拆利是

星期日爸爸返工, 我同倆姊妹起身後無野做 (見倆姊妹頭髮凌亂都應該估到是剛起身吧), 見所有親戚朋友嘅利是亦都已經逗過晒, 咁就不如一齊拆利是啦!!  :p

有咁多利是, 好開心呀~

明明叫緊Yeah, 但唔知點解變左咁嘅手勢~

由妹妹操刀幫家姐影相~

整個拆利是過程相當混亂, 倆姊妹爭住拆, 爭住搶錢, 真係唔知好嬲定好笑, 結果媽媽又要出聲控制埸面...  @@"

黎緊媽媽打算幫倆姊妹開設銀行戶口, 希望盡早培養倆姊妹嘅理財觀念!!

真係要多謝有份派利是俾倆姊妹嘅善長仁翁呀, 咔咔.  ^^





我們的Facebook專頁 - 小b與妹妹b之成長日誌

妹妹兩歲生日Home Party + 團拜

今年妹妹生日撞正年初五, 所以契媽想同妹妹開Party都比較難夾時間, 因為大家都好多團拜活動嘛, 不過有心唔怕遲, 大家有心就夠了!!

今次契媽又攪攪新意思, 生日訂乳豬...

妹妹, 你要快高長大, 開開心心啊~

切乳豬前當然要大合照嘛~

今次爸爸媽媽比較Hae, 因為早上有事忙嘅關係, 所以未有時間準備晚餐, 結果只好選擇叫外賣, 好彩大家自己人唔會介意, 哈哈!!  :p

另外今次嘅蛋糕係由媽媽負責, 原本我打算訂雪糕蛋糕架, 只可惜妹妹有幾聲咳, 為免主角有得睇無得食, 最終都係決定訂番普通蛋糕.

切蛋糕前大合照~

 笑下啦...妹妹~

點都要有張全家福嘅~

大個女, 今年識得自己切蛋糕啦~

家姐突然變身成為主角~

妹妹自踏入兩歲後, 跟人方面終於都有進步, 起碼玩耐咗見耐咗都可以俾人抱下...今日大家能夠成功抱到你, 佢哋都好開心呢, 哈哈!!  ^^

我們的Facebook專頁 - 小b與妹妹b之成長日誌

〈倆姊妹〉健康院跟進

今日倆姊妹齊齊返健康院進行成長進度跟進...

其實一般小朋友歲半後就已經唔洗再返健康院, 不過妹妹歲半時因講嘢唔太多, 而姑娘又見家姐遲講嘢, 所以就約妹妹兩歲時再做跟進, 結果今日返去見姑娘, 當然Pass啦, 因為妹妹已經連句子都可以講到嘛, 仲要唔係Copy啵, 姑娘仲驚訝妹妹點解突然會有咁大進步呢.  其實歲半時妹妹應該唔係唔識講, 只係唔肯講啫!!  另外姑娘亦有用圖書仔考妹妹認知, 大概係考妹妹認衫褲鞋襪杯之類等物件, 呢方面當然難唔到妹妹, 所以再下一次返健康院就係4歲嘅視力普查喇~

至於家姐今日亦要一齊返健康院, 家姐就主要係做視力普查.  據爸爸所講 (因我陪妹妹見姑娘), 家姐見視光師驗眼時, 視光師都唔算馬虎, 仲同家姐以玩遊戲形式進行視力測試, 最後得出結果係...有散光有遠視, 但度數就要轉介去眼科醫院再詳細驗.  唉...其實爸爸有深散光, 有遠視, 媽媽又有近視, 我都知倆姊妹應該都走唔甩做四眼一族, 不過無諗過真係咁快囉. 

然後家姐仲有一份問卷要做, 主要係問父母對小朋友嘅發展有無懷疑, 而我就揀咗發音方面, 之後姑娘就馬上再安排我哋去見醫生.  醫生首先俾一堆字家姐讀, 然後評估得出有4個音準有問題, 即係唔合格.  其實上年8月去做言語評估時係有10個音準有問題架, 經過數堂後原來真係有明顯改善, 雖然都係未得, 不過10個變4個算係有進步吧, 唯有再多多鼓勵小B努力練習. 

黎緊眼科同言語治療方面政府都會再有跟進, 不過政府排期耐, 所以我會私家政府兩邊Check, 希望快快將小B呢個問題兒童糾正為正常兒童啦, 哈哈~





我們的Facebook專頁 - 小b與妹妹b之成長日誌

猴年大吉の大年初六

呢個新年真係精彩節目一籮籮, 今日因為爺爺返咗黎香港, 陳氏一家當然要齊齊出動去食新年飯嘛~

好彩小B今早退燒後精神尚算不錯, 否則我哋就要留喺屋企陪小B休息喇.  

