契女大豐收

早幾星期, 契爺契媽去Honeymoon, 但旅程中佢哋都不忘我家倆姊妹架...

結果我哋坐定定喺屋企又有禮物收, 所以話有契爺契媽鍚嘅倆姊妹真幸福呢.

多謝晒契爺契媽, 我哋會盡量保存得好D, 留番俾將來嘅契細佬/契細妹架喇, 哈哈~

每次契爺契媽去旅行都買唔少嘢俾倆姊妹, 攪到媽媽都有D唔好意思添!!  :p





我們的Facebook專頁 - 小b與妹妹b之成長日誌

萬勝節服飾分享

再過幾天就到萬勝節, 大家為小朋友準備好扮鬼扮馬未呀?!

今年因為小B學校要開萬勝節Party關係, 所以媽媽早前特地為小B準備了一套巫婆南瓜服.

登..登..登..登..

真心覺得呢套巫婆南瓜服好正, 不過質地略厚, 所以以現在廿多度天氣來看, 裡面單穿一件背心就可以了.  另外還配襯了一對黑色絲襪和南瓜袋, 媽媽非常期待星期五Party當天小B嘅整個造型啊.

今次又一真心推介, 就連小B同妹妹自己都好滿意呢個造型呢, 哈哈~





我們的Facebook專頁 - 小b與妹妹b之成長日誌

Hayden's 4th Birthday & Halloween Party @ Playhouse Megabox

星期日...我哋一班大大小小嘅好朋友又出動去玩啦, 今日大家都玩得好開心好盡興.

一去到Playhouse登記完畢, 小朋友進場後就馬上四散, 其實喺呢D地方開Party, 場面真係較難控制, 不過最緊要就係小朋友開心嘛!!

話明場面難控制, 當然影相亦有一定難度啦, 結果到最後我地更加發現原來無同主角Hayden合照呢, 噢~  

今次再去Playhouse玩, 無咗大爺同大爺媽陪玩, 小B竟然無平時玩得咁放, 而且仲經常要痴住媽媽, 攪到媽媽一齊擒高擒低, 真係好攰好攰.

結果玩完一輪, 媽媽就宣佈投降, 好彩小B亦都已經投入, 可以自己跟朋友仔一齊四圍玩.

好啦...Party差不多要開始, 準備Party前, 我哋當然要換上萬勝節裝扮啦...

估唔到小朋友們原來都好期待扮鬼扮馬一刻啵, 哈哈!!

Party開始了 @ 我們這一班 (其實我哋自己都未齊人, 不過唔好理啦, 因為已經好混亂)

玩下食下傾下笑下...是大家的指定動作吧.

最後大部份出席嘅小朋友都好乖乖肯企埋一齊影張大合照, 然後大家喺一片歡笑聲之中又渡過咗大半日嚕.

而媽媽我最開心當然係集郵成功可以同梓瀧合照啦, 嘩咔咔咔~

另外我要代朋友特別鳴謝檬媽幫忙呢!!  ^^





我們的Facebook專頁 - 小b與妹妹b之成長日誌

試用 - 澳洲天然品牌Moogoo牛奶輕柔潔膚乳及洗髮乳

踏入秋天才不久, 倆姊妹嘅皮膚就已經開始出現乾燥問題, 襯平時用開嘅洗髮沐浴露差不多用光, 又係時候要轉一轉了.

今次我哋試用嘅係Moogoo牛奶輕柔潔膚乳及洗髮乳...

來自澳洲嘅天然品牌Moogoo, 產品牛乳成分性質溫和, 專門針對不同肌膚問題, 無添加石油等對人體有害嘅化學成分, 以最天然嘅原料來改善及保護大家嘅肌膚!  而且牛奶蘊含豐富營養, 不但能為肌膚保濕, 更有助肌膚變得嫩白, 亦能減退因敏感而產生嘅紅腫反應, 尤其適合嬰兒使用, 加強天然保護屏障, 為肌膚提供全面呵護.

牛奶輕柔潔膚乳 - 能防止肌膚水份流失, 維持皮膚嫩滑, 可讓肌膚更添彈性.

