恭喜發財

今日大年初一, 小B代表我們陳氏一家祝大家馬年行大運, 事事順利, 橫財就手, 身體健康, 心想事成, 家庭和睦, 恭喜恭喜!!

小B行花市 @ 花墟

28012014

年廿八....難得今晚人齊, 所以婆婆就提議外出晚飯做團年喇.  食過團年飯後, 小B再跟婆婆, 姨姨和亞父去行花市, 而爸爸媽媽就先行回家, 因媽媽我大肚如籮, 絕對不方便到人多擠迫的地方啊, 加上去年小B爸又因工作關係未能收早, 所以未有帶過小B去行花市, 結果就這樣小B的第一次又奉獻了給婆婆姨姨和亞父嚕.

聞說我家小B一到達年宵市場門外, 已經表現得何期興奮, 當然啦...因為這才是小B的第一次嘛, 小B當然覺得新奇興奮啦, 但我相信最能令小B開心的事情, 應該都是姨姨買給她的那個氫氣球了~

我家小B超愛馬馬, 有隻臭豬開心到回家後都只顧著玩而不願睡呢...

多謝婆婆, 姨姨, 亞父又帶給了小B一個開心愉快的晚上...明年爸爸媽媽一定要親自帶妳們姊妹倆去行花市才行.  :P

小B大任務 - 4th N班 Interview 結果 (救世軍卜凱賽琳)

Yeah...小B又有Offer啦, 正如我上次所講, 媽媽表現真的不錯啊, 哈哈!!  ^^

今次交過留位費後, 我決定放棄下個月的Interview了, 雖然那間明我才是我心目中的首選, 但到時我應該正在坐月中, 而且學校又只得半日制, 地點又不算太近婆婆家, 考慮過幾種因素後, 覺得都好像不太適合我們.  加上之前亦已經浪費了一千元於循道衛理交留位費, 為免自己想得太多和再花太多金錢在留位費上, 所以我決定聽小B爸話...疊埋心水讀這間就好了, 反正我一早就希望小B可以入讀救世軍嘛.

如無意外, 應該都不會再有變卦, 小B 9月份就會入讀這所幼兒園啦,  我見朋友姨甥仔讀這間學校好像很不錯, 希望媽媽真的沒有選擇錯誤啦, 我只希望小B的幼稚園生活可以過得開心愉快.

收爐

今日雖然只係年廿四...不過因放產假的關係, 所以可以提早收爐!!

雖然我一直都好渴望可以過著不用上班, 只留在家中做大食懶的生活, 但今次純粹因放產假而不用上班, 心情並非想像中嚮往.  一來我怕妹妹B出世後, 突然多了一個初生B照顧而忙得大家有氣無定抖, 二來我怕小B爸放完十天長假上班之後, 我要和婆婆二打二, 面對著這兩小魔怪的情景, 三來我好怕妹妹B會是個難湊之人, 四來更怕在娘家坐月如同被收監的日子...總之就有好多好多的憂慮啦, 有時我會在想, 究竟今次會否因此而患有產後抑鬱呢, 哈哈~

其實我知以上的憂慮都是好多餘, 全因為我自己太過緊張才會這樣.  算...就隨便讓我呻兩句吧, 我知我好快就可以把負面情緒踢走, 大家不用擔心.

好老實...由於第2胎的關係, 一直都好怕自己會早產, 更怕於上班途中或在公司時穿水, 你知啦如果真是這樣, 好樣衰嘛.  幸好, 妹妹B還頂得住, 終於跟媽媽一起頂到產假前的最後一個工作天, 媽媽希望妹妹再頂多兩星期, 最好就是在預產期的那天或是前一天才面世, 知道嘛.

好...所有公事都已經交低了給同事嚕, 今天就好好的Hae住過.

同事們...辛苦了, 4月再見!!

太公生日壽宴

22012014

今日太公生日...我們這班孝子賢孫放工後便馬上趕到香港仔跟太公一同食飯慶生. 

其實我都忘了我公今年是多少歲了, 大概應該都有88, 89吧, 幸好我公到了這個年紀還尚算精靈活潑, 行得走得, 雖然老人病比起以前確實多了, 但我還是希望我公繼續身體健康, 長命百歲.

每次太公太婆見到小B, 就好像蜜蜂黏著蜜糖一樣, 雖然小B都好受落, 但只要爸爸一在場, 小B就會唔理太公太婆, 只要有爸爸...眼中就再無其他人, 今晚就算太公太婆怎樣出盡法寶, 小B都唔願望他們倆老多一眼, 真激氣.

