回顧我的2015

轉眼間又黎到2015年嘅最後一日啦...一年容易又過去, 有小朋友後嘅生活真係過得好快好快, 而且都算過得精彩, 亦因為有倆姊妹, 我嘅生活先會變得咁有活力咁有動力.

呢一年生活中未見有大起大落 (咁即係平平穩穩啦), 但都有令我不安嘅事架, 就係幫小B轉校嘅事喇, 始終兩間學校嘅分別太大, 所以就連我自己都需要一段時間才能完完全全咁適應, 曾經我有懷疑自己是否決定錯誤, 但當大家都適應好之後, 慶幸小B今年K1嘅校園生活都算過得開心愉快.

另一件最令我擔心嘅當然就係倆姊妹健康啦, 自小B返學後, 生病次數多到數唔晒, 連帶妹妹都一樣, 不過小病是福, 無乜大病已經要好感恩, 來年真係要想辦法增強一家嘅抵抗力呢.

工作方面已經無乜好講, 因自有家庭之後, 工作對我來說已經變得係次要, 但無咗又唔得囉, 只要繼續安安穩穩已經心滿意足, 但求繼續有薪加又有花紅分, 哈哈~

而最開心嘅就係6月時嘅Family Trip喇, 有得去旅行已經係件開心事, 能夠同埋婆婆一齊去就當然更加開心啦, 說真的...我真係好想每年都可以同埋婆婆一齊去旅行架, 始終婆婆湊住我哋咁多個都好辛苦, 所以真係好想佢開心.

2015大概就是這樣吧, 只要學會知足, 其實已經過得好不錯, 感謝今年在我身邊出現過嘅你..你..你及你, 希望2016會過得更加精彩更有意義.

新一年祝願大家繼續要身體健康, 幸福快樂!!

我們的Facebook專頁 - 小b與妹妹b之成長日誌

2015聖誕系列の聖誕節目停不了

28.12.2015

睇到個Topic都覺得好開心, 不過節目停不了嘅人唔係我而係小B, 3天假期完結後媽媽又要上班嚕, 但小B一樣唔愁無節目, 今日小B就跟咗姨姨去玩喇.

去開姨姨公司嘅聖誕Party前, 小B跟咗姨姨返公司, 而經過今日之後小B仲話鐘意返工多過返學添啵...  當然啦, 今日喺公司有幾個朋友仔一齊玩嘛, 又有野食又有野玩仲有卡通片睇, 小B唔知就梗係以為返工就係咁樣過啦.

最後玩到無嘢玩, 仲有姐姐幫小B化妝添啵!!  ~.~"

你話返工有幾開心呢?!?!?!?!?!

返完半日工, 下午就去咗會所開Party, 有得玩之餘又有好嘢食, 簡直就羨慕死媽媽啦, 唉~

姨姨同事們有交換聖誕禮物環節, 出奇地竟然連小B都有聖誕禮物呢, 你睇小B收到禮物幾開心.

不過離開前小B面上笑容已經不見啦, 皆因有人電力秏盡...姨姨話有個小朋友一上車就馬上ZzzZzz~

多謝姨姨帶小B去玩, 等小B嘅聖誕節目停不了呀, 哈哈!!  ^o^





我們的Facebook專頁 - 小b與妹妹b之成長日誌

2015聖誕系列のBoxing Day Night

今日雖然係我同爸爸嘅鐵婚紀念日, 不過我哋並無放低兩個囡自己去慶祝, 反而晏晝幫小B開咗個生日會, 夜晚再同姑姐, 姑丈, 表哥一家齊齊食飯慶祝, 係咪好唔浪漫呢, 哈哈!!   但老套D都係嗰一句啦, 點樣慶祝同食乜野都唔重要, 最重要就係一家人食得開心嘛, 而且放假嘅日子我兩個囡又點會肯放過我哋啵~

媽媽我亦好有先見知明, 知道開完生日會大家都會攰, 所以一早已經揀咗喺沙田食飯, 唔洗騰出騰入去咁遠, 而且倆姊妹又無瞓晏覺, 去得太遠只會辛苦我同爸爸.

今次我哋揀左喺大會堂天台花園嘅La Terrazza, 其實我想試呢間餐廳好耐架啦, 但每次都總係有D阻滯, 所以當我知道Boxing Day呢日會出黎食飯慶祝後馬上就打去訂位喇.  ^^

其實呢間餐廳嘅室外位置都幾有情調架, 不過天氣涼又有小朋友, 所以只好選擇坐室內.

一坐下來連餐都未點, 就先每位送上一杯蘋果茶及軟綿綿餐包 (按人頭計), 連倆姊妹都一人有一份唔洗爭.

