2014年9月30日 星期二

小小心意就是最大支持

又要返工又要湊囡辛苦換來老公送我的回報, 多謝...老公!!  *3*
我們繼續一起為這個家努力吧...

相信再過幾年, 當兩個女開始長大以後, 舒服的日子就會回到我們身邊. XD

加油加油!!





最近媽媽幫倆姊妹開了一個Facebook Page Anke & Karena - 小b與妹妹b 有興趣的話就入黎Like一Like支持下啦!!  ^^

2014年9月25日 星期四

戒片大作戰 - Update (2)

自6月開始幫小B戒片以來, 除了頭一, 兩星期經常瀨濕之外, 小B平時都算是少有會失手的, 所以在戒片大作戰的過程中並非十分困難, 反而最困難的是戒去街片...

其實要戒去街片應該都唔難, 最難都係因為我們大人過不了自己的心理關口吧!!
一...怕小B想去洗手間時找不上洗手間
二...怕小B太急而在街上瀨濕
三...怕洗手間太污糟而令小B去不了

總之就因為多種因素而引致我們遲遲未敢幫小B戒去街片啦, 始終女孩子都是比較麻煩的嘛.
(相反如果地點近而時間短的話, 我們就會唔幫小B著片片, 但其實小B之前都有試過兩, 三次瀨濕架, 失禮失禮!!)

雖然出街時我們還有幫小B著片片, 但小B自懂得示意去洗手間後, 好多時都可以忍得到去洗手間才解決, 就算真的找不上洗手間, 我們叫她先痾在片片上, 小B忍到的話都盡量會忍.  或許...我們都真的該是時候要幫小B戒著去街片了, 皆因小B看似已經準備好.

另外由Day 1返學開始, 小B就已經無著片片返學啦, 校長話要方便學校幫小B戒片, 就最好不要著片片返學嘛, 所以我們儘管一試.  然而小B都確實算是叻女, 返學至今已經3星期有多, 暫時都只不過是瀨濕過3次而已, 而這3次更是因為午睡完後排隊去洗手間時忍不住才瀨濕呢, 說真的...媽媽我真心覺得小B已經算好叻啦, 始終學校人多, 要排隊等去洗手間確實需時, 所以瀨濕都絕對情有可原.

現在小B連午睡片都已經無再用, 希望夜晚訓覺片都可以快快戒掉啦.





最近媽媽幫倆姊妹開了一個Facebook Page Anke & Karena - 小b與妹妹b 有興趣的話就入黎Like一Like支持下啦!!  ^^

2014年9月24日 星期三

百厭星出沒注意

自小B這個百厭星開始定性之後, 大家都已經唔洗再看牛牛好一段日子, 當大家都以為可以有好一陣安樂日子時, 原來另一隻百厭星已經靜悄悄地出沒啦...

亞父部電腦又再一次糟央, 難怪亞父見小B把電腦弄壞後遲遲唔換機啦!!
哎呀, 被發現添!!  其實你唔講我唔講, 亞父應該係唔會知我玩電腦嘅, 係咪?!
原來媽媽無開電掣啵, 唔怪之得我開極都開唔到電腦啦...
既然電腦開唔成, 還是去找別的東西再玩就好了.

嘩...咁多奶粉, 等我將佢地排排坐先.
既然家姐鐘意彈結他, 等我都學定打鼓先...
太好啦...原來奶粉仲有存貨呀, 咁我就可以繼續半夜起身喊食夜奶啦, 自從上星期開始, 我晚晚半夜都肚餓到要媽媽開多6安奶做宵夜先可以再訓呀, 陰公!!
唔好講笑, 我又開始肚餓, 等我試下偷飲豆奶先.
我終於都知道點解爸爸要努力賺$啦, 原來我嘅食量變得越黎越驚人, 真係辛苦晒爸爸啦.

飲飽食醉過後, 可唔可以開門放我入廚房玩呀?!
各單位注意...自第二隻百厭星出沒後, 大家又再一次要好好注意家居安全嚕.





