2015年7月31日 星期五

值得留意的家居保險

以前仍住在娘家時, 我都有幫娘家買過家居保險, 不過後黎到我搬咗, 婆婆又覺得買咗都無用, 加上又要每年續買, 所以買買下就無再繼續買落去喇.  當然一直相安無事就無所謂啦, 但萬一有起事上黎, 買咗家居保始終都叫有個保障嘛...

就好似娘家最近咁...屋企家電年紀開始大, 好多電器都相繼排住隊壞, 先有電視機, 洗衣機, 電熱水爐, 最後更加連雪櫃都壞埋, 真係黑仔到你唔信.  雖然家電用得耐會壞好正常, 但係最近我上網見人講, 原來有D家居保連雪櫃壞咗都可以有得Claim架, 當然有關家居保險計劃內容只保障家電因火災、水浸、水渠爆裂、颱風、盜竊或意外導致嘅損失或毀壞先有得賠啦, 所以我都真係要認真考慮一下幫娘家買番份家居保先得喇, 而且婆婆亦有心打算遲下裝修, 萬一裝修期間有D乜野損毀都叫有個保障嘛...不過有關計劃只保障小型嘅室內裝修工程, 即是工程期以不超過兩個月為限, 賠償額通常以每件家具/家俬計算, 例如每件物品以$100,000 為上限.

市場上保險公司多的是, 但邊間先係最好呀?!

要做個精明消費者, 當然要自己下點功夫做功課啦...唯一辦法就係逐間比較.

以前我幫保誠買, 不過究竟保乜我真係唔太記得, 因為我懶囉, 所以乜都依賴晒交俾Agent處理, 但後黎當身邊出現有投身保險嘅朋友之後, 我就知道自己蠢咗喇.  宜家每買一份保險我都會認真問清楚架...

今次大大話話都有比較過10間8間公司對於家居保嘅保費, 如保誠, 三井, 中銀, 藍十字, 蘇黎世等等等等, 但以我娘家呎數黎睇, 平則有$4xx (富衛), 貴則有$14xx (安盛), 雖然當中保障金額及保障範圍都有所不同, 但我以娘家嘅需要黎研究, 我覺得富衛比較適合, 最重要當然係價錢平啦, 因為今次提出再買家居保嘅人係我, 當然保費就由我來負責, 而且適合娘家嘅保障範圍亦都已經足夠.

富衛特色:
- 最平, 實用面積1000呎以下劃一收費 $420
- 屋企裝修時會包括裝修材料
- 搬屋期間搬運過程中整壞/損毀嘅東西有得賠
- 如屋企有意外, 需要搵臨時居所或住宿有得賠
- 家傭財物有保障
- 重點...因冰箱意外停電或故障而壞咗並需重新購買嘅食物都可以賠

想了解多D計劃詳情嘅話, 可以Click入去產品小冊子睇睇.

富衛網上投保平台
家居保險
富衛Lifestyle Blog

以下是消委會提提你, 大家記住留意呀!!

家居保險保費差額大, 最勁相距千元

買家居保 要清楚保障範圍

家居保險多設墊底費






我們的Facebook專頁 - 小b與妹妹b之成長日誌

2015年7月30日 星期四

N班觀課日

等了多個月, 終於都等到觀課日啦......可惜因地方限制問題, 所以觀課只能接待一位家長, 而原本出席嘅當然就係媽媽我啦, 點知爸爸當日竟然放假啵, 小B見爸爸唔洗返工, 就指明要爸爸去觀課, 最後媽媽就只好讓位俾爸爸去喇!! 

今日觀課活動主題係 - 愉快有效學習

學校安排了早禱後嘅時間俾家長觀課, 據爸爸講述, 當老師安排家長入課室觀課時, 小朋友們同班主任已經正準備進行語文活動之故事閱讀, 期間老師亦有教小朋友發音, 如:碗, 哇, 喂, 水壺, 泳等W音嘅字.  而老師亦有要求每位小朋友跟住讀, 看看他們是否能夠準確發音, 今次小B講W音嘅發音字都尚算清晰, 不過老師亦都有話小B對某幾個音嘅發音字仍有待改進, 例如N音, S音等嘅字, 小B大部份都未能準確讀出呀, 唉~~~

而呢班N班小朋友亦都好叻叻, 雖然今日有家長觀課, 但係佢哋每一個小朋友都依然可以坐定定留心聽老師講, 未有受家長們影響架, 抵讚!!