直至...生日蛋糕出場一刻, 愛吹蠟燭和愛切生日蛋糕的小B終於抵不住誘惑, 屈服坐到太公身旁, 嘩哈哈哈.  這小鬼真的超現實呀~

我們家最年長和最年輕的一位...都同樣可愛!!  ^^

I love my Family~~~~~~~~ 

37w4d 產檢 @ QE

21012014

今日產檢超快手, 20分鐘內就可以完成兼走人, 所以我一向都比較喜歡助產士約我於最早時段來檢查的, 雖然最早的預約時間為8:30, 比上班時間還要早, 但每次等候時間則可大大縮短啵, 試過有幾次約10點後, 結果最少要我罰坐個多小時, 唉... 

不過今日小B爸車我反而比我自己坐車去還要遲, 幸好8:40到達, 完全未見有孕婦等候, 真奇怪.

首先來個指定動作, 自行驗小便, 量血壓及體重, 然後馬上就被叫進房內見助產士喇.  嘩...原來不知不覺間, 我已經重了22磅啦, 不過比起陀小B時, 好像還是輕了一點點, 但助產士今次檢查話妹妹B追得好好呀, 已經由細碼偏細B, 追回到細碼, 助產士還說由於都是偏細的關係, 應該生產過程都不會太難, 所以若然一有見紅, 穿水, 陣痛等徵兆就要馬上入院, 加上妹妹B又已經開始落盤, 所以說得我又再一次緊張起來.

送上37w的大肚照...

妹妹B: 我已經足月啦...不過個個都話媽媽肚仔細, 其實都唔算太細啦, 起碼我應該會叻過家姐, 重過家姐先嘛!!  至於我會幾時面世呢, 我都唔知架, 爸爸媽媽日日都叫我立春後先好出黎, 希望我做得到啦, 哈哈~

小B大任務 - 5th N班 Interview分享 (駿發花園浸信會)

18012014

緊接第一場Interview後, 馬上我們又要到另一間學校Interview, 幸好兩間學校距離不遠, 只是約10分鐘路程, 最後我們還提早了15分鐘到達...

等候Interview期間, 全部小朋友一起擠在校門外的小小Playground玩, 好迫好迫, 不過小朋友們一樣玩得開心, 雖然耍樂設施不多, 但小B都玩到唔捨得離開.  未知於我們Interview的時段裡, 小B是否最大一位的小朋友呢, 因為姨姨發現今日全場最高大的人竟然是我家小B呀, 勁~

(剪髮後的小B帶一點傻氣, 媽媽覺得好可愛呢!!  ^^)

玩了十多分鐘左右, 好快我們就被老師叫進禮堂進行面試啦.  今次面試非常簡單, 老師主要考小B疊高積木, 圖畫配對及會否聽指令收拾玩具等, 基本上對於小B來說, 完全沒難度可言.  而個人亦認為, 今日兩間學校都好大機會會取錄小B, 當然最後都是要等學校書面通知啦, 不過這間學校並不是我心水囉, 所以就算取錄, 我都未必會考慮.

除了並非我心水之外, 這間學校的上學時間都比別的學校早+長時間...一般全日制學校都是返8:30-9:00左右, 但這間竟然是8:00呀, 即使是我自己上班, 8:00還在家裡未出門呢, 所以要小B返8:00放4:30的話, 實在是說不過呀...

小B大任務 - 4th N班 Interview分享 (救世軍卜凱賽琳)

18012014

今早一連兩場緊接的Interview, 小B和媽媽表現都尚算不錯, 點解我會話媽媽表現都不錯呢, 因為第一場Interview是In媽媽我嘛, 而第二場Interview才是In小B, 所以媽媽當然覺得自己和小B的表現都同樣不錯啦, 哈哈!!  其實小B的表現好與壞, 多多少少都跟爸爸在場與否有關係, 不知怎的每次爸爸一在, 小B就會表現得特別扭計, 而且還會變身成為痴爸B, 看來爸爸今世都是註定給她那位寶貝女兒食住上的嚕...

