痴孖筋

忘了由多少週開始 (總之就好早期啦), 自半夜試過一次抽筋後, 之後幾乎每星期最少都會抽一次或以上, 好彩的一星期抽一次, 唔好彩的一星期抽三次, 更加好彩的是多數只抽一隻腳, 有次試過一夜間抽完右腳再抽左腳, 那次真的抽筋抽到無覺好訓.  幸好每次一抽筋, 小B爸都會馬上彈起來幫我舒緩痛楚, 不過昨晚抽筋過後, 到目前為止...小腿仍然隱隱作痛呢, 今早上班時想行快兩步都有困難, 可想而知昨晚的我有多痛苦啦.  小B爸幫我拉完筋, 按完摩後, 我還竟痛得流下眼淚來.  唉...究竟要怎樣才可避免抽筋情況經常出現呀? 

好多媽媽朋友話, 只要夠鈣, 就唔會抽筋.  不過即使我已經有食鈣片, 再加每日一盒鈣思寶, 但情況依然未見改善啵...  我亦跟助產士提及過抽筋的情況, 但一如以往的口吻, 抽筋是正常, 唯有多做伸展活動 (即廢話).

送上wk 24 - wk 29的保齡球照, 再過10週左右, 我就可以完完全全脫離半夜抽筋之苦啦, 加油加油!!

四眼豬B

我家小B經常見我們帶住眼鏡, 所以好多時一見到亞父的眼鏡框亂放就會快手拿來玩, 最近小B就連我和爸爸的眼鏡都不放過呢, 見我們帶著, 還硬是要把它除下來, 真怕有一日我家的眼鏡全都被這個粗暴小B整爛. 

今次玩都未夠, 還要帶上拍照...吹脹~

媽媽收到姨姨Whatsapp過來的相後, 雖然覺得帶上眼鏡後的小B增添了幾分可愛, 但媽媽我好唔想你像我們一樣要帶眼鏡呀, 所以媽媽又是時候出手要限制一下你玩平版電腦的時間啦.  (因為你實在有太多方面都似足爸爸, 而爸爸就遺傳了他家族的散光眼, 我好怕小小年紀的你就要加入做四眼一族呢~) 

29w4d 產檢 @ QE

今日約了9點產檢, 不過我每次都慣性早到, 所以未夠9點就已經到達喇, 當自行量過血壓, 量過體重後, 就開始呆等, 雖然時間尚早, 到診的人亦只得小貓3數隻, 但依然要足足等上一小時才到我呢, 唉...下次去產檢, 一定要帶齊報章雜誌消磨時間才行呀.

第2次見助產士, 循例問問最近身體狀況, 然後量度肚圍, 聽聽妹妹B心跳, 再約下次產檢日期和照超聲波日期就完成.  今次跟我的那位助產士蠻健談的, 她還會主動提及妹妹B的Size, 雖然只憑雙手摸摸(個人認為絕不準確), 但既然助產士說沒問題就只好信她啦, 而且妹妹B頭仔已經向下, 即暫且可免除擔心要開刀的煩惱.

嘩...原來不經不覺, 我已經重了15磅啦, 雖然15磅對於一個懷有7個月BB的孕婦來說並不算多, 但我己經覺得自己面圓像波, 大脾粗壯, 真的連鏡都已經不想再照呢.  體重方面其實跟上胎陀小B時差不多, 未知妹妹B出世時又會有多少磅呢?!

掛住講..講..講, 無記性的媽媽我竟然忘了問助產士取回今天的到診紙呀, 結果回到公司樓下才醒覺, 幸好打去醫院一問, 職員說我可於3個月內去醫院補回, 否則今天就要白白浪費自己半天假啦.

上班前襯有兩個多小時空檔, 快快回娘家跟小B食個麥當當早餐, 玩一會兒, 再餵過飯仔才出門.  雖然小B應該都已經習慣了爸爸媽媽經常不在自己身邊, 但近幾個月, 小B變得好痴身...每次當我和爸爸一離開娘家就要跟著我們, 明明我已經跟小B說好, 晚上放工會馬上回來跟她玩, 可惜小B一見我換鞋就已經開始喊喇, 唉...心痛死媽媽啦, 眼淺的我有時都會因為見小B不捨得我們離開大喊而眼濕濕架.

