿是期待.

大約4:45左右, 我哋已經去到機場跟朋友們會合...今次一行14人出發, 真係好耐好耐都無試過一班人去旅行了.

小朋友們未上機, 齊齊睇楠楠哥哥打機...  :p

今次我哋要搭接駁巴士出停機坪上機, 點知剛巧遇著落大雨, 結果大家都好狼狽, 幸好航空公司有雨衣提供, 如果唔係就真係變晒做落湯雞.

妹妹起飛後不久就已經大覺瞓, 相反家姐太興奮所以唔肯瞓, 不過起飛後大約一小時都相繼暈倒, 而我亦都終於可以休息一下, 呼~

3小時機程好快過去, 至於倆姊妹亦都好乖無扭計, 仲記得上次去台灣時, 妹妹回程喺飛機扭眼瞓, 攪到我哋勁唔好意思, 今次大個咗搭飛機無再扭計...真係抵讚 (希望將來搭飛機都咁順利, 唔會喺機上大吵大鬧啦.)

落機後, 朋友已經安排好酒店車接我哋, 大約半小時(連塞車)就到酒店.

等Check In期間, 小朋友開心停不了.

同時...友人亦已經成功攞車, 黎緊呢5日我哋就靠晒佢啦.

大家快手放低行李就齊齊出發去食午餐, 今次友人介紹去食有機菜, 果然...真係唔錯啵, 不過大家太肚餓又要照顧同行中嘅5個小朋友, 所以無人記得要影相, 其實今次個Trip大家都只係影咗好少相咋, 唉~

3位美少女!!

妹妹超like楠楠哥哥, 整個Trip都要楠楠哥哥照顧, 哈哈~

食完Lunch去附近商場買上網咭, 然後再去超市入少少乾糧.

小朋友要晨早出發去旅行其實真係好攰架, 所以一返酒店, 小朋友們就要午睡, 至於男人們就齊齊落泳池游水, 好梳孚.

大約6時多, 我哋就出發去食晚飯, 由於今日大人小朋友都好攰, 所以是晚無特別活動, 食過晚飯又再返酒店.





我們的Facebook專頁 - 小b與妹妹b之成長日誌

美國靚太歡迎會

講真...愛美寫Blog已經有一段長時間, 由讀書年代嘅Xanga開始, 然後轉去Y Blog, 再轉去Google, 真係好多好多年啦, 不過跟一班Blog友仔認識, 就肯定係因為小B喇...
  
以前真係無諗過寫Blog會識到真朋友架, 始終網絡世界有好多嘢都好唔實在同太假, 但唯獨呢班Blog友仔就真係好真, 所以我都好希望可以跟大家保持聯絡.

今次美國靚太Mrs Wu遠度回來, 我哋呢班Blog友仔當然要聚下啦~

只可惜今日我要一拖二, 妹妹又係個貼身膏藥, 所以實在無太多時間同大家聯誼, 就連相都影得幾張咋, 究竟我家妹妹幾時先會變得獨立D呀?!

今日倆姊妹知道有得去玩, 未出發已經好興奮, 但去到Party Room之後又變得有少少內斂, 小B都還好, 但妹妹就要痴實媽媽囉.  今次真係辛苦晒有份出力嘅媽媽, 我家倆姊妹玩得開心之餘仲又食又拎呢, 哈哈~

食完飲完又未夠鐘去Playroom玩, 檬媽就提議小朋友們先黎個集體遊戲時間, 不過好快小朋友們就四散了.

然後小朋友們影張合照先啦...

小B每次都好照顧妹妹豬, 真乖~

到大合照時間...  (但原來Little K未到)

終於到咗小朋友們最期待嘅Playroom時間, 小朋友們當然個個都要去放電啦...

開心嘅時間總係過得特別快, 玩咗大約45分鐘之後就齊齊返Party Room準備收拾東西交場~

返過Party Room後襯有時間, 梗係要同靚太Mrs Wu影張合照嘛...  ^^

最後當然要影多張齊人嘅大合照啦.