叫餐後再送上超好味磨菇湯及菠蘿沙律...

羊架 & 燒春雞

 肉眼扒 & 豬手

最後仲有一個漢堡包同兒童裝 (掛住食已經無再影), 而以上每一款食物都真係好好味好好味, 連奄奄尖尖嘅爸爸都大讚Yummy呢, 仲話遲下可以再Encore, 結果當然係大大小小都食到挺著大肚子離開啦, 讚呀~ 

送上大合照一張

有得食又有得玩, 呢位小朋友今日真係過得超開心.

好愛小B嘅靚仔表哥~

都係妹妹乖, 一於食飽先玩~

好啦...食飽飽見時間尚早, 於是我哋打算去星光花園影燈飾, 因為聽聞今年整得好靚啊, 只可惜我哋想影嘅時候人哋亦都想影, 結果要排1.5小時先可以入去, 最終梗係放棄啦, 唯有過晒節日有機會先再去影吧.

無得影相, 於是姑姐就帶小B去買生日禮物, 今年小B揀咗買琴, 不過我屋企好細無位放, 所以鋼琴就免喇, 電子琴都唔可以揀太大部...

最後食埋個甜品就過咗完滿嘅一日啦...呵呵!!

小B: 多謝姑姐~

我們的Facebook專頁 - 小b與妹妹b之成長日誌

2015聖誕系列のBoxing Day - Anke 4th Birthday Party

再過幾日元旦就係小B 4歲生日啦, 呢兩年返學後嘅小B已經有自己嘅朋友仔, 加上之前小B又出席過數個朋友仔嘅生日會, 所以小B一直都好想可以跟朋友仔一樣擁有一個屬於佢自己嘅生日會, 就係咁...今年爸爸媽媽決定同佢開個生日Party, 邀請近年玩得最多嘅朋友仔一齊出席, 希望小B開心.

不過要開一個大型嘅生日會真係唔容易, 當中實在有太多細節要煩, 煩場地, 煩蛋糕, 煩到會, 煩Banner, 煩回禮禮物等等等等, 真係樣樣都需要時間樣樣都需要精神, 所以媽媽話明唔會年年大攪, 間中一次就夠了.  :p

今年第一次攪, 當中有好多嘅忙亂都係事後先回想起, 而且亦有招呼不周嘅地方, 但總算係一個好嘅經驗吧.  若然下次再幫小朋友開生日會, 媽媽答應一定會比今次做得更好...

日期: 26.12.2015
時間: 12:00 - 15:00
場地: Party Duck

今日短短3小時嘅生日會, 我唔知自己做緊乜, 但總係好似好忙咁, 就連影相都只係影得好少, 其實我有交低相機俾小B姑丈幫忙影相架, 不過佢都無點影過, 好彩大家都有Send番相俾我, 而兩位有用相機影相嘅爸爸遲D亦會俾番相我, 所以下次開生日會真係要安排一個專業嘅攝影師.  另外最失敗嘅就係, 我哋竟然無影大合照呀...嗚嗚嗚嗚~
(不過唔緊要啦, 小B當日開心燦爛嘅笑容, 媽媽已經入晒腦)

唔講太多...去相去片同大家分享我家小B嘅喜悅吧!!

多謝榮哥哥幫小B設計Banner~

媽媽為小朋友準備嘅小禮物~

跟Party Duck依人數訂到會, 雖然到會食物真係唔錯, 但份量少咗D囉.
(事後跟到Party Duck開過Party嘅朋友提起, 原來大家都有遇上同一個問題.)

令小朋友們瘋狂嘅Peppa Pig蛋糕~

切蛋糕時間~

 唯一嘅全家福 ^^"

難得有坐定嘅一刻~

媽媽捉唔到小B影相, 但有幾位朋友仔竟然成功攔截小B合照, 勁~

玩得開心忘我嘅倆姊妹~

今日除咗玩開嘅幾位朋友仔, 同學仔, 另外都要多謝三位Blog Blog朋友仔大爺, 小檬同妹妹豬賞面出席呀...  雖然小B掛住玩, 請咗大家食檸檬, 但都總算叫影咗張合照, 哈哈~

以下對話真人真事好好笑...
媽媽: 小B...你點解請姨姨們食檸檬, 又請大爺食檸檬呀?!
小B: (認真Mode) 無呀...我無請過佢哋食檸檬呀, 我都無檸檬.
HAHAHA...好明顯小B係唔明食檸檬嘅意思啦.

最後送上生日歌一首~

今日真心多謝大家, 呢個生日會小B真係好開心好忘我好興奮!!!!!!!!

