自從小B返學之後, 我發覺小B已經比之前難攪得多, 近一星期每天放學回來, 小B都會大吵大鬧, 亂發脾氣, 忟忟憎憎, 就好像人家更年期一樣, 超討人厭, 婆婆已經頂唔順鬧到無氣而放棄再鬧, 但錯就是錯嘛, 這樣的行為一點都不能容忍和接受, 所以每當我放工回家入大門一刻, 衰人角色馬上由我來充當, 或者小B好快就會好憎我呢個媽媽, 因為媽媽時時鬧, 天天鬧, 但沒辦法啊...既然講道理不行, 軟硬工一齊出都擺平不了小B那些惡劣行為, 我除了用鬧的方式去宣洩之外, 還有什麼辦法?!?!?!
無例証的話, 大家可能會覺得我太誇張...所以儘管分享一下最近小B的差劣行為吧.
例証一
雖然小B經常表現好錫妹妹, 但有時小B會襯大家唔為意時, 手多多去打妹妹...腳多多去踢妹妹, 當妹妹喊喇, 就快閃離開扮作若無其事. 見到這種情況發生, 我們當然會馬上制止兼跟小B講道理啦, 不過講完道理後, 下一次好快又會再次發生, 所以絕對係...講唔聽.
例証二
自從媽媽我知道小B在學校時可以自己食飯後, 食晚飯時當然會叫小B自己食啦, 始終媽媽我手就只得一對, 但小B食飯時, 妹妹同樣都要食飯嘛, 那我一對手又可以餵得幾多個?! 以前我會選擇先餵妹妹, 再餵家姐, 但既然自己識食就無謂拖到咁晏啦, 點知...叫佢食飯, 佢次次都話唔食, 唔食都算, 有時還要刻意將飯餸左挑右撥, 結果一台都係, 見到呢個情景, 通常我都已經嬲到著晒燈. 好...既然唔食, 無謂浪費大家時間, 當婆婆收起碗飯倒掉後, 有人就只懂大喊話要食飯, 真吹漲... 究竟係因為小B想人餵, 還是故意搗蛋呢?!
例証三
經常自己走入廚房開雪櫃玩, 叫佢唔好玩, 佢就會話要攞檸檬茶飲, 當然時候不當我們都不會批准飲檸檬茶啦, 一話唔准就大喊發脾氣以示不滿, 直至我們肯就範為止, 雖然不是每次都會就範, 但都無理由野蠻到這個地步吧. (好似剛飲完奶, 又話要飲檸檬茶, 相信所有媽媽都唔會批准囉.)
要講例証有排講...唔想再數小B不是, 只想知道有何方法應付這個Trobule 2的小朋友, 唉~
我的兩個小寶貝, 你們可以一直只做天使不做惡魔嗎?
最近媽媽幫倆姊妹開了一個Facebook Page Anke & Karena - 小b與妹妹b 有興趣的話就入黎Like一Like支持下啦!! ^^
我諗每個小朋友都會呢個階段，小b仲細，會唔會覺得妹妹出世後分攤左父母對佢既愛？我記得我細個入院時，我爸媽笑探我但我細佬係小朋友唔俾入去，佢企係門口望住我，但我竟然"秒"佢>.< 我細佬細我年半，成日俾我恰架，我大個後諗返每次都覺得好內疚。我估小b可能想引你地注意，或者試下搵日只同佢一個去下拍拖，話俾佢知你地好錫佢，同埋妹妹係送俾佢既禮物。amy, 加油呀，過渡期黎架
回覆刪除其實我地已經錫佢多過妹妹, 又成日剩係同佢出街, 不過我覺得唔關事囉, 總佢之就越黎越難教啦~
刪除我睇完直覺感到係小B呷醋喎~ 如Lille K mama 所講, 再比多D愛同時間小B 啦~或者製造一D只係屬於你兩個既時光~
回覆刪除如果參考汪老師既方法, 其中一個方法係要媽媽幫妹妹做D公關工作, 例如家姐放學回來, 準備D佢鐘意既野食, 然後同佢講, 話係妹妹留返比家姐食架~
不過....我得一個, 始終未感受過, 只係紙上談兵, haha~
你地嘅方法, 我會再試試, 希望唔好再咁麻煩就好喇...
刪除明明之前已經無呷醋一排, 唉~
好明顯係小B呷醋, handle唔到自己的情緒.
回覆刪除雖然我只有1個, 但蘋果仲有個7y的表哥仔一齊住.
你所講ge野, 我都幾乎遇過. 你越鬧小B, 小B越反抗.
我而家返屋企, 第一時間, 係hug 表哥仔, 叫表哥仔錫我.
apple 只係可以好無奈企喺後面....排队hug 我錫我.