語文活動完畢, 然後老師就叫小朋友分成兩組, 一組玩貼貼紙油顏色, 一組就玩蒙特梭利教具, 竟然...想玩貼貼紙油顏色嘅只得三位小朋友, 其中兩位都係新插班生, 至於其他小朋友全部都話要玩蒙特梭利教具囉, 再一次証明我家小B對畫畫油顏色真係零興趣, 好彩媽媽無迫小B去上畫班咋.

最後學校安排家長跟校長進行觀課後討論, 雖然校長都有問家長們對今次觀課嘅意見, 不過大部份家長都無發表意見啊, 而且我同爸爸都覺得揀得呢間學校嘅家長一直似乎都幾滿意學校同老師們對小朋友嘅教法, 再者揀得Happy School嘅都唔會係怪獸家長, 只希望小朋友能夠做到愉快學習便可.

說真的, 我, 小B爸同小B都真心好鐘意呢間學校, 但我又唔會話特別要推介俾其他家長, 因為我知道現今有好多家長都唔認同俾小朋友讀Happy School係正確嘅選擇, 覺得Happy幾年之後上小學條路會好辛苦, 所以都係等家長們自己去衡量, 自己去判斷乜嘢學校先係最合適自己小朋友啦.

小B今年就讀得好Happy喇, 希望明年妹妹都同樣讀得Happy啦!!





我們的Facebook專頁 - 小b與妹妹b之成長日誌

2015年7月29日 星期三

Water Babies Playgroup初體驗

剛過去嘅星期六, 我哋有幸獲史丹福游泳學校邀請出席Water Babies Playgroup活動.
唔講唔知其實我家倆姊妹都好鐘意玩...水架, 所以當收到邀請一刻媽媽我當然馬上答應啦, 其實爸爸一早已經講明要倆姊妹遲吓去學游水, 因為學識游水就等於學識多一種求生技能, 所以爸爸話學游水係少不得嘅, 不過喺未正式去學游水之前, 大前提就係一定要令佢地唔驚水, 所以當有時間都盡量想多帶佢哋去泳池或者沙灘玩.

講番今日活動, 我哋換好泳裝...就準備去泳池上堂啦~

(原本今日妹妹都係著三點式架, 不過臨早一晚先發現原來泳衣唔岩身囉, 好彩之前朋友送咗呢件密實游水衫俾妹妹, 妹妹先不至於無衫著咋, 哈哈!)
 活動開始前, 當然要影張相留念啦...
活動上我哋仲巧遇幾位朋友仔.  ^^

妹妹嘅212朋友~
媽媽嘅Blogger朋友~
開始時, 首先係由余Sir為大家講解一下要注意嘅事項, 水中安全技巧等, 特別係喺水中抱住幼兒嘅正確姿勢, 你睇大家幾留心聽書...
之後我哋就逐一準備落水進行活動啦...
今次真係要多謝PR姐姐幫我安排另一位教練Ray哥哥照顧小B, 小B先可以一齊落水咋, 由於呢個Water Babies Playgroup係需要一位大人照顧一位小朋友, 而爸爸今日又要返工, 所以...真係唔該晒Ray哥哥呢!!  ^^
好啦, 落水後大家都認真留心聽余Sir指示去做...
先黎個水中跳, 好讓幼兒熟習水性, 你睇B Be幾開心幾Enjoy, 我哋妹妹太含蓄啦~
媽媽協助妹妹爬泳...
好彩Ray哥哥好友善, 所以小B一D都唔驚, 而且仲玩得好開心添啵...
 有圖有真相...
學習手握池邊移動...
余Sir正在教導媽媽正確握住妹妹進行手握池邊移動嘅手勢...
齊齊踢踢水...
以下呢個環節媽媽最Like, 因為除了可提升幼兒平衡及協調能力之外, 仲可讓幼兒嘗試潛水, 不過因為大家今日才第一次上堂, 所以唔係個個幼兒都成功做到, 而值得加許嘅就係B Be喇, 因為B Be成功呀, 哈哈~
最後大家學習雙手輔助幼兒背浮...
其實呢個Water Babies Playgroup真係幾好玩, 仲可以提升親子關係, 如果年齡介符6個月至3歲, 不妨考慮參加此課程, 詳情可入史丹福網頁睇睇......愛美媽媽真心推介!!

Water Babies課程特點
可以讓父母摒除手提電子通訊產品嘅干擾, 與孩子一起全情投入於課堂中, 透過一系列嘅水中學習, 可以提升孩子與父母嘅親密接觸及情感交流, 亦可以加強孩子嘅安全感, 減少孩子成長中不必要嘅震驚..不安或羞怯, 令孩子敢於嘗試新事物.