其實劑少量已經夠全身用, 今次重手咗少少...

用起上黎唔算多泡, 而且亦有淡淡牛奶味, 質感都算是幼滑, 不錯不錯.

今次由妹妹來做先頭步隊試用,因為妹妹腳仔肌膚比較乾燥, 所以希望妹妹試用過牛奶潔膚乳後會快些有好轉.

另外基於小B已經長大, 而且頭髮亦比較長, 加上每天都會扎頭髮, 頭髮受損程度一定比小時候犀利, 所以我覺得係時候要為小B分開試用一枝洗髮乳, 之前一直都係用開Top to Toe那款洗髮沐浴露, 今次就轉一轉看看那款比較合適吧.

牛奶洗髮乳 - 使用牛乳保護頭皮, 抑制頭皮上微生物滋長, 來達到去頭屑, 止頭痕等症狀.

 劑出少量已經能令頭髮起泡...

不過抱住小B洗頭, 實在無能為力為小B拍照.  皆因我家小B實在太麻煩, 洗頭時只要有少少水入眼或耳都會嘈喧巴閉, 所以每次洗頭都一定要好小心, 而且要快~





我們的Facebook專頁 - 小b與妹妹b之成長日誌

百厭馬騮妹

繼上星期家姐嘅百厭事件後, 今日又輪到妹妹有新攪作...

事緣有個小朋友走入廚房 (門欄已起不到作用), 手多多四圍摸, 點知摸著一個剛煮完麵不久嘅爐頭, 結果當然有人係爆喊當場啦, 而手指亦迅間起了個大水泡, 不過媽媽丁點心痛都沒有 (好變態啊), 因為媽媽覺得既然婆婆已叮囑了她, 但她還是不聽勸, 那就唯有給她受點苦吧, 反正小朋友未撞過板係唔會知驚, 我想經過今次之後...妹妹應該就算入廚房都唔會再敢四圍摸了.

有時我真係好想問老公, 點解我會生咗兩個咁百厭嘅女, 相信...應該係100%遺傳自爸爸吧~





我們的Facebook專頁 - 小b與妹妹b之成長日誌

旅遊保分享

近來見Blog友仔們相繼出遊記, 突然令我諗起6月初時去台灣買旅遊保後嘅激氣事, 真係講起就無名火起.

事緣早於5月初時喺FB見到某公司做旅遊保推廣, 結果我哋一家四口就經佢哋買咗份旅遊保喇, 點知返港後好不幸地有兩件損毀物品要向保險公司索償, 但直至目前為止我仍未收到一個保險公司嘅回覆, 而我當然亦好鍥而不捨地隔幾天就打去追問一次情況啦, 可惜每次負責我Account嘅職員都只會回答我一句: 仍在等上司審批中, 會盡快幫忙處理, 然後就打發走我!!

事實上所有文件及申報表我都已經早早交妥, 真的有需要用那麼長時間去審批嗎?  而當日遞交所有文件後, 明明經SMS回覆我話會於7個工作天內以書面形式回覆我的, 但7日又7日的過去, 仍然未收到一個應有回覆.  雖然今次要索償嘅金額唔係大, 但既然我買得保險, 有得這個保障, 是否就應該要得到合理回覆及索償呢.... 

好...唔開心嘅事唔想再提, 既然金額唔係大, 我決定選擇放棄, 就讓保險公司鐘意回覆我時才再回覆我吧.

雖然今次買旅遊保令我就有個唔太開心嘅結局, 但去旅行點都一定要買旅遊保嘅, 始終人在外地, 有個全面嘅旅遊保障先可以令自己玩得安心又放心嘛, Right!!

前陣子我因選購家居保時留意到富衛呢間公司, 而我亦都順便搵到佢哋嘅旅遊保險俾大家作參考, 將要去旅行而又未買旅遊保嘅你不妨去睇睇.

另外富衛仲推出咗一個免費航空保險計劃, 費用全免之餘仲可買多個安心, 超讚!!