最近媽媽幫倆姊妹開了一個Facebook Page Anke & Karena - 小b與妹妹b 有興趣的話就入黎Like一Like支持下啦!!  ^^

2014年9月23日 星期二

契媽Big Day

21.09.2014

等了又等, 等了又等, 終於都等到契媽大日子來臨啦, 恭喜恭喜!!

雖然今日只是簡簡單單的15分鐘註冊儀式, 但我真的好高興好高興好高興呀, 沒辦法啦...誰叫小B契媽是我最最最要好的朋友啵, 哈哈.

只可惜因為爸爸要返工, 所以我未能應契媽要求帶同妹妹B一齊到賀, 始終單拖時...還是帶著家姐比較容易和方便嘛.

主角未出場, 小B先出場, 不過有人未熱身, 所以影相唔肯笑.
有請一對新人出場...
當大家好專心望著兩位主角簽紙一刻, Jade姐姐竟然不停幫小B影相, 難道Jade姐姐以為小B才是主角嘛, 哈哈!!
識於微時的幾位要好中學同學 ...
期待著明年中秋節, 大顆兒跟你一起在婚宴上渡過, 更加期待著到時可做你一日的妹仔 (當年我結婚, 你出盡最大力去服侍我, 今次終於輪到換我來幫你嚕.), 哈哈!!





最近媽媽幫倆姊妹開了一個Facebook Page Anke & Karena - 小b與妹妹b 有興趣的話就入黎Like一Like支持下啦!!  ^^

2014年9月22日 星期一

獎勵計劃之睇飛機

自中秋節過後, 小B連續幾天都唔願出門返學, 而且回到學校一刻又習慣性地要喊幾分鐘, 雖然知道這是分離焦慮症的表現, 但已經足以令媽媽我好困擾, 有見及此...我便嘗試提出獎勵計劃這一招, 想不到...這招一出, 小B返學前終於唔太扭擰, 而且回到學校分離一刻亦已經可以唔再喊啦, 厲害厲害!!

既然媽媽一早就應承了小B, 如果返學表現有進步就帶小B去機場睇飛機, 結果小B又可以連續3天都做得到, 所以星期六就由姨姨和哥哥負責來帶小B去機場睇飛機喇, 媽媽則留守家中湊妹妹...  ~.~

有得睇飛機, 小B全日都表現得異常興奮.
見到你可愛燦爛嘅笑容, 真的深深被溶化了, 難怪姨姨同哥哥都鍾意帶著你周圍去啦!!

看來要對付這小鬼都不算太難攪, 但就一定要花心思氹囉...





最近媽媽幫倆姊妹開了一個Facebook Page Anke & Karena - 小b與妹妹b 有興趣的話就入黎Like一Like支持下啦!!  ^^

2014年9月19日 星期五

頂得住

自老公轉工後, 由於新工比較忙, 所以變得沒時間陪我和幫手湊兩個女, 不過我好體諒架, 因為老公都只係想為個家, 才寧願轉做一份辛苦工嘛, 說到底...人工多一半啵, 換轉我有這個機會同樣會選擇去試試.  雖然老公出外工作辛苦, 但我都唔見得好好, 每天準時下班後就要極速回家湊兩個囡, 雖然係好辛苦, 不過我都唔想同老公呻太多, 皆因我知老公比我還要辛苦.

算...我唔係想呻, 亦唔係要埋怨, 只係想藉此幫自己同幫老公打打氣~

見到倆姊妹開心笑, 心情即刻好得多了!!
加油加油加油....





最近媽媽幫倆姊妹開了一個Facebook Page Anke & Karena - 小b與妹妹b 有興趣的話就入黎Like一Like支持下啦!!  ^^

2014年9月18日 星期四

開始報K1

踏入9月之後, 家長們又要開始忙著報K1啦.

雖然最終未知明年會否幫小B轉校, 但今年我還是要繼續參與這個令人煩擾的遊戲...所以唔洗再煩報K1的媽媽們, 我真心想恭喜你地.

