2014年2月28日 星期五

KAWAI 日本肝油丸

自農曆新年後, 經過一班親戚塗毒下, 小B變得愛吃甜, 由從前不愛吃糖變為發糖痴, 不過媽媽我經常同小B講多食糖無益, 所以間唔中都會禁止小B食糖架, 幸好現在有KAWAI日本肝油丸...可以增強抵抗力之餘, 小B又可以當糖食, 而且這是果汁味的, 所以小B都以為這些肝油丸是糖糖來, 連爸爸試食一粒後都大讚好味呢, 總之就健康得黎又可以滿足小B啦, 就連正在餵媽媽奶的媽媽都可以食架, 因為可以補給授乳期的維他命嘛, 正呀!!

這款肝油丸含有維他命C, 能有效增強抵抗力, 同時又可以促進鐵質吸收, 絕對比起小B食糖有益得多.
大家看到小B雙手嘛...已經急不及待要拿出來試食啦.
小B: 媽媽, 你影完相未, 我要食糖糖呀!

小B: Um...終於食得, 等我試下好唔好食先.
小B: 嘩...雖然我食得樣衰衰, 但原來好好味架~~~

食過一粒後小B繼續追問媽媽要多粒, 不過小朋友每日早晚只可食一粒啵, 所以媽媽唯有將肝油丸偷偷收起, 留待明天才再給小B食嚕.

至於媽媽我呢, 除了肝油丸, 還有KAWAI日本梨の鈣丸.
這個真是正正合我需要, 因為生完BB後, 我覺得自己好像流失了好多鈣質, 又經常腰酸背痛, 而且在懷孕期間, 亦讓妹妹B搶走了大量鈣, 所以一定要補充一下才行, 否則日後未老先衰, 骨質疏鬆就慘了.

其實食這款鈣丸真的超方便, 只要每日4粒就相等於一杯牛奶的鈣質了, 絕對適合坐月中忙到連廁所都不能去的我呢.

誠意推介...有興趣的朋友不妨一試~

2014年2月26日 星期三

愛上扭計的小B

唉...當大家都以為小B好乖好生性之際, 其實小B已經靜俏俏地起革命啦!!  話說妹妹B回家已經差不多兩星期, 起初小B的確表現得好錫妹妹, 好肯幫忙去參與有關妹妹的一切, 例如開奶, 餵奶, 沖涼, 換片等等等等...  可惜近幾天小B開始變了, 雖然偶然還是會參與, 而且仍然好錫妹妹, 但我們察覺到小B在行為上出現了好大變化, 變得呷醋, 變得愛爭寵, 少少事都變得愛大哭大鬧, 完全跟之前判若兩人.  雖然我知道有初生BB回家, 對於一個只有兩歲的家姐仔來說, 出現這些行為都好正常, 但我好多時亦會因為她的無理..野蠻而大聲罵她, 因為我EQ低囉, 而且小B總是愛挑戰我底線嘛, 結果每次總是忍不住口.  雖然事後我確實感到好內疚, 但眼見小B突然變得這麼惡攪..難教, 我真的快要發瘋啦!!

其實我想講我真係無大細超, 倆姊妹都同樣愛錫, 不過爸爸見我近日經常罵小B, 所以覺得我對小B變了, 亦因為這樣, 我的確有點唔高興架.  現在小B爸對住小B時, 就好像黃大仙一樣...有求必應, 其實真的有需要這樣縱容小B嗎?  雖然我知道現在最緊要給多點時間小B去適應這種改變, 而且亦要給她更多的關心與愛心, 但我好怕自己見她亂發脾氣時又會忍唔住呀, 或許我就是個失敗的媽媽吧, 唉...

幸好小B依然緊張妹妹, 未見有蝦妹妹的行為, 看來我要花更多時間去照顧小B的感受才行喇~

昨天, 自問我花多了時間在小B身上, 結果小B情緒又真的好像好一點啵.  雖然小B看似不會呷妹妹醋, 但原來對於小朋友來說, 是沒有一個會不呷醋的, 是我太大意忽略了小B感受, 真的好內疚好內疚好內疚呀..........


2014年2月23日 星期日

12朝

話咁快...我妹妹B今日已經12朝啦!!

