好消息

對於媽媽黎講係一個好消息...
對於婆婆黎講都係一個好消息...
但對於小B黎講就唔知算唔算係一個好消息喇...

等了幾日, 昨早終於收到學校通知, 小B可以繼續返埋8月啦, 雖然8月只係返短短兩星期, 但對於年紀開始大嘅婆婆黎講, 一湊二真係太辛苦了, 所以我哋都認為返得一日得一日好, 如果唔係到時困獸鬥喺屋企一打二, 婆婆真係命仔都短幾年呀.  至於媽媽原本亦開始為小B放一個月暑假而準備搵興趣班, 但一想到要上興趣班時又要辛苦婆婆帶住兩個行出行入就開始有點頭痕, 幸好...最後終於都唔洗煩!!

至於現在只放13天暑假嘅小B, 相信應該未識同媽媽投訴太少時間玩吧, 哈哈~





我們的Facebook專頁 - 小b與妹妹b之成長日誌

Happy Saturday

星期六放假無地方去, 大熱天時又唔想進行戶外活動, 最好當然係約去朋友仔屋企玩啦, 小朋友玩得開心時, 大人又可以吹吹水, 爽!!

不過去到朋友屋企時, 朋友仔仲訓緊晏覺啵, 既然係咁唯有倆姊妹自己玩住先啦.

近來倆姊妹經常表現得老友鬼鬼, 媽媽終於感到有丁點欣慰...  ^^

朋友仔敵唔過倆姊妹嘅高興玩樂聲, 好快就醒咗加入一齊玩啦...

 成日都係得倆姊妹玩感覺比較悶, 所以間中都係要搵朋友仔一齊玩下嘅...

 大人開餐...小朋友都一齊開餐~

 然後3隻小豬一齊排排坐, 睇碟碟...

 一齊跟住DVD Fing Fing手, 最後更齊齊落地跳跳舞, 超可愛呢.

今日3隻小豬都玩得咁開心, 黎緊得閒真係要再約一齊玩先得, 始終我都覺得有其他小朋友一齊玩, 總好過倆姊妹成日自己喺屋企爭嘢玩嘛.

另外不得不提...媽媽我今日終於成功挑戰一拖二啦, 下次可以再嘗試這個越級挑戰, 哈哈~





我們的Facebook專頁 - 小b與妹妹b之成長日誌

提早結束N班校園生活?!

看來因為媽媽嘅疏忽, 小B要提早結束佢嘅N班校園生活啦!

早於一月初時, 學校已經有通告問我哋會轉校嘅家長, 打算幾時退學.  而全日制學校一般暑假只得兩星期左右, 所以有好多家長都會選擇喺學期結束前退學, 好讓小朋友放暑假玩過飽玩過夠, 而我哋當然都唔例外啦, 最初打算返埋7月, 等小B可以休息一個月才去新學校返學, 不過經過前陣子小B一連幾天病假之後, 知道小B真係好鐘意返學, 而且婆婆亦開始擔心自己未能同時間照顧兩隻小魔怪, 所以就漸漸打消了提早退學嘅念頭喇.  而我哋亦以為只要一日唔交退學信就可以返到學期終結, 所以當有新決定後, 一直未有通知學校, 但原來我哋唔通知學校嘅決定係更加錯嘅...

今日同小B同學仔媽咪傾開, 先知道原來學校已經開始搵緊新生8月返黎學校補位啦, 這些新生雖然都係9月讀N2, 但學校為咗可以預先安排學生早點適應校園生活, 所以按次序問家長是否願意於8月時從N1班開始適應, 據知暫時已經有幾位新生家長答應補上, 將於8月插班N1.  而我聽到後當然馬上通知學校我哋嘅決定啦, 不過學校話因為已經通知咗幾位新生家長, 所以看來我哋8月可以留低嘅機會唔大, 但暫時仲有一兩位新生家長未覆實會否插班, 最終結果還是要等學校過兩日通知.  唉, 今次純粹係因為媽媽我嘅疏忽, 可能令小B要提早結束佢開心快樂嘅N班校園生活啦!!

雖然當日決定得轉校, 就預咗會有離開嘅一日, 但當日子越近, 心情就越見不捨, 我想小B應該都會跟我一樣有相同感覺吧.