富衛仲有一個平台, 入面有好多精選文章, 相信對於保險唔太熟悉嘅人或多或少都會有幫助.

富衛Blog

有些文章個人認為都幾值得睇, 如...親子旅行小貼士等等文章.

黎緊下年三月, 我哋一家四口將會同朋友們一齊去泰國, 今次我哋一行十幾人一齊去, 有大又有細, 真係未出發先興奮啊, 哈哈~~~~~~~~

我們的Facebook專頁 - 小b與妹妹b之成長日誌

大閘蟹之夜

一年一度大閘蟹季節又到啦, 唔記得由幾時開始, 一向唔好大閘蟹嘅我竟然迷上了大閘蟹, 雖然我唔算瘋狂, 但每年點都要食番幾隻先開心嘅.  今次朋友們為咗方便我一湊二, 所以黎咗我屋企開餐, 點知爸爸今日放早呀, 可以一齊食食食, 真好...  (其實爸爸唔好蟹架, 但有佢睇住妹妹, 咁我就可以慢慢食嘛, 哈哈!!)

每次經我哋手整嘅蟹, 賣相都唔會靚...  有人話要反轉蒸, 有人又話唔好反轉, 結果我哋選擇一輪反, 一輪唔反, 其實正確蒸蟹係要反定唔反架?!

今次朋友喺三陽泰買蟹, 靚女買蟹待遇寧捨不同, 買10隻送1隻, 最後我哋買咗12隻, 另外仲送咗薑, 黃糖, 拆蟹工具等, 不過今次D蟹就唔太多羔, 所以只係一般般.

其實小朋友應該唔食得大閘蟹, 但胃食嘅倆姊妹都分別淺嘗咗幾口...

人少少, 開開心心又一晚, 幾時都話放假係要同朋友聚聚先開心嘅.

第一擊之後期待第二擊, 如果有朋友再約就好啦, 哈哈~





我們的Facebook專頁 - 小b與妹妹b之成長日誌

妹妹B ~ 20個月

唔知道其他當兩個小孩媽媽的人, 有否像我一樣感覺....就係第二個小朋友總係大得特別快呢?!  唔經唔覺我哋妹妹都已經20個月啦, 當回想起妹妹出世時就好像前陣子才發生嘅事一樣, 雖然媽媽常常在想如果妹妹可以快點長大就好, 因為妹妹自小都比較難湊嘛, 但其實當媽媽見你咁快已經20個月大時, 卻又有點捨不得~

大個女...開始變得愛笑了!!

已經唔需要返健康院, 體重高度都只可粗略估計.
重: 約25磅
高: 約8x cm 

食方面, 一直唔太擔心, 仍然係食晚飯時比較唔聽話, 而且近呢兩星期好鐘意食奶, 明明前排已經連睡前奶都無再食, 只食一餐早奶, 不過呢兩星期最高峰係一日4枝奶, 但除咗飲奶多咗, 亦唔覺妹妹食正餐或零食少咗, 唯有抱住食得是福嘅心態, 任由妹妹想食就食吧.

平時唔會隨意跟人嘅妹妹, 因為幾塊餅餅竟然肯俾太婆抱, 難得難得...

說話方面, 簡單對答無大問題, 問題係要睇小姐心情, 因為唔係每次問妹妹問題, 妹妹都肯答, 你越問多幾次, 佢只會越回你一個字多幾次, "下..下..下..下..下", 然後就好似借咗聾耳陳隻耳咁, 總之就超有性格啦.  所以下個月Interview, 媽媽都無太大期望, 只抱住俾妹妹去玩下嘅心態Interview就好了.  雖然妹妹唔係經常肯開金口, 但妹妹表達能力好好, 一個眼神一隻手指, 就已經可以點到我哋大人陀陀轉.

活動能力方面, 開始越跳越起, 非常愛扭動身體, 手腳筋骨都比家姐柔軟, 一字馬...簡單嘅瑜伽動作等都難唔到妹妹.  另外妹妹10個半月便學會走路, 但一直感覺都唔太穩陣, 經常跌撞, 不過最近好似情況得以大大改善啦, 難怪健康院姑娘當日答我, 大大下就會穩陣啦, 哈!!

