2016年1月28日 星期四

華服日生日會

今年雖然一早就知道學校有華服日, 不過媽媽無特地去買華服啊, 只係穿去年多買嘅呢件背心, 雖然唔算好靚, 不過都還算可以啦!!

我總係覺得小朋友越大, 穿起華服就越無咁可愛~
期待已久嘅呢一日終於都到, 我家小B真係好開心好興奮好期待, 呢個小朋友今朝仲一早就自動自覺起身換衫等返學,  跟平時每天都賴床嘅佢, 簡直係判若兩人.  :p
希望你今日返學玩得開心啦.  ^^





我們的Facebook專頁 - 小b與妹妹b之成長日誌

2016年1月26日 星期二

冷得我哋騰騰震

59年以來最低溫都俾我哋遇到, 唔知會唔會好快有機會俾我遇到3x年以來首次中六合彩頭獎呢, 哈哈~

剛過去嘅呢個週末, 天氣真係寒冷得好緊要, 事前我真係一度擔心倆姊妹會因抵禦不住寒潮而冷病架, 因為佢倆姊妹身體唔算強壯, 最容易就係患上傷風感冒, 加上小B氣管比較差, 所以早一星期我都特地去Uniqlo入定貨, 幸好最終倆姊妹都平安渡過了最嚴寒嘅三天 (唔講得笑, 千期唔好少氣呀, 臨近新年大家都唔可以病架).

而星期日最凍嘅一天, 平均都係1.x-3.x度左右, 我家小B更因為怕凍, 一度拒絕出門去玩, 真係估佢唔到呢.  最終全日我哋除咗由屋企坐的士返婆婆家之外, 其餘大部份時間都係喺被窩入面, 直至夜晚先齊齊落街打邊爐, 真係冷得我哋騰騰震呀.
至於星期一就因為只得3-7度天氣, 所以我一早已經打算幫小B請假了, 然而幸好教育署最終亦宣佈因寒潮而停課一天, 大家都可以安安樂樂留喺屋企避寒.

今日天氣稍為回暖, 小朋友都如常返學啦, 難得小B竟然無賴床, 可以精精神神上學去, 真心覺得小B好勁呀.

不過咁...大家都要做足保暖功夫, 記得唔好冷病啊!!
 包到剩係見到個頭  :p

 



我們的Facebook專頁 - 小b與妹妹b之成長日誌

2016年1月25日 星期一

靚媽飯聚

一班妹妹212嘅靚媽終於有飯局啦...雖然212媽媽谷唔算多人, 不過能夠搵到一班啱嘴型嘅媽媽實屬難得.  但可惜自從一歲Party之後, 大谷好耐都無攪聚會啦, 而且有部份媽媽於谷內亦都開始少說話, 幸好仲有幾位媽媽都尚算啱傾, 結果我哋又另外開一谷日日吹晚晚吹, 真心覺得有班媽媽朋友係件好開心嘅事...  所以難得有人提出約飯聚, 平時放工後少出街嘅我都當然盡量抽時間出席啦, 結果今晚大家都傾得好開心, 食得好滋味!!

成晚除咗傾計同笑, 雖然食咗好多嘢, 好彩有媽媽鐘意相機食先, 如果唔係都開心到唔記得自己食過乜嘢落肚呀~
另外成晚最緊張嘅就係大家一齊幫其中一位媽媽做見証, 當大家都想生第2胎嘅時候, 我呢D爆響口話要封肚收爐嘅當然大大力支持大大聲鼓勵啦...  :p

平時放工只忙住趕返屋企湊女嘅我, 今日可以輕輕鬆鬆同靚媽們飯聚, 真心覺得超爽, 期待我們下一個唔洗湊B嘅飯聚啊.  ^^





我們的Facebook專頁 - 小b與妹妹b之成長日誌

2016年1月22日 星期五

K1班親子新春吊飾

臨近節日, 又係我哋要做親子吊飾嘅時候啦, 不過今次小B完全無動過手, 因為媽媽係喺公司整嘅.  :p

今次真係好彩有軍師協助, 小B先有個咁靚嘅新春吊飾帶番學校佈置課室咋...

