証件相

又到咗報學校嘅月份啦...雖然妹妹明年一定唔會無書讀, 但我都想試下報其他學校, 所以媽媽又要開始做功課了.

不過做功課交報名表前, 首先當然係要帶妹妹去影番張靚嘅証件相啦...

原本懶懶閒嘅我真係打算到交表前一刻先求求其其帶妹妹到娘家樓下影相, 但我真心覺得每次都影得唔靚, 所以見某個星期六有時間, 就帶妹妹去快圖美影相喇, 起碼快圖美唔會影得太過醜樣嘛, 認唔認同先?!

大家都知道妹妹性格冷酷內向, 而且亦非常痴身, 所以去影相前我不停同妹妹洗腦, 影相時要自己坐唔洗喊笑住影相就可以, 然後去到影相時, 妹妹真係記得要笑, 但就好想媽媽抱住佢影, 所以影影下都忍唔住喊, 仲要係笑住咁喊, 真係笑死我同影相個姐姐.

影咗4, 5張相, 妹妹都係笑住喊樣, 完全無可能揀得落手, 最後我帶妹妹去超市行一圈, 買定糖糖氹妹妹, 之後再返去影相就好好多喇. 

起碼無喊之餘仲識得笑...為咗怕妹妹突然又神經病發作, 所以影咗兩三張我就已經收貨.

雖然唔及去影樓影靚, 但影得妹妹開開心心, 我覺得已經超值, 哈哈~ 

我們的Facebook專頁 - 小b與妹妹b之成長日誌

妹妹上學去 (Day 7 - Day 10)

12.09.2016 (Day 7)

放咗5日假再返學, 我哋知道妹妹應該一定會喊, 結果....正如我哋所料喊咗一陣.

今日輪到家姐放病假, 所以婆婆同家姐一齊帶妹妹返學, 唔知家姐係咪太鐘意呢間學校呢, 家姐竟然送妹妹入課室後想留低陪妹妹一齊上堂囉, 最終婆婆要叫老師帶家姐走.  家姐一走, 妹妹就即刻喊, 不過呢個時候唔可以理咁多, 所以婆婆好快手就帶住家姐離開學校喇. 

原來有部份同學仔已經開始試返全日啦, 有部份就食埋午餐先放學, 但妹妹放咗太耐假, 所以今日一樣只係返個半鐘, 點知到放學老師帶妹妹出黎時, 妹妹個樣勁無奈, 原來老師話妹妹玩到唔願走呀, 哈哈!! 

就係咁, 老師話妹妹聽日可以開始食埋Lunch先放學啦, 似乎距離返全日嘅日子應該不遠了~

當媽媽今日睇番學校嘅日誌, 發現老師影咗幾張妹妹玩遊戲時嘅相, 看來妹妹終於明白返學係好多野玩嘅, 所以玩到唔願放學囉.... 

夜晚我問妹妹今日放學有無喊,

妹妹: 好老實咁話有, 因為想婆婆陪佢返學.

媽媽: 咁你返學玩得開唔開心呀?

妹妹: 好開心呀, 聽日要再玩.

媽媽: 咁你聽日返學時仲會唔會喊架?

妹妹: 唔喊喊啦...

13.09.2016 (Day 8)

家姐繼續係病假, 同婆婆一齊送妹妹返學...婆婆報告, 妹妹入學校時強忍淚水, 不過當到分離一刻都係喊咗出黎, 原本今日係食完午餐就放學, 但因為婆婆同家姐去睇醫生遲咗接妹妹, 之後老師就打黎話唔好接放學住, 因為妹妹已經瞓著咗...

老師話妹妹今日好乖, 見食完午餐婆婆未到, 所以就同妹妹講要瞓覺, 點知妹妹碌咗兩下竟然可以自行入睡呀, 就係咁...今日突然由返半日變咗返全日.

真心覺得妹妹好叻叻~

14.09.2016 (Day 9)

今日家姐繼續病假, 已經連續發燒第3日啦, 唉....

因為今早屋企有人嘅關係, 所以我唔准家姐送妹妹返學, 要佢留喺屋企好好休息, 結果好鐘意痴實家姐嘅妹妹就梗係唔想返學啦, 最終婆婆係要抱佢出門口, 真係激死.

返到學校入課室時如常喊兩聲, 直至婆婆離開妹妹視線範圍就好快無再喊喇, 我諗呢個情況應該仲會有一段時間維持, 其實以妹妹性格黎講....算係正常, 哈哈!!

另外唔知係咪因為食緊藥嘅關係, D藥物令佢哋排出細菌 (因為家姐都有同樣情況), 妹妹今日喺學校肚痾呀, 仲要係忍唔住個隻, 瀨咗...兩次囉, 暈.  @@"

15.09.2016 (Day 10)

依舊婆婆湊妹妹返學, 入課室時喊, 不過當婆婆一離開妹妹視線範圍就已經收聲, 所以我有理由相信...妹妹一定好快就可以笑住咁自己行入課室.