亦都好多謝大家送俾小B嘅生日禮物, 每一份小B都話好鐘意呢~

我們的Facebook專頁 - 小b與妹妹b之成長日誌

2015聖誕系列の聖誕節

今年聖誕節...我哋真係過得好簡單, 所有節目都離不開兩個囡, 雖然我哋未至於俾到最好嘅野佢哋, 但我哋會盡我哋能力去令佢哋開心.

呢幾個月電視有套卡通片叫妖怪手錶, 而倆姊妹就因為首歌而被深深吸引住, 自此每星期日都會坐定定喺電視面前等睇呢套卡通片, 咁岩前陣子媽媽知道妖怪手錶電影版會喺聖誕期間上影, 所以都有打算約朋友仔去睇 (怕爸爸會悶本打算唔預爸爸), 點知後尾爸爸知道竟然話不如聖誕節一家四口去睇 (好明顯有人唔想諗節目啦), 為怕爸爸反悔結果我好快手咁上網買咗飛, 哈哈~

兩張飛四個人仲有四個位...抵!!  :p

食住薯條等開場, 簡直係一大樂事也~

難得一家四口齊齊入戲院睇戲, 梗係要影張合照啦...

雖然事前以為倆姊妹會對妖怪手錶呢套電影有興趣, 但最終竟然兩個都瞓咗, 相反爸爸媽媽就覺得套戲幾低B幾好笑!!

夜晚爸爸話返屋企玩煮飯仔, 所以今晚嘅聖誕大餐就由爸爸負責...

雖然簡單, 但味道真的不錯啊, 最重要係我覺得咁樣已經夠溫馨夠幸福了, 咔咔~

Merry Christmas!!





我們的Facebook專頁 - 小b與妹妹b之成長日誌

2015聖誕系列の平安夜

今年平安夜雖然依舊有得收早(4pm), 不過我無特別安排節目呀, 皆因爸爸早兩日先通知我有假放, 原本係有想過安排去BBQ嘅, 但最終約唔成, 所以平安夜我哋一家四口只係去咗尖沙咀睇燈飾迫下湊下熱鬧...

食過晚飯由婆婆家出發, 過條馬路就到Park Lane, 真係非常方便!!

一行到去已經見到人頭湧湧, 好多團體喺度報佳音, 唱聖誕歌等, 而小B亦好快被呢鼓氣氛感染, 變得好開心好興奮, 見咁多人唱歌, 小B仲跳舞助興添啵, 真係好好笑, 相反妹妹就怕人多, 全程要抱.

其實只要一家人一齊, 去邊度過同點樣過平安夜根本都唔重要, 最重要係兩個小寶貝開心就好了.

這樣我們就渡過了一個好平安嘅平安夜啦~

P.S: 平時由娘家出發返屋企只需半小時, 今日我哋足足用咗兩個半小時, 雖然攰...但攰得都好開心.  ^^

Happy Christmas Eve!!





我們的Facebook專頁 - 小b與妹妹b之成長日誌

《淘》生日會回禮禮物篇

去年爸爸媽媽嘅一班朋友幫小B開生日會, 媽媽都有準備回禮小禮物俾朋友仔女們, 今年話曬大攪, 回禮小禮物當然少不了, 但我左諗右諗都唔知送乜好, 要我自家DIY就更加無可能 (我哪有時間?!), 結果就襯雙十一時淘咗D小玩意俾大家喇.

今年嘅生日蛋糕, 順應小B要求訂咗Peppa Pig, 所以順理成章生日會主題就以Peppa Pig為題.  ^^

就係咁...回禮禮物當然都離不開Peppa Pig啦~

Peppa Pig Puzzle - 絕不馬虎嘅質量.

Peppa Pig貼紙 - 看起來, 質量都不錯, 平平哋貼吓, 希望小朋友們喜歡.

既然有小禮物送俾賓客就當然要有禮物袋嘛, 不過我搵唔到岩心水嘅Peppa Pig禮物袋啊, 最後只訂了印有Happy Birthday字樣嘅小紙袋!!  :p

收貨時真心覺得好靚, 完全唔似淘寶貨~

另外每份禮物袋再加入了一包小熊餅, 希望小朋友們都喜歡啦...

雖然回禮包內不算豐富, 而且亦並非昂貴禮物, 但媽媽一心都只係想所有小朋友開開心心咁黎參與小B生日會, 齊齊玩過顛過食飽後仲有禮物可以帶番屋企.

這全都只是小小心意呢. 嘻嘻!!