媽媽日日聞住婆婆煲薑醋, 實在忍不住流口水中, 今日終於12朝可以食薑醋啦, Yeah!!  不過我相信媽媽大約10日8日後就會食到怕, 因為婆婆一定每餐都會叫媽媽食, 到時媽媽一定聞到都驚呢, 哈哈~

日日都在變樣中...知道媽媽影相放上黎, 等我正正經經望鏡頭先. (≧3≦)

2014年2月21日 星期五

相親相愛

其實小B真係好錫妹妹架, 你看小B抱住妹妹時有多開心, 笑得有多甜就知道啦, 感恩小B能夠接受妹妹B成為我們家一份子, 更不會因為我們經常要照顧妹妹而覺得討厭她!!

小B...妳真的好生性, 好有家姐風範呀.
爸爸媽媽希望妳們倆姊妹可以一直相親相愛, 有商有量.

We LOVE you both~

大食妹 KO 窮媽媽

話說一直以來都沒想過自己可以餵人奶, 因為我覺得自己係個無奶之人, 所以上胎更加連試都沒有試就已經放棄, 但今胎既然是最後一次嘛, 就即管試試看吧!!  不過由於我一向抗拒埋身餵奶, 所以一開始就打算走泵媽這條辛苦路, 希望自己可以捱得住啦, 而事實亦証明埋身餵奶會好令我反感, 因為試過一次就已經被妹妹啜損了, 唉!!

一到產後房時, 姑娘問我打算餵人奶還是奶粉, 我答兩樣都餵, 但可惜QE只准2選1, 最後我選擇了奶粉, 打算回家後才再餵人奶.

而負責跟我的那位助產士張姑娘亦好好人, 知我有意思餵人奶但又怕埋身, 所以就教我在醫院時先用手擠奶, 好讓上奶容易一點, 但我實在太懶啦, 未有在每餐餵奶前做這個動作, 只是睡夠沒事做時才記得擠奶, 起初第一日得1ml, 即使唧到手軟亦只得好少好少, 所以好快就感到有點心灰, 不過當第2日再來時, 終於可以見到3ml啦...  雖然都係好少, 但見份量多了確實令我更有動力.  或許因為我記得時才擠奶, 未有兩小時進行一次的關係, 加上回家後實在忙得團團轉, 每次隔3-4小時才有時間泵奶, 結果直到今日第10日, 奶量仍只得30-45ml左右, 唉...妹妹已經食90ml一餐啦, 究竟我還有可能追到她每餐的需求嗎?  我已經連續數天一日三大碗魚湯, 不過成績仍未理想, 有經驗的媽媽們可以教我如何再增加奶量嘛?  現在一有時間我就會努力泵奶, 每次大約30-45分鐘不等...比起之前已經算是勤力, 雖知道還有小B不斷在攪攪鎮, 實在分身不了啊!!
由於現時每次只泵到1安左右, 所以暫時妹妹一日只能夠得2-3餐全人奶, 其餘時候都是以奶粉為主, 看來要做到全人奶B的目標還有很遠很遠路呢...

我要為自己打氣, 繼續堅持, 繼續努力, 加油加油!!



2014年2月19日 星期三

Just to say HI~

大家好~

我係妹妹B呀, 爸爸媽媽終於幫我改好名啦!!

我叫凱欣, 英文名叫Karena, 請各位姨姨叔叔哥哥姐姐多多指教...  ^^

2014年2月18日 星期二

小B大任務 - 5th N班 Interview 結果 (駿發花園浸信會)

上月跟救世軍同一天Interview的那間浸信會, 今日終於收到通知信啦...  雖然小B面試當日做足老師所有要求, 而老師亦有讚小B全部都能做到, 所以我一直都認為學校應該是會取錄小B的 (雖然沒打算入讀), 但收信時結果卻出孚意料之外, 小B竟然只被安排為後備生, 有時真的好想知道每間學校的收生準則, 好讓家長們容易接受結果.

即使本身沒打算選入讀, 但見小B Interview時表現大好, 而學校又竟然不取錄她, 心中確實有點不是味兒.

誰說大B找學校會比較容易?  誰說大多數學校都愛收大B?  現在我絕對有理由相信找學校全都是靠小朋友自己運氣, 唉!!  ~.~

2014年2月17日 星期一

妹妹出世啦~~~

11022014 - 12022014

承接上篇...