豬兄豬妹生日BBQ @ 吉吉燒農莊

23112013

又到了每年一度豬兄豬妹生日BBQ Party啦, 今次想近近地方便大家, 朋友就提議到九華徑的吉吉燒農莊喇.  地點位於美孚, 交通算是非常方便, 適合沒有駕車的人士, 而且吉吉燒的食物都算不錯呀, $158任食, 只是場地活動空間非常有限, 爐貼爐的, 密集得根本不適合帶年紀太小的小朋友去.  幸好今次一行十多人中, 年紀較小的四位小朋友都算聽話, 肯圍在一起坐定定食東西, 抵讚!!

(由於媽媽要照顧小B及食食食, 所以根本未有時間周圍影相, 加上大家都竟然忘了帶相機呢, 結果唯有偷朋友放在fb的手機相嚕, 哈哈.)

小朋友們好快食飽飽, 開始要落地四圍走, 但前後左右都是燒烤爐, 真的好怕他們會受傷, 結果小B跟翁氏兄妹就到了門口附近的韆鞦椅玩喇, 其實媽媽我未有跟出去, 只忘著食食食...幸好有朋友代為照顧, 所以我都好放心.  至於左邊的小男孩, 見他們三個玩得開心, 又走上去一起坐, 而謙謙呢...則全程只顧痴著爸爸媽媽, 未有跟他們三位小朋友一起玩.

嘩嘩嘩...到了切蛋糕時間啦!!

實不相暪, 蛋糕是由我來挑選的, 因我和朋友都想試東海堂新出的芝士蛋糕, 又見豬兄豬妹一同慶祝, 所以就決定買下兩款不同口味的芝士蛋糕喇, 最後還是左邊的濃烤芝士蛋糕比右邊的日式梳乎厘芝士蛋糕較優勝, 哈哈~

一人一蛋糕, 慢慢吹, 唔洗爭...  (其實小B都好愛吹蠟燭架, 所以爸爸當然會預小B一份啦)

生日壽星 ~ 豬兄豬妹+小B先來張合照吧...

齊齊切蛋糕, 一人一刀都唔洗爭...

 最後來一張未齊人的大合照...

 今晚的生日BBQ Party, 小朋友們玩得好開心啊, 期待下月聖誕再聚在一起的時刻!!  ^^

敗於日本......城

早幾日全線日本城均做88折優惠, 從媽媽會得知這消息後, 當然立刻跑去一趟啦, 因家中的電熱水壺又是時候要更換嘛.  我發覺一般電熱水壺的壽命, 平均只得兩年左右, 自搬出來這4年間, 今次已經換上第3個電熱水壺啦, 每次更換的原因都是因為使用時間久了而導致水壺頂部的膠邊老化, 為了大家健康著想, 不得不更換啊, 因為膠邊溶了後膠粒會掉到水裡去, 而最大問題是我們要用這些熱水來開奶奶給小B嘛, 所以襯著日本城減價, 快快去買個新的熱水壺更換.

雖然我們家用了2個電熱水壺都是樂信牌, 同事更問我是否這品牌的電熱水壺才是這樣, 還建議我去買象印來試試, 不過婆婆話以前曾經買過一個過千元的象印電熱水壺來用, 3年後同樣有這個問題出現, 所以我相信未必關品牌事, 而是因為電熱水壺經常煲著熱水才會出現老化情況, 既然兩三年間就要換一個, 最後我還是選回價錢較大眾化的樂信牌.

原價$538, 折後473

最後還買了兩Packs茶包袋, 等遲下陳生幫我炒米茶後, 坐月時用.

原價$12, 折後$10.5

因帶著手多多的小B一起去日本...城, 所以快快手買完要買的東西就走了, 免得周圍摸周圍撞的小B害我要賠錢.  ~.~

原本襯著星期日減價最後一天去多一轉日本...城, 買一個小型電飯煲用作煮飯仔給小B, 以及多買一個透明膠箱來放妹妹B的衫仔, 可惜我的Schedule都被小B打亂而去不成, 就連我最想到的一田都無得去呀, 唉...

小小家務助理

24112013

自從媽媽我有了妹妹B後, 做家務方面已經比起以前懶惰好多, 雖然媽媽我有潔癖, 但因為肚子越大負擔越重的關係, 所以好多時做一會兒已經感到有點吃不消, 不過為了保持家居清潔, 媽媽我仍是堅持每星期於小B回家前進行一次大清潔, 最多媽媽我慢慢分階段進行.