始終小B未病好, 所以飯後喺商場影幾張相就返屋企...

病咗兩日無出街, 今日小B出到黎勁開心, 完全唔似病緊.  ^^

黎緊仲有幾個團拜, 小B一定要快快好番啊!!





我們的Facebook專頁 - 小b與妹妹b之成長日誌

妹妹兩歲啦~

12.02.2016

嘩..嘩..嘩..唔經唔覺妹妹已經兩歲啦~~~~~~~~

原本今日媽媽請咗假, 打算一家四口外出走走順便同妹妹食生日飯, 只可惜因為家姐病倒而被迫要取消, 不過妹妹仲細, 我知妹妹唔會介意嘅, 而且妹妹又咁鍾意家姐, 妹妹都一定好想家姐快D好番先.

雖然正日無慶祝, 好彩年初一時媽媽都有買蛋糕去太婆屋企同妹妹預祝生日, 總算已經切過生日蛋糕嘛.

至於正日當日, 因為妹妹留咗喺婆婆屋企, 所以就無慶祝喇, 婆婆仲話妹妹今日非常乖呢...  叫佢影張相Send俾媽媽仲笑成咁嘅樣, 而媽媽無見妹妹足足一日, 亦真心覺得非常掛住妹妹!!

黎緊契爺契媽哥哥姐姐們已經約好日子同妹妹慶祝, 到時再補數啦~

踏入兩歲前後, 妹妹好像變得懂事了, 行為舉止亦變得成熟, 說話當然亦相對增加啦, 驟眼看起來妹妹已經超出實際年齡...  妹妹嘅言語發展亦已經進展到可以講句子, 雖然有D音未係好準, 不過我哋日日對住又點會聽唔明啵, 另外妹妹仲已經識得駁咀, 睇黎媽媽好快就會俾倆姊妹齊齊激死.

宜家妹妹變得好有自己主見, 只要佢想做嘅就一定要做, 想食嘅亦一定要食, 幫佢換衫多數要自己揀, 性格向來都好硬頸, 絕對係個難攪嘅小朋友, 黎緊9月開學希望有老師協助下, 可以幫媽媽手一齊教好妹妹啦.

戒片方面我哋唔太擔心亦唔會心急, 因為妹妹自歲半開始已經間中識示意去廁所, 所以返學前要戒片應該唔係難事, 而且最近妹妹濕片後仲會識叫人換片添, 哈哈!! 

食方面繼續算係唔錯, 樣樣肯試樣樣肯食, 但呢幾個月就唔太肯飲湯水, 就連婆婆都無晒佢辦法.

媽媽祝妹妹兩歲生日大快樂, 快高長大, 聽教聽話, 精靈活潑. 

爸爸, 媽媽, 家姐都超愛你啊~





我們的Facebook專頁 - 小b與妹妹b之成長日誌

新年流流慘變病病豬

年初四媽媽要開工啦, 爸爸跟倆姊妹就返咗婆婆屋企, 突然傍晚時份婆婆來電告知小B發燒呀...  @.@

不過新年流流, 睇開嘅兒科醫生要初九先開診, 咁點算好呢?!

今次真係媽媽大意, 明知新年長假期醫生會放假一星期, 但我竟然忘了要配定平安藥看門口, 真係失策.

原本以為小B只係普通發燒或發骨節之類, 因為見小B無其他病徵嘛, 咁屋企有退燒藥應該可以應付得黎, 所以未有馬上去睇醫生.  只可惜...今次嘅發燒原來又係因感冒而起, 結果只靠退燒藥當然係無用啦, 直至晚上小B除了發燒仲開始有幾聲咳添啵, 爸爸見小B越燒越熱, 越燒越攰, 就連返屋企都話無力, 緊張大師嘅爸爸當然係快手帶小B去醫院睇門診啦, 至於妹妹就先交低俾婆婆照顧, 免得去到醫院又受細菌感染. 

去到醫院...剩係登記都差不多用了半小時, 幸好等睇症又唔算太耐, 只係大約三小時左右, 比起我同事初三去睇已經用少咗一半時間.