好啦...開心好玩嘅時間總係過得特別快, 又係時候要講Bye Bye啦~





我們的Facebook專頁 - 小b與妹妹b之成長日誌

2015年7月22日 星期三

淘書分享

書展剛剛結束, 雖然我真係好想去, 但可惜我實在抽不了時間出來去逛書展, 但我又確實突然心癮起好想買圖書俾倆姊妹啵, 幸好同事剛巧話想淘書, 所以我就順手搭單一齊淘喇.  由於初次淘書關係, 我唔敢買太多, 只抱住一試嘅心態來淘幾本, 若然質量好的話日後才再繼續淘, 結果...收書時, 發現質量出孚意料的好, 完全跟正品沒分別!!  ^^

一本妹妹, 一本家姐, 等佢哋出街食飯時可以坐定定兼坐耐D, 有得睇又有貼紙貼, 相信應該可以讓她們打發時間吧.
唔記得由幾時開始, 小B就經常拿著手機看Peppa Pig, 既然係咁...不如睇Peppa Pig圖書仲好啦.
最後再隨隨便便的多揀一本, 然後店主又送一本...
對於今次淘書, 我真係好滿意呀, 等我試試倆姊妹對睇書嘅熱誠及反應後再決定淘多些吧!!





我們的Facebook專頁 - 小b與妹妹b之成長日誌

試用 - Little Innoscents Milky Whites Toothpaste 全天然有機牙膏

小B用開的牙膏剛好用光光, 而當我又正在苦惱轉換那款牙膏給小B用之時, 突然就收到這支Little Innoscents Milky Whites Toothpaste 全天然有機牙膏試用喇...真好!! 
這支由澳洲製造嘅全天然有機牙膏不含任何人造物及有害成份, 適合任何年齡人仕使用, 即使幼兒誤吞亦安全無害, 其實只要註明幼兒誤吞亦安全無害我都會考慮選購, 皆因小B直至今時今日都仲會間中吞食牙膏嘛, 原因係有人刷牙時掛住講嘢囉, 正一口水多過茶, 所以每次刷牙時或多或少都會把丁點牙膏吞進肚裡去, 而我選購牙膏就要特別留意這點啦.
 
好, 就讓我家小B馬上進行試用吧~
產品特點:
- 不含氟化物 (Fluoride Free)
- 沒有SLS起泡劑, 跟一般傳統牙膏刷起來是會有較稀嘅感覺, 但份量亦只需兩粒青豆大小
- 沒有加入任何人工甜味或色素
- 全天然成份, 有機成份高達77%
- 適合6個月以上使用

有請我家小小試用專員...陳小B出場...登..登!!
試用後, 小B話這款牙膏食落唔太甜 (再一次証明小B平時真係有吞牙膏架) =.=" , 不過就有少少辣喎, 我估應該係因為牙膏配有薄荷清香, 但小B唔識形容薄荷味, 所以就話有少少辣, 話需如此但小B還是可以接受到的.

事實媽媽亦的而且確見這款牙膏沒有之前用開那幾款牙膏多泡, 感覺用起來好像比較安全點, 不過有機嘅產品向來都係好受父母們歡迎, 所以我都會放心俾小B繼續用.  ^^

刷牙後, 小B還特意走到妹妹面前, 張大口叫妹妹聞下香唔香呢, 笑死~

好啦, 分享完畢, 希望日後再有機會同大家分享不同產品啦!!





我們的Facebook專頁 - 小b與妹妹b之成長日誌

2015年7月21日 星期二

Q嘜人氣品牌大獎

香港優質標誌局正在舉行「Q嘜人氣品牌大獎」活動, 由即日起至7月26日(星期日)投選各類您至喜愛「Q嘜」品牌, 便可參加抽獎贏取來回機票, 想知更多活動詳情, 可瀏覽活動網址: http://qmarkelitebrand.com/

獎品有單人來回首爾機票, 單人來回曼谷機票及海洋公園日間門票呀, 我都已經參加咗啦, 你又參加咗未呀?

參加方法好簡單, 大家都不妨去投票參加啦!!  ^^





我們的Facebook專頁 - 小b與妹妹b之成長日誌

2015年7月20日 星期一

戲院初體驗

近期Minions非常紅, 各界造勢都相當凌厲, Minions絕對可以話係無處不在, 結果就連我家小B都火速愛上.  媽媽見小B 3歲半人仔都未去過戲院睇戲, 所以今日就即管相約朋友仔們一齊去睇Minions喇.

去戲院前, 我哋仲喺新世紀巧遇佢哋添啵, 有個人仔二話不說就話要影相啦...
其實商場仲有好多Minions嘅影相位, 可惜我哋趕時間去上跳舞班, 實在無時間排隊, 所以草草影幾張相就拖著小B離開.