嗚嗚嗚~~~   





我們的Facebook專頁 - 小b與妹妹b之成長日誌

妹妹B ~ 16個月

12.06.2015

嘩嘩嘩...妹妹B已經16個月大啦, 雖然媽媽一直唔捨得你倆姊妹大得咁快, 不過媽媽都要繼續祝你快高長大, 而且玩得, 食得, 瞓得又痾得!! 

近幾個月, 跟家姐相處越見融洽, 當然間中都會有爭玩具或打交嘅時候, 但和平相處時間明顯比以前多, 而且妹妹偶然亦會表現出錫家姐嘅一面.  媽媽真心希望你倆姊妹感情可以一直好落去, 假如將來能夠做到既係姊妹又係朋友那就Perfect喇.

呢個月, 妹妹第一次出門遠行, 雖然帶咁細個BB去旅行爸爸媽媽確係有少少辛苦, 但見到妹妹又開心又興奮, 真係覺得好值得呀, 而且我亦深信這樣出外走走, 小朋友一定會有獲益嘛.

不用多說, 妹妹真係一個愛食BB.  (有圖有真相)

好...又黎記錄一下發展進度先~

體重: 21磅 (兩個月前記錄)

食:
其實食方面, 一向唔太擔心, 最擔心係佢同金仔一齊分享, 一人咬一口麵包.
胃食嘅BB有時連金仔D狗糧都唔放過, 曾經多次目睹妹妹將狗糧放入口, 唉!!!!!!!!
至於食飯方面, 妹妹比較鐘意自己進食, 所以往往都會食到天一半地一半, 基本上媽媽見到這個情況一定會忍唔住出手餵妹妹, 但妹妹未必每次都領情, 有時甚至會用手撥開我呢.  另外妹妹有時會邊食飯邊走來來去, 要追住餵飯嘅我真係餵到好激氣, 所以好多時我都會忍唔住大聲鬧佢, 結果我一大聲鬧, 妹妹就會同我耍脾氣, 拒絕再食, 通常妹妹唔食我都唔會再餵, 但婆婆又會忍唔住再餵囉, 結果妹妹當然會繼續食啦, 但長此下去...真係好容易會令妹妹養成壞習慣嘛.

訓:
早上約8:00起床, 午睡一次, 大約1.5 - 2小時, 晚上10:30媽媽就會開奶, 妹妹見奶後會自覺上床食奶訓覺.

活動能力:
開始模仿家姐扭動身體跳舞, 真心的...妹妹跳舞好像比家姐更有天份, 哈哈~

指令:
繼續不斷有進步, 已經唔可以一一列出.

講:
Mum Mum, 奶奶, 爸爸, 媽媽, 婆婆, 家姐, 姨姨, 伯伯, 金金(金仔), 去街街, 揹揹, 碟碟(米奇DVD), 包包, 係, 打打, 手手, 腳腳, Pat Pat等...  (其實仲有好多, 因為妹妹就好似錄音機一樣, 你講佢又會跟住講)

表達方面,
從小到大妹妹表達能力都好強, 佢想表達出黎嘅嘢, 我哋好容易就會估到.
(相反家姐細個表達比較差, 表達幾次我哋都唔明就會發脾氣, 但妹妹就好少因為咁而發脾氣)

性格:
脾氣激大, 一唔鐘意就會丟嘢, 咬人或打人, 唔知點樣先可以教番好.  (媽媽頭痛+苦惱中)

健康:
今個月還好, 要繼續Keep住健康身體呀~~~






我們的Facebook專頁 - 小b與妹妹b之成長日誌

高雄墾丁之旅 - Day 4 (旗津 -> 壽山忠烈祠觀景台 -> 龍虎塔 -> 夢時代)

話咁快又黎到旅程嘅最後一日, 今日我哋一早就離開墾丁回程去高雄, 墾丁可以玩嘅地方都差不多玩過, 要去嘅地方都差不多去過, 加上我哋又唔打算再游水或進行水上活動, 所以司機就建議我哋行下高雄景點.

跟昨天一樣10點出發, 去到高雄已經係正午時份, 高雄天氣比墾丁悶熱, 一想到今日稍後嘅行程, 大家都確實汗顏.

原本我跟司機已經安排好要行嘅景點, 但去到高雄落車後, 婆婆同契婆都話呢度又焗又熱, 又話唔想行什麼什麼博物館或公園之類等地方, 但去旅行啵...唔係應該預咗會行呢D景點咩?!  算...為免傷和氣, 今日嘅行程安排我唔參與, 就由其他團友及司機來決定吧.