但我呢3年都可以做比表哥睇, 表弟出世, 我地仍然咁錫佢.
當然, 我有時都按奈唔到自己情緒失控鬧表哥仔la.
表哥都喊住回應真係好嬲我地, 話我地錫哂蘋果唔錫佢.
我地個個都偏心!
所以, 唯有再多出萬二分之力, 再更錫表哥仔咋.
而家隨著蘋果大d就好d. 因為我地要佢讀圖書比蘋果聽.
要佢教蘋果做功課. 等等...
令到佢覺得自己"係wor, 我係大哥哥wor"
情況暫時有改善.
你都加油呀.
可能因為妹妹越黎越痴身, 變左我成日都要抱住妹妹...就係咁, 令到小b再一次呷醋!
刪除睇黎都係我呢個媽媽做得唔好, 先會令到小b情緒咁大轉變.
我諗我真係要再俾多d愛佢先得喇, 唯有專注佢再多d啦.
例証二中我覺得小B想你餵，雖然佢識自己餵。
回覆刪除妹妹依歺係用奶樽嗎？如果係，交婆婆餵，可以嗎？
例証三要一致飲奶唔可以飲檸檬茶，如果間中就範，小B会confused 点解有時可以飲，下次亦会再發脾氣。
雖然我地只得一仔，但每天我地都会hug 佢同錫锡，尤其佢瞓醒的第一hug，佢大d ，又係男仔，諗到時唔会天天比我地又hug又锡了！
妹妹已經開始食飯仔, 而佢地食飯時婆婆就要煮我地d飯, 所以我咪餵左妹妹先囉, 可能小B真係想我餵而我又無為意啦, 唉!
刪除至於檸檬茶就多數都俾飲嘅, 只係食完奶之後或者食飯前先唔俾飲者, 有同佢解釋過點解唔得, 但唔知佢係咪完全明白, 好似話食完奶飲會肚痛, 佢自己又會跟住我講會肚痛, 不過都仲係堅持要飲...囉!!
我又無覺得佢呷醋喎，反而覺得佢係學校適應期所以要慢慢adjust, 始終都唔係返左學校好耐啫。 其實佢地日日都變緊，佢今日做到既野聽日未必做到or 想做， 我可能好忙所以好多時都得過且過，佢打妹妹可能係覺得好玩，或者唔好話，用d 軟d 既態度同佢講。 佢既然咁中意爸爸，或者叫爸爸同佢傾下計啦，雖然你話爸爸轉工忙，但parenting 呢家野係priority and 24 小時，squeeze 5 min 已經好夠啦。 希望terrible 2 5d 遠離小b 啦！
回覆刪除爸爸唔係同小B住架, 小B同婆婆住, 係放假先會跟我地返屋企架咋~
刪除而且爸爸都有試過同佢講, 不過小b唔會理囉, 剩係會掛住嗲爸爸~
其實可能係好多情緒夾埋一齊而變成咁都未定，或者係呷妹妹醋想嗲大人啦，又或者返學有壓力or不安唔識表達啦，燒腩仔都係對住人哋就無事，返到屋企就發我皮四嘅朋友來，面對住呢D情況我覺得越同佢硬碰硬越無用，我都失敗過好多次，但都明有時嬲起上來真係好難出到軟攻，或者諗D嘢轉移佢視線，例如話食完飯可以做D佢好鐘意做嘅嘢咁，但最重要都係佢正常無事時，多D同佢傾偈攬吓佢解釋佢知爸爸媽媽好愛佢，等佢慢慢感受到安全感先會對自己有信心，以後安安份份唔再搞事
回覆刪除小b同燒腩仔都係愛發脾氣同唔可以硬碰硬嘅朋友黎, 睇黎佢地兩個應該可以好夾, 哈哈~
刪除教小朋友真不易，加油。
回覆刪除南瓜仔同南瓜妹都咁乖...你肯定唔洗好似我咁勞氣啦!!
刪除咁睇小b都好乖，小豆子曳好多呢！我覺得小b都係要引你地注意同爭寵, 一係比啲權力佢，敎妹妹野，等佢覺得自己大個女
回覆刪除我都覺得可能要俾d野佢教下妹妹..等佢知道自己係大姐姐, 唔好成日再蝦妹妹同覺得妹妹會分薄左我地對佢嘅愛先得喇~
刪除我覺得小B係呷緊醋, 加上番學新轉變, 唔識HANDLE自己情緒問題, 而家妹妹仲細, 唔識簡人, 你可以湊多D 小B, 妹妹俾番婆婆湊, 等佢知MAMA唔係錫曬妹妹~~ 俾D時間大家, 小B仲細, 需要時間學習, 俾D耐性, 加油~~~
回覆刪除我會再努力試下....多謝你地嘅支持呀~
刪除