跳完舞食過Lunch, 我哋終於都向戲院進發啦, 事前當小B知道我會帶佢去睇Minions時, 幾乎每一日都問住我幾時去睇, 如今終於都俾小B等到, 小B當然開心啦.

去到戲院見正言哥哥, 善兒姐姐未到, 小B就不停問, 點解咁遲架, 就黎要開場啦, 宜家D人入緊去啦.  (好明顯有人好心急囉, 哈哈!!)

見佢不停問, 我就唯有同佢影下相, 分散一下小B注意...
哎呀, 原來小B已經有一米高啦, 下次睇戲媽媽要幫小B買飛了...
(由於今次係小B第一次, 所以我預早已經問咗小B幾次, 想自己坐還是媽媽抱住坐, 結果膽小嘅佢又未曾了解過戲院這地方是怎麼樣一會事就梗係揀媽媽抱住坐啦.)
等呀等...等呀等...正言哥哥同善兒姐姐終於到咗, 快快影張合照就齊齊入場睇戲啦.
今次雖然係小B嘅戲院初睇驗, 但媽媽我非常有信心小B絕對唔會中途叫離場, 所以都好放心帶小B去睇戲, 而結果小B又真係好享受整個過程啵, 下次再有好睇嘅戲一於帶小B去睇先得.  ^^





我們的Facebook專頁 - 小b與妹妹b之成長日誌

2015年7月16日 星期四

妹妹B ~ 17個月

12.07.2015

16個月成長紀錄才剛記下不久, 現在又要寫17個月啦...

明明上個月跟家姐相處還蠻融洽的, 突然今個月開始變得好惡呀, 一有少少唔鐘意就打家姐, 甚至扯家姐頭髮, 幸好家姐大人有大量, 唔同妹妹計較, 如果唔係真係一日打交打到黑都似, 究竟點解我哋妹妹豬會咁惡架?!  其實宜家妹妹已經完全明白大人講嘢, 所以只要妹妹一做錯我哋就會鬧, 如果出手打家姐時, 甚至會打手仔教訓佢, 只可惜妹妹完全唔驚啵, 你越鬧, 佢就越硬頸, 仲要擰開面唔理你, 如果打佢手仔呢, 佢就犀利到可以完全唔縮, 有時打到自己都覺得痛, 但妹妹依然可以無反應.  唉...點解妹妹會咁難教架, 真係一山還有一山高, 我要點教先可以令妹妹溫馴D呢?

另外呢個月, 妹妹第一次去廸廸尼, 回想起其實我哋都真係對倆姊妹幾公平, 記得小B差唔多年紀曾經去過嘅地方, 我哋大部份都有再帶妹妹去一次, 所以我哋絕對無大細超架.

乖乖嘅妹妹真係好可愛, 可惜妹妹乖嘅時間唔多~~~~~~~~
好...又黎記錄一下發展進度先!

體重: 約23磅 (自己磅)

食:
食方面還算過得去啦, 不過夜晚飯開始越黎越勞氣, 有幾次媽媽忍唔住餵到發火, 最後更加索性收起唔再餵.  雖然係咁, 但我哋絕對唔需要擔心妹妹會唔夠飽, 因為佢個口永遠都係唔識停嘅, 宜家更加識得去放零食個位自己偷嘢食添啵, 試過幾次...妹妹自己偷咗麵包食, 但到差唔多食完先俾婆婆發現, 厲害厲害.  有時又會偷餅, 然後自己無聲無色走上床食, 雖然看似好好笑, 但見到一床都係餅乾碎就真係笑唔出, 因為我哋又要做餐死.

訓:
早上約8:00 - 9:00起床, 午睡一次, 大約1.5 - 2小時, 晚上11:00見到媽媽開奶就會自動自覺上床食奶訓覺. 

活動能力:
大致良好, 但有個問題唔知算唔算係一個問題, 就係自妹妹10個半月開始識行到宜家, 妹妹都好似唔係行得好穩咁, 經常會跌跌撞撞, 有時好明顯就係妹妹自己心急, 但有時又究竟係乜野原因呢?!

講:
跟上個月差唔多, 暫時未太覺有新字加入.

性格:
脾氣激大, 一唔鐘意就會丟嘢, 咬人或打人, 唔知點樣先可以教番好.  (媽媽頭痛+苦惱中)
有日喺街發脾氣丟風扇, 結果連風扇都丟壞.