去到高雄, 司機首先帶我哋去旗津區, 契婆話想買手信, 司機就帶我哋去旗后觀光市場買乾貨手信喇.  呢度主要賣的都是海味或魷魚絲之類等食物, 全個市場幾乎買的東西都是同一款, 只在於價格不同而已.

買手信期間倆姊妹唔太合作, 仲突然扭肚餓...

結果攪一大輪依然扭計, 為免耽誤大家時間, 我同爸爸就先找個地方坐著餵飽倆姊妹, 而團友們就繼續於附近四周逛逛.  幸好今早媽媽我喺酒店盛了一壺肉燥飯, 如果唔係突然間都唔知有乜嘢岩佢哋食囉.  倆姊妹食飽飽, 心情馬上變好, 不過太熱我同爸爸帶住兩個都唔太願行, 所以跟團友們會合後就齊齊跳回車上.

其實旗津可以行嘅地方有好多, 可以影靚相嘅地方亦唔少, 原先司機都怕我哋會喺旗津逗留太耐而影響之後嘅行程, 但點知我哋...今日真係超Hae囉.

既然唔想行, 司機就帶我哋去食牛肉麵喇, 食牛肉麵時妹妹又要自己坐, 宜家樣樣都要有佢份, 乜都要霸一份.

食飽飽...之後嘅行程要重新設計, 原先安排嘅駁二藝術特區及鐵道公園通通唔去, 而團友們都話想去有冷氣嘅地方, 所以司機就帶咗我哋去行大賣場, 但大賣場賣的都是一些家居用品及電器之類, 仲有宜家傢俬囉, 除咗婆婆同契婆有少少興趣行之外, 我哋都覺得好無聊啵.

然後司機再帶我哋去壽山忠烈祠觀景台影相...

L.O.V.E...我愛你們呀, 希望下次再有機會跟你們一起去旅行啦~~~

一個講...一個聽..小小事倆姊妹就可以玩得好開心, 小朋友開心就係咁簡單.  ^^

司機見時間尚早, 就再多帶我哋去附近一個景點才去夢時代, 原來今次要行嘅係龍虎塔...這個塔其實都沒什麼特別, 好快行完一圈又走人啦, 因為推住BB車唔方便行想頂, 所以我哋只行了最底層.

然後終於黎到最後一站 - 夢時代, 相信倆姊妹今日玩得最開心嘅地方, 應該就係去咗呢個湯姆熊歡樂世界喇.

跟丟錢樂園一樣燒銀紙嘅歡樂世界, 但既然倆姊妹鐘意玩就讓她們玩玩吧.

於夢時代行完街, 食過飽, 玩過夠, 我哋終於都係時候要出發去機場返香港啦, 雖然呢個旅程唔算係十分之好玩, 不過能夠跟家人一起去旅行, 實在已經係件幸福事, 所以黎到最後點都會有少少不捨.

噢...去到機場Check In, 點知地勤人員告知航班將會Delay約半小時.

幸好機場總算有少少地方俾倆姊妹玩...

下次去旅行, 爸爸話回程時千萬唔好再揀搭夜機, 因為返到屋企已經係凌晨一點, 真係大人小朋友都攰爆.

好啦, 今次旅程已經分享完畢, 期待下一次旅程再同大家分享.  ^^





我們的Facebook專頁 - 小b與妹妹b之成長日誌

父親節 2015

父親節, 當然要同天下間所有父親講聲父親節快樂啦...雖然公公已經離開我哋一段長時間, 但我依然好掛住公公, 好想親口同公公講聲"父親節快樂"呢.  以前年紀尚輕又未做人父母, 真係唔會感受到父母節日當中嘅意義, 不過這幾年媽媽我已經完全體會到+感受到啦!!

藉著父親節, 我真係要襯機讚一讚爸爸先得, 因為自問這幾年來爸爸比媽媽這個職務, 爸爸真的確實比媽媽做得更好更出色, 雖然因工作關係, 爸爸放在倆姊妹身上嘅時間未及媽媽多, 然而當爸爸一有時間或放假時, 爸爸都會主動幫忙照顧倆姊妹, 陪玩陪瞓煮飯餵飯湊返學放學通通無托手踭, 所以難怪我家倆姊妹熱愛爸爸程度比媽媽強, 不過放心, 媽媽係唔會呷醋架, 因為這是爸爸你應得的.