上胎陀小B, 因第一胎關係, 小B爸特別特別緊張, 千叮萬囑我不要做家務, 結果家中大小事務都有他來一手包辦, 不過男人對於做家務這一環, 始終都有點求期, 所以好多時我會襯他不在家, 自己再從頭做一次, 可惜今次小B爸已經再無自動請纓啦...  算啦, 我完全明白亦好難怪他, 因為家中小B是一個痴爸B, 只要小B在家時, 小B爸就會被他弄得團團轉, 就連爸爸上廁所小B都會在門外催促的, 而且最近爸爸經常早出晚歸, 好多時見他比我還要累, 所以我亦不會要求他去幫手, 慶幸有時他還是會自動自覺地幫忙, 抵讚!!

未知小B是否知道媽媽辛苦呢, 最近就連小B都開始幫手做家務啦...始終還是生女比生仔好, 嘩哈哈哈~

小B開始大, 亦知道家中物件的擺放位置, 今日小B見爸爸媽媽坐在沙發上休閒地看電視時, 突然玩完玩具的小B, 便走去拉開櫃桶, 拿出除塵掃幫忙打掃喇...  我還開玩笑地跟小B爸說, 你何時請了家務助理而我不知道的呢, 哈哈!!

小B: 爸爸媽媽...等我這個小小家家務助理來幫忙, 你們不用理我, 繼續慢慢看電視吧~

媽媽: 小B, 你真乖女呀!!  媽媽錫錫  ^3^

爸爸: 小B, 你阻擋了我的視線呢...

小B: 哎呀...我幫手打掃, 你還說我阻住你嗎?

小B: 繼續幫媽媽手, 唔理你~

小B: 媽媽...點解個除塵掃灰灰黑黑既?

媽媽: 係呀, 媽媽用了好一陣子, 還未得閒換上新的, 所以你就先張就一下吧, 哈哈~

小B除了間中會幫手掃塵外, 有時見我拿著地拖或掃把時, 小B又會走過來搶著要幫手, 雖然媽媽知你生性, 知你乖女, 但操重功夫還是留待爸爸媽媽做就好了.  ^^

或許小B也遺傳了媽媽, 跟媽媽一樣有潔癖, 喜歡乾乾淨淨的環境, 所以好多時小B一見有少少Dirty, 就會表現得好嫌棄, 而且又愛學媽媽般打掃, 哈哈~

我是小肥豬

最近上班大部份時間都在食..食..食, 即使肚子不餓, 一旦無聊無事做時又在找食, 相信再這樣下去, 我好快就會變成一隻大肥豬.  現在除了有雙下巴外, 就連下半身都開始在長肉呢, 當某天自覺腿粗如象時, 小B爸竟然也開口取笑我.  唉...假如妹妹B出世後不能減去這些肥肉, 相信我一定會顛都似...因為向來瘦底的我, 實在接受不了自己擁有一個大躉 + 一雙象腿.

不過公司實在太多引誘, 太多魔鬼, 太多零食啦, 加上自己又在懷孕中...所以好多時還是會給藉口自己繼續食食食.

好像近幾天, 我就在沉醉於這包粒粒榛子威化餅中喇, 還要一包我獨享, 嘩哈哈哈!!

雖然邊食邊有罪惡感, 但這隻餅實在好味到停不了口呢~ 

儲奶袋

原本打算問問經常去泰國旅行的朋友, 最近會否再去泰國, 如去的話就請她幫忙代買Boots儲奶袋, 因為同事極力推介這款好用, 而且在泰國買的話會便宣一點, 結果朋友暫時未有計劃再去, 但她馬上就將妹妹用剩的都全部送我, 暫時共有5 Packs, 而朋友另外再叫了已出發到泰國的同事幫我代買數盒Boots呢.  雖然對我而言, 突然多了一點, 而且亦未知自己可以持續餵人奶餵多久, 不過我都好希望自己可以用得著架, 哈哈!!  ^^

小B大任務 - 2nd N班 Interview 分享及結果 (北海)

星期六單拖出席完救世軍校園導覽日後, 快快趕到附近的北海會合婆婆和小B, 幸好剛剛趕得及十時到達, 可讓我親身去感受一下這間學校的師資以及看看報讀學校的小朋友是什麼國藉居多.