等候期間, 呆呆滯滯, 真係好慘慘豬呢~

 凌晨一時多終於可以返屋企食藥休息啦~

每次小B發燒, 一般都會燒兩至三日, 但今次持續高燒低燒輪住咁燒, 由初四開始燒到初六, 真心有一刻驚小B會燒壞腦.

高燒時小B辛苦得只能睡在床上, 甚至向爸爸發脾氣, 不過爸爸會體諒嘅.  爸爸更體貼得半夜唔瞓親身照顧小B呢, 簡直超讚呀~

低燒或退燒時小B就會自己叫做功課...其實小B都算乖巧吧.

仲識笑, 即係無燒壞腦啦...

經過一連三日嘅擔心, 燒總算退下來, 但咳同鼻水就依舊未清, 似乎要再搵鄭醫生執手尾了.

新一年再長氣都真係要為大家繼續祈求身體健康...

最近天氣忽冷忽熱, 又正值流感高峰期, 大家一定要注意身體啊!!  





我們的Facebook專頁 - 小b與妹妹b之成長日誌

猴年大吉の大年初三

每年大年初三, 我哋都無懼赤口照去拜年, 而拜年對象繼續都係Jess姨姨一家.  ^^

例牌都係先去飲茶, 再去公園放電, 最後就上屋企玩, 不過今年就調轉由我哋去Jess姨姨屋企, 因為Jess姨姨新居入伙一年有多, 我哋都未去過呢...  無辦法啦, 屯門對我哋黎講真係太遠嘛, 平時一拖二真係有難度啊. 

4隻馬騮越大, 去到公園就各自四散, 想影張相真係難上加難~

都係上樓玩舒服D...

女孩子天性, 始終都係鍾意扮靚靚.

妹妹被家姐整蠱...

 一腳都係指甲油...

由爸爸負責陪玩, 大家都玩得好開心, 所以話...爸爸呢個角色真係好重要呢, 哈哈~

我們的Facebook專頁 - 小b與妹妹b之成長日誌

猴年大吉の大年初二 (拜神+東華嘉年華+團拜)

大年初二, 開年第一件事當然係要去拜神啦!!  :p

新一年我哋祈求陳宅事事順行, 身體健康, 家宅平安, 爸爸長賺長有, 媽媽加薪不加辛, 家姐學業進步, 妹妹精靈活潑, 所有家人親戚朋友都幸福快樂, 猴年個個如意吉祥, 行運行到落腳趾尾, 恭喜恭喜!!

拜完神...我哋就緊接下一場, 快快趕去郵輪碼頭跟姑姐一家會合, 齊齊去東華嘉年華玩過顛玩過夠.  原本約3點喺門口等, 不過我哋因為去拜神遲咗, 好彩姑姐一家先去排隊, 邊排邊等我哋, 結果排隊入場都足足用咗差不多一小時, 真係好誇張呢~

排隊入場人數眾多, 慶幸場內機動遊戲及攤位唔多人排, 但因為我哋時間有限夜晚仲要趕去鴨利洲團拜, 所以只玩咗一個機動遊戲.  另外原本家姐想玩小型海盜船, 不過妹妹見家姐玩, 妹妹又要跟住玩, 結果家姐好乖知道妹妹唔夠高玩所以就陪妹妹一齊唔玩喇, 真抵錫.

(基本上嘉年華嘅所有機動遊戲都有高度限制, 家姐過咗100cm就無問題, 但妹妹矮的的就無份玩喇)

靚仔表哥~

 家姐與爸爸~

妹妹與媽媽~  (妹妹剛瞓醒, 勁呆豬)

其餘大部份時間我哋都主要係玩攤位擲公仔, 最後我哋用$400成功贏得5隻細公仔返屋企, 抵抵抵.

新年最緊要就係大家開心嘛.  ^^ 

玩完當然要影張大合照啦, 可惜呢個時候小B已經電力秏盡, 唔願影相.

最後, 我哋齊齊返太嫲屋企團拜兼食開年飯, 開開心心又一日.





我們的Facebook專頁 - 小b與妹妹b之成長日誌

猴年大吉の大年初一

恭喜發財~

陳氏一家祝大家身體健康, 心想事成, 萬事如意, 大吉大利, 財源廣進, 仔女聽話...

恭喜恭喜!!

我們的Facebook專頁 - 小b與妹妹b之成長日誌

御用髮型師

因為爸爸嘅關係, 倆姊妹自少就有個免費御用髮型師, 可惜臨近年尾大家都忙, 而且我哋又太遲先帶倆姊妹去搵Yan叔叔剪頭髮, 結果Yan叔叔間髮型屋實在太爆場啦, 咁既然Yan叔叔又唔肯收我哋錢嘅, 就無謂打攪Yan叔叔啦, 唯有返屋企等倆姊妹嘅另一位御用髮型師...爸爸操刀吧.