其實由小B上星期正式返全日班開始, 爸爸, 婆婆和姨姨分別都有提及過唔捨得小B讀全日班, 原因是要一個2歲多的小朋友返那麼長時間好像太辛苦了吧.  雖然間中我都覺得要小B讀全日班是有點殘忍, 但沒辦法呀...誰叫我家無工人, 又沒可能叫婆婆長時間一湊二, 為了想減輕婆婆負擔, 就唯有要小B讀全日班喇. 

但既然今次婆婆主動開聲叫轉半日, 所以今年一於主打報半日班K1, 所有全日班通通唔再考慮, 免得到時又心大心細.

暫時9月可以報的就只有這幾間, 10月還有一大堆報名表等著我呀, 唉~
另外去年報了圓方商場某間幼稚園N班, 雖然最終面試後未有取錄小B, 但今早竟然再一次收到該校寄來的面見通知書, 通知我們11月去進行K1面試呀, 但明明我今年無再報名啵, 不過...可惜這間是全日班呢, 所以我沒打算帶小B去面試了, 這些機會就留給其他小朋友吧. 
今年跟我一樣繼續要報學校的媽媽們, 大家一齊加油加油加油!!!!!!





最近媽媽幫倆姊妹開了一個Facebook Page Anke & Karena - 小b與妹妹b 有興趣的話就入黎Like一Like支持下啦!!  ^^

2014年9月16日 星期二

朋友仔生日會

14.09.2014

朋友仔Cayden四歲生日, 我們這一家有幸被邀請出席, 今日除了壽星仔開心之外, 我家小B同樣開心, 因為派對地點正正是小B至愛嘅冒險樂園嘛, 結果倆姊妹又可以玩餐飽嚕, 哈哈!!

我們準時4點到達派對場地, 跟主人家打過招呼送上禮物後, 小B就馬上拉住爸爸向波波池進發喇.  眼見大B有大B自己玩, 細B有細B自己玩, 家長們就要一人照顧住一個, 結果變得沒時間聚在一起談談天說說地.

算...反正去得冒險樂園都預了沒有時間跟朋友們交流, 因為這根本就是小朋友的世界嘛.  
難得唱生日歌和切蛋糕一刻, 大夥兒終於聚在一起!!  :p
但當儀式完畢後, 各位小朋友好快又再一次東奔西跑的散開了.

雖然去冒險樂園開生日派對, 小朋友們會比較開心, 但媽媽我卻認為這樣好像沒有了開生日會的意義, 因為大家都變得各自各玩, 但總結今天還是開心的.

姨姨祝Cayden生日快樂...身體健康~





最近媽媽幫倆姊妹開了一個Facebook Page Anke & Karena - 小b與妹妹b 有興趣的話就入黎Like一Like支持下啦!!  ^^

2014年9月15日 星期一

小B返學初體驗 (Day 5 - Day 8)

話咁快又到適應週的第二個星期啦, 上星期小B返學表現尚算不錯, 完全無喊, 而且表現出來返學是開心的.

但經過了幾天假期之後, 好明顯今個星期的表現大大退步了!!

Day 5 (08.09.2014) - 返09:30放12:30
繼續是可有家長陪同的適應週, 今日由爸爸湊返學放學, 不過經過週末玩得太開心, 結果朝早叫小B起身返學時, 有人表現超唔合作, 猛話自己未訓醒唔返學, 到起身後又唔肯食早餐, 最後只好食奶奶頂肚算了.

一早已經諸事不順+有點生病, 幸好最終還是開開心心的上學去.

第一次在學校食午餐, 老師話小B好叻呀, 只食剩兩口, 但就唔肯飲水囉.
Day 6 (10.09.2014) - 返09:30放12:30
今日輪到姨姨, 婆婆, 妹妹一起湊小B返學, 如星期一時一樣, 繼續唔願起身, 看來...從今天起開始, 早上要全家一起打仗才行啦.