由於婆婆及小B比我先行到達, 所以我自行按門鈴上學校, 結果學校職員遙距開門後, 竟然無人理會過我, 一上到學校, 只見接待處有兩位疑似校務員, 但他們全程都是坐著, 完全沒有出來招待過家長及小朋友, 那麼我就只好自行進去Playgroup找小B喇, 入去後只見幾位小朋友在Playgroup跑來跑去玩波波, 而小B則望著哥哥姐姐們玩 (一看身型...相信他們都是來面試K班的, 因除身型高大之外, 聽得出他們的講話能力都比較好, 所以好肯定他們不會是來In N班), 另外只見一個課室內有一位小朋友, 家長及老師正在進行面試中, 看來報讀這間學校的學生一點都不多啊!!  或許真的正如我所說, 報讀的人不算多, 所以未有安排其他老師回校, 但這方面的安排已經叫人要扣分了...而且感覺真的好街坊.

 

從相片中可令我聯想到這間學校就像聯合國一樣, 除尼泊爾人及大6人外, 應該就只有少數香港人.  就如面試當日一樣, 6, 7位小朋友當中, 已經分別有尼泊爾人及大6人喇, 唉...完完全全大打折扣, 真有衝動馬上帶小B走, 不過一場來到, 還是要見一見.

 (題外話:  藍色衫的那位小朋友, 竟然在眾目瞪瞪下搶去小B手上的波波, 而他的媽媽完全沒有加以阻止.  假如小B跟他們一起上學, 真怕小B會被他們欺負呢.)

等了一會兒, 到小B入課室面試啦, 原來面試的那位正是校長.  嘩...要校長親自接見, 老師們則未有回校, 這是什麼安排呀?!

好...入正題, 今日面試內容非常簡單:

1. 玩形狀配對板 (跟家中那塊一模一樣, 完全沒難度.  不過小B好心野, 老是想走到Playgroup繼續玩波波, 結果最後校長要把課室門關上, 還要叫小B乖乖先把形狀配好後, 才再到外面玩, 校長更忍不住說這位小朋友應該都是比較好動呢 ~.~" )

2. 認水果 (除了把檸檬和啤梨對調, 其餘蘋果, 橙, 香蕉, 提子都全部認對, 而且還可跟著校長指令, 分別把水果遞給媽媽, 婆婆及校長)

3. 形狀配對蛋 (校長先把一個配對蛋配對後, 再叫小B跟著做, 不過小B只顧拿著講蛋蛋, 蛋蛋, 完全沒有把它們配好, 其實因為小B未玩過, 所以唔識, 哈哈)

最後簡單問了家長幾句就完成了整個面試喇, 不過有兩個好奇怪的問題, 聽完我真的O了咀.  校長問我, 如小B心情不好時會否哭哭鬧鬧?! 我真的好想答校長, 我唔相信會有一位小朋友心情不好時還肯乖乖聽話.  另外校長又問我小B會否無理打人?!  好老實小B未試過無理打人, 而我亦好想問校長一句, 是否這兒的學生會經常打架, 所以才這樣問.

面試結果將於兩星期內有信通知...

離開學校後, 我已經忍不住跟婆婆說, 即使這間學校真的收了, 我都不會讓小B入讀, 一來學校給我印象蠻差的, 二來我對其他國藉小朋友的操行有所保留.  為了保護小B, 還是不要選讀這間學校比較好.

結果...今日才星期一, 婆婆就已經收到信通知, 學校收了小B讀上午幼兒班啦!!  雖然$780留位費不算貴, 但既然沒打算入讀這間學校, 我是不會把金錢白白丟到咸水海裡去的. 

老實說, 我確實有擔心過小B可能會無書讀, 因大多學校的N班都只收十個八個學生, 而報讀的人多的是, 但我亦不至於要求期得這個地步吧!!

今次親自到來, 真的令我大開眼界, 更令我明白到街坊學校跟其他學校的分別何在... 

調整心情好方法

前兩天心情總是怪怪的, 唯一能調整心情的方法就是...去敗家喇!!

近近地, Lunch及放工時專誠去了Cotton On和H&M一趟, 雖然只得少少收穫, 但敗家過後, 心情已經好轉了不少...

小B呀..小B, 你看媽媽對你有多好丫, 自己心情不好時都掛住買衫給你, 以後你真的要多多錫媽媽呀, 知道嘛?!