今日睇番學校嘅日誌, 學校有中秋提燈會活動, 見小朋友們拎住大家帶番學校嘅生果影合照真係好開心, 妹妹仲難得喺學校都出現佢嘅招牌矇豬眼笑容添啵, 哈哈!

原本媽媽打算有得放早可以接妹妹返學, 點知公司要4:30先放人, 唉...又錯失咗一個接妹妹放學嘅機會喇.





我們的Facebook專頁 - 小b與妹妹b之成長日誌

小B驗眼跟進@兒童護眼中心

由於小B有深散光嘅關係, 所以暫定每半年都要做一次眼睛檢查, 確保小B嘅視力唔會再差落去!!

不過今次再去驗眼前, 其實我真係好緊張架, 因為小B係一個勁鐘意睇電話嘅小朋友, 即使我點制止都好, 屋企人都總會配合小B, 而且就算我出動到打鬧一招, 小B都一定要扭到我哋俾電話為止, 我知..我知..呢個係一個好壞嘅壞習慣嘛, 所以最近我已經開始採取強硬嘅態度, 暫時算係有少少改善吧.

一去到, 職員姐姐先拿下小B眼鏡去驗度數...

無戴眼鏡嘅小B...突然有D睇唔慣添, 哈哈~

好快職員姐姐又再帶小B去用儀器驗度數, 我驟眼睇到張紙仔嘅數字, 散光度數跟之前好像差別不大.

然後職員姐姐再為小B進行色盲測試, 基本上我見大部份數字小B都能夠講岩, 所以媽媽一D都唔擔心小B會有色盲.

做完色盲測試再驗眼睛立體感...PASS.

之後最緊張嘅環節要開始啦...唔知小B係唔係太過緊張呢, 明明一早已經能夠認讀A-Z, 但當視光師問小B時, 小B好像完全唔識英文字一樣, 10個有8個都係答錯, 結果視光師都忍唔住問我小B學校有無教英文字...暈 @@"

題外話: 
其實我覺得小B係因為我在場嘅關係, 小B驚答錯會俾我鬧, 所以變得緊張咗....  平時溫習溫極唔識嘅時候, 當我一去到忍無可忍一刻, 我...係會爆佢架, 所以唔知係唔係因為咁樣, 小B變得緊張而答錯.  當然都有可能係因為小B完全睇唔清楚D英文細宇, 所以答錯啦.  不過我見到有幾次當視光師指住英文字叫小B讀出黎時, 小B好自然就先望我, 唔通我真係俾咗太大壓力小B?!  睇黎我真係要好好檢討一下我嘅教學方式先得喇, 唉~

之後睇完英文字, 再睇圖畫, 最後輕輕鬆鬆滴埋眼藥水放大瞳孔, 再等十數分鐘左右, 就進行第二次驗眼, 咁就得出咗今次嘅驗眼結果啦...

驗眼結果: 眼底非常健康, 散光度數維持不變, 但遠視度數卻喺半年間大大下跌, 由原先嘅100度及120度跌至得番50度, 換句話講...小B應該好快就會變為近視, 不過視光師話突然跌得咁快, 都有可能係因為先天原因, 所以暫時都無乜野可以做到, 唯有半年後返黎再檢查, 希望到時嘅遠視度數未減至0. 

另外視光師話覺得小B眼睛都算弱, 建議小B每日做一D圈細字嘅眼睛練習, 時間約做10-15分鐘.

最好當然要有恆心每日做啦, 其實整本練習只有25頁, 但能夠做完整本練習交回驗眼中心嘅人卻好少, 哈哈~

好老實D字細到鼻屎咁細粒, 真心覺得好難做, 但只要做晒25頁, 就唔需要再繼續做, 因為做到已經証明視力唔係差喎... 

媽媽為咗要証明呢一點, 我決定要喺下次去驗眼前同小B做晒整本練習.

請給我們一點力量吧!!





我們的Facebook專頁 - 小b與妹妹b之成長日誌

小一簡介會

黎到9月份, 好多小學都開始有開放日...簡介會等活動, 早前同學仔group有媽媽報料, 區內一間名校有簡介會, 於是我又抱住八掛心態去聽.

知我娘家住邊區嘅應該好容易估到...

聽完兩個鐘嘅簡介會後, 我只可以講...這些機會不屬於我的.

雖然以家長嘅心態一定會想仔女入好學校, 但真心覺得呢間學校太神級啦, 對於我家小B黎講, 絕對唔會適合, 不過兩年後嘅事無人知, 最終我唔知自己會唔會報, 亦唔知小B有無咁幸運大抽獎抽中呢間.

但對於普教中...數學科教快一級等, 聽到後媽媽真心覺得感到卻步.

雖然現今教育制度係一定讀得辛苦, 不過太大壓力我怕連媽媽都會承受唔到囉.

黎緊一年, 我真係要好好考慮, 究竟邊間學校先係我想要而又適合小B嘅.