去到學校, 由於未見有老師在門外接收小B, 所以姨姨要親自帶小B入課室, 結果入到課室就唔准姨姨走喇, 姨姨嘗試走到課室門外等, 但小B竟然喊囉, 不過老師話從明天起, 家長們就不得再陪上堂嚕, 所以還是尤她喊一陣好了.  幸好...老師好快就走出來同姨姨講小B已經OK, 姨姨可於放學時間才再回來接她.

唉...放完假開始, 有人返學變得好麻煩, 點算好呀?!

雖然今日喊了幾分鐘, 但放學時因為老師有讚小B, 所以姨姨都有獎勵小B扭蛋架.
老師話小B午餐時只食好少...我猜應該是飯餸不合胃口.

由於姨姨有跟老師提及過, 只要是由我們陪入課室的話, 小B一定不會肯讓我們離開, 結果老師就話既然如此那麼明天起開始返9點, 因為9點左右門外才會有老師接收學生 (其實正常返學時間為8:45, 只是N班學生暫時仍安排返9:30), 加上經過半天上堂後, 老師話小B表現如之前一樣算是不錯, 所以明天開始可以試番全日班啦.

Day 7 (11.09.2014) - 返09:00放16:30
依舊唔願起身食早餐, 繼續以奶奶來頂肚, 或許之後每天都應該會是這樣, 皆因小B根本就晚晚都唔願訓, 唉~

心情算是好的, 還打扮得潮潮的上學去...哈哈.
姨姨帶返學, 回到學校一刻, 老師好快手地抱走小B入課室, 只見小B眼紅紅, 但無喊出聲, 情況算是比昨天好.

中午時, 老師打來跟媽媽講小B今天的情況, 老師話小B午餐時只肯自己食幾啖, 然後就要老師餵, 由於現階段才是剛開始, 所以老師們都好樂意餵飯, 不過好快就會要求他們自己食飯嚕, 然後到午睡時...可能是頭一天的關係, 所以小B一點都不習慣, 結果當然訓唔著啦, 至於其他方面則大致上沒問題.

第一日返全日, 姨姨, 婆婆, 妹妹齊齊出動接小B, 小B一見妹妹即刻攬實話好掛住妹妹呀, 哈哈!!
Day 8 (12.09.2014) - 返09:00放16:30
今日係爸爸轉工前最後一次帶小B返學, 之後爸爸應該好少機會可以湊返學放學了.

出門後...小B一直要求爸爸抱住, 爸爸已經心知不妙, 直到返到學校門口, 小B繼續話唔返學, 見老師抱走入課室一刻, 更終於忍唔住喊出來...  不過入課室才不到5分鐘, 爸爸在門口偷望時已見小B收聲啦, 我想小B應該是患上分離恐懼症吧, 大概是沒有安全感才會令小B分開一刻唔開心而已!!

小B呀小B, 你明明日日都話返學好開心, 好鐘意返學, 但點解朝朝唔願起身, 又話唔返學, 返到學校還要做喊包呢, 唉~

其實小B每天情況都差不多, 只是分開一刻有一點問題, 其他...大致上還算不錯, 至於午睡於第二天時都已經OK了.

放學前, 爸爸早了到學校, 見到小B好開心跟同學們一起跳舞, 看來小B的校園生活還算過得愉快, 而放學後小B亦有跟爸爸提及返學好開心.

---------------------------------------------------------------------------------------------------------------

兩星期可有家長陪同的適應週就這樣結束, 希望小B真的可以快快適應, 分開一刻唔好再喊就好了.

加油加油...爸爸媽媽妹妹都支持你架!!