仲有兩個可愛4眼妹, 哈哈~

希望下次Mrs Wu再返黎香港時可以抽時間再聚啦...  ^^





我們的Facebook專頁 - 小b與妹妹b之成長日誌

言語治療 (二) @ 健康院篇

話咁快就3星期, 又要去健康院上第2次嘅言語治療堂啦, 不過今次進展只係麻麻, 因為即使差不多每天練習, 但小B仍然未能夠掌握到個技巧, 所以上次學嘅今次仍未算合格.  唉...但原來今次已經係健康院治療嘅最後一次啦, 睇黎政府都係幫唔到小B, 咁我哋唯有繼續上私人嘅言語治療班啦.

今次言語治療師話小B用氣方面係好咗, 但用氣連發音就依然未達標, 所以只好繼續努力, 同時言語治療師亦有教新嘢, 但唔會再跟進即係無用啦, 不過言語治療師話若然真係覺得有需要就可以排醫院嘅言語治療訓練喎, 真係唔該晒呢~

其實我知道要搵個同小B夾到嘅言語治療師係好難嘅事, 唯有跟之前檬媽介紹嗰個磨合多一排看看結果再算吧!!




我們的Facebook專頁 - 小b與妹妹b之成長日誌

K1親子旅行 - 沙田中央公園

期待咗好耐嘅親子旅行竟然係去沙田中央公園, 當媽媽知道一刻真係有點失望, 不過都會好想小B可以同同學仔一齊參與, 所以都有報名出席.

對小朋友黎講...地點並唔重要, 重點係有得玩就已經夠開心嘛, 所以小B一直都好期待架.  旅行呢日仲自動自覺起身呢, 好叻豬啊, 哈哈!!

一早跟同學們一起食過早餐後就齊齊準備上旅遊巴出發...  ^^

好快...我哋就到達目的地啦~

一去到小朋友們當然係先盡情地放電啦...  :p

除了小B最好朋友 (之前亦已經出過鏡), 其他就低調一點唔出樣了.

喺大空地附近吹過泡泡, 然後就轉戰公園遊戲設施...

好快...又被同學仔嘅汽球吸引過去~

玩下...食下...又到咗集體遊戲時間啦, 所有K1班學生集合好後, 先分班去影大合照.

由於一班太多人, 所以要分上下兩組影相...

原來小B都可以好有秩序架, 平時喺屋企真係唔太覺, 哈哈!!

跟兩位班主任合照...

影完相...唱完歌...玩過集體遊戲, 然後又到自由活動時間, 到兩點才再集合上校車回校.

不過因為我哋有下場, 所以就先提早離開.

簡簡單單嘅學校旅行, 小朋友們足以開心一整天.

希望明年嘅旅行地點會有驚喜啦.  :p





我們的Facebook專頁 - 小b與妹妹b之成長日誌

兒童鋼琴班 @ 柏斯琴行

自從學校嘅鋼琴班完咗10堂之後, 我就無再喺學校繼續學, 因為真心覺得學校請返黎嗰間中心嘅導師唔太有愛心, 經常投訴小B唔認真唔聽教, 仲同小B講如果再係咁就不如唔好學之類嘅說話, 所以我同爸爸係非常極之不滿, 加上其他家長都覺得呢間中心開辦嘅興趣班好麻麻, 所以我哋就唔再繼續喺學校學, 轉去其他地方學喇.

咁我見有幾個朋友都有話過柏斯嘅琴班唔錯, 於是我當然係上網搜尋一下資料啦, 而最終經我直接同琴行職員查詢後, 覺得真係可以一試, 於是就約埋同學仔一齊轉去呢度學.