似唔似買番黎先, 哈哈!!
 呢部份係媽媽整, 當然軍師都有加入少少意見啦...
 呢部份係軍師整, 但媽媽都有出手協助架...
其實做呢個吊飾唔難, 不過真係好花時間, 當完成後一刻我真係有想過整多幾個掛屋企做裝飾.

而做呢個吊飾亦都算係好環保, 材料只需要兩個廁紙筒, 10個利是封, 絲帶, 兩張顏色紙加一個舊有嘅新春小吊飾就可以合併而成, 絕對配合到學校嘅新春環保吊飾主題.

我家小B見到後...開心之餘亦讚不絕口呢!!





我們的Facebook專頁 - 小b與妹妹b之成長日誌

2016年1月21日 星期四

《淘》學校生日會之小禮物

學校生日會每個月都有, 不過小B等做生日會主角就足足等咗好幾個月喇, 今次小B知道自己有份成為生日會主角之一, 所以一早就叫我準備定小禮物送俾同學仔...  -.-"  原本我真係無諗過要送小禮物架, 只打算買個生日蛋糕返學, 但既然小B開到聲要求, 咁我就唯有乖乖配合, 等佢開心一下.

其實諗小禮物都唔係一件容易事啊, 一黎又唔可以太貴, 二黎又唔可以太行, 最終想了好幾天終於決定淘卡通小毛巾做禮物, 反正每個同學仔都有需要用到小毛巾嘛, 送小毛巾好像比較實際呢.  ^^

每一條都有獨立包裝, 便宜又好看, 讚呀...
小小心意, 希望小B嘅同學仔都喜歡啦!!





我們的Facebook專頁 - 小b與妹妹b之成長日誌

2016年1月19日 星期二

CO2 Laser 打疣分享

說好的全身打疣一拖再拖下終於完成啦...  

當年陀小B時開始, 可能免疫系統出了問題, 加上大肚抵抗力又變弱, 結果不知從何時何日起突然長了幾粒像墨一樣的疣來, 起初真的不以為意, 以為係墨, 但後來發現有散開長出嘅情況, 加上後期肚子越大皮膚越乾我又不斷抓肚, 一唔小心抓損皮膚就傳染開去, 結果長出十多廿粒應該都無走雞了.  

直至生完小B我仍未有要去打疣嘅念頭, 因為始終生喺肚皮附近, 如果唔係著比堅尼的話根本就無大影響, 亦唔會有人見到, 所以就一直無再理.  但到陀妹妹時發現, 我身上像墨般一樣的疣又長多了, 除了整個肚皮附近都長滿疣之外, 就連胸, 頸都有呀, 簡直就係大範圍擴散, 不過當時仲覺得可以唔做打疣, 因為我無認真上網查找問題嘛.  

後來見有幾位朋友都有話去打疣, 我先認真上網睇究竟疣係乜東東黎...  原來疣係過濾性病毒, 而且仲會傳染架, 難怪我身上嘅疣會越黎越多啦.  而呢一刻我亦意識到唔可以再拖, 要快快將身上所有疣都消除, 否則惹開俾兩個女就慘了.

疣有好幾種, 而出現喺我身上嗰種就係扁平疣~
--------------------------------------------------------------------------------------------------
(網上資料圖片)
疣

疣(Viral Warts)屬於過濾性病毒的感染,病源是一種名為人類乳頭瘤病毒 (Human Papilloma Virus﹐簡稱HPV)﹐能透過人與人的接觸而傳染開去。HPV的種類非常多﹐當中引發「疣」的只屬傳染性皮膚病的一種﹐跟性接觸感染的性病無甚關係。
常見位置: 面、頸、手背、四肢...
扁平疣(Plane Warts)是其中一種最為常見的疣。這類過濾性病毒非常普遍﹐大量存在於四周環境中﹔當皮膚表面有傷口﹐加上免疫系統較弱或本身體質較差﹐便會受此微生病毒感染。