當我以為今晚會在醫院白白渡過之際, 原來妹妹B已急不及待想同大家見面啦!!  探病時間過了不久, 老公回家去, 而我就只好看電視和雜誌打發時間, 由於眼見隔離床媽媽痛得越來越辛苦, 相信我今晚一定無覺好訓了.   誰不知就由8時多開始, 我好像感到有點肚痛, 但因未有規律而且痛的密度都好疏, 所以自己就不以為意, 直至9時多仍然持續有這感覺, 而且開始變得有規律, 大概好像是10分鐘一次吧, 那刻我才意識到是陣痛的開始, 所以我馬上whatsapp通知老公, 叫他半夜記得要聽電話, 因為妹妹應該隨時會在凌晨時份出世.  好快...到了12時多, 已經變為5分鐘一次, 但痛的程度仍然可以接受, 所以我還可跟朋友whatsapp吹水, 而且亦未有特別通知姑娘, 直至1:30陣痛變成2-3分鐘一次, 每次痛的時間長了, 我終於亦忍不住要通知姑娘啦, 或許姑娘見我整晚都沒什麼動靜, 所以當我告知她時, 姑娘好像有點不相信似的, 幸好最後都肯為我檢查, 可惜還是1度都未開, 不過姑娘都說應該會快開了.  我見睡不著又想快點開度數, 夜蘭人靜唯有獨個兒走去玩Fitball, 不過玩了一會兒, 我開始痛到唔願郁, 唯有返回床上繼續等待, 唉!!  到3:30...終於開了一度可以到產房待產啦, 馬上打電話叫老公過來陪產先.

3:40去到產房, 突然越來越痛, 原來已經開了3度, 今次我不停大大力的吸笑氣, 但我真的覺得沒什麼止痛作用, 而且每吸一次痛楚就更加強烈, 突然我更感到超級勁的便意呢, 不過助產士們說還未生得, 當她們一起步出產房之際, 我痛到馬上按鐘叫她們回來, 那時我已經急到忍不住要痾了, 當她們衝過來之際, 我已經感到妹妹正在出來啦, 由於老公未到, 她們還問我要不要多等一會, 雖然知道老公應該差不多時間到, 但我真的忍不住要馬上生嘛, 結果老公今次就趕不及陪產了, 而妹妹亦於4:02出世嚕.

多謝妹妹錫住媽媽, 今次的生產時間比起小B還要快, 小B由開1度到生得, 足足用了差不多兩小時, 至於妹妹就只需半小時便任務完成, 原來第2胎真的會快好多架.

家姐 vs 妹妹
大家覺得她倆姊妹像樣嘛?!  我和爸爸都覺得她倆簡直像餅印Copy出來一樣, 而今次大部份人都說妹妹比較似我, 哈哈!!


2014年2月16日 星期日

產檢+入院記

11022014

今日已經40w4d啦, 相信今次應該會是最後一次產檢吧!!  一早8時多就到達QE, 今次還巧遇Blog友Carol, 不過時間關係, 大家只閒聊了幾句.

由於妹妹B已經過期居留, 加上亦已見紅了幾天, 所以我已經有心理準備隨時被助產士捉入院催生, 結果不出我所料, 做過簡單檢查後馬上就被安排入院嚕, 不過我想老公陪我, 加上又想回娘家拿過走佬袋才入院, 所以助產士就給了我數小時期限, 最遲12點要入院.

一離開QE, 快快買個大家樂早餐回家, 然後沖涼洗頭收拾好入院用品, 待老公回來就出發去醫院了.

我們準時12點到達醫院登記, 再自行到C2病房, 由於不是探病時間, 所以老公只可以在病房外等候, 而我到病房後亦要安排駁機聽BB心跳, 雖然做完檢查後我就可以自由活動, 但免得老公獨個兒傻傻地等, 所以我都叫他先行離開, 待探病時間才來陪我.

聽完BB心跳, 再要等醫生來做檢查, 因要看看官頸成熟與否才再考慮何時催生, 結果等到花兒也謝了, 還未見有醫生巡房, 想睡又因為隔離床痛到不停在呻吟而睡不著, 悶極!!

