2012年12月31日 星期一

我的2012

回顧過去一年, 這是我人生最大轉變的一年, 雖然當中甜酸苦辣都有齊, 但我仍然過得開心覺得幸福!! 

還記得去年今日(31.12.2011)...一早起床, 發覺見紅比前一天多了, 跟陳生相量後, 決定早點回娘家待產, 始終QE在娘家附近, 所以回去娘家休息待陣痛時才入院會較為方便一點.  起床後...沖涼洗頭換過衣服, 再食個早餐, 就跟陳生一起回娘家去.  回到娘家, 我發覺開始有間歇性陣痛出現啦, 不過由於仍未有規律陣痛, 所以只好去訓覺休息一下, 直至下午時份, 陣痛依然未見有規律, 但陳生擔心稍後時間封路, 要去QE就麻煩, 所以我再一次沖涼, 約3時多, 陳生就陪我入院喇.  其實乘的士去醫院途中, 我真的開始緊張起來, 因為我知道我好快就要生BB啦, 而且我亦好怕一個人在醫院的感覺, 但無奈只可以面對.  入院做好登記, 助產士為我做過簡單檢查後, 我就要跟陳生分開, 獨個兒於產前房等等等等等...而陳生就只好先回娘家, 於探病時間6pm-8pm再過來陪我. 

E...明明這篇Blog是講我的2012, 何解差點會變成了我的生產過程呢?!  

還是說回我的2012吧...  

過去一年, 我和陳生幸運地已經升格成為爸爸媽媽.  而小B出世後, 我的人生就更可謂豐富了不少, 我和陳生的新一頁亦隨之而展開.

小B的出現, 令我和家人的關係變得融洽了, 這可真算是一個大Bonus!!  雖然以往跟家人關係算不上差, 但溝通就略為少一點囉.  幸好小B的出現, 令我們大家都有所改變, 現在我和家人的溝通變得多而且緊密, 所以我一定會好好珍惜的啊.  這一年來, 雖然我並未能夠全天候地照顧小B, 但有婆婆幫手, 所以我有十萬個放心.  其實不能當一個全職媽媽, 或多或少都帶有點遺憾, 但為了生計, 又豈有辦法丫. 

不過我都好想藉這個機會讚一讚自己, 讚一下自己有生BB的勇氣...讚一讚自己為了小B而學煲粥仔...讚一讚自己努力學習做媽媽...  (唔知醜, 小小事都要讚自己, 哈哈)

過去整整一年間, 小B帶給了我們無數歡樂, 而我亦衷心希望這些歡樂一直可以延續下去, 繼續帶給我家笑不停的的歡樂聲.  雖然歡笑聲背後總會夾雜著少許苦與淚, 但做人最緊要開心嘛, 所以這些苦這些淚, 好快就被我忘記得一乾二淨啦.  (奇怪...竟然變得樂天了, 哈哈!)

總之...2012對於的我家庭來說, 就是一個大轉變啦. 

小B - 多謝你的出現, 媽媽愛你呀!! 


P.S: 2012...無論你過得開心唔開心, 我都希望大家可以一起開開心心送舊迎新~

2012年12月26日 星期三

皮婚紀念日

時間過得真快, 轉眼間...原來已經結婚3年啦, 今年特別少少, 因為多了小B嘛, 希望我們一家繼續幸福下去.
肉麻骨痹話就無謂在此多說啦, 簡單一句...3週年快樂!! 

2012年12月24日 星期一

X'mas @ Elements

15-12-2012

美女出巡...去相先講...是日到了娘家附近的Elements!!

(途中還巧遇近日事非纏身Cool爆的徐濠縈及Eason囡)

嬌滴滴小B的走路姿勢好好笑, 中間那張更有點像個木頭公仔呢, 哈哈~
對聖誕花隔離那舊木頭情有獨鍾, 摸到唔捨得走... 
繼上次小雲小吉後, 我發覺小B其實都蠻喜歡各大商場的聖誕佈置...
最後送上我跟小B的合照...YEAH!!

祝大家聖誕快樂...開開心心甜甜蜜蜜度佳節!! 

P.S: 今日天氣寒冷, 記住要多穿衣服保暖, 小心身體呀~~~~~~

2012年12月21日 星期五

小B保濕用品推介

冬天到...天氣又乾燥...大家有為BB做保濕嘛?! 

今次就讓我介紹一下小B的保濕用品吧...

小B出世時, 正直冬天, 加上小B爸又有濕疹, 所以我真的好怕小B同樣會有濕疹呢, 幸好...直至現在, 小B皮膚依然白滑, 沒有像爸爸一樣每逢天氣轉就會周身痕.  而小B媽我亦有聽說過濕疹皮膚患者用馬油作保濕, 可改善濕疹皮膚, 所以想也不用想就買了一盒純馬油給小B喇.  (當然我選的不是藥用那種啦) 

選它是因為成份全天然, 而且又註明嬰兒可用~

  • 天然成份, 嬰兒的幼嫩肌膚也可以安心使用
  • 可用於嘴唇
  • 100%純馬脂肪所提煉的膏狀護膚用品,細膩的分子能迅速被肌膚吸收, 特別適合極乾燥肌膚
  • 無著色,無香料
  • 日本製造

這隻純馬油好就是好, 但只識用於乾燥的冬天, 皆因它屬油性, 冬天用時會迅速被皮膚吸收, 但若然夏天用, 那就有點油立立的感覺了.