最近媽媽幫倆姊妹開了一個Facebook Page Anke & Karena - 小b與妹妹b 有興趣的話就入黎Like一Like支持下啦!!  ^^

2014年9月12日 星期五

妹妹B ~ 7個月

妹妹B已經7個月大, 媽媽真心覺得你大得好快, 而你跟家姐相比之下亦是較愛痴媽媽的, 所以媽媽好唔捨得你大得咁快呀, 希望你之後一直繼續愛痴媽媽啦!!!!!!  XD
體重: 16磅

食:
奶 ~ 3-4餐 (每餐6安, 多數要分兩次食, 食到最後50ml時會自動撥開奶樽抖抖)
固 ~ 1-2餐 (午餐因婆婆無時間煮, 所以多數食奶或糊仔, 晚餐食粥)

食物方面已試過好多款, 無特別記低, 暫時未見有出現食物過敏情況, 希望唔好中招!!

暫時算是個超愛吃的寶寶, 每次見我地食時又要問攞食, 唔俾食就出絕招 ~ 喊, 所以婆婆經常性投降, 基本上妹妹B已經試食過好多1歲以下的遺禁食物啦.

訓: 自家姐開學後, 妹妹都一樣跟著早起, 大約8時多起床, 午睡情況繼續係差, 一日兩次小睡, 短則15-20分鐘, 長則2小時左右, 有時甚至可以全日只小睡一次, 晚上大約11:00訓, 多數可自行入睡.

活動能力:
- 由訓變坐, 由坐變企
- 向前向後向左向右周屋爬
- 開始嘗試扶著物件開步行, 暫時最多會試行一步 (這樣實在是太快了吧, 暈 @@)

有圖有真相...百厭到不得了.
性格:
比較慢熱而且勁愛人抱, 算是痴身膏藥一名, 暫時最愛痴婆婆和痴媽媽.
之前唔太跟爸爸, 最近都開始愛上爸爸啦.

唉...大部份親戚都話妹妹B比起小B更加百厭, 而自問我地一家都好有同感, 所以如果當過一排見我無再Update Blog時, 應該都係因為俾兩姊姊激死了!!

好, 記錄完畢...8個月時再Update~  ^^





最近媽媽幫倆姊妹開了一個Facebook Page Anke & Karena - 小b與妹妹b 有興趣的話就入黎Like一Like支持下啦!!  ^^

2014年9月11日 星期四

唔好走..唔好走

前陣子突然有人話小B好似日本娃娃, 雖然媽媽我完全唔覺, 但有人講我就即管聽啦!!

左睇右睇, 前睇後睇, 完全唔覺似日本娃娃...唯一似的就是愛吃日本菜吧.

一去食壽司...開心到見牙唔見眼.
早幾個月前我們帶過小B去食元氣, 結果小B竟然火速地愛上, 現在每次行經元氣, 什至見到其Logo都會叫我們去食壽司.

但於小B認知裡, 根本唔會知這間壽司店就係叫元氣, 最後經小B介紹之下...原來這間壽司店係叫"唔好走..唔好走"呀, 究竟點解會叫"唔好走..唔好走"呢?!  其實係因為小B每次在迴轉帶上拎壽司時, 小B都覺得迴轉帶行得太快, 所以一邊拎壽司一邊就會緊張得大叫"唔好走..唔好走", 自此之後...小B就將元氣稱之為"唔好走..唔好走"喇!!

就係因為小B瘋狂地愛上"唔好走..唔好走"的關係, 結果小B成功令爸爸將元氣成為我們家的常到飯堂之一啦...  不過每次去食元氣, 小B都一定要求坐迴轉Order檯, 所以好多時就要等耐一點才有位, 雖然爸爸最討厭的就是等位, 但難得佢寶貝女鐘意, 爸爸又可以點啵, 所以話小B幾時都係食硬爸爸架, 哈哈.

(陳生你都有今日啦, 平時我叫你陪我等位食好野你就唔肯, 宜家食元氣你都有排等呀)

虎視眈眈的望著壽司轉轉轉...其實是在等爸爸媽媽叫幫手拎壽司.
這件三文魚手卷, 明明媽媽是點給自己食, 但可惡嘅小B竟然同媽媽爭食呀!!  >.<
(真沒想到年紀少少就竟然已經愛上食魚生, 果然深得媽媽真傳, 莫非因為我陀住小B時都有食過好幾次魚生的關係, 所以小B認得這種味道, 哈哈.)

