♡親子活動●海洋公園♡

星期日難得兩位大忙人爸爸夾好一齊放假, 原本我哋一行人打算去廸士尼玩, 只可惜廸士尼又加價了, 5大5小去廸士尼實在好貴, 結果唯有改去海洋公園...  因為爸爸識人攞平飛, 所以一家四口只需$700便可入場, 相對去廸士尼真係平足差不多一半架.

今早跟朋友仔約好10:30喺金鐘食早餐, 然後再齊齊出發去海洋公園, 不過去到海洋公園時已經正午12:00, 無論場外場內都人山人海...超多內地同胞, 所以下次再去主題公園, 真係要揀平日啊.

雖然我哋5大5小去玩, 看似應該會比較輕鬆, 但原來唔係架...由朝到黑玩足一整日, 認真的攰到爆燈.

今日好彩有帶BB車, 因為倆姊妹都唔太肯行, 其實唔止倆姊妹唔肯行, 就連朋友兩個年紀少嘅小朋友都一樣唔肯行, 究竟我哋係咪揀錯咗, 其實應該去廸士尼比較適合呢?!

一架車兩份坐, 總算唔洗抱...  (不過其實推車都辛苦架)

為咗先上山睇海洋劇場, 我哋一入場就去搭海洋列車上山...其實朋友想搭纜車架, 可惜不論上山還是落山都大排長龍, 結果我哋只好坐海洋列車.

呢個時候...家姐發現帶住黑超嘅妹妹竟然坐喺BB車度瞓著咗.  :p

我哋見未夠鐘睇海洋劇場, 就四周圍行下, 睇下鯊魚館同玩下丟錢落海嘅攤位遊戲...

4個唔鐘意影相嘅小朋友 ~.~"

原來鯊魚館係唔俾BB車出入架, 但既然妹妹瞓咗覺, 咁媽媽唯有陪妹妹喺出面曬住等啦, 好彩鯊魚館門前有個大澳村俾我影下相.

我哋係呢個丟錢落海嘅攤位遊戲放低咗$300, 好彩楠楠哥哥贏咗3隻公仔.

兩個爸爸唔知做乜, 講講下因為愛面子走咗去玩韆鞦, 然後玩完落黎叫頭暈, 哈哈~

終於都夠鐘去睇海洋劇場啦...雖然已經黎到11月尾, 但天氣一樣好曬好熱, 等開場嘅10分鐘, 大家都已經曬到無樣, 好彩小朋友食下包, 食下薯片又過咗.

宜家嘅海洋劇場相比起以前真係完全唔好睇, 不過小朋友第一次睇就仍然感興奮.

食過Lunch後, 其他人就去玩機動遊戲啦...出奇地過山車, 海盜船等機動遊戲通通都唔多人排隊.

(至於我同爸爸就負責看管小朋友同喺附近行下 - 2個人4隻手對4個小朋友, 真係非常呢Hae)

大嘅玩完...我哋就要落番山去睇熊貓, 睇金魚, 睇水族館同去兒童王國啦.

全日難得嘅幾張全家福!!

海洋公園的日與夜~

雖然由12點玩到7點, 但始終帶住5個小朋友嘅關係, 進度非常非常慢, 結果我哋竟然係行唔晒成個海洋公園, 不過最緊要都係小朋友們玩得開心.  ^^





我們的Facebook專頁 - 小b與妹妹b之成長日誌