薄款Tee+長褲, 最適合這樣的天氣, 全部合共盛惠278個大洋, 抵..抵..抵..  ^^

小B大任務 - 1st N班 Interview 結果 (Cannan)

Interview後兩星期, 今天終於收到迦南通知啦, 結果係...已被列入新生後補名單!!  頂, 雖然迦南不是我心水學校, 而即使收了亦只會讀一年N班就轉校, 但眼見小B當天表現不錯, 竟然不獲取錄, 心裡確實不是味兒.

不過正如我之前已經提及過, 要從500-600人當中選收130人, 那還是要靠運氣多一點...

 算...疊埋心水, 跟小B一起努力餘下的面試吧!!

去 / 唔去?!

當大部份小朋友都差不多有N班/K班Offer之際, 我小B仍然在等消息中, 因為直至目前為止暫時都只是見了一間學校而已, 不過這間學校大約下星期就會發信通知啦, 即使取錄與否都會收到信.  至於另外還有兩間就要到明年一月及二月才開始接見, 看來小B能否入到心儀學校...媽媽我要等到變長頸鹿時才可揭曉喇, 哈哈.

其實今個星期六, 將會有另一間學校接見, 不過媽媽我仍心大心細中, 未知去見唔去見好.  這間學校超近婆婆家, 步行約10分鐘左右就到, 可以省回校巴錢及婆婆接送時間, 但...亦因為這間只是一般街坊學校, 於網上根本找不到任何評價, 而且近幾年更開始有不少印巴藉人士入讀呢, 所以一直都只打算用來做後後後備.  點知, 報了8間學校, 就只得迦南和這間安排於今年面試, 其餘都要出年才進行, 那麼萬一這間街坊學校真的收了, 我又究竟交唔交留位費呢?!

唉...好苦惱呀!!!!!!!!  婆婆話見了再算, 而我和爸爸則不想小B跟印巴藉人士做同學, 究竟星期六應唔應該去面試呢?!  

小B偶像 ~ 小B爸?!

我發現好多小朋友都好愛封自己爸爸為偶像...你們又有否曾封自己爸爸為偶像呢?!  (我自己...好像沒有囉, 或許爸爸給我的感覺實在太嚴肅, 所以從小我就愛痴媽媽多一點.)

小時候我表弟跟我們說, 他爸就是他最祟拜的偶像, 因為表弟話覺得爸爸好叻, 說到我姨丈好像十項全能像個Superman一樣...加上當年姨丈幫表弟做的勞作功課又真的大多頗高分, 所以表弟覺得爸爸好叻亦屬正常.

最近發現小B好像都將爸爸封為了偶像呢, 現在只要小B爸每做一件事, 小B就會跟著做, 有樣學樣, 做到跟爸爸好像Copy出來似的.  究竟是否因為小B當了爸爸為偶像, 所以鐘意模仿他呢?!

前幾天在婆婆家食晚飯時, 忘了爸爸在電視上看到什麼喇, 總之小B爸就好緊張地拿著碗飯走到電視機前啦, 小B見狀又馬上拿著碗飯走到電視機前, 姿勢還要一模一樣, 把我和婆婆弄得哭笑不得.

有時爸爸在家賞魚, 會將雙手放在後面, 如小B見狀又會走到櫃前將雙手放後面, 學爸爸賞魚...總之就是愛模仿爸爸.

要知道小B爸有個花名叫大眼仔 (其實因為朦豬才被朋友們稱為大眼仔, 哈哈), 每次笑起上來時, 眼睛就不知跑到那裡去.  雖然小B不至於眼大大, 但都未及爸爸一樣朦豬, 笑起上來時理應不會跟爸爸一樣, 但每次叫小B笑時, 小B就會將眼睛收起, 笑到跟爸爸一模一樣, 難道小B又是在學爸爸嗎?! 

從以上種種看來, 小B媽絕對有理由相信, 小B不知不覺地已經將爸爸封為了她偶像了, 哈哈~

Join團購大肚照試探小B爸反應

其實最初我真沒想過要影大肚照...因為既然上胎無影, 所以今胎都沒有要影的念頭, 可惜我身邊的魔鬼多的是, 同事及朋友不停在游說我, 說一生人怎樣也要影一輯來作紀念, 加上這是最後一次機會嘛, 結果我好快就敵不過這班魔鬼, 心思思又想跟風影一輯喇.  雖然上胎都知道小B爸蠻抗拒影大肚照, 但我還是嘗試著努力說服他, 可惜小B爸就是不太願意囉, 幸好他未至於堅決否定我, 不過我不想太過勉強他, 所以本打算放棄影大肚照.

