尋找兒時回憶之夜遊荔園

繼星期五熱爆廸廸尼(廸廸尼Blog後補), 星期六反轉Play House後, 星期日媽媽再挑戰自己體能, 帶倆姊妹去遊荔園!!

其實如果唔係婆婆開聲話想去荔園, 我想今次應該都未必去得成, 因為天氣真係好熱, 結果今日一拖再拖之下, 我哋都拖到6時多才出發,即使夜晚才到荔園, 但大家依然一樣熱到汗流浹背, 若然中午時份黎, 我想應該會熱到暈低兼中暑.  不過為咗可以多點時間帶倆姊妹周圍去玩, 媽媽都已經克服緊怕熱怕曬嘅心理, 盡量多帶倆姊妹到戶外玩唔再經常宅喺屋企, 始終小朋友都應該係要同陽光玩遊戲嘛~

好, 入正題先....

當我哋一入荔園門口,就見到大象Tino啦.

雖然大象係假, 不過都有好多人圍觀, 而且每當有人將香蕉掉中Tino口時, Tino就會噴水, 所以好多小朋友都玩水玩得好開心, 還特地走上前讓水花濺中自己呢, 哈哈~

 睇完大象, 小B話要玩旋轉木馬...

但當排到時, 又話想同妹妹一齊坐... ~.~"

最後因為倆姊妹都唔過1.1米, 所以需要媽媽陪同.

然後當然要坐充滿懷舊味道嘅叮叮船啦...

雖然荔園嘅遊戲大部份都屬於小兒科, 但又未至於樣樣都適合年幼嘅倆姊妹玩, 所以我哋主要都係四周圍行下.

是日合共玩了3個遊戲, 消費共$200, 雖然收費唔太合理, 不過個人而言勉強可以接受啦, 但若然每個遊戲都玩的話就真係唔平啦, 所以認真的...去一次就夠了.

我們的Facebook專頁 - 小b與妹妹b之成長日誌