一早爸爸車我回娘家後就上班去, 而我快快把小B弄醒, 然後幫她梳洗好食過奶奶, 就和婆婆, 姨姨一同落街食早餐喇.  食完早餐...我和姨姨就負責帶小B到學校, 今次我們預多了十分鐘左右的時間, 本來是打算用來給小B做熱身, 但原來根本就沒有這個必要, 因為今次面試, 主要是In媽媽我.  認真的..其實都算不上是In媽媽, 只是由校長來跟媽媽講解一下學校的教學理念, 跟我了解一下對小B學習的要求等, 純粹閒話家常...於短短30分鐘時間裡面, 大家都好輕鬆愉快.

好久之前曾於BK見過有媽媽發文說, 救世軍卜凱賽琳主要是跟輪候號碼來取錄學生, 而並非去揀學生取錄, 如真有其事的話, 相信今次小B會被取錄的成數就高好多嚕, 因為N班收15人, 而我小B的輪候編號卻是第7個嘛.  當然最後取錄與否還是要等學校通知啦, 不過如果今次真的被取錄, 相信我想也不用想, 馬上就會幫小B去交留位費, 哈哈!! 

主要是...爸爸媽媽都蠻喜歡這校的教學模式, 而且亦非常認同校長所說, 學前教育應該是要讓小朋友開心, 不應過份催谷, 只要將學習基礎教懂了他們以後, 上到小學時同樣有能力跟得上.  若然太早就開始催谷的話, 沒錯...上小學後不會太辛苦, 但或多或少會令他們對上學產生一種恐懼或厭倦, 這樣對他們來說絕非是一件好事啊.  雖然學術方面救世軍的程度是比較淺, 但學校好注重學生的品德品格培養, 亦對他們的自理能力有一定要求, 而剛好這點亦是媽媽我比較看重的一環, 因為我不希望小B在被寵愛的環境下, 成為港童.

Happy & Yummy Lunch @ 鮨賀

早兩星期Annual Dinner, 我和同事S分別抽中了現金獎, 結果當然要一齊高興下啦...

今日就先由同事S來請客, 下星期我放產假前再請大家多吃一餐, 順道答謝她們將要為我分擔未來十星期的工作.

今次同事選了鮨賀, 嘩...又係日本菜?!  即係又要我從天使與魔鬼之間做抉擇啦, 雖說我整個孕期一直未有戒口, 魚生刺生通通照食可也, 但臨近尾聲終點在望, 我卻反而開始怕會容易出現肚瀉情況, 所以唯有忍忍口嚕.

加上自知好快就可以全面解禁, 到時我想食幾多就食幾多, 又何必於現在偷偷摸摸呢, 哈哈!!

面對著三碗有8種不同款式及肥味的魚生飯...確實引得我在狂吞口水中, 幸好我和另一同事點的銀雪魚定食都非常不錯.  再加上前菜沙律和一碗不太味噌的麵豉湯, 簡直無得頂呀~

飯後侍應生更送上每人一杯北海道牛乳布甸, 真的太完美太滿足啦...

不得不提, 鮨賀Lunch時段一直都在做4人同行一人免費的優惠, 所以若有興趣真的不妨一試!!

悠閒的星期天

由星期日開始(36w2d)...我已經不敢再安排太緊密的活動給自己啦, 因為近這一星期我發覺肚子越來越墜, 甚至多行兩步妹妹B都有想轉出來的感覺, 所以避免妹妹B由2月B變為1月B, 我還是開始多留在家中休息就好了!!

雖然好多人都話, 懷孕約34-36週左右就應該多點走路, 這樣生產才會較容易, 而且亦有助幫BB落盆, 不過說真的...跟上胎來比較, 由一知道有BB開始, 我都好像未有真真正正停下來休息過, 一直還是繼續到處跑到處去.  加上個人認為自己每天的運動量都不少啊, 每天由火車站步行至公司, 由公司步行回娘家, 再由巴士站步行回自己家等的路程, 每日加起來最少都有約一小時, 所以我一向都覺得自己是行得足夠兼有凸.

為了安全起見, 我決定由現在至一月尾, 全力閉關休息, 沒小B爸陪同下, 盡量不到處走動, 免得在街上突然作動就麻煩.

雖然話就話想今日全日留在家中訓訓訓, 但難得小B爸主動提出帶小B到附近公園玩, 所以一於去玩完先再算...  反正陪小B玩的人又不是我, 我都只是跟他們一起散步到公園去, 然後就好像一尊佛般坐著兼做賓賓看守物品.

懶媽媽遠距離偷拍... 