剛好這時候跟大肚好友提及這件事時, 原來她的情況跟我一樣呢, 就是自己想影, 但老公唔願影, 最後不記得是我先提議還是她先提議, 不如就由我們倆人自己去拍一輯來玩玩!!

我們倆抱著試玩心態, 見團購有平靚正優惠, 最後買了兩個Package一試.  雖然大家都知道團購的未必一定好, 不過友人認為那些大肚照遲些定會跟婚照一樣, 好快就會被收藏到床下底裡去, 所以不願花太多金錢, 最終我們以$299的廉價買得以下優惠:

--------------------------------------------------------------------------------------------------------------------
$199享【專業攝影套餐】拍攝150張相片 + 1隻12張Slide Show DVD + 12張4R相片。適用於拍攝兒童照/情侶拍拖照/家庭照/團體照/畢業照/孕婦照。專業攝影師主理，提供專業意見，拍出獨一無二相片﹗專業影樓拍攝，佔地1000尺。送$200現金券，可即場使用。(價值﹕$1999)

如預約星期六、日或公眾假期，需加$100

--------------------------------------------------------------------------------------------------------------------

可幸的是...買了團購後, 小B爸在不情願之下, 還是答應相伴去拍照呀, 而友人亦強烈要求了他的另一半一起參與.  雖然對於這輯相不會抱有期望, 但能夠於大肚時做個小小紀念, 我都已經好開心啦, 哈哈~

如果今次試影後覺得OK, 我一定會認真再影多輯, 因為其實我一早就已經有心水攝影師啦, 只是小B爸的關係所以遲遲未Confirm, 總之先看看小B爸團購試影的反應, 到時再實行先Join後奏, 等小B爸不得Say No, 不得意議, 咔咔...

我家小狗 ~ 金仔

再過兩星期左右, 我家小狗金仔5歲生日啦!!  今年真的要認真想一想, 要怎樣跟金仔慶祝才行, 因為自小B出世後, 我真的虧欠了金仔好多好多...  其實有時我都會感到蠻內疚的, 但沒辦法啦, 小B一個都足以令我團團轉, 遲些再多一個妹妹B, 相信到時能跟金仔相處的時間就會變得更加少.

最近婆婆經常投訴金仔之餘, 還不斷給我說話聽, 話我當初沒有好好想清楚就決定養金仔, 好老實即使再給我一次回到最初, 我仍是會選擇養金仔的, 但我亦不得不承認, 自己於編排時間方面確實做得不好, 以致近年經常忽略了牠, 幸好當家中各人都忙著照顧小B時, 我家細佬還視金仔為唯一, 否則我想金仔的情況一定會更差更壞.

以前金仔集萬千寵愛在一身, 在家中就好像大爺一樣, 人人對牠服侍周到, 而且個個回家後都愛攬著牠, 但這年多...萬千寵愛在一身的人已經變為小B啦, 現在個個回家都只顧著跟小B玩, 完全沒有理會金仔, 最多都是請牠食餅餅而已, 這些日子相信金仔一定好難受, 所以在性格上, 金仔確實有所改變, 當然我所講的改變並非向好的一方面改變啦, 但我還是一直在包容牠.  即使婆婆, 姨姨投訴金仔有多壞, 我都左耳入右耳出, 大不了我就跟金仔大談人生道理, 雖然未知道牠是否完全明白, 但從牠眼神中, 我看得出牠知道我還是關心牠的.

現在小B開始大...小B跟金仔亦有不少互動, 而且看來感情還不錯呢, 各人亦看得出小B好錫金仔之餘, 金仔又會因小B不在家時坐立不安, 金仔甚至會在小B每次被罵或扭計時, 站在小B身旁發出古怪聲呢,  總之見他們倆相處真的覺得好好笑.  而我亦希望遲些妹妹B出世後, 金仔不會再一次感到自己地位不保就好了.  因為金仔好不容易...才能夠接納小B, 所以我同樣希望遲些金仔可以快快接納妹妹B啦.

看來...我除了要認真想想如何跟金仔慶祝生日之餘, 還要認真地抽回多點時間陪牠才行.  我真的不想將來到金仔百年歸老後才去後悔, 所以我要襯著現在還有時間, 盡我的責任去愛牠.