患有扁平疣帶來的影響﹕
  1. 一旦感染了﹐皮膚表面形成肉色或淺啡色、質地粗糙的小粒﹐邊界清晰。
  2. 一般扁平疣雖然對健康無大影響﹐但會具傳染性。
  3. 若不處理﹐扁平疣會蔓延至非常多的數量﹐影響個人儀容。
  4. 很大機會會傳染給有經常接觸的人士﹐若家中有免疫能力較弱的小孩或老人﹐最好還是進行治療去除。
  5. 治療後會有傷口或有機會形成炎症後色素沉澱﹐建議由專業醫生來處理比較安全。
治療﹕
  1. 二氧化碳激光
    波長10600nm﹐能精確把疣的組織除去﹐特別適用於面部位置的疣﹐只需1-2次治療便可。
  2. 刮除術光
    利用手術刀片把疣的組織逐層刮去。
  3. 冷凍治療光
    以低溫氮氣使其壞死﹐繼而脫落。適合治療手、腳及及面積較大的疣。
  4. 外塗藥物光
    利用極酸性(A酸或水楊酸)藥膏﹐慢慢把凸起的疣移平﹐治療次數較多﹐效果亦較慢。
-------------------------------------------------------------------------------------------------- 
得知做CO2 Laser打疣除了可以找皮膚科醫生做之外, 宜家有好多美容院都有得做, 所以就多口問問做美容院嘅朋友同姑仔, 最後比較過兩間美容院價錢之後, 我決定去姑仔間美容院做.

*純粹個人分享, 所以我無刻意去影美容院嘅設備*

由於我身上長出嘅疣實在太多, 最後分咗3次完成...

(28/11) 第一次主力打肚位, 因為肚位真係實在太多太多啦, 而聽朋友講打疣都幾痛, 所以當美容師問塗唔塗麻痺膏時, 我當然話要啦, 仲要話塗大量嗰隻, 哈哈!!  塗完大約15分鐘左右, 美容師就開始幫我進行療程啦, 一開始時我真係超緊張, 之後美容師就先打一兩粒俾我感受下痛楚程度, 而個人都認為接受到, 亦無想像中痛, 之後美容師就開始不停打不停打啦, 第一次打疣已經係11月尾時嘅事, 我已經唔記得用咗幾耐時間去完成,  不過就肯定唔少於45分鐘囉.  打完之後其實無乜大感覺, 不過之後結焦就開始感到痕癢, 但我非常忍得手, 無刻意去抓, 沖涼抹身亦只係印乾, 最後足足兩星期先甩晒焦.

(12/12) 第二次主力打胸, 頸位, 經過第一次經驗我覺得打疣唔算痛, 所以今次我無要求塗麻痺膏, 直接開始...  胸, 頸位嘅疣唔算多, 大約30分鐘左右就完成, 而可能因為範圍唔算大, 即使結焦後亦未見有痕癢感覺, 大約都係兩星期先甩晒焦, 跟第一次一樣...未有留低任何疤痕, 讚呀!!

(16/1) 第三次主要打之前全身未完全甩掉嘅疣, 因為有D疣長得比較大同深, 而且之前嘅範圍實在太廣啦, 走漏眼打少一兩粒亦屬正常.  今次只剩餘十數粒, 所以大約15分鐘左右就已經完成啦...

雖然我姑仔係喺呢間美容院做, 不過唔係由佢負責, 而負責幫我打疣嘅美容師手勢真係好好, 加上完全無Hard Sell, 所以我真心推介俾有需要嘅朋友...

今次打疣, 我就係揀咗呢間...I Love Beauty!!
如你有需要, 不妨試試話我介紹, 可能會同我一樣享有優惠價啊, 哈哈~





我們的Facebook專頁 - 小b與妹妹b之成長日誌

2016年1月18日 星期一

〈倆姊妹〉真‧好感情

雖然我自己都係有細佬妹之人, 不過我哋自小嘅感情都係好一般, 直至近幾年因為小B嘅出現, 我同我妹嘅關係先叫好少少, 至於同我細佬就一直都普普通通啦, 始終佢年紀細我太多, 不過慶幸嘅係佢一直都好聽我話囉!!