近幾個月, 妹妹跟家姐相處越黎越好, 當然間中都會有打架, 爭玩具等事情發生, 但大部份時間都尚算融洽, 媽媽亦因此事而覺得恩惠.  不過妹妹有一個問題真係好難處理, 就係好霸道喇, 只要係家姐想要嘅野, 妹妹都一定要爭到手, 有時甚至連媽媽, 婆婆, 妹妹都要一人獨霸, 唔准家姐惦我哋.  @@" 

妹妹, 你真係要好好學習分享啊.

大概先是這樣吧, 媽媽祝妹妹B 20個月快樂!!  ^^


 


我們的Facebook專頁 - 小b與妹妹b之成長日誌

試用 - GOO.N 日本大王柔軟紙尿片

其實今年初時我哋都有經MyBB試用小隊試用過大王嘅紙尿片, 當時一試之下就愛上咗大王, 然後妹妹都持續用了大王好一段日子架, 不過後來媽媽基於師奶心態就幫妹妹轉用了另一款價錢比較平嘅紙尿片(F牌), 當然質量亦相對無咁好啦, 但大前提係唔過底, 唔漏尿我都已經接受!! 

今次再有機會試用升級版GOO.N 日本大王柔軟紙尿片, 真係好開心~

其實妹妹宜家已經有25磅左右, 應該係時候要轉用大碼片, 但我哋屋企仲有存貨, 所以遲遲未開始轉用大碼, 而今次妹妹試用大王中碼時又出奇地合身啵.  你知啦...片片碼數越大就越貴嘛, 有得揀當然唔希望咁快轉大碼啦~

一度之下, 原來大王比P牌大條架, 難怪妹妹會合身啦.  (現用P牌...腰位及脾位都窄)

今次全新尿片系列配合升級超薄設計, 透氣表層, 吸收更快, 另外可減少40%表面水份殘留, 令小朋友Pat Pat更加乾爽.   而透氣表層亦添加了維他命E滋潤肌膚, 3D壓紋減少肌膚接觸點, 改善敏感, 不容易令Pat Pat變紅, 真係讚讚讚~

妹妹:
我知影相係要笑, 不過我鐘意敷衍笑囉!!

都唔明媽媽點解成日都影我著片片嘅相架?!

我們的Facebook專頁 - 小b與妹妹b之成長日誌

百厭嘅下場

噚晚當我正在沖涼之際, 突然聽到婆婆鬧倆姊妹, 大概係叫倆姊妹要收拾玩具, 又叫倆姊妹唔好擒梳化跳梳化之類, 可惜有人唔聽話, 完全當婆婆說話係耳邊風, 而婆婆亦有講...轉頭跌落地唔好喊住同我講好痛, 不過倆姊妹一樣無有怕繼續擒繼續跳繼續大笑.  點知當我一由廁所走出黎嘅時候, 我就剛好睇住家姐從梳化跌落地下喇, 仲要係跌落一堆玩具堆中, 問你死未!!  結果有人當然係爆喊收場啦, 不過我同婆婆一於少理, 因為係有人唔聽警告在先, 所以後果當然要自負嘛.

然後小B喊咗大約10分鐘, 我同婆婆依然無理過佢 (突然覺得自己好狠心呀), 之後小B自己走入房繼續喊, 呢個時候...妹妹竟然跟家姐走入房, 攬住家姐以示安慰, 雖然見到呢一刻我真係有點安慰, 不過我都係當睇唔到, 免得家姐轉頭又走過黎撒嬌, 我話過...只要係佢哋唔聽話而造成嘅損傷, 我係一切唔會理會架.

事後我再問小B仲敢唔敢唔聽警告, 仲敢唔敢擒梳化跳梳化, 呢刻當然係答唔敢啦, 不過我絕對有理由相信過兩日又會再次打回原形.   

今早有人負傷返學, 唔知學校會唔會以為小B慘遭家暴呢?!

落樓時...有人知道自己臉上有瘀傷, 馬上要求媽媽拍照給她看.

