美食博覽2016

基本上每年嘅美食博覽我都會同屋企人一齊去, 一黎可以當係家庭樂, 二黎又可以陪婆婆入貨, 三黎仲可以帶倆姊妹去見識一下大場面, 所以行美食博覽絕對係一個不錯嘅假日活動啊!!  只可惜媽媽今日抱病在身, 戰鬥力近孚零, 但為咗唔想掃興, 而我又覺得身體還可以應付到, 咁就即管去行一陣啦...

去到會展已經5點, 現場人山人海非常擠迫, 幸好我醒目叫爸爸帶部BB車, 咁就可以唔洗排隊行特別通道直入喇, 你知啦要排隊同唔洗排隊真係爭好遠架嘛~

一入到會場小B已經問有乜野食???  呢個小朋友係咪真係咁鐘意食野呀?!?!?!?!

就係咁, 我哋周圍買小食, 食飽有力氣先再拼...

呢倆姊妹今日由頭食到尾, 完全無諗過美食博覽竟然會係咁適合我家倆姊妹囉, 最終大家連晚餐都幾乎唔洗食...勁呀!!

而今日我同婆婆都拼得大包小包, 滿載而歸咁返屋企架~  ^^





我們的Facebook專頁 - 小b與妹妹b之成長日誌

妹妹的戒片大作戰 (1)

還有不足一個月, 妹妹就要返學啦...對於仍未戒片嘅妹妹, 我確實有點擔心, 皆因家姐當年返N前, 學校真係有叫返學時唔好著片架, 但妹妹明明就係識叫去廁所, 不過佢偏偏就係唔肯叫囉, 所以我怕帶多多底褲校服褲都唔夠俾妹妹換.  幸好今年學校話, 如果小朋友真係完全未準備好戒片嘅, 就先著學習褲, 等學校帶小朋友排洗時, 老師或嬸嬸較容易處理, 唔知係咪因為學校有太多小朋友瀨濕要嬸嬸清潔, 所以今年可以著學習褲呢, 哈哈!!  不過學校最終仍然補充一句...就係家長們最好喺開學之前繼續努力幫小朋友戒片喇. 

聽到學校咁講, 我知我哋唔可以再愛理不理, 真係要的起心肝幫妹妹戒片啦~~~

就係咁, 媽媽特地去買左多條公主底褲俾妹妹, 利誘妹妹唔好再著片片, 點知鐘意公主嘅妹妹一見到公主底褲之後, 真係肯唔再著片喎!!

其實妹妹早於歲半時已經時不時識叫去廁所(veevee/poo poo), 當時我心想妹妹咁醒目, 唔通咁快就想幫媽媽慳尿片錢, 點知妹妹叫咗一排之後就無再叫啦, 而且我哋叫佢唔好著片都唔肯, 明明已經示意咗想veevee或poo poo, 但係都要喺片片解決先安樂, 真係無晒佢辦法.

星期一開始, 婆婆終於幫妹妹開始咗戒片大行動, 暫時只係頭一兩日偶有失手, 不過當婆婆話俾妹妹知如果再瀨濕就無晒公仔底褲著, 如是者...去到第3, 4日妹妹已經無再瀨啦, 而且要去veevee嘅時候仲識得走黎搵媽咪, 話要去痾尿尿添.  嘩..嘩..嘩..睇黎妹妹應該好快可以成功戒片, 唔洗再做臭Pet豬啦, Yeah~

  




我們的Facebook專頁 - 小b與妹妹b之成長日誌

失驚無神睇夜診

我家小B身體毛病總係特別多, 根據統計, 小B每個月都必定會探醫生一次, 究竟點解小B身體會咁弱呢, 唉~~~~~~~~

星期六時大概已經意識到小B開始作感冒, 但病徵唔算明顯, 只係有幾聲咳, 因為鄭醫生放大假關係, 打算再過幾天未好先去睇醫生.  
 
然後到星期日中午, 小B右眼突然又紅又腫勁多眼屎, 於是快快手帶小B去藥房買眼藥水滴.  點知夜晚臨瞓前, 連左眼都開始腫啦, 仲要狂流眼水, 小B好驚嘅同時其實我都好擔心, 最終都係等唔到第2日, 又要帶佢去醫院睇夜診...

一路等睇醫生嘅時候, 唔知小B係咪好驚會盲呢?!  佢不停問住幾時先有得睇醫生?  姑娘幾時先叫我名? 

就係咁佢自己喺度來來回回行咗好多次... 

好彩唔係大時大節, 人唔算多, 最終大約一小時左右就有得見醫生喇.

醫生話, 小B都係感冒啦, 眼睛方面就係結膜炎, 有機會係因感冒引起, 亦有機會因摔眼所致. 

好彩滴咗兩次眼藥水後, 雙眼總算好番, 但感冒就仍然未清, 又發燒又狂咳囉!!

其實有無辦法可以令身體弱嘅小B可以變得強壯D呢?!





我們的Facebook專頁 - 小b與妹妹b之成長日誌

變靚D~

暑假已經過咗一半, 仲有唔夠一個月就要開學, 襯有時間梗係要帶兩位小姐去剪頭髮扮靚靚準備開學啦...

家姐由細到大對於剪頭髮都唔抗拒, 因為貪靚囉, 所以每次去剪頭髮都會自動波乖乖坐好.

一直以黎帶倆姊妹去剪頭髮都係去爸爸朋友間髮型屋剪, 但星期日生意比較多, 我哋呢D拍下屁股就走人嘅客仔, 真係唔好意思去打攪人.  最終今次媽媽帶咗佢哋去搵靚仔哥哥, 呢個靚仔哥哥大大話話都幫爸爸媽媽剪頭髮剪咗十年以上有多啦.  :p

你睇家姐幾乖...