以前當我見到朋友們同自己兄弟姊妹嘅感情好到不得了時, 我真心覺得好羨慕, 所以我以前成日會幻想, 假如將來自己有囝囡, 希望佢哋都可以相親相愛, 如果能夠成為好朋友般就更加好喇...不過最終會係點真係無人知.

自從有小B之後, 我好快就已經想生多個伴陪小B, 直至妹妹出世, 我好開心見到小B表現得好愛錫妹妹, 雖然小B有時都會呷妹妹醋, 但只要爸爸媽媽做多少少, 小B應該係明白倆姊妹喺爸爸媽媽心目中地位係一樣, 無分高低嘅.  (希望倆姊妹都真係識咁諗同會咁諗啦 :p)

之前妹妹仲細, 即使小B好想同妹妹玩, 妹妹都未必會接受, 所以爭玩具, 打交, 嗌交時有發生, 但隨住妹妹開始大, 開始要同伴陪玩後, 倆姊妹嘅感情簡直係一日千里呀, 雖然偶然都仲會爭玩具, 打交, 嗌交等, 不過攬頭攬頸, 手拖住手嘅情況亦相對多咗, 暫時爸爸媽媽見到倆姊妹感情咁好真係好欣慰, 希望倆姊姊嘅感情可以一直好落去啦...  ^^
宜家倆姊妹有一半時間已經學會分享, 有好嘢食會分甘同味, 有好嘢玩又會一齊玩, 而且當兩個分開嘅時候, 大家亦會記掛住大家, 好好笑架~





我們的Facebook專頁 - 小b與妹妹b之成長日誌

Cool妹出戰N班最終回

多謝咁多位Blog媽之前嘅安慰留言呀!!

我家妹妹今年9月終於有書讀啦, Yeah...

(宜家媽媽嘅心情好亢奮呀)
我哋妹妹可以返全日班嚕, 呵呵~





我們的Facebook專頁 - 小b與妹妹b之成長日誌

2016年1月13日 星期三

妹妹B ~ 23個月

時日如飛...話都無咁快妹妹B已經23個月大啦, 還有一個月就兩歲了, 唔知媽媽幾時先可以甩難兼甩身呢(發夢中), 哈哈!!
妹妹雖然係痴媽媽多D, 但其實佢都係爸爸嘅2號情人黎架, 當家姐唔為意時, 爸爸就會攬住妹妹不停錫, 不過唔知係咪因為爸爸一早已經俾佢嘅1號情人霸佔咗嘅關係, 所以妹妹都算好識趣, 唔會同家姐爭爸爸, 相反如果家姐痴住媽媽時, 妹妹就會想盡辦法搶番媽媽, 好好笑呢.

有日我哋問妹妹問題...妹妹話爸爸係家姐嘅, 媽媽係妹妹嘅, 究竟點解會咁樣分呢?!
呢個月妹妹有少少進步, 我指嘅進步係變乖乖豬啊 (唔讚得, 千萬唔好小氣).  可能因為呢個月多假期, 加上不同日子又分別有爸爸, 媽媽同家姐全天候陪住, 所以妹妹今個月唔算太痴身, 只要唔痴身有人陪玩, 基本上妹妹都會較少扭計嘅.  唔通平時因為我哋分唔夠時間俾妹妹, 所以妹妹先會咁樣?!

另外食晚餐方面都有少少進步, 食得快咗, 只係前排食藥嘅兩星期無胃口唔太肯食, 其餘時間都真係有進步啊.

認知方面都好強, 近排當我幫家姐溫習學校英文書時, 妹妹都已經認讀到某D字啦, 厲害厲害~
如果每一個月都可以令我有讚無彈你話有幾好呢...
妹妹加油啊, 你要繼續變乖乖, 做個人見人愛嘅可人兒, 媽媽支持你~





我們的Facebook專頁 - 小b與妹妹b之成長日誌

2016年1月12日 星期二

♡親子活動●香港文化博物館♡

多間博物館於整個一月免費開放給市民參觀是眾所周知吧, 既然今日無節目, 我哋一於揀去近近地嘅香港文化博物館行下啦...

