我是K1生

28.08.2015

轉眼間, 13日嘅暑假話咁快就完結, 今日小B已經成為K1學生啦!!

雖然我哋唔係第一次返學, 但始終轉咗新學校, 所以媽媽心情一樣好緊張, 相反小B就好淡定, 只係有D期待.  ^^ 

今日係新生適應日, 由媽媽陪同返學一小時, 由於未有校車接送服務, 所以預早少少出門, 結果返9:00嘅我哋, 8:25就已經去到學校啦, 好彩學校附近有公園, 所以唔洗企門口等.

不過有個小朋友個心一早就已經飛咗返學校, 所以玩唔夠5分鐘就話要走, 叫我快D帶佢返學, 最後媽媽帶佢去附近超級市場行個圈, 終於都到學校開門時間!

見到呢個小朋友咁鍾意返學, 媽媽真係好開心, 好欣慰~

有返開N班嘅小B真係比無返N班嘅小朋友叻, 雖然陌生環境, 但小B一D都無怯場, 入學校之後仲好乖咁聽從老師指示, 而上集體活動時, 小B又會主動舉手, 難怪兩位班主任放學時已經記得小B個名, 唔洗睇名牌啦, 哈哈~

一小時好快就過去, 我哋開開心心又放學啦!!

放學前仲派咗新書包, 小B話個書包好靚喎.

今日除咗返學玩得開心, 另外最開心嘅當然係我哋已經識到新同學仔啦, 至於媽媽都好快咁俾人踢咗入谷添啵, 不過咁...媽媽事前已經好希望可以快快被踢入谷架喇, 所以見到呢班家長咁主動踢我入谷, 媽媽都一樣好開心. 

作為在職媽媽, 希望往後一年可以從這班全職媽媽口中得知學校更多最新最快嘅消息啦, 哈哈~





我們的Facebook專頁 - 小b與妹妹b之成長日誌