希望有人藉著今次百厭嘅後果, 會變得聽話一點, 我真係唔希望下次要係要帶倆姊妹去醫院縫針囉~





我們的Facebook專頁 - 小b與妹妹b之成長日誌

言語治療(四)

相隔兩星期, 今日又要再去上言語治療訓練, 不過由今個月開始, 每逢星期六都要回校上興趣班關係, 結果再去上言語治療訓練時就會變得好趕好趕, 已經無食早餐嘅小B連午飯都無時間食, 唯有媽媽接放學前去麥當當買定薯條, 魚柳包俾小B喺巴士醫肚, 希望這些趕頭趕命嘅日子好快可以過去...

停咗一星期, 加上之前中秋國慶等假期又經常早出晚歸, 再加上病了好幾日, 所以這兩星期實在沒太多時間去幫小B練習, 本以為言語治療師會話小B進度停滯不前, 但今次又出奇地有讚賞聲音啵, 哈哈!!

有人讚...當然值得開心啦~  (基本上小B本身就係一個Happy Girl, 所以經常都可以見到小B笑架)

今日雖然未有加入新嘅發音字, 可能言語治療師見我哋停咗一星期, 所以主力重溫, 而最後言語治療師嘅評價係....

1. 要用氣嘅發音字變得比之前穩定
2. 即使有時未有用氣發音, 但一經提點就會讀得正確
3. 開始能夠掌握言語治療師教嘅技巧, 所以進度亦相對快了
4. P音已經可以連句子講, 用句子講出P音字時亦都開始準確
5. K音都已經穩定, 可以跟詞語一起練習
6. H音雖然上一堂才教, 但因已掌握用氣技巧, 所以比起學P音同K音時快
7. L音跟N音字雖然有時分唔清, 但只在於鼻音重了, 所以聽者絕對能夠明白, 亦會知道小B講乜東東, 所以唔浪費時間糾正, 只要小B日後運用舌頭再有改善, L音跟N音自自然然就會分得清

雖然言語治療訓練還是要繼續上, 不過見到小B有進步真係開始鬆一口氣, 相信對於完成治療嘅日子已經又近咗一步.

小B你要繼續加油, 爸爸媽媽同妹妹都支持你架~

P.S: 每次當媽媽幫小B練習練到氣餒, 又或者小B唔肯練習激嬲我時, 小B爸就會叫我一係嘗試接受小B這種缺憾美, 真係吹脹!!





我們的Facebook專頁 - 小b與妹妹b之成長日誌

我們這一班之集體回憶大合照

星期日...我們這一班本應打算去郵輪碼頭影一輯集體回憶大合照, 但可惜因為颱風彩虹關係, 天公不造美啊, 最終友人臨急租了個室內地方, 俾小朋友們放電之餘順便繼續影我哋嘅大合照.

其實今次我們這一班話要影大合照嘅原因係因為我哋呢班好朋友, 好快就要分道揚鑣啦, 有兩個快將要嫁到外地, 有一個就快將舉家移居到美國, 所以齊人嘅時間將會越黎越少, 你話宜家唔搵多幾個藉口聚聚仲要等到幾時啵~

想當年...我地個個未有小朋友, 真係要幾低B有幾低B, 要幾自由有幾自由.

如今大部份都已經成家立室, 而且仲有了小朋友, 我哋嘅陣容已經變得如此強大...啦!!

(其實仲未齊人, 不過要人齊的話相信約10年都未必約得齊, 最重要係主腳都已經到齊.)

呢一班認識超過10年嘅舊同事, 能夠成班都可以榮升為大家朋友榜中最高嘅位置, 真係好難得, 所以我一定會好好珍惜你哋架.  ^^

其實我同小B爸嘅相遇, 一切都係從舊公司開始, 呢班就係我嘅舊戰友啦, 不過我哋朋友帶朋友咁繼而再認識咗幾位共同朋友, 之後就成班玩埋咗, 一玩就玩咗唔知幾多年Lu.

其實今日小朋友多, 場面都真係幾混亂, 而影到嘅靚相亦唔多, 不過無所謂啦, 反正只在於大家一齊聚聚嘛.