其實對於所有乜乜館, 物物館, 博物館等地方, 我同爸爸都真係一D都提唔起勁去, 不過只要一想到帶小B同妹妹去見識下應該算係一個幾好嘅親子活動後, 終於就踏出咗呢一步喇.  雖然場館今期所做嘅專題展覽我哋完全無興趣, 幸好都總算有個武.藝.人生 - 李小龍展覽俾爸爸睇下, 等爸爸唔好覺得自己完全中伏.

一入博物館正門不久, 我哋就見到有個兒童探知館, 小B同妹妹馬上就手拖住手跑入去, 嗰一刻我同爸爸都覺得好好笑, 大概呢個就係有手足作伴嘅好處.  ^^

雖然今日係星期日, 不過場館內唔算多人, 所以倆姊妹每樣都可以玩下...
爸爸教學中...
假裝置身在海底世界...
 與蟻后合照...
其實呢個兒童探知館, 我真心覺得幾益智....真係好適合小朋友.
玩完兒童探知館, 再上一樓及二樓展覽廳逛逛, 不過大家對於展覽廳內嘅展覽都無興趣, 好快行完一圈就走人, 反而三父女對放飛機就好有興趣啵, 哈哈~
下次一於帶倆姊妹去反轉科學館啦.  ^^





我們的Facebook專頁 - 小b與妹妹b之成長日誌

2016年1月11日 星期一

遲來的X'masParty

跟同事們一早說好的X'mas Party, 經一改再改期之下, 由原本嘅12月推延至1月初才終於成事, 雖然聖誕節都已經過了好一陣子, 不過Party大家都唔會嫌多嘅, 最重要係小朋友們有得玩, 大人們有得食, 大小朋友都可以開開心心咁過一日嘛...

難得改期後撞正爸爸放假, 今日我終於都可以輕輕鬆鬆啦, 至於爸爸就梗係要...陪玩啦!  :p
有過千呎嘅屋企真係好, 又可以踩單車, 又可以變小型足球場, 仲有個小小玩具閣, 倆姊妹今日真係玩得好開心好開心呢...
全日令佢兩個最愛不釋手嘅係Rody...
最後指定動作...影大合照~  
(影呢張大合照, 我哋影咗超過10張, 點解?!  因為小B同俊俊囉, 佢兩個一見影完後就馬上跑去相機面前按快門, 結果來來回回影咗十數張, 小朋友真係好可愛呢, 哈哈!!)  ^^

期待我們的下一個約會啊...





我們的Facebook專頁 - 小b與妹妹b之成長日誌

2016年1月6日 星期三

妹妹報N班後感

剛過去嘅11, 12月, 相信大部份家長小朋友都忙住去各大幼稚園Interview吧, 而我哋就因為只報了3間學校嘅關係, 所以不至於好忙, 但就因為媽媽太過大安旨意, 結果今年妹妹無N班讀囉...嗚嗚嗚嗚~

我同自己講, 我今年一定要為妹妹明年讀K班做好準備, 唔可以再咁大安旨意, 免得到時我又要刀仔拮大脾.

最初唔報咁多間學校嘅原因係因為我覺得妹妹明年K班已經有家姐嘅學校做Backup, 學校媽媽谷話有兄/姊在校讀有99%優先取錄, 所以今年N班只報了娘家附近較為好嘅3間學校, 一黎諗住明年已經有學校收, 二黎又諗住妹妹係2月B, 應該可以排到讀救世軍, 三黎今年唔係龍年應該會較大機會獲學校取錄, 四黎無理由N班已經要妹妹搭校車返學, 所以完全無諗過報遠少少嘅學校.