一小時後, 小B好乖主動叫走人去剪髮髮, 可能是因為爸爸出門前就已經跟她講明了去完公園要去剪髮, 所以小B全程都好合作呀, 抵錫~  *3*

悠悠閒閒的一天...其實都幾舒服幾寫意!!

小B大任務 - 3rd N班 Interview分享 (仁愛堂)

11012014

休息了整整一個月, 今日繼續小B大任務...  第3次Interview, 爸爸終於可以放假陪小B一起去作戰啦, 不過今日早於7點就要起床的關係, 小B似乎有點不在狀態.

一早9點到達學校, 在門外排隊輪候面試的人並不多, 可能因為學校太細 (位於圓方商場的一旁), 所以分開了好幾個時段來進行面試, 而每節面試人數大約20人左右.

面試時間由9:15開始, 我們是較早去到的一群, 所以被編排了於第一組.

首先有大約15分鐘時間給20位小朋友們於Playground熱熱身, 之後老師再安排了2組小朋友和家長一同進入課室, 今次學校是以分組形式來面試, 好像是5個小朋友一組.  一開始在兩位N班的老師帶領下, 全部小朋友一起唱唱歌, 做指令, 再聽聽老師講故事等, 形式如同上Playgroup一樣, 而在旁則有兩位老師在觀察及給予分數.  雖然我覺得今次面試並非要考小朋友什麼, 但小B今日不在狀態有點痴身, 未及其他小朋友般活躍, 所以我想在旁給分的老師一定不會給予高分, 之後老師再個別跟家長們問了幾個簡單問題, 整個面試過程就完結啦.

好老實...今次面試結果成功與否, 我們都不會有太大感覺, 因為今次又並非真正去考小朋友, 所以我想他們都是以抽籤形式來決定取錄居多.

面試完...一走出學校, 媽媽叫小B企定定正正經經給我拍照, 有人不肯就範之餘還竟招招積積擺Pose!!

結果將於一個月內有信通知, 就即管看看新一年的小B, 會否比去年好運啦, 哈哈~

放產假倒數

還有兩星期我就開始放產假, 雖然不用上班可以留在家中陪小B確實令人興奮, 但...同時我的心情亦隨著妹妹B出世的日子越近而變得越緊張!!

兩年前入院生小B的畫面, 最近開始不斷重覆又重覆地呈現在腦海裡, 害得我好驚好驚...  上胎因沒有經驗, 所以抱住痛死把就的心態就入院了, 我還記得上次直至見紅一刻我才懂得去驚呢, 但今次就是因為有了上一次的經驗, 反而好早就開始擔心啦, 我真怕自己再承受不了那種十級之痛, 真怕自己要獨個兒面對那種痛得典床典蓆之苦, 真怕想痾但又唔准痾的感覺, 總之就好多好多個怕啦, 唉...

雖然踏入懷孕後期後有點辛苦, 而我亦有想早點卸貨的想法, 但我確實還有太多事情未準備好啦...所以妹妹B還是準時報到不要逾期居留就好了.

鬆一口氣

昨天當我正為尋找BB床螺絲而煩惱之際, 小B爸突然叫我不如放工時去五金鋪問問, 竟然...五金鋪老闆話應該可以配回的呢, 只不過因我連一粒螺絲Sample都找不到, 所以去配前就要先自行度準螺絲的長度+闊度嚕, 雖然暫時仍未配回, 但知道不用再買新床後終於可以鬆一口氣, 畢竟這張BB床雖是二手, 但看上去仍好新淨, 加上用的時間又不會太長, 大約都是一年左右, 所以真的不想再花錢去買新BB床喇.

心急的我, 已叫小B爸明天盡快去配回, 免得夜長夢多.  而小B爸今次亦超穩陣啊, 我叫他預先度好尺寸才去配, 他竟跟我說...打算將整張床仔搬到樓下的五金鋪讓老闆幫忙, 哈哈~

其實到最後如真的在五金鋪配不到螺絲都不用怕, 因為這張床是C-max出品, 我已經打過去C-max代理問過, 他們說不知道BB床型號不緊要, 只要影張相再Whatsapp給他們, 他們就可得知是什麼型號了.  快手的我當然馬上就Whatsapp了相片給他們啦, 問價後...整套螺絲連床轆, 合共$425, 再加$50速遞費, 即$475便可.

不過我始終認為五金鋪應該可以再便宜一點, 所以還是先到五金鋪問問再決定在那裡配吧, 反正代理說隨時有貨嘛.