呢倆姊妹剪頭髮時表情多多, 真係可愛到不得了!! 

雖然小B強烈要求想剪短頭髮, 但今次由爸爸操刀就無謂大剪, 兩個都修少少前陰就算了.  留待下次先再去搵Yan叔叔大剪吧, 始終媽媽唔係好信得過爸爸嘅手勢呢...哇咔咔咔~  :p 





我們的Facebook專頁 - 小b與妹妹b之成長日誌

年廿八 (洗邋遢+團年飯+行花市)

今年嘅年廿八真係過得非常忙碌又非常充實, 好彩爸爸已經開始放假, 如果唔係得我一對手又要應付倆姊妹, 相信應該會有好多嘢都做唔切或做唔到...

今日一早先去辦年貨, 然後快快趕返屋企進行大掃除, 原本一心打算清玩具同清細房雜物, 可惜最終因時間關係最想做嘅呢兩件事都未能夠完成, 而媽媽我亦只係做咗一D表面功夫, 至於爸爸就真係好抵讚喇, 因為佢負責完成洗廚房同洗廁所抽氣扇嘅重任嘛.  爸爸仲襯機讚自己...話我嫁到佢真係好幸福喎, 因為佢話唔係個個男人都肯幫手做家務同湊女, 而佢就覺得自己喺呢方面做得算唔錯 (真係好唔知醜呢, 哈哈).

大掃除完成後, 我哋又要趕去香港仔食團年飯啦, 其實香港仔嘅酒樓唔多, 而大時大節亦都相當多人, 所以今年我哋都只係Book到食首輪 (6:30), 不過都好嘅...早D食完一家人又可以去維園行花市嘛...

我哋大約9:30左右去到維園, 雖然人係多, 但我哋都覺得仲可以接受, 未算非常迫, 起碼我哋都仲可以埋到攤檔買嘢, 不至於企喺中間任人擺佈.  :p

雖然上年都有帶妹妹去行花市, 不過當時妹妹仲細, 應該唔知發生咩事, 相反今日大個女啦, 仲行得非常開心...

好快...我哋就有收穫啦, 爸爸揀咗一盤蘭花, 今年嘅花又真係唔算貴啵~

原本婆婆話行花市梗係要一人買一個氫氣球先似樣, 但拎住氫氣球搭車真係唔方便, 所以最終爸爸改咗一人買一個風車...

行咗個幾鐘越夜越多人, 而且要抱住妹妹行實在係好攰, 所以未行晒都決定要走人了~

唔講真係唔知, 我哋屋企好似係第一年擺放年花.  :p

 難怪呢倆姊妹都忍唔住話要影相呢, 哈哈!!

我們的Facebook專頁 - 小b與妹妹b之成長日誌

美贊臣Cook Book

多謝PR姐姐為我們家送上一份精美用心嘅新年禮物...

內裡附有:
- 高貴大方嘅心想事成靚靚利是封
- 精美月曆
- 實用無比嘅Cook Book

真心覺得呢份禮物好正呢~ 

說真的...對於一個無飯煮婦嘅我黎講, 收到Cook Book真係最實際不過, 因為我並唔係有心想做無飯煮婦, 而係我真係唔識下廚所以先被迫做個無飯煮婦嘛.  宜家有咗呢本Cook Book, 應該對我入廚會有丁點幫助吧, 哈哈!!  

就等我為大家介紹一下呢本Cook Book啦...

呢本Cook Book除咗有嬰幼兒不同階段嘅發展資訊外, 仲有介紹嬰幼兒喺不同階段進食上嘅注意事項.  同時更附有大量食譜, 真心不得不讚啊.

簡單有營嘅食譜, 岩晒只有放假時才需要下廚嘅我...

簡單易製嘅小食...

另外仲有一D適合孕媽媽及坐月媽媽嘅食譜, 我真心想推介呢本Cook Book俾身邊朋友. 

其實剛剛有幾位媽媽同事見到我呢本Cook Book後都讚不絕口, 因為佢哋同我一樣都係唔識煮飯嘅無飯煮婦黎, 所以呢本Cook Book真係好岩我哋, 哈哈~





我們的Facebook專頁 - 小b與妹妹b之成長日誌