早前健康院唔肯幫小B排期做言語評估, 因為小B發音唔準嘅問題唔算嚴重, 所以要等到4歲再返健康院時先知可唔可以安排到, 不過我同爸爸都覺得發音問題有必要快快糾正, 因為年紀越小越容易糾正好嘛, 所以最後我揀咗去小檬媽介紹嗰間智思中心做言語評估...
整個評估過程大約45分鐘, 喺完成評估後, 言語治療師會向家長提供諮詢服務.
一開始治療師就同我哋了解小B嘅問題, 跟住就拎咗袋煮飯仔出黎同小B玩, 當然一路玩之餘都有問小B少少問題啦, 主要係想聽聽小B嘅發音, 繼而順道想同小B熟絡一下, 方便之後做評估, 因為小B對住陌生人比較慢熱, 佢真係可以10問10唔答架.
好快治療師就拎咗一本圖片書出黎俾小B讀, 我想大概有20頁左右吧, 讀完就可以玩吹Bubble, 小B一路讀, 治療師一路記低, 結果小B有10個音唔準呀, 噢...
之後治療師俾Bubble小B吹, 又俾兩款唔同硬度嘅T字牙膠小B咬, 睇下小B口肌方面嘅發展, 結果小B口肌係有少少弱嘅, 主要係佢平時唔肯用大牙咬硬物, 而且鐘意含飯, 唉...
之後治療師再不斷同小B玩, 不斷叫小B發音, 如果發音正確就獎勵玩吹Bubble一次, 最後發現小B主要錯得最多係聲母, 所以好多音聽落就會唔準. 好彩治療師都補充一句, 其實小B唔準嘅問題真係唔嚴重, 不過始終口肌方面比較弱, 所以就算音準, 講出黎都好似唔太清晰咁, 最好嘅解決方法當然係要上堂做治療啦.
由於有10個音準唔正確, 預計治療要用半年至一年時間, 當然如果進展快的話, 半年就可以完全糾正啦, 暫時我都無得選擇, 唯有去上堂做治療.
雖然今次只係做評估, 不過治療師都有寫低Notes俾我哋, 叫我哋返屋企每日練習, 首先我哋要糾正嘅音係P音, 因為呢個音2歲半就應該要發得準, 但小B對於呢個P音字由頭到尾都無準過, 所以治療師建議先由P音開始.
如果小朋友對P字發音有問題又想試下自己先糾正的話, 我可以嘗試俾少少僅知嘅方法你參考.
其實上堂做治療真係好貴, 所以希望小B要爭氣呀......加油努力一定得!! ^^
我們的Facebook專頁 - 小b與妹妹b之成長日誌
呢啲錢真係唔慳得, 小B加油啊~~~希望快啲完成治療
回覆刪除真係無得慳, 如果唔上治療堂, 佢應該一直keep住都會係咁樣講野~
刪除喺屋企練習多啲，應該會快啲治癒好，或者唔使咁耐呢!!
回覆刪除小B加油啊~
最慘係有人唔合作, 唔鐘意練習囉, 唉~
刪除P音係指婆婆，波呢D？小B加油，練習多D可能唔使半年都搞掂
回覆刪除係呀, 婆婆...正常我地讀婆音係會有噴氣架嘛, 但佢就無.
刪除又好似Pa音咁, 讀Pa音時應該都要係噴氣嘅, 但佢就讀晒爸囉.
加油小B
回覆刪除知道, ee~
刪除小B加油~ 不過我成日覺得女仔講野會叻啲, 所以應該好快可以改善既~
回覆刪除好多人都係話女仔講野會叻d, 咁其實小b講野都算係叻架, 只係音準方面就唔太叻喇~
刪除我地會加油架 ^^
用玩去引佢講會好啲？我相信小B好叻叻，好快會改善，加油
回覆刪除我都希望佢可以快d攪惦~
刪除我地會加油架!! ^^
其實有咩寫佢係吾準？ 我完全無留意hannah發音準吾準tim
回覆刪除其實一聽就聽到個音係唔岩~
刪除下次我叫小b同你whatsapp下, 咁你就知佢講野係好難聽架啦, 哈哈!!
雖然係貴，不過真係要及早正視呢！上堂係學技巧，最緊要屋企都同小B訓練，咁就事半功倍啦！
回覆刪除係呀, 學技巧先係最重要, 宜家我地日日同佢抽少少時間練習, 希望到下次正式上第一堂時已經改善到個P音啦~
刪除我讀小學時，都被發現好多音錯，只糾正了"他"和"car",現在仍好多音會講錯，如"細"、"4"; "洗"、“死“等
回覆刪除