家姐剪完就到妹妹, 之前每次帶妹妹去剪頭髮都唔成功, 所以由細到大每次剪頭髮都係爸爸操刀, 近排可能大個女咗, 好多嘢都好肯去嘗試, 變得叻咗.  今次佢見家姐剪完頭髮, 竟然自動自覺準備埋位, 真心覺得妹妹越大越叻叻呢.

哥哥仲話妹妹坐得好定, 完全唔似未剪過頭髮...  ^^

家姐唔肯剪太短~

 妹妹就變咗小丸子~

 剪完頭髮自我感覺非常良好, 大家都以為自己變咗靚女, 哈哈!!

我們的Facebook專頁 - 小b與妹妹b之成長日誌

暑假篇之好朋友來我家

剛過去嘅星期六我咃又約咗同學仔一齊玩啦, 今次係小B第一次有同學仔黎我哋屋企呀, 事前小B表現得好開心好期待, 雖然屋企地方唔大, 玩具唔多, 但其實佢哋只要見個面就已經好開心好滿足, 最好就係喺屋企玩大人仲可以輕輕鬆鬆唔洗捉馬騮嘛, 哈~

一見面已經開心到咁...

返到屋企就更加唔需要我哋理...

原本打算7點左右一齊出街食飯, 不過玩到6點, 3個小朋友突然要午睡, 結果...我哋就打消咗去食泰菜嘅念頭而改叫外賣小菜.

朋輩影響嘅力量真係好大, 原本幾個平日唔願自己食飯嘅小朋友, 你睇今日幾乖乖...

所以話朋友仔對於小朋友黎講都真係好緊要架, 可以互相影響互相勉勵!!

過幾日就係朋友仔4歲生日, 我哋梗係要一齊切蛋糕慶祝啦~

 老友鬼鬼~

下次再見, 應該係K2開學啦!!  :p





我們的Facebook專頁 - 小b與妹妹b之成長日誌

暑假篇之N班同學仔聚 @ 馬灣

放暑假梗係要約好朋友去玩嘛...雖然大家都已經分開咗一年, 但小朋友純真嘅友誼係唔會變架, 而亦因為呢幾位小朋友之前太好感情, 所以爸爸媽媽們就造就一個機會俾4位小朋友相聚一天喇, 結果今日小朋友當然玩得盡興啦, 而我哋大人亦都好開心啊, 唔知今年到妹妹讀N班時, 我又會唔會識到一班咁岩傾嘅家長呢?!

今日我哋去咗小朋友好鐘意去嘅沙灘玩, 原本我係打算帶齊全副武裝上陣架, 不過爸爸話唔打算俾倆姊妹落水, 最多都只係玩下沙同喺岸邊踩下水, 所以我只係帶咗兩套衫, 就連大毛巾都無帶, 而玩沙工具就由其餘兩位媽媽負責, 結果...我哋當然係失晒預算啦, 最終小B係玩到忙晒形, 由頭濕到落腳, 好彩琳琳媽有多條毛巾俾我幫小B抹身.  下次去玩真係唔可以信爸爸, 一定要做足準備呢. 

出發去沙灘前, 我哋約咗一齊食Lunch, 而今次Lunch (元氣高速線) 亦係為咗滿足小朋友而安排嘅, 我哋一家仲專登預早一個鐘去排隊攞位添, 但可能星期日嘅關係, 加上我咃人多(14人), 所以最終係要等足兩個鐘, 不過大家有傾有講時間唔覺唔覺就過咗去.

幾位小朋友一見面就馬上埋位, 嘈喧巴閉嘅一日正式開始~~~~~~~~

兩個小朋友一見面就攬頭攬頸咬耳仔, 完全無理會過其他人.

今日幾位小朋友Lunch食咗好多野, 大概係因為架火車嘅關係吧, 不過人多手腳亂, 所以未有影相, 下次一定要再帶倆姊妹去食過先得.  ^^

家姐餵妹妹, 好溫馨啊!!

食飽飽轉眼間我哋就去到馬灣啦...

原本只係玩沙...

 然後好快就一齊去咗岸邊玩水啦...

係咪好奇怪點解唔見咗妹妹呢....因為妹妹好爽咁吹住風扇涼住海風咁喺BB車午睡緊囉, 差唔多玩到尾聲, 妹妹先捨得起身, 就係因為咁, 我同爸爸全程都尚算輕鬆, 哈哈~

開心嘅妹妹同媽媽合照...

 玩到7點, 我哋回程去食晚飯, 呢幾個小朋友玩完都依然好好精力...

今日真係好開心呀, 希望我哋下個月又夾到時間組隊去玩啦!!





我們的Facebook專頁 - 小b與妹妹b之成長日誌

週年紀念日

01.08.2016

今日當大家準備迎接明天嘅開心打風假期時, 看似平靜...平靜得連我都唔記得咗今日係乜野日子.  好彩現今科技進步, 即使人腦唔記得, 電腦都仲會記得提番你, 所以真係要多謝FB提醒, 原來今日係我同老公拍拖12週年+註冊結婚7週年嘅日子呀, 好明顯我哋兩個都無咗件事囉, 哈哈~

經過每一次嘅高低起伏之後, 兩個人嘅感情亦都誇進咗一大步, 12年黎高高低低都一起經歷過, 最重要係之後一樣能夠擕手誇過.

真心多謝我老公呢12年黎對我嘅忍讓...  :p

相信黎緊一定會有更多開心美好嘅12年.

謝謝你!!  ^3^

我們的Facebook專頁 - 小b與妹妹b之成長日誌