不過魚生始終唔岩小朋友食, 所以每次都會限制住小B, 最多一件起兩件止...

希望等妹妹再大少少, 可以一家四口去日本食食食啦, 一於等我計劃下先!!  XD 





最近媽媽幫倆姊妹開了一個Facebook Page Anke & Karena - 小b與妹妹b 有興趣的話就入黎Like一Like支持下啦!!  ^^

2014年9月10日 星期三

小B大師作品

最近我家小B大師於學校做了一件小手作, 雖然應該都是由老師代勞居多, 但我好肯定中間那幅水彩畫是出自小B手筆的, 因為這是Day 3返學時, 媽媽親眼望住小B畫的嘛, 唔怪之得...當天老師會輪流叫小朋友們畫畫啦, 原來是另有目的.
不過向來沒創意的我又真沒想到, 原來這樣都可以做成燈籠啵...

從今日起, 相信我家小B大師的作品, 將會全都列入收藏品之列, 哈哈~





最近媽媽幫倆姊妹開了一個Facebook Page Anke & Karena - 小b與妹妹b 有興趣的話就入黎Like一Like支持下啦!!  ^^

不想多提的中秋節

今年是我們這一家第一次一家四口過中秋, 可惜中秋節當日四口中竟然病了兩口, 所以對於我們一家來說一點都不快樂.  原本媽媽已經想好晚飯後帶兩隻小魔怪到維園中秋花燈會拍拍照玩玩燈籠, 只可惜卻因為病而被迫要取消, 最後留在家中隨意吃過便飯, 就齊齊搵周公子一起在夢中賞月喇!!

病了的兩口, 正是小B和媽媽本人, 唉~
今早我倆如常起身返工返學, 其實早上起床時已察覺小B有少許異樣, 加上半夜時小B又猛話鼻塞, 但見小B無發燒又無咳, 只是扭計後才有少少鼻水, 所以就繼續讓她返學, 打算放學後才去睇醫生, 誰不知爸爸接放學時已經見到小B鼻水長流啦......晚上更燒至38.6度呢.

(其實從返學第一天開始, 小B同班同學中已經有兩位小朋友流鼻水, 所以我估計今次小B可能都是因為他們而染病的.  算...反正返學就是要學病嘛, 從好的方面去想, 就當是吸取多一點抗體吧.)

至於媽媽我呢, 半夜時肚子突然開始陰陰痛, 一痛就痛了一整天, 估計應該是早一晚出街做節時酒樓食物不潔所致, 因為姨姨都話晚飯過後第二天肚子就開始有點不適喇, 另外再加上睡得不好, 頭痛得像被人打了一拳似的, 回公司不久更開始發冷呢, 幸好今日收早, 快快回家一探, 嘩...原來已經發燒了, 最後唯有跟小B一起去睇醫生嚕, 所以今年的中秋無得去玩又無得慶祝, 我真的一點都不想提起.

但我都好想跟大家說聲 - 中秋節快樂啊!!




 
最近媽媽幫倆姊妹開了一個Facebook Page Anke & Karena - 小b與妹妹b 有興趣的話就入黎Like一Like支持下啦!!  ^^

2014年9月8日 星期一

小B與妹妹B之演唱會體驗

話說小B自一歲多開始就已經超愛在家中睇演唱會DVD載歌載舞, 所以爸爸經常話好想帶小B去睇演唱會, 讓其感受一下現場氣氛和試試反應, 只可惜...現今的演唱會門劵實在太貴啦, 即使坐到上山頂還是要$300一張, 所以為免浪費門劵和金錢, 我們就只好先找些免費的來試試吧.