唔想面對...但遲早都係要面對, 唯有搵定多點資料做好準備吧, 唉~~~~~~~~






我們的Facebook專頁 - 小b與妹妹b之成長日誌

妹妹上學去 (Day 1 - Day 6)

眨下眼...妹妹大個女要返學啦, 漫長又艱辛嘅學習之路隨即要展開, 希望妹妹可以好好Enjoy啦.

妹妹開學咁大件事, 媽媽梗係要請假陪返學嘛, 雖然學校有一星期適應週可陪, 但因為媽媽無假, 所以只可以請假兩日陪返學, 其餘日子就要靠婆婆喇, 至於爸爸就因為要返工嘅關係未能陪妹妹, 幸好今年學校只准一位家長陪, 所以爸爸就算黎到都無用, 因為媽媽一定會搶住做妹妹隨從囉, 哈哈!!

02.09.2016 - Day 1

今日返10:45 - 12:15, 媽媽同妹妹都好緊張, 一早已經換好晒校服準備出發返學.

去到學校都仲未夠鐘...

既然上一時段適應班嘅小朋友未放學, 我哋只可以喺門口等開門.

一開始喺大小肌肉室玩, 大家一齊唱歌跳舞, 不過妹妹怕生保, 所以表現得唔算太熱情, 雖然都有舉手話想出去玩遊戲, 但當知道媽媽只坐在身後未能同玩, 結果就梗係唔肯出啦...

玩完集體活動就一齊排隊入課室玩玩具, 老師們逐一埋身跟小朋友混熟, 唔知妹妹係咪因為之前日日黎接家姐放學, 所以對老師們都有少少認識, 結果今日跟老師一起玩玩具時都尚算可以, 希望妹妹繼續努力盡快適應, 可以開始嘗試分離.

好開心...今年妹妹個班主任同家姐當年嘅一樣, 所以媽媽亦都非常放心.

總結第一日返學, 妹妹話好開心, 仲話聽日都要返學添啵, 真叻豬~

05.09.2016 - Day 2

今日妹妹一樣好早就已經準備好出門返學, 去到學校門口又係要等..等..等..

明明係開心笑, 唔知點解好似變咗苦笑 :p

未開始集體活動前, 老師派圖書俾小朋友睇.

可能經過星期六, 日兩日假, 今日妹妹好痴媽媽呀, 完全唔投入去玩囉.

就算入課室玩, 妹妹都唔肯俾老師埋身, 就連老師都話無晒佢辦法, 不過始終都係岩岩返學, 唯有慢慢黎.

未夠鐘放學時, 妹妹仲問...幾時可以走呢, 真係俾佢激死.

好彩最後問佢聽日返唔返學, 妹妹都仲話要返, 証明其實妹妹真係鍾意返學, 只係未習慣同老師相處.

06.09.2016 (Day 3)

今日媽媽要返工由婆婆頂上, 但返學時遇正落大雨, 結果遲到.  咁岩因為遲到入學校, 老師順勢一手就抱妹妹入課室, 當然...妹妹立即爆喊啦, 不過婆婆唔同我, 佢好忍心咁照老師吩咐喺門外坐住等, 試試妹妹反應, 最後15分鐘左右老師就話妹妹已經收聲無再喊, 直至放學時一見到婆婆仲笑笑口話今日好好玩, 聽日要再返學呢.

估唔到第一日嘗試分離都算成功啵, 哈哈!!

07.09.2016 (Day 4) - 09.09.2016 (Day 6)

請病假

返學第4日, 妹妹就打敗仗發高燒, 仲要燒足3日都唔退, 醫生話係病毒感染, 好彩妹妹燒得黎都尚算精神, 只係最高燒(41度)嗰晚變左吊滯豬, 不過當一退番落39.X度左右, 妹妹又再次生猛起來.

真心希望妹妹快D好番, 下星期一可以繼續返學, 如果唔係我怕到其他小朋友都已經適應可以返全日班嘅時候, 妹妹會唔習慣呀.

但我哋都好有公德嘅, 如果妹妹真係未好番, 我係絕對唔會俾妹妹返學, 始終學校容易互相感染, 我唔想妹妹傳染俾其他小朋友囉.

返學都未夠一星期就病, 唉......






我們的Facebook專頁 - 小b與妹妹b之成長日誌

我是K2學姐

放咗個半月暑假...終於都等到開學啦.

轉眼間, 今年已經升呢成為K2學姐, 唔再係學校裡面嘅小妹妹.

新一年, 媽媽希望你繼續享受開心愉快嘅幼稚園生活.

同時亦都希望你今年會比上一年進步, 唔好成日俾老師投訴唔專心.

黎緊老師已經預告每日會有三樣功課, 希望你可以合作, 唔洗媽媽勞氣啦!!

聞說今年嘅班主任黃老師比較嚴厲, 相信因為咁, 你應該會變得更加精乖, 哈哈~

我們的Facebook專頁 - 小b與妹妹b之成長日誌