幸好跟我的助產士一有空就會來找我們, 最後她見我無無聊聊不停玩手機, 就教我玩Fitball來打發時間喇.  直到4時多, 終於有醫生來為我檢查啦, 醫生話官頸已經ok, 她還好心地說幫我一把(即人手整鬆官頸), 然後再安排明天才催生, 不過醫生亦有提及, 說不定今晚就會開始陣痛呢.  頂...那麼今晚就要獨個兒在醫院渡過了.
一個人在醫院, 特別掛住小B, 好想馬上出院回家去.

2014年2月9日 星期日

為搏回情人一笑

有時我真的覺得爸爸太過寵幸她的小情人了...雖然我並非在呷醋, 但有時真的覺得這樣會好容易寵壞小B, 所以我要想想辦法設定自家一套來教囡才行喇.  一直以來爸爸都好遷就小B, 只要小B一發動眼淚攻勢, 即使小B話想要月亮, 我想爸爸也會出盡辦法去摘個月亮來滿足她.  雖然大家都會覺得這只是爸爸愛錫囡兒的表現, 不過久而久之小B就會認為這是必然的了, 最激氣的是爸爸經常話小B年紀尚少, 哄她開心想她笑亦屬正常事, 所以在爸爸能力範圍做到的, 爸爸都會做, 唉~

好像今日...小B扭計要玩我電話, 我唔准, 結果有人大哭大鬧, 連婆婆好聲好氣地逗回她開心都失敗.  雖然最後我都有把電話給她玩了一會兒, 但在滿足她前, 我不忙跟她說了一輪大道理, 而且亦不會像爸爸一樣, 有求就立即必應, 結果小B好聽我話, 即使喊到不停在喘氣, 但我要求她馬上收聲她都可以做到, 聽完道理後, 我說只可以玩15分鐘, 最後小B亦好乖聽到我說要收機就把電話遞回給我.  (其實小B就不是個不講道理的小朋友, 只是較喜歡蝦爸爸而已, 但點解爸爸就不可以強硬一點, 偏偏去過份竉愛呢?)

真怕日後在管教方面, 我和爸爸的方式會越來越大不同.  雖然爸爸說只要當小B再大一點, 就再不會用這寵幸方法, 但慈父終歸也是慈父, 我絕對有理由相信爸爸連鬧小B一句都不忍心囉.  看來我和爸爸要快快溝通一下才行啦...

說了一輪廢話, 還是入正題好了.  今日爸爸知道小B因為電話一事而喊得好淒涼, 結果為了搏回她小情人一笑, 就去反斗城買一點快樂回來哄她嚕.  雖然偶爾的物質, 我不反對, 但婆婆都已經不太認同我們了, 覺得我們倆都太過縱容小B.  算...就給我一點時間慢慢找套教囡方式來令大家一同實行吧!!

今天的快樂就源於......這兩樣東東喇, 實情小B超愛這些玩意的啊!!
1. Air Slammers - 小B於丟錢樂園玩上癮的其中一個玩意.
2. 最近小B迷上了看演唱會DVD, 經常在扮歌星唱歌跳舞彈結他.
由於婆婆是晚帶了小B去太婆家食飯, 所以爸爸並未有等她回來就已經閃人, 不過當小B一回來見到這兩樣東東時, 就知是爸爸買的了, 還不停自己在說開心開心呢, 好好笑.
小B: 爸爸, 多謝你呀, 我有型嘛?

媽媽: 爸爸, 你今次又成功搏回情人一笑啦...

爸爸: 為了令小B開心, 只要在我能力範圍做到的, 我都會去做.

婆婆: 無你一家三口咁好氣!!

2014年2月8日 星期六

過期居留?!

今日已經40週了, 但妹妹B好像還未有意識出來, 難道住在媽媽肚中真的有那麼舒服嗎?  (不過又難怪, 媽媽日食夜食, 日訓夜訓, 就連媽媽自己都覺得好像在嘆世界一樣, 哈哈!!)   但舒服還舒服, 妹妹B你真的要快些出來呀, 大家每天都在等著跟你見面呢...尤其是你的前世情人- 爸爸.