我們的Facebook專頁 - 小b與妹妹b之成長日誌

Happy 6th Anniversary - Iron Wedding

6年時間對於一段婚姻來說並不算長, 但我有信心我們一定會有更多更多嘅6年直至我們都老去. 

這些年來多謝你一直對我愛護有加, 雖然偶爾還是會吵吵架, 不過你脾性真的非常好, 就算係我先無理取鬧, 你都可以扮作若無其事, 直至令我消氣為止.

雖然我倆都並非浪漫之人, 6年後嘅我們激情亦已不再, 但我們嘅感情相反卻越來越深厚...

我亦感謝你這個從前超愛玩嘅一個大男孩, 如今竟然變得如此照顧家庭, 看著你這麼多年來一直為我嘅轉變, 為這個家嘅付出, 真心覺得好幸福呢~

老公...鐵婚快樂, 就讓我們一起繼續努力令這個家充滿幸福和愛吧!!

我們的Facebook專頁 - 小b與妹妹b之成長日誌

妹妹B ~ 22個月

22個月大嘅妹妹B越黎越難攪, 雖然未夠兩歲但早於幾個月前已經進入了Trouble 2階段.  以前小B進入Trouble 2階段時媽媽都未驚覺Trouble 2嘅恐怖威力, 但當Trouble 2出現喺妹妹身上就真係深深體會到...宜家我同婆婆幾乎每日都會好想中佢, 可想而知妹妹有幾咁麻煩幾咁難攪同幾咁可怕啦, 當然或多或少都跟妹妹愛扭計嘅性格有少少關係嘅, 究竟我家妹妹幾時先會變得好湊呀?!

身高: 88cm (著衫碼數已經係90)
體重: 大約26磅 (睇醫生時有磅, 不過媽媽忘了實際數字)

呢個月識講嘅野越黎越多, 有家姐真係唔同好多呢, 當年家姐22個月時仲係講緊有限度嘅單字/疊字咋, 相反妹妹呢方面比家姐叻, 最重要係發音亦比家姐清楚, 應該唔會有發音問題呱.  雖然好多時都仲會講BB話, 但出奇地家姐同佢又溝通到啵, 哈哈~

食方面開始難攪, 雖然仲係樣樣肯試, 樣樣肯食, 而且都算食得多, 但講到晚餐就唔太乖囉, 晚餐好多時食幾啖就唔肯再食, 就連婆婆都話唔明點解食午餐同食晚餐好似兩個人咁...好大分別.  另外有事無事都叫食奶奶, 唔開奶俾佢就大叫大喊, 奶癮比以前大.  試過有一日嘅早奶食完6安再要求食奶, 婆婆再多開3安後繼續要求食, 最終一共開咗12安, 全部食晒.      

性格方面, 脾氣好大好臭, 一有唔滿意就亂發脾氣, 丟野打人樣樣齊, 野蠻程度爆晒燈.  問題係我唔知應該點教, 因為妹妹話又唔聽, 講道理又唔聽, 鬧就更加唔驚, 我真係無晒佢辦法, 唯有希望佢快D返學俾老師幫手教.

其實當妹妹唔扭計嘅時候都真係幾可愛幾好玩架, 所以媽媽真心希望你可以聽教聽話, 做個人見人愛嘅可人兒!!

祝: 22個月大快樂~





我們的Facebook專頁 - 小b與妹妹b之成長日誌

Cool妹出戰 - 3rd N班Interview結果 (浸信會)

面試結果應該不難猜對吧, 皆因事前我哋已經知道大概只係去陪跑而已.

點解我會話事前已經知道係陪跑...因為報名時就知道學校會按報名先後次序而收生囉, 而我亦因為太懶關係一直拖至今年10月才去交報名表, 但明明學校只要年滿一歲就已經接受申請, 一看就知我有多遲啦, 哈哈.  加上N班只收12名學生, 我哋又點會咁好彩爭到啵...今次妹妹排第74呀.  雖然學校都有話會睇小朋友面試表現黎作考慮, 但我家妹妹當日完全唔肯開金口回答老師問題, 只做對指令, 若然真係要睇表現, 妹妹根本就未達標. 

可能有人會問, 明知係陪跑點解都仲要去面試呀?!

其實我哋決定去面試, 都只不過係抱住帶妹妹去玩嘅心態, 反正妹妹明年都要繼續面試K班, 既然有機會倒不如早點開始俾妹妹多點面試經驗, 任由她去玩下見識下, 希望明年會有更好表現嘛. 

這應該算是合理結果吧... 

遲些有時間再另Blog一篇馬年妹妹報N班後感啦~  :p





我們的Facebook專頁 - 小b與妹妹b之成長日誌