K1上學期家長日

眨下眼上學期已經完結, 經過一輪評估後, 又係時候見家長嚕~

雖然第一次參與呢間學校嘅家長日, 不過已經無去年第一次時咁緊張, 加上一直以黎小B喺學校嘅表現都好好, 所以媽媽亦都非常放心.

喺等候見家長期間, 見小B同其他同學仔相處唔錯, 跟某幾位女同學感情更加係好到不得了, 連家長們都要走過黎認識小B, 真係估唔到原來小B都幾受同學歡迎啵.
(見到個囡性格咁開朗, 真心覺得好欣慰)

今次整個見家長過程大約15-20分鐘, 而老師俾小B嘅評價亦都相當正面, 讚佢聰明叻女悟性高, 性格樂天又愛笑, 仲好識照顧同學仔, 喺學校都算得老師歡心呢...

至於評估報告方面, 中英數各方面表現良好 (幸得媽媽於評估週前有陪溫習), 大小肌肉發展亦唔錯, 老師話整體而言小B表現尚算優異, 但創作力就好一般囉...不過呢點我絕對理解嘅, 因為媽媽我都係個創作力偏低嘅人黎嘛, 哈哈!!

雖然整體表現係唔錯, 但其實都有地方係需要繼續進步架...例如要培養讀書興趣, 學習獨立處理事情等~

另外至於專注力方面, 小B亦明顯比去年N班時好, 當然遇上無興趣嘅事時都係難以專注, 但最起碼今年已經無再俾老師投訴.

黎緊下學期媽媽會同你再一齊繼續加油努力, 希望下學期嘅家長日會得到更多讚美聲音.  :p

我們的Facebook專頁 - 小b與妹妹b之成長日誌