不過當小B皮膚乾燥, 出現"鞋烚烚"的情況時, 只要持續用上幾天, 皮膚又真的馬上會變得滑滑, 讚呀!! 

用了11個月, 這盒純馬油亦過期了, 今次我同樣選擇買馬油給小B作保濕, 但就轉了以下這款...


  • 採用優質北海道產馬油製成
  • 富士山溫泉水 - 含豐富礦物成份
  • 最高濃度Q10 - 保濕效果更好, 抗氧化, 防衰老
  • 配合日本茶精華, 透明質酸及骨膠原
  • 最新加入牛乳滋潤成分, 用後肌膚更滑更細嫩
  • 絶無添加合成界面活性劑, 色素, 香料, 防腐劑及礦物油(石油副產品), 嬰兒也可安心使用

幫小B試用了一星期, 感覺比之前那隻純馬油好, 因為這款是屬於膏狀, 絕不油膩, 但價錢則比前者貴一倍. (只要是好的東西, 即使貴一點, 亦覺值得  )

2012年12月20日 星期四

Toys"R"Us

放假去邊好?!

既不用入場費, 大小朋友都玩得開心的地方, 我想一定非"玩具反斗城"莫屬!!

現在已經識行識走的小B, 去到反斗城經已不再一舊飯啦...

她會拖著你手, 行去自己喜歡的玩具面前, 摸摸拍拍, 非常攪笑.

最後小B當然玩到唔願走啦... 

2012年12月17日 星期一

Miss Hong Kong

登登登登...我家有位Miss Hong Kong!!
媽媽幫小B加冕候冠的一刻, 就連小B自己都忍不住笑了, 嘩哈哈哈!! 

2012年12月13日 星期四

勁難買奶粉

當小B未出世, 而我正為奶粉品牌而煩惱之際, 同事已經告知我A+極度難買, 如非一定要選A+的話, 可選其他品牌試試.  可惜那時偏偏醫院就是用A+, 結果...我當然跟醫院, 選了A+給小B啦!!

還好清楚記得...當日我一知道醫院用A+後, 已經叫小B爸快快去入貨, 好讓小B出院回家時有奶粉食, 誰不知...小B爸行了好幾間藥房都無貨呀, 剛巧1.1 - 2.1又是公眾假期, Hotline無人接聽!!  幸好小B爸同事有朋友做藥房, 才僅僅拿得一罐回家.  直到3.1假期完結, 我妹馬上打上Hotline訂了兩罐奶粉, 那時的我...心才叫定下來.  自此我習慣了入定一至兩罐奶粉做存貨, 免得小B無奶食.  直到後期...見網上有好多媽媽出讓400g奶粉, 價錢又不貴, 只需80-100元一罐, 所以我便開始選擇了跟網上的媽媽們入貨喇, 不過出讓400g奶粉的人不太多, 而且還要跟其他媽媽鬥快排買, 所以每次能夠買到400g奶粉, 都真是要靠點運氣啊. 

或許我算是好彩的一個吧, 由食1號仔後期開始, 每次當我要入貨時, 都可於網上買得400g奶粉, 所以我已經有好幾個月未有到過藥房買奶粉了.  但近期...這些400g奶粉突然變少, 即使找到又不及其他媽媽手快, 最終還是買不到, 唉...  屋企的奶粉存貨已所餘無幾啦, 唯有正正經經去藥房買900g吧, 結果...行了幾次都一樣話無貨, 明明早上打去藥房問, 才說剛入貨, 但到我下班時去買, 竟然又話無貨, 激死我激死我激死我啦!! 

買罐奶粉都這樣艱難...香港真CRAZY~~~~~~

2012年12月11日 星期二

大6妹?!

嘩..嘩..嘩...小B你扮大6妹都好入型入格啵!!
話你係大6妹, 應該無人唔信... (大爆) 

為生日蛋糕煩惱

小B一歲生日快到啦...媽媽我正在搜尋一些較得意款式的生日蛋糕, 用作慶祝小B一歲生日!

雖然今年是小B的首個生日, 但我們並不打算大攪, 始終小B年紀少, 即使我們為她慶祝, 我相信小B都未必知道這是什麼一回事, 加上埸地又是一個大問題, 所以......

不過爸爸媽媽的一班朋友好好呀, 每年爸爸媽媽跟這班朋友都會一起歡度節日 (除了上年媽媽我因除夕入院生小B未有一起渡過之外), 今年當然如常一起倒數迎2013啦.  而他們亦沒有忘記小B是個元旦BB, 所以今年除夕派對他們將會順道為小B慶祝生日呢, 哈哈.   

媽媽我就現正要為生日蛋糕而煩惱啦...