這兩天當我以為妳有少許動靜想要出來之際(因有少少見啡), 結果還是一次又一次的在騙我, 而妳亦未有像家姐一樣在我們想要的日子出來, 究竟那個日子才最適合妳呢?!  爸爸, 媽媽快要等到變長頸鹿啦......

妹妹, 妳乖乖快些出來好嘛, 媽媽唔想催生之餘, 亦希望可以早日完成任務啊!!


(之前人人都說, 第二胎一定會比第一胎早生, 結果我可以話你知, 我就是一個非這樣的例子喇.  家姐: 39w4d, 妹妹: 還在自己選日子中)

2014年2月5日 星期三

宅媽一週生活

自放產假至今已經一星期有多, 而我亦已經搬回了娘家住嚕, 這個星期除了食, 訓, 陪小B玩就好像沒什麼做過似的, 雖然看似有點頹廢, 但其實都幾寫意架, 哈哈!!  只可惜陀B陀到尾聲, 我的腰骨好像快要斷開似的, 有時就連起身坐低都好不情願呢, 因為我個小肚dum經常扯著扯著痛, 連行步路都要如同鳥龜一樣, 所以即使寫意亦不等於享受!!  不過整個孕期, 來到尾聲才叫辛苦, 妹妹B都已經算是錫住媽媽我喇.

這個星期, 除了到醫院產檢, 跟婆婆到酒樓飲茶, 媽媽就就再沒有上街了, 就連新年必做的到親友家拜年都全部缺席, 絕對說得上是宅媽一名.  幸好爸爸一有空就回來陪我, 否則我應該好快就已經發顛了, 不過其實只要有小B在, 媽媽我依然是忙過不停,  因為有個臭豬突然由痴婆B變為了痴媽B, 由早媽到晚, 洗面, 換片, 開奶, 陪訓, 陪玩, 餵飯, 全部要媽媽, 雖然媽媽都好樂意去做, 但有時都真的感到好累, 所以媽媽我都會求小B放過我架, 幸好小B看似都好明白事理, 有時只要媽媽跟她解釋兩句, 她就會自己去玩, 不再纏住媽媽, 抵鍚.  ^3^

妹妹B...你不如快點出來, 好讓媽媽我快快坐完月, 帶你們一同出關啦.  放了12天假, 媽媽我開始悶+心癢癢, 好想約朋友仔們出街玩啦.

2014年2月4日 星期二

立春+清胎毒

Yeah, 終於來到立春之日, 妹妹B成功做到馬B嚕!!  媽媽我由一月開始, 一直就提心吊膽怕妹妹B會提早出世, 由馬B變為蛇B, 所以遲遲未敢清胎毒, 食得最多的都只是腐竹雞蛋糖水而已, 不過來到今日...我已經唔再怕啦, 所以決定要獎勵自己勁食綠豆沙, 清胎毒之餘, 希望食多少少涼野, 妹妹B可以快快手出來, 等我早日卸貨, 不用約期催生.
其實除了腐竹雞蛋糖水, 綠豆沙, 芝麻糊外, 這幾天我還可以食什麼來清胎毒呢?

記得上胎婆婆有煲過兩次白蓮鬚給我, 不過婆婆話第二胎就不用再食這個了, 至於點解我沒有去追問呀, 反正我自己都不太喜歡那種苦澀味, 加上媽媽會有好多媽媽話, 食過白蓮鬚後, 反而令宮頸開得更慢, 痛楚亦相對增加, 雖然未知是否屬實, 但聽後都不太再試呢.

2014年2月1日 星期六

終點在望

嘩..嘩..嘩..已經來到39週了, 終點在望, 快快來為自己打打氣.
眼見2月媽媽會有好多BB都已經陸陸續續面世, 心情真的既興奮又緊張, 雖然我都好期待見妹妹B, 但又擔心唔知今次要痛多久才可順利生產, 總之心情就巧矛盾啦.  不過越近尾聲, 反而開始豁出去了, 因為我知道始終都要面對多一次這種痛, 所以還是不要想太多.

妹妹B...你要錫住媽媽, 到時最緊要快快快快快呀~

記得家姐好像是39週4時出世, 未知妹妹又會否跟家姐一樣呢?!  如果妹妹都是39週4出世, 那麼妹妹就已經是馬B嚕, 哈哈!!