雖然最終妹妹係有Offer, 但半日班嘅Offer實在唔適合我哋, 所以幾經爭扎之後, 我連留位費都放棄無交, 一心就係等救世軍...  點知救世軍面試後, 再經過兩星期多嘅等待, 最終只得後補學位, 當我知道一刻確實係晴天霹靂 (雖然已有心理準備), 原因係排我之後兩個no.嘅朋友仔竟然入到, 但我哋反而只得後補, 當然我明白論按需要學位程度, 我朋友係絕對有緊急嘅需要, 因為佢哋係在職父母, 無姐姐亦無長輩幫忙照顧小朋友, 每日返工前仲要帶小朋友過海去保良局嘅托兒所, 所以學校選擇收佢先我真係無嘢好講...  至於排後補位方面, 我實在係唔太大信心, 雖然朋友都已經決定放棄學位, 但以先後次序計, 我前面仲有4位, 另外我問過學校亦講明除咗按輪候號碼之外, 校長又會加入其他因素而決定最終嘅先後次序, 以我哋呢D只讀一年嘅學生一定唔會有優勢, 而最終有無N班讀就唯有繼續等通知...     

其實以妹妹班212朋友仔嘅成功獲取錄比例黎睇, 今年算係較為容易有書讀嘅一年 (相對家姐當年龍年效應情況下), 但就衰在媽媽太懶懶閒, 太過老定, 結果攪到今年都唔知點安排妹妹好喇.  其實當收晒3間學校嘅通知後, 我心情真係有一陣子低落過架, 突然仲諗起不如幫妹妹報讀家姐讀緊嗰間學校嘅N班, 但諗深一層, 呢間學校N班只得下午班, 家姐就返上午班, 如果真係一個返上午一個返下午, 豈不是玩死自己又玩死婆婆.

而經過一個聖誕新年假期後, 我終於都睇開咗啦, 宜家仲疊埋心水俾妹妹開心多一年添, 一於有後補就上無後補就玩啦, 哈哈!!  

今次我得到嘅教訓係凡事都唔可以太過大安旨意, 做人做事都一定要有兩手準備, 機會係只留俾有做準備嘅人, 而機會亦唔會無啦啦咁跌落黎送俾你, 好彩...我今次損失嘅只係一個N班學位, 但我同自己講, 我一定會為以後每一件事做好準備, 唔會再等到事後先黎後悔.

共勉之~





我們的Facebook專頁 - 小b與妹妹b之成長日誌

2016年1月4日 星期一

小B四歲生日Home Party

嘩..嘩..嘩..小B生日Home Party又黎啦, 今年契媽同姐姐們都話要同小B慶祝正日生日, 仲話之後每年嘅正日都要留俾佢哋咁話添啵, 其實有媽媽嘅呢一班朋友咁鍚小B, 小B已經好幸福好開心!!

今日雖然係生日Party, 媽媽原先亦有好多攪作想整, 但因時間關係, 加上最重要係我太懶惰, 結果最終都係求求其其整下嘢食, 大家一齊聚下, 有傾有講咁就過咗一個晚上喇.

雖則係簡簡單單嘅聚會, 不過小B知道大家都係為咗同佢慶祝4歲生日而黎已經好興奮好期待, 最重要係有人陪玩丫嘛...
要能夠好似哥哥咁得戚, 成功抱住我兩個囡係需要付出好多感情同時間架, 哈哈~
今晚原本有諗過叫外賣, 但姐姐們話想自家煮, 所以辛苦晒有份出力嘅姐姐啦, 當然仲有爸爸啦.

~是晚餐單~
1. 鹵水雞翼
2. 豬骨湯麵
3. 翠玉瓜炒雜菇
4. 煙肉車厘茄卷
5. 金菇+蘆筍牛肉卷
6. 自家製壽司

簡單又好味, 鐘意大家愛自家煮嘅心思.
全晚最期待嘅一刻...切蛋糕時間.
當然唔少得嘅影相環節啦~
小B話今日真係太開心啦...多謝大家黎陪我玩陪我食啊~
最後就係要多謝契爺契媽嘅大利是, 仲有哥哥姐姐們嘅生日禮物喇, 今年小B生日真係大豐收呢, 哈哈!





我們的Facebook專頁 - 小b與妹妹b之成長日誌