兒童鋼琴班適合3歲半起嘅小朋友, 課堂共分上下兩期, 一班只有6位小朋友, 至於導師方面亦都好唔錯, 睇得出有愛心之餘亦好識跟小朋友相處, 暫時上咗兩堂...小B都話幾鍾意老師.  而每次落堂前5分鐘, 老師又會跟家長們講解課堂內容, 方便家長跟小朋友練習, 真心覺得呢個琴班好唔錯, 自己亦無幫小B選擇錯呢.  :p

雖然每堂只得一小時, 而且又有6位小朋友, 不過為咗提高小朋友嘅興趣, 所以每位小朋友於每一堂都會安排到琴前學習, 即係點都會有得惦下琴鍵, 唔會只用琴書或工作紙去認識鋼琴上知識.  根據呢兩堂觀察, 我都真係幾滿意...

另外小B上堂表現亦好像比之前喺學校學琴時好, 老師話小B學習時都算專注, 只係當快手完成每一樣工作後會搵嘢玩, 可幸嘅係老師竟然話小B吸收力算高, 要求佢做嘅都做到, 暫時要多加注意嘅係彈琴手勢.

希望小B今次真係會認真去學, 唔好半途而廢啦~

唔知小B幾時先可以彈到一首歌呢?  媽媽好期待著呢個小小嘅成果呀, 因為我小時候都好想學琴架, 只係婆婆見我學每一樣興趣班都3分鐘熱度, 所以最終無俾我學.  就係咁...我更加希望小B可以學識彈琴, 哈哈!!

我們的Facebook專頁 - 小b與妹妹b之成長日誌

好友相聚

10.04.2016

小B讀N班嘅時候, 特別同某幾位嘅同學比較好感情, 所以即使大家分開了, 我哋仍然有間中保持聯絡, 今日我哋就約咗跟小B最好朋友嘅憬琳一齊去玩喇...  ^^

自從暑假後大家各自去到新學校, 加上大家都開始了不同嘅興趣班, 時間上真係好難配合, 所以一直約極都總係未能成事, 今日終於夾到時間去玩...兩個小朋友當然就最開心啦~

原本憬琳媽媽想約去戶外踩單車, 不過我要一拖二, 戶外活動對我來說相對有難度, 加上今日天陰有雨, 所以最終近近地約去黃埔冒險樂園, 對上一次我哋都係約埋一齊喺呢度玩架.

其實去冒險樂園都好架, 我覺得容易控制嘛.  :p

妹妹今次都玩得好投入呢~

 3個玩得非常融洽...

 小B好叻女, 成功挑戰跳樓機~

 玩得超開心呀...

雖然今日只係短短相聚兩小時, 而且玩完之後媽媽超攰, 但能夠令小朋友開心, 媽媽絕對願意辛苦一點.

P.S: 真心想讚一讚自己, 因為原來一拖二去玩係難唔到我架, 以後爸爸返工媽媽一樣可以帶倆姊妹周圍去玩啦, 嘩哈哈哈哈~





我們的Facebook專頁 - 小b與妹妹b之成長日誌

言語治療 (一) @ 健康院篇

早前經健康院轉介上言語治療訓練, 等了個多月終於上咗第一堂啦, 但言語治療師話以小B唔算嚴重嘅程度, 最多只可以上3堂, 即係話就算小B未完全改善好, 政府都未必會再跟進.  ~.~

首先言語治療師再為小B做一次評估, 因為言語治療師話上次醫生只係粗略評估, 所以要再多做一次去確定小B有幾多個音準有問題, 最後得出結果係7個 (比上次5個多), 但都比去年評估為9個少.