金仔...我希望你知道, 雖然媽媽少了時間陪你, 但我依然好愛你架!!  *3*

小B大任務 - 1st N班 Interview分享 (Cannan)

01112013

小B大任務之第一回終於順利結束...今日晨早未夠8時就要把仍在睡夢中的小B吵醒 (平時這隻豬仔多數睡至10時多才起床, 因跟著婆婆習慣了夜訓, 唉..看來要快快幫她戒掉夜訓的習慣才行喇!!), 幸好起床時小B沒有哭哭鬧鬧, 但都需要一段時間才能夠清醒過來, 而媽媽我亦不停地在她耳邊說, 你快些起來, 媽媽就帶你去學校跟小朋友玩, 貪玩的小B聽到有得玩當然沒有詐型啦, 哈哈~

好...梳洗過後, 小B就醒醒目目地跟媽媽和婆婆出發去迦南面試嚕!!

我們三人準時9時正到達學校, 而校長亦親自在校門外迎接各家長及小朋友, 感覺蠻親切.  一入校園, 快快到接待處交過問卷, 取過小單張, 拿了面試號碼, 就先讓小朋友在Playground玩玩具, 熱熱身.  而小B今日表現亦比我預期中好, 竟然未有怯場, 還拖著媽媽我四處看, 可能大部份小朋友都好乖乖坐定定玩玩具, 所以平時坐唔定的小B都坐得算OK, 大約10分鐘左右, 老師就請各小朋友的其中一位家長到音樂室聽學校簡介會, 而另一位家長則陪同小朋友到課室面試.

5位小朋友進入同一課室, 分別由5位老師接見, 一開始當然是問小朋友的名字啦, 可惜小B啞了, 因為她根本就不懂說完整句子, 平時都只是跟著我們大人說才勉強說出, 媽媽我唯有老實跟老師講, 她還是在說單字階段, 幸好老師話, 由於他們年紀少, 說話技巧亦不是今次面試重點, 所以不懂答亦沒關係, 他們主要是看看小朋友是否明白老師問的問題, 以及其反應.

好...問過小朋友名字後, 面試正式開始, 老師先拿了些玩具出來, 叫小B做給老師看.

1. 老師拿出一個水樽和數粒蠶豆, 叫小B把它放進水樽內再把蓋子關上.
    這個對小B來說根本沒難度, 因平時在家都有玩開這樣的遊戲, 所以輕易過關.

2. 老師拿了幾張相及幾隻公仔, 叫小B做配對.  (如: 鴨, 魚, 海豚等等)
    起初我都擔心小B會失手, 幸好最後全都配對了.

3. 老師拿出水果配對板, 叫小B做配對.
    Yeah...小B又全對啦, 叻叻!!

    老師拿著蘋果問小B這是什麼來, 小B沒回答, 即使媽媽從旁引導, 小B仍是金口難開.

    老師再叫小B分別將蘋果, 橙及香蕉遞給媽媽, 幸好小B都肯做加全對.

4. 老師問小B眼耳口鼻位置, 不過小B唔答, 最後老師改為問媽媽的眼耳口鼻位置.
     小B輕易地指對了.

5. 最後老師拿出一幅圖, 叫小B指出老師問的東東在那.  (如: 餅, 小朋友, 花等等)
    小B除了未能指出那粒是糖之外, 其餘都能順利指出.

面試完畢, 老師送上公仔一隻, 小B跟著媽媽說多謝老師, 老師還說終於聽到你講野啦, 哈哈~

雖然對於老師來說, 小B的表現應該未算是最好, 但老實說, 在未有催谷小B面試下, 小B仍能做出這樣的成績來, 媽媽我真的好開心好欣慰...啜啜啜啜啜, 媽媽愛死你!!

最後媽媽讚小B幾句, 小B就鬆毛鬆翼, 得得戚戚喇...

今次面試內容純粹只可作參考, 因為原來每間迦南面試模式都有所不同, 朋友同一天於另一間迦南面試, 是以小組遊戲形式來作評估, 感覺上比這間還要容易, 但其實迦南面試, 真的算是不難啊!!

3星期後即使取錄與否都會有信通知, 不過有家長於簡介會時問過, 今次會收多少明學生時, 校方說面試人數多達600人, 但上下午校則只會各收65人.  嘩...看來又是以抽獎形式, 那取錄與否真是要看小朋友彩數喇.