學校興趣班

小B學校一直好鼓勵小朋友上興趣班, 原因就不用多說啦...當然係因為方便日後考小學嘛.  雖然本身小B都有學跳舞, 但因地點唔太方便嘅關係, 所以媽媽喺8月時已經暫停了小B嘅跳舞班啦, 然後打算開學後才繼續上興趣班, 可惜婆婆知道後強烈要求我唔好揀平日去上興趣班, 因為要帶出帶入實在唔方便, 結果我只好留待星期六才去上興趣班嚕.

9月中時, 見學校有不同嘅興趣班可以報名, 但能夠跟我時間配合的則選擇不多, 最後喺小B強烈要求下, 我哋報咗鋼琴班, 但因小組教學, 所以我唔期望會學得好好, 暫時我只係借今次機會試試小B是否真有興趣學鋼琴, 如果上完10堂後小B要求繼續學, 我就會帶小B去琴行學, 希望小B今次唔會係3分鐘熱度啦...大大話話小B話想學鋼琴都已經講咗大半年有多.

剛過去嘅星期六, 小B第一次上鋼琴班, 雖然媽媽唔在場, 不過小B話好好玩啊.  而學校安排嘅課外活動導師亦有話小B手指算OK嘅, 但暫時手勢仍未正確, 要多上幾堂才知是否真的適合, 現時導師叫媽媽有空就幫小B練習將雙手正確放在琴鍵上嘅手勢便可.

有個小朋友期待咗好耐, 終於可以上佢第一堂嘅鋼琴班啦~

一小時課堂好快過去, 上完興趣班就同同學仔去食Lunch.  雖然佢兩個才剛認識一個多月, 不過一直都好似幾好朋友, 而我跟同學仔媽媽亦尚算投緣.  ^^

跟同學仔在一起, 連食Lunch都唔洗媽媽操心~

然後再一起逛逛商場, 本來小B話要去公園多玩一會才回家, 可惜天公不造美, 一離開商場就落雨, 最後唯有一起回家午睡去.





我們的Facebook專頁 - 小b與妹妹b之成長日誌