小B成長之3歲6個月

不知不覺間我家甜心小B已經3歲半, 還有不足兩個月就要升上K1啦.

小B雖然只得3歲半, 但從外表看起來, 媽媽總覺得小B帶點少女味, 或許媽媽要幫小B打扮得可愛一點才行啦, 哈哈!!  :p

假如我唔認識小B, 我想我會估小B有4歲多...

(哎呀, 咁咪即係代表小B好老積囉 ~.~")

基本上小B嘅發展大概跟同齡小朋友差不多, 所以媽媽一直都無太擔心, 結果咪無特別寫低小B嘅成長紀錄囉, 一句到尾...都係媽媽懶.

暫時媽媽只係比較擔心小B發音方面唔清晰嘅問題, 不過學校老師話可以再觀察多半年時間, 若然4歲多依然未見改善才再去搵言語治療師糾正, 既然老師都這樣說, 那我就唯有繼續觀察, 明年再算吧.

至於食方面真係越黎越令人頭痛, 好多時呢樣又話唔食, 嗰樣又話唔食...  明明自己喺學校會自己食飯, 出街又會因為怕人笑而要求自己食飯, 但偏偏喺屋企食飯就一定要餵, 真係激到你暈低, 老師話呢個問題主要係因為妹妹所致, 所以無得迫只好慢慢黎.  而小B食嘢最衰就係, 咬兩啖就話吞唔到, 相反佢鐘意食嘅就幾大件幾硬都無問題, 擺明玩嘢.

另外原本之前媽媽已經嘗試過幫小B戒用奶樽飲奶, 不過只維持了一段短時間, 唔記得由幾時開始, 又已經變番用奶樽啦.  至於睡前奶明明都戒了好一段時間, 但小B間中心癮起時都會要求飲奶架, 結果我哋無佢辦法, 唯有佢要求飲就開俾佢, 佢無要求飲我哋就側側膊囉.  除非妹妹都一齊唔食奶啦, 否則小B看來應該都係唔會成功戒到奶架喇.

最後媽媽真係希望小B可以聽教聽話, 唔好再成日蝦爸爸, 爸爸平日少見小B, 所以就縱容小B嘅橫蠻無理, 但媽媽我絕對唔容許囉, 所以暫時媽媽湊時小B可以好乖巧, 相反爸爸湊時, 小B就會變身成野蠻公主, 究竟點樣先可以搵個平衡點呢?!

好...報告完畢, 期待下個月嘅小B會有進步, 壞習慣方面亦會有改善.





我們的Facebook專頁 - 小b與妹妹b之成長日誌