唔知係咪倆姊妹都知道今日係父親節嘅關係呢, 今日兩個都特別痴爸爸囉, 哈哈~~~  ^^

是晚活動除了跟親友外出食飯慶祝父親節外, 小B還特地送上喺學校親手造嘅父親節禮物給爸爸呢...

我們的Facebook專頁 - 小b與妹妹b之成長日誌

便服日

小B學校難得有便服日慶祝兒童月, 媽媽當然要借機幫小B好好打扮一下啦, 想不到有打扮嘅小B原來係可以咁索架!!
(平日經常自認豬扒嘅小B, 今日一D都唔豬扒  :p)

就今早返學時所見, 大部份女孩子都打扮得好靚呀, 返學時仲不停聽到老師讚小朋友添啵, 確實女孩子都應該係貪靚嘅, 但論性感程度呢, 似乎小B應該都算係數一數二喇.

都係嗰句啦, 細個唔性感, 唔通留番大個先行性感咩...
(爸爸好保守, 小B大咗就無得再行性感架啦)





我們的Facebook專頁 - 小b與妹妹b之成長日誌

高雄墾丁之旅 - Day 3 (龍磐公園 -> 鵝鑾鼻燈塔公園 -> 砂島 -> 船帆石 -> 後壁湖 -> 貓鼻頭 -> 關山夕照 -> 出火) 下

食完豐富又美味嘅午餐之後, 我哋又再繼續行景點啦...

原本我哋打算去紅柴坑坐小海豚半潛艇出海睇珊瑚, 只可惜紅柴坑嗰邊風浪太大, 船家見我哋有小朋友就唔建議我哋上船.  其實好彩我哋無上船咋, 因為之後我哋見到有隻小海豚半潛艇喺大海中不停拋上拋落, 如果我哋上咗船...真係驚食飽嘅我哋事後會嘔得一乾二淨囉.

結果司機就帶番我哋去後壁湖坐另一家嘅半潛艇, 後壁湖呢邊風浪唔大, 非常平靜, 所以大家都可以好安心上船. 

上船後影大合照是常識吧!!

今次媽媽於行程中安排坐半潛艇, 目的係想俾小B開開眼界, 看看水底珊瑚有多美, 果然小B係好認真好入神地睇架...

倆姊妹又一齊去痴實契姨姨, 今次旅程真係辛苦晒契姨姨呢, 哈哈~

泊岸前,爸爸又借機抽水  ~~"

俾人鍚完然後會大笑嘅BB真係特別可愛...

好啦, 觀光海底世界時間又要結束, 我哋下一個景點係出水口.

由出水口水道排出大海嘅水, 唔知點解特別藍....

離開後壁湖, 我哋就去貓鼻頭公園啦, 不過去到貓鼻頭, 最令我感到意外嘅係, 竟然超多大陸人囉, 辛辛苦苦行樓梯上到觀景台, 幾乎所有位置都佈滿大陸人, 所以莫講話搵位影靚相, 我哋直情多留一陣都唔願呀.

原本去完貓鼻頭應該去關山睇日落, 但我哋每個景點都只逗留一會就火速跳回車上, 結果時間亦比司機預計嘅早.  既然未夠鐘睇日落, 司機就提議我哋去玩小型賽車喇...

為安全起見, 小朋友一定要帶頭盔....

小B話要坐亞父車...

 有個爸爸又扮型...

妹妹見家姐玩, 佢又指住車車要求玩, 既然妹妹要求, 當然要俾佢試下啦~

大家有見到妹妹嘛?!

(見唔到係正常架, 因為我都係見到佢頭上嘅橡筋咋, 哈哈)

玩完賽車, 都係未夠鐘睇日落, 司機再帶我哋去恆春鎮北門走走.

一個好有中國歷史文化氣息嘅古蹟地方...

然後我地終於都去關山睇日落啦, 雖然時間尚早, 不過邊食邊等, 時間好快就過去...

只要有得食嘅地方就會見到妹妹豬出現...

好可惜今日多雲, 所以大家都睇唔到好靚嘅日落啊, 真失望~

睇完日落, 我哋先去熊家豬腳食晚飯, 然後就去出火喇, 不過大家唔好心邪, 此出火不同彼出火.  我哋要去嘅係出火特別景觀區呀...

因為地底有天然氣嘅關係, 所以才會產生這個現象來.