今次姨姨公司有免費門劵睇慈善演唱會, 既然一家大細沒事幹, 那就不如Go Go Go啦...
話明係個慈善演唱會, 嘉賓方面就不要抱有太大期望啦, 雖然大部份嘉賓都不認識, 但總算有許志安, C All Star, 陳慧敏等人吧.
襯未開場先影張相作留念, 以証明小B年紀輕輕就已經跟我們去過聽演唱會.
原本以為帶妹妹B去聽演唱會會是個大挑戰, 因為BB始終比較細膽嘛, 突然要她身處在黑暗又勁嘈的環境下, 真的好怕妹妹B會因不適應而大哭, 幸好入場前15分鐘左右, 妹妹B已經乖乖睡著了, 直至開場後我都一直用雙手+外套掩住妹妹B耳仔, 總算...順利過關吧!!  最後開場約半小時左右妹妹B終於都被樂手嘅鼓聲吵醒啦, 出奇的是妹妹B竟然全程無喊過, 而且還手舞足蹈笑笑口呢, 相反家姐開場時雖表現雀躍會拍拍手和搖搖頭, 但好快有人就坐唔定話要走了.

好...出外面逛逛, 順道開枝奶奶俾妹妹B再試試入場睇Show.
由於是晚表演無勁歌熱舞, 所以小B一直顯得悶悶不樂, 最後坐到大約十時左右更要求回家去.
算...既然小B想回家就早點回家, 反正從灣仔回沙田都需要點時間, 加上爸爸媽媽都真心覺得今晚這個演唱會超悶.  至於婆婆, 亞父, 姨姨, 哥哥等人則繼續坐至完場.

回家後準備安排小B睡覺一刻, 姨姨Whatsapp過來話許志安終於出場...  
事後問番姨姨, 姨姨話我們提早離場的決定非常正確, 皆因連姨姨, 婆婆等人都覺得是晚演唱會悶極呀.

經過今次之後, 相信距離小B可以買票入場睇演唱會的距離還有十萬九千仗遠, 那麼12月的Sammi演唱會, 爸爸媽媽就只好二人世界拍拖去嚕, 哈哈!!





最近媽媽幫倆姊妹開了一個Facebook Page Anke & Karena - 小b與妹妹b 有興趣的話就入黎Like一Like支持下啦!!  ^^

小B返學初體驗 (Day 1 - Day 4)

等了又等...等了又等...終於都等到小B開學嘅日子啦!!

其實學校安排得幾好, 知道小朋友初次返學, 一定需要時間慢慢適應, 所以安排了兩星期可有家長陪同嘅適應週, 當然如果小朋友好快就已經適應, 可以獨自跟老師同學們一起上課的話, 那家長們就可以先行離開啦, 繼而學校還會按個別小朋友的進展而開始加時上堂, 究竟小B幾時才可以正式上全日班呢, 暫時還是未知知數, 要等學校通知啊. 

Day 1 (02.09.2014) - 返10:45 放12:15
人生第一次返學, 爸爸媽媽當然要一齊陪小B返學啦, 初次返學小B心情好像有點緊張啵.
回到學校, 可能知有爸爸媽媽陪, 所以表現還算不錯, 一放低書包就馬上跟老師指示於小禮堂坐下來跟K1哥哥姐姐圍圈圈上唱遊課, 雖然慢熱嘅小B唔太主動, 但都唔抗拒老師點名叫小B出來玩.
 初次玩大帆布嘅小B, 笑容終於跑出來啦...哈哈!!
上了一會兒唱遊課, K1生要回到課室去, 老師就安排了N班學生分兩組踩單車或玩體能遊戲.
今日整體感覺其實跟返playgroup好相似, 學校用玩遊戲來吸引住小朋友, 其實都算幾成功架, 起碼小B話佢今日返學好開心, 聽日都要繼續返學嘛.  XD
老師評價: 比較慢熱, 愛跟著爸爸媽媽, 距離可以自己上課還需要點時間.