有爸爸陪玩, 小B特別開心.

租場時得知有波波池玩, 大家都好期待好高興, 但到場後才發玩原來個波波池就係得咁大, 真係笑咗~

今日家姐好照顧妹妹, 全場都勁讚家姐乖乖, 叻叻~

小B~

妹妹~

兩個都係爸爸媽媽嘅小寶貝!!  ^^

混血BB開始大個仔啦, 變得越黎越得意...

 突然俾一班靚姨姨圍攻, 嚇得Jay唔知點算好.

 最後送上我們一家的家庭照.

襯大家未離開, 真係要好好計劃我哋約不完嘅聚會呀~~~~~~~~





我們的Facebook專頁 - 小b與妹妹b之成長日誌

K1班親子萬勝節吊飾

繼上月嘅親子中秋燈籠後, 今次又有另一佳作...親子萬勝節吊飾是也~

其實學校係咪想考驗一下父母嘅藝術細胞有幾多呀?!  點解小B學校總係特別多親子勞作做架?!

上星期當收到學校通告話要做萬勝節吊飾時, 媽媽我頭頂上嘅烏鴉不停在閃過, 然後心裡一沉, 最後攪盡腦汁都係毫無頭緒, 結果我決定今次來一個低B班作品, 最重要係可以讓小B大大投入跟爸爸媽媽一起參與嘛.

今次嘅吊飾全部係利用公司物資, 雖然學校有話要用環保物資, 而我這款吊飾亦完全談不上環保, 但有吊飾交總比無吊飾交好了, 哈哈!!

一般剪貼嘅勞作, 其實非常簡單, 媽媽預先剪好所有眼耳口鼻, 然後再等小B同爸爸一起貼貼貼, 最後出來就變成這個樣子啦...

(P.S:  雖然我很醜, 但樣子卻很惹人笑啊)





我們的Facebook專頁 - 小b與妹妹b之成長日誌

學校興趣班

小B學校一直好鼓勵小朋友上興趣班, 原因就不用多說啦...當然係因為方便日後考小學嘛.  雖然本身小B都有學跳舞, 但因地點唔太方便嘅關係, 所以媽媽喺8月時已經暫停了小B嘅跳舞班啦, 然後打算開學後才繼續上興趣班, 可惜婆婆知道後強烈要求我唔好揀平日去上興趣班, 因為要帶出帶入實在唔方便, 結果我只好留待星期六才去上興趣班嚕.

9月中時, 見學校有不同嘅興趣班可以報名, 但能夠跟我時間配合的則選擇不多, 最後喺小B強烈要求下, 我哋報咗鋼琴班, 但因小組教學, 所以我唔期望會學得好好, 暫時我只係借今次機會試試小B是否真有興趣學鋼琴, 如果上完10堂後小B要求繼續學, 我就會帶小B去琴行學, 希望小B今次唔會係3分鐘熱度啦...大大話話小B話想學鋼琴都已經講咗大半年有多.

剛過去嘅星期六, 小B第一次上鋼琴班, 雖然媽媽唔在場, 不過小B話好好玩啊.  而學校安排嘅課外活動導師亦有話小B手指算OK嘅, 但暫時手勢仍未正確, 要多上幾堂才知是否真的適合, 現時導師叫媽媽有空就幫小B練習將雙手正確放在琴鍵上嘅手勢便可.

有個小朋友期待咗好耐, 終於可以上佢第一堂嘅鋼琴班啦~

一小時課堂好快過去, 上完興趣班就同同學仔去食Lunch.  雖然佢兩個才剛認識一個多月, 不過一直都好似幾好朋友, 而我跟同學仔媽媽亦尚算投緣.  ^^

跟同學仔在一起, 連食Lunch都唔洗媽媽操心~

然後再一起逛逛商場, 本來小B話要去公園多玩一會才回家, 可惜天公不造美, 一離開商場就落雨, 最後唯有一起回家午睡去.





我們的Facebook專頁 - 小b與妹妹b之成長日誌