求救..求救...有人知道BB床螺絲可以在那裡配嘛?

由於婆婆家中那張BB床, 早早就已經轉贈了給朋友, 而朋友BB又仍在使用中, 我沒理由開口問朋友取回.  幸好另一位朋友多出了一張BB床可以轉贈給我, 那我才可以省回再買新BB床, 不過...昨天當小B爸打算開BB床來看時, 竟然發現螺絲不見了, 而大家亦好肯定拿BB床當天是有見過那包螺絲的, 只是大家都不知道一時三刻放了在那, 結果反轉反轉再反轉還是找不到, 現在只怕...有人當了那包螺絲是垃圾般丟掉, 唉~

想問問有人知道BB床螺絲可以在那裡配嘛?

事關這張BB床已經轉了好幾手, 大家亦都已經不知道是什麼型號, 所以好難向代理/百貨公司查詢啊.

唉...連床褥都剛剛訂好, 現在才發現螺絲不見了, 難度我們要買一張新BB床嗎?!?!

HelP~~~~~~~~

奶粉補倉成功

新年將至, 加上臨盆在即, 又是媽媽我四出為小B撲奶粉的時候啦, 一直希望可以於這個月頭裡儲得足夠奶粉, 好讓我在放產假期間煩少一樣事情.  始終妹妹B出世後, 家中各人都一定會忙得團團轉嘛, 若然到時再要為撲奶粉一事而煩, 相信我會發神經囉...

由上星期長假期完畢開始, 我已經一直在網上搜尋400g裝A+2, 可惜一直就是找不到, 每次見到有人出售, 又不及其他媽媽們快手, 即使夠快手嘛, 價錢又被抬高了, 結果找了足足一星期仍是買不到.  或許你會問, 為何不直接向媽媽會訂購呢?!  唉...有所不知了, 因為早於12月時我已經向媽媽會取了藥房奶粉券, 所以直至2月前都不能再直接跟媽媽會訂購啊.  當時我天真得以為藥房還是好抵買, 所以才向媽媽會拿定奶粉券, 誰不知...臨近新年假期, 大部份藥房都已經將奶粉加價啦, 唉~

幸好...今早在FB的奶粉群組中徵奶粉時, 有位好心媽媽留言給我說因要轉奶粉, 所以可出讓16罐400g裝A+2給我, 而這位媽媽更沒有因為市面缺貨而坐地起價呢, 抵讚.

現在加埋家中的少量存貨後, 我想應該夠小B食到5月中嚕, 呵呵.

雖然小B的奶粉存貨問題經已解決, 但我怕到時又要為妹妹B的奶粉而煩惱......  希望我餵人奶成功, 而家中的3小罐美素1號又夠頂得住啦.

走佬袋

眼見只剩一個月時間, 加上昨天助產士都叫我要快點準備定走佬袋, 所以我不敢怠慢啦...回家後馬上準備, 以防萬一!!

走佬袋已收拾好9成, 現只餘下少許日常用品未放進袋裡.

最後跟上次生小B時一樣, 都是3大袋, 明証言順走佬一樣呀...Crazy~

35w4d 產檢 @ QE

繼上星期五去QE照超聲波後, 今日又要回去產檢+驗B鏈.  自12月中起, 去醫院檢查的次數變得開始密, 而每次又最少要我罰坐一小時, 所以真的好想放棄唔去產檢, 但又怕之後生得入院時會被姑娘責罵, 巧矛盾呢!! 

今次助產士主要講解上星期五照超聲波的那份報告, 情況...跟私家說的大致一樣, 全部都是細碼, 不過腳仔就跟家姐一樣偏長, 所以我都不太擔心, 暫時妹妹B有2.2kg, 照計出世時應該會比家姐重一點, 雖然都是屬於細碼B, 但我自己本身都是細碼一族啊, 所以助產士說一切都好正常, 無須進行特別催谷.  加上...細碼易生一點嘛, 所以個人認為健康就可以了.  ^^

原來不知不覺...餘下要生B的日子就只有32日, 看來我真的要快快手執走佬袋, 唔可以再懶懶閒啦~

小B的生日禮物

承蒙朋友們對小B的厚愛...現今的小朋友真的好幸福啊, 媽媽我真要代小B向哥哥姐姐們說聲多謝!!