言語治療師話小B最大問題係用氣方面, 只要對用氣方面嘅字能夠完全掌握, 或許有某些音準就會自動讀到, 而呢D用氣音一般兩歲半左右已經能夠準確讀出, 但小B已經4歲啦, 所以明顯係有問題囉.  其實之前喺灣仔上過幾堂言語治療訓練, 當時都係針對教幾個要用氣嘅發音, 如P, H, K音等, 不過當時小B未完全掌握到我就暫停咗上堂, 加上又無再勤加練習, 所以小B大概已經忘記了...  幸好之前有上過堂總算有丁點底子, 所以今次言語治療師話小B都算容易掌握, 但就經常要提點囉, 而今次嘅目標當然係希望唔需要提點都能夠發岩音啦, 所以媽媽唯有又再每日抽時間幫小B練習.

暫時三星期後會再去見言語治療師, 希望到時小B真係已經有改善, 因為時間緊迫, 政府只能夠提供最多3堂言語治療俾小B, 所以藉著今次免費嘅機會希望改得幾多得幾多, 等我哋再去灣仔上堂嘅次數可以盡量減少, 你知啦...私人嘅收費真係唔平啊, 唉~

最理想能夠改善發音嘅時間係6歲前, 我哋真係要捉緊機會, 希望快快KO小B嘅呢一個問題!!




我們的Facebook專頁 - 小b與妹妹b之成長日誌

跌斷手驚魂

01.04.2016

今早起床妹妹因太快手快腳落床時被棉被絆腳而跌落地, 結果當然係大喊收場啦, 不過又唔算喊得好慘好耐, 所以我就以為無事喇, 但跟住妹妹就開始唔肯再用右手啦, 突然變成了左撇子一樣, 連用匙羹食通粉都變為了用左手, 嗰一刻爸爸已經心感不妙, 之後爸爸嘗試幫妹妹鬆一鬆隻手, 點知一掂佢就喊, 最後安全起見當然係去睇醫生...

其實跌落床後妹妹都有話隻手好痛, 但見佢又未至於完全郁唔到, 所以無即時處理, 以為過一陣就無事, 點知直到食完早餐都仲係咁, 爸爸就提議即刻去睇醫生喇.

去到診所醫生摸一摸妹妹隻手, 妹妹就喊, 醫生更發現妹妹手踭未能自如地摺合, 雖然醫生話多數係撞傷肌肉或扯傷, 但安全起見都係入急症室照一照X光比較好, 就係咁..醫生即刻寫咗封轉介信叫我去QE, 仲連今次診金都唔收我~  :p

去到QE, 出奇地登記好唔洗等就有得見醫生, 醫生聽我講完妹妹情況就安排妹妹去照X光, 照X光時妹妹因為太驚而大吵大鬧, 最終要我夾住先照到, 照完等X光片出, 大約半小時左右就再見醫生喇, 好彩醫生話無骨折, 只要休息一下唔好太郁動受傷嘅手就應該好快無事, 最後再安排一星期後返醫院覆診再照X光, 今次真係要讚一讚QE嘅效率.

好彩妹妹無事咋, 否則我一定會勁內疚, 因為係我無好好睇實妹妹, 唉...  小朋友真係望少一眼都有機會出事, 唯有再多加留意!!

兩天後妹妹隻右手已經無事啦, 所以最後我哋都無返醫院覆診, 免得又要再照多次X光.

今次睇急症未能提供出世紙, 所以無須先付款, 不過14日內就要補交出世紙正本, 所以到時才再收費, 若然大家有需要帶小朋友去急症, 記得帶定出世紙, 免得要再多行一趟啦.

我們的Facebook專頁 - 小b與妹妹b之成長日誌

小雲Look

帶了眼鏡後, 大家覺得小B有幾多成似小雲?

雖然媽媽未完全接受到, 不過小B就好鍾意自己呢個小雲Look喇, 試帶眼鏡已經開心到咁, 小B是傻的嗎?!

呢副就係小B人生第一副眼鏡啦, 小B副眼鏡仲貴過媽媽嗰副呢, 唉~

 媽媽覺得小B宜家激似小雲囉...哈哈哈~

我們的Facebook專頁 - 小b與妹妹b之成長日誌