Day 2 (03.09.2014) - 返10:45 放12:15
爸爸安排了工作後, 今日又可以跟媽媽一起帶小B返學, 今日第二日, 心情明顯比昨天好, 加上有至愛嘅爸爸陪, 心情果然相當OK.
回校後首先繼續於小禮堂跟K1哥哥姐姐一起圍大圈圈上唱遊課, 而爸爸和我就襯機坐遠一點, 雖然小B見我地坐到遠一遠, 但都無扭住要過黎, 反而好專心跟著唱歌跳舞玩遊戲, 最後老師叫家長們一起參與, 我才走回到小B身邊.
玩了一會兒, 又要分班回課室啦, 當小B專心玩玩具時, 爸爸媽媽偷偷走了出課室, 站在門外偷望小B, 結果給發現後小B竟然跟我們揮揮手就繼續玩, 最後老師走出來話小B未見有要搵爸爸媽媽情況, 所以就尤得她自己在課室內直至放學喇.

老師評價: 今日有好大進步, 由於開始跟老師混熟, 所以可以自己跟住老師玩, 叻叻!!

Day 3 (04.09.2014) - 返09:30 放11:30
今日繼續由媽媽帶返學, 而姨姨都有跟在一起架, 因為遲些主要會由姨姨負責帶返學嘛, 所以循例都要讓老師認識一下姨姨.

快快手幫小B換好鞋, 想將小B交給老師後, 媽媽回家鬆一鬆.
原本見昨天小B可以自己跟老師和同學玩, 以為今日媽媽我都可以好快離開啦, 點知...小B竟然唔放媽媽走呀, 要媽媽坐係課室睇佢玩, 反而有2, 3位小朋友都已經成功可以唔洗爸爸媽媽陪入課室.

今日首45分鐘, 小朋友於課室自由活動可玩玩具或畫水彩畫, 之後再到小禮堂跟K3哥哥姐姐集體活動, 唱唱歌跳跳舞, 玩些訓練大小肌肉遊戲, 到最後半小時就回到課室聽老師講故事, 好快就到放學時間了.

雖然小B全程要我坐在課室內, 但當老師一叫小朋友圍在一起活動後, 小B都無再理我....直至放學時還竟然問我點解咁快放學呢, 哈哈.

如老師所言, 小B又愛玩, 但又慢熱, 所以還是需要多一點時間讓她適應啊.

Day 4 (05.09.2014) - 返09:30 放11:30
今日媽媽要返工, 由爸爸陪小B返學, 由於回校途中, 爸爸不停同小B講, 如果唔想咁快放學, 想玩耐一點, 換好白鞋後就要自己跟老師入課室, 爸爸就在門外等, 給果...長期處於想玩+極度鐘意玩嘅小B, 竟然換好鞋之後出奇地肯放爸爸走, 自己乖乖拖住老師手入學校呀, 真的要大大力以掌聲鼓勵鼓勵, 哈哈!!

相反爸爸就唔太放心, 驚小B中途要出來搵爸爸, 結果爸爸快快去附近食個早餐就返學校等接放學喇, 至於小B有得玩就當然唔會理爸爸啦, 所以今日小B係成功可以自己返學架, 而學校亦已通知下星期一將會加多一小時給小B, 順道讓小B試試在學校食午飯.

(爸爸話有幾個小朋友仍未可以加時, 希望小B加時上課後繼續有進步.)
放學時爸爸話小B拖住老師好開心地跑出門口, 看來小B真的好喜歡返學, 好喜歡這間學校, 好喜歡過校園生活啵!!  ^^

老師評價: 只肯跟死一位老師, 當另一位老師嘗試埋小B身時, 小B唔肯同另一位老師玩, 一句到尾...慢熱型, 要從新跟另一位老師建立感情後才OK.  另外, 今日安排了月餅給他們吃, 有得食時就表現得唔怕醜, 是個貪食小朋友, 哈哈!!

突然覺得自己安排小B返N班的決定相當正確, 起碼一連4天都見她表現相當興奮, 夜晚10時左右還會主動要求食奶訓覺, 早上起床知道要返學又唔會扭擰, 暫時仲自覺戒了早奶添, Good~~~





最近媽媽幫倆姊妹開了一個Facebook Page Anke & Karena - 小b與妹妹b 有興趣的話就入黎Like一Like支持下啦!!  ^^