由於今年除夕+小B生日派對, 會於朋友位於天水圍的家舉行, 地點確實好鬼遠.  為了方便拿取蛋糕, 最佳首選一定非連鎖餅店莫屬, 皆因它們到處都有分店, 一定夠方便, 不過款式就...唔多OK啵. 

結果媽媽我又再繼續上網搜尋, 今次意外地給我發現了這間 - ONDA PASTRY EXPRESS.  嘩...款式好靚呀, 價錢亦好合理, 對於3D蛋糕來說, 不錯不錯~~~  雖然這間ONDA只有工場, 沒有店鋪, 不過他們設有送貨服務, 所以都可以一試, 再者工場亦位於沙田, 方便我親自去工場到取. 

或者...Blog友仔們, 你們會否還有更好的介紹呀?!

2012年12月10日 星期一

隨便講講

星期六一家三口帶我家小狗金仔到表嫂開設的美容店沖涼扮靚, 順路相約了一位網上賣家於附近交收頭飾...

這兩款頭飾是買給小B的, 由落單到起貨只需短短三天時間, 如果買滿$30還可包郵呢, 不過我見順路, 所以就選了面交喇. 

收貨後覺得這兩款頭飾造工都好精美, 絕對值得一讚...   
難怪好多朋友話, 喜歡生囡多過生囝了, 因為生囡可以扮靚, 而且衫褲鞋襪頭飾的選擇亦比男仔多.  最重要是將自己女兒打扮得靚靚而又有讚賞的聲音後, 媽媽我是會有感到飄飄然的一刻, 嘩哈哈哈~ 

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

自從家中多了一個小魔怪..日後媽媽我擺放東西就要更加小心了!!
這隻米奇擺設於家中擺放了兩年都安然無恙, 但當它遇到小B後, 不出兩秒就已經人頭落地.

米奇...你安息啦~

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

嘩嘩嘩...Vicky姐姐送給小B的聖誕禮物, 小B爸好like呀.  因為裡面載了一大包棉花糖, 愛甜的小B爸又可以乘機增磅啦, 咔咔!!

2012年12月7日 星期五

小B與朋友的聚會

不要看小B年紀少少, 但其實姨姨好早之前就已經幫小B認識了一班朋友仔了!! 

以下就是上星期日, 姨姨帶小B去出席小朋友聚會的花絮喇, 一看相就知道小B當日玩得好開心啦.
這就是小B的朋友仔喇... 


2012年12月6日 星期四

小B玩意

小B近期好唔環保呀...因為她愛上了玩紙巾. 

現在只要你拿著紙巾而又被眼利的小B發現, 小B好快就會從你手上把它搶過去, 即使你拿得緊緊不放, 小B都會想辦法將你的手打開, 如果你硬是不給她, 她更會發脾氣大叫呢.  搶去紙巾後, 小B會以9秒9時間把紙巾撕得碎碎的散在地上.

今次已經算是小兒科了...
唉...究竟小B你何時才玩厭這個玩意呀?!

媽媽我唔想日日幫你執紙巾碎呀~~~~~~ 

2012年12月5日 星期三

哈哈笑飯壺

跟同事一起淘的哈哈笑飯壺終於到手...

對於一個長期帶飯的人來說, 每天用微波爐叮飯確實好不健康, 加上公司帶飯的人又多, 如果11:30前還未拿飯盒去排隊, 那麼1:00時分分鐘仍在排隊叮飯中呢, Crazy!!  為了食得健康, 加上要避開那條恐怖的大長龍, 所以我決定加入蒸飯行列, 跟同事一起齊齊食得健康些... 

有了它...以後早餐時蒸燒賣, 珍珠雞就方便得多啦, 哈哈~

這個就是哈哈笑飯壺喇, 只需加水插電按鈕, 就可以將飯盒加熱, 簡單方便...讚呀!! 

一大一小不锈鋼芯飯盒, 以後除了帶飯外, 還可以帶亞媽靚湯呢...
附送餐具一套+量杯...

如你都有叮飯習慣, 不妨考慮一下轉用這個哈哈笑飯壺丫~ 

2012年12月4日 星期二

扮初生B

小B...你想笑死人咩?!
你已經11個月, 係大BB, 唔再係初生BB啦~

不過媽媽確實好懷念妳初生時的樣子... 

2012年12月2日 星期日

X'mas @ Lok Fu

<靈感IQ稱得上十分之高超...創作力量同幻想會嚇你一跳...小雲同小吉好重要>

一齣兒時我好喜歡收看的卡通片...IQ博士返黎啦, 如今IQ博士當中的天神村及其卡通人物已於樂富廣場重現. 

既然今年是我們首個跟小B一起共渡的聖誕節, 我當然想帶她周圍去拍照留念, 順道提早感受一下快將來臨的聖誕氣氛啦.

第一站近近地就先去樂富廣場吧~~~~~~

 小B扮小雲張大口...好攪笑呀, 嘩哈哈哈!! 
現在已經可以放手自己行路的小B, 玩到唔捨得走. 
下星期上完Playgroup, 一於帶小B去海運影木馬......