健康:
今個月最安慰就係雖然家姐病咗足足一星期, 但慶幸妹妹未有被感染.  (低調低調, 千萬記住唔准小氣呀)

記錄完畢, 下個月希望會係讚多過鬧啦...





我們的Facebook專頁 - 小b與妹妹b之成長日誌

熱爆廸廸尼

10.7.2015

星期四"蓮花"突襲, 原本以為今日嘅廸廸尼遊要取消, 幸好"蓮花"來去匆匆, 結果落風球後嘅天氣好到不得之了, 只是早上稍為有幾陣驟雨, 而當我哋準備出發時亦已經轉為天晴啦...呵呵!!

話咁快, 我地就到達廸廸尼, 第一次去廸廸尼嘅妹妹...對身邊所有事物都感到好新奇. 
每次行到呢個位媽媽都好想影張靚相, 只可惜倆姊妹極度唔合作, 齊齊唔肯上鏡~
入園後, 小B見到米奇米妮第一件事就係話要去排隊影相, 但既然難得你叫影相, 即使肚餓都要排咗先啦.

雖然岩岩入園, 不過天氣熱到爸爸不斷叫好辛苦, 而小B亦曬到無晒表情, 至於妹妹就因為初次見咁大隻公仔而嚇得要婆婆抱實.
同米奇米妮影完相後, 快快去租架BB車, 然後就去開餐嚕.

食完Lunch, 剛好到飛天巡遊時間, 雖然我哋霸唔到最前排位置, 但倆姊妹喺後面都一樣睇到入晒神, 傻傻的向表現隊伍揮手, 好好笑.

巡遊完畢, 我哋就開始四圍玩下, 可惜今日我同爸爸一人湊住一個, 實在無多餘嘅手去影相, 唉~~~
一開始玩妹妹就扭眼訓, 唔肯自己坐馬馬...結果轉咗幾圈, 妹妹已經迅速暈咗 (其實係瞓咗先岩)  ^.^
既然妹妹瞓咗, 我同婆婆就選擇揀個陰涼地方休息, 等爸爸同小B去玩, 如果唔係3x度天氣仲要我揹住個23磅嘅妹妹周圍行, 真係輪到我暈低都似.

呢個時候爸爸帶小B去咗反斗奇兵大本營, 原本以為爸爸會同小B玩降傘, 可惜爸爸話覺得小B會驚, 所以只係玩咗轉轉彈弓狗, 而第一次玩彈弓狗嘅小B事後仲猛話好玩, 之後就開始樣樣都話要排要玩啦, 哈哈~

大約45分鐘後, 妹妹就被媽媽叫醒, 跟住我地就去咗探險世界坐船, 欣賞森林河流之旅, 不過唔知點解小B竟然驚喎.  ~.~"

直至目前為止, 其實唔係玩咗好耐, 但係兩隻馬騮都已經開始唔願行啦...
(其實我哋選擇帶晒兩個去廸廸尼, 真係一個唔太明智嘅決定, 因為真係好辛苦.)
今日我哋入園後無Plan好就四圍行, 完全係見到邊度少人就去邊度玩, 咁岩行過見巴斯光年星際歷險唔多人排隊, 所以就入咗去玩喇, 但重申...小B一早已經話明唔想玩, 因為佢驚巴斯喎, 結果咪全程都要爸爸攬住囉, 相反妹妹同我坐, 妹妹就好叻叻, 入到去總係覺得好新奇.
之後再去幸會史廸仔, 宜家小B已經大個女啦, 完全知道講緊乜做緊乜, 所以見完史廸仔後仲不停話史廸仔講嘢好好笑呢...

最後我哋再去埋小小世界, 小小世界入面真係好靚架, 雖然之前都有睇過, 但係我都係覺得好靚啵, 結果妹妹仲睇到唔捨得走, 臨離開要Say Goodbye時扭計要繼續坐船.
呢個妹妹真係越黎越懶, 今日全日每行幾步就要抱一抱, 你舒服時真係難為了媽媽!!
既然見未夠鐘睇光影匯夜間巡遊, 咁岩又見到多位卡通人物, 所以我哋就去咗排隊影相打發時間喇...

手拖手同米妮做個好朋友.
米妮想用鼻鼻碰小B, 點知小B整個人變得僵硬起來, 哈哈~
媽媽抱住, 妹妹終於都刻服到唔驚啦...
同米妮影完, 然後再同維尼熊影...
突然Pose王上身...
好啦, 最後霸定靚位睇光影匯巡遊...
巡遊完畢就係時候要走人, 大家今日都玩到好攰, 要快快返屋企休息啦.





我們的Facebook專頁 - 小b與妹妹b之成長日誌