今日嘅行程就這樣結束, 回酒店稍作休息後, 年長的就繼續留守喺酒店休息, 至於我哋年輕的就當然要襯最後一夜狂掃街啦.  :p





我們的Facebook專頁 - 小b與妹妹b之成長日誌

高雄墾丁之旅 - Day 3 (阿興生魚片)

黎到墾丁當然要去後壁湖食海鮮餐啦, 因為呢度出名又平又好味嘛...

一去到漁會大樓, 見到人氣極高嘅輝哥大排長龍, 加上之前於網上做過資料搜集, 得知輝哥只食其名氣, 海鮮質量只屬一般, 所以我完全未有想過要去輝哥排隊呢.  相反另一間阿興同樣出名, 食店一樣座無虛席, 而且亦有少量人群聚在門外等候, 幸好司機認識阿興嘅人, 所以我哋只係等咗10分鐘就有位, 既然係咁...就梗係揀阿興啦.

等位期間要先點菜, 基本上未入單就一定唔會有位, 所以一去到記得要先揀好海鮮點菜, 然後快快入單輪候坐位啊, 而且點菜後亦不能再加單, 份量方面大家就要安排好一點了.

今餐我哋點了以下食物, 出奇地埋單不用港幣$800, 真係好抵好抵好抵食呀~~~~~~~~

最令我欣賞嘅當然係生魚片同海膽啦, 夠新鮮之餘, 甜味亦十足, 激讚激讚!!

至於其他海鮮都好不錯, 而最好彩係開餐期間, 倆姊妹都敵不過睡魔急Call, 雖然我同爸爸要抱住兩隻豬仔開餐比較辛苦, 但總算食得安靜, 無人攪攪震嘛, 哈哈.

今日媽媽亦專誠拎定暖壺出黎, 所以倆姊妹瞓醒之後都可以食到少少...  :p

若然下次再去墾丁, 我一定會再去幫襯阿興食海鮮~





我們的Facebook專頁 - 小b與妹妹b之成長日誌

高雄墾丁之旅 - Day 3 (龍磐公園 -> 鵝鑾鼻燈塔公園 -> 砂島 -> 船帆石 -> 後壁湖 -> 貓鼻頭 -> 關山夕照 -> 出火) 上

玩完沙灘車, 行過對面龍磐公園, 就正式開始司機為我哋安排嘅行程喇!!  ^^

需說是公園, 但其實係一片大草原, 加上地層隆起, 看似就像個縣崖邊一樣, 風景確實特別的美...

咁靚嘅地方當然要影張全家福啦~~~

逗留了約10分鐘, 大家影完相就繼續出發去下一個景點鵝鑾鼻燈塔公園啦.

今日天氣真係好好, 而且好熱好曬, 我哋仲因為包咗車嘅關係竟然忘記帶BB車, 結果行景點時就變成這個樣子喇...一個揹時另一個抱, 辛苦到極.  雖然呢幾日係就係有人幫手湊囡, 但無奈倆姊妹都係比較鐘意跟住爸爸媽媽呢, 不過我都真係好感激今次最幫得上忙嘅契姨姨架, 年紀輕輕都攪得惦我兩隻小魔怪, 厲害厲害~ 

一場黎到, 點都要影下個燈塔嘅...

雖然呢個公園要收入場費, 但我哋一行8人都實在感到好熱好辛苦, 所以快快行一圈後就選擇離開.

上車不久, 我想應該不夠10分鐘吧, 司機就帶我哋去到砂島.

又係一望無際嘅大海...好靚, 而且陣陣海風, 超舒服的!!

這個被譽為墾丁最美的沙灘...  好可惜因沙灘被受政府保護, 所以遊客未能走近, 只可遠觀~

影過幾張相, 然後再到附近嘅船帆石, 正如我之前所講, 我哋對於睇山睇石睇水唔太大興趣, 所以用上半天時間都係睇呢D景點, 大家都好像開始有點悶了, 最後黎到船帆石時, 就連司機叫我哋落車影相, 我哋都無人肯落呢, 結果坐在車頭嘅契姨姨在車上影張相, 就代表咗我哋到此一遊啦, 嘩咔咔咔~

好啦, 睇山睇石睇水嘅行程下午再繼續, 現在大家都又累又餓, 係時候出發去後壁湖食海鮮午餐了...





我們的Facebook專頁 - 小b與妹妹b之成長日誌