至於婆婆和媽媽就當然送上了大利是啦, 哈哈.  ^^

2013除夕夜

31122013

今日係2013年最後一日...當大家都興高采烈地告別2013迎接2014的一刻, 同時我家小B亦正式踏入2歲啦.  (有時真的不得不慨嘆時間過得真快, 我這個在職媽媽好像Miss了好多小B的成長階段似的)

原本今晚小B爸提議帶小B外出倒數迎生日, 不過小B爸和小B都在生病中, 而媽媽我亦開始有點作感冒, 所以倒數這項活動就只好取消咯, 留待小B再大一點才再外出倒數吧.

由於今年大家都好忙, 朋友們好遲才相約一起歡度除夕夜, 所以最後只得幾位朋友一起渡過, 加上大家都不想外出跟人迫, 所以就安排了來我家打邊爐, 順道幫小B慶祝生日喇.

開開心心又一晚...多謝你們來陪小B玩, 更加多謝你們送給小B的禮物, 小B今晚過得好開心呀!!

我們的2013...再見啦, 期望2014更加好更加開心, Yeah~

我的大肚照

嘩..嘩..嘩..新鮮滾熱辣出爐大肚照, 終於收到啦!!

不過原來只得Hard Copy, 沒有Soft Copy, 但就另有一隻Slide Show DVD可取回.  算吧...反正最終都是入籠底, 有Hard Copy留個紀念都已經可以啦.

雖然不是拍得很美, 但在沒要求的情況下尚算可以吧.
(由於自己Scan入電腦的關係, 出來效果略為差一點, 請見諒)

好...就讓我隨便送上幾張相來獻醜啦...  ^^

Happy Face, 一起期待新成員的到來!!

家姐仔錫錫媽媽肚中的妹妹, 好Sweet Sweet呀!!

攝影師似乎高估了自己的技術, 竟然黑色衫配黑背景, 結果我的小肚肚完全突顯不了出來.

最後跟朋友一起的大肚"dum"與小肚"dum"合照....  (未得朋友批准, 就不公開人家的真面目了)

Annual Dinner

每年一度的Annual Dinner又到啦, 今年公司繼續縮皮, 於Regal Kowloon舉行, 不過食物質素卻比去年Marco Polo好得多, 我食到超飽超滿足呢...哈哈!!

既然我講得出縮皮, 除了場地之外, 當然就連抽獎禮物都大大縮皮啦...  但對於一個從來都沒有抽獎運的人來說, 應該都沒太大關係吧, 而我正正就是這個從來都沒有抽獎運的人嚕, 唉~

要從200人中抽中獎, 對我來說, 機會率簡直是零.  我記得早幾年獎品好像不止56份, 而公司同事人數還未及現在那麼多, 不過到最後我依然是空手而回啊, 所以今年我都只敢抱著陪跑心態, 完全未有諗過可以抽中獎.

從56份獎品當中, 除了對現金獎有興趣外, 其餘都真的....要說聲多謝了.  別以為只有我才那麼現實唯, 而是每一位同事見到這份Prize List, 都只對現金獎感興趣, 因為今年的獎品都真的幾...差, 哈哈.

其實今年我們香港區還可以繼續有Annual Dinner, 都真要多謝老闆和HR向總部爭取, 因為聞說今年某些地區分公司的Annual Dinner都已經被取消了.  唉...真沒想到公司生意真的差成這樣子, 不過見近一年半都未有出過季度花紅, 大概都知是怎樣一回事, 總之我們這班打工仔仍可保得住份工已經算是行運.
(不好的事就不要提, 反正我於公司都只是個小小小小小人物而已, 大事就由大入物去處理吧!)

說回開心的 , 就是...今年我竟然抽到$3000現金獎呀~~~~~~~~

真沒想過今年自己竟然可以抽中獎, 所以當MC讀出我名字時, 我都呆一呆, 似乎是妹妹B帶給媽媽好運呢, 哈哈!!  如果我去買六合彩都可以中獎的話, 那就真的太好了.  (又提早發夢啦, 呵呵!!)

今晚Party好開心, 期望明年還可繼續有Annual Dinner啦...

Happy New Year & Happy Birthday to my Little Anke

陳氏一家祝各位2014新年快樂...幸福美滿...身體健康!!

小B爸媽再祝小B生日快樂...精靈活潑...快高長大...人見人愛!!

放了幾天假, 實在有好多Post想出, 不過還是需要一點點時間, 因為...近幾日都比較忙呢~