石沉大海嘅成長片段

結婚後...因愛美搬過一次屋, 所以當時順勢將所有結婚物資(相簿, DVD)等統統都收好入箱放到床底了, 如沒必要那堆當年用了好多時間, 金錢去堆砌嘅相關物品應該都唔會再重見天日, 幸好最近執屋時發現, 原來呢段已經石沉大海嘅成長片段, 一直就放在電視櫃裡沒人發現, 多年後我再開出黎睇, 已經係同自己個囡一齊睇啦, 雖然只得短短數分鐘, 但愛美依然好Like這段成長片段啊, 最意外嘅係小B都會嚷著叫我重播, 重播再重播嘛, 哈哈!!

相信再過一排, 呢段成長片段又會再一次石沉大海, 直至唔知幾多年後先會再次被發現了.

P.S:  越睇越覺得小B真係好似我細個呀~  XD





倆姊妹已經有Facebook Page Anke & Karena - 小b與妹妹b 有興趣的話就入黎Like一Like支持下啦!!  ^^

戒睡前奶

講戒睡前奶之前, 先要講一講戒用奶樽嘅情況, 因為多得我要小B戒奶樽, 小B竟連佢最愛嘅睡前奶都戒掉啦, 呵呵!!

媽媽當日試跟小B打心理戰, 知道小B貪靚, 所以就同小B講, 如果用奶樽飲奶, 牙齒就會變黑甚至好快爛, 結果成功地幫小B將睡前奶一戒就戒用了奶樽, 連週末嘅早上奶都改了用杯飲, 但因平日媽媽貪快, 所以我一起身就慣手先用奶樽開奶俾小B, 而小B飲奶時就可以繼續訓喇, 直至我梳洗完畢才叫小B起身刷牙換衫返學, 咁樣就可以慳番少少時間嘛, 你知啦...朝早起身返工返學時間真係好趕好趕架, 好彩小B返學校先食早餐, 如果唔係應該會仲趕, 但亦因為小B返學校先食早餐, 所以我先會將飲奶時間放在起身之前, 而這個習慣相信會隨住9月轉校而改變, 皆因到時要食埋早餐先返學嘛.

而婆婆亦因為見小B用奶樽飲湯比用碗飲得多, 所以婆婆亦好堅持每日將湯倒入奶樽才俾小B飲, 那即是代表小B戒奶樽只限於睡前奶時段, 並非真真正正的戒用奶樽囉.  算...媽媽相信總有一日, 小B會因為覺得醜怪而把奶樽戒掉的.

雖然戒奶樽目標尚未成功, 但亦因為轉用杯後, 小B竟連睡前奶都自覺戒掉.  擺明...小B之意根本不在於奶, 只在乎用奶樽條心癮吧.  起初轉用杯飲睡前奶, 每次只飲兩啖就話唔要, 結果我哋就白白倒奶倒了好一排, 真係食奶唔知奶粉貴, 媽媽就肉都赤埋.  幸好最終有人連嗰兩啖奶都放棄咗, 就算見到妹妹飲睡前奶, 小B都無再要求了, 而且已經持續了一星期, 相信小B今次算是成功戒掉睡前奶呢...

可能有人會覺得, 其實小B仲細, 飲多D奶都無壞丫, 不過夜晚小B實在食得太多啦, 我唔覺得真係有飲奶嘅需要囉, 反而早上奶我還是會繼續俾, 就算晏晝小B話想飲奶, 我都會俾架.  至於完全戒奶....我並沒有指定時間表, 就讓小B隨心吧.  唔怕話俾你哋知, 婆婆話愛美飲奶飲到6歲先自動自覺戒咋, 哈哈~





倆姊妹已經有Facebook Page Anke & Karena - 小b與妹妹b 有興趣的話就入黎Like一Like支持下啦!!  ^^

我家有個麻煩妹

一直都聽好多親戚朋友講, 假如你第一個小朋友是容易帶, 第二個小朋友就一定會很難帶, 起初我對這話確實有點存疑, 但當妹妹出世後...真的不到我不相信了.  而除了我之外, 眼見自己有幾位朋友跟我一樣, 總是一個好帶, 一個難帶, 莫非這真是一個定律嗎?!

就先講我們自己吧...

以前小B出世除了頭兩, 三個月因肚風問題比較扭計, 大部份時間其實都唔算難攪, 不過當時對於一個從未有過湊B經驗的我來說, 基本上小小事我都會覺得好麻煩, 加上免得小B會小氣, 所以只要有人問起, 我都會答小B不是很好帶, 當然每次朋友都會質疑啦, 因為每次大家見到嘅小B都算乖算聽話嘛, 而比較麻煩的是...大概應該係小時候扭眼訓這一環吧.

直至妹妹出世後, 我終於領教到什麼叫做一山還有一山高啦, 基本上對住妹妹, 我哋真係無一個唔投降, 唔怕話俾你哋知, 我哋任何一個都真係好怕跟妹妹獨處架, 因為要是單獨相處時, 妹妹嘅麻煩(痴身)指數就會更高, 就連婆婆算是比較好脾氣的都會忍唔住要開口鬧, 可想而之我家妹妹有多恐怖呢?!

正所謂3歲定80, 我最怕妹妹未夠3歲就真的能批出是個大麻煩啊~

唔知點解每朝由一起身開始, 妹妹就一定會喊會扭計, 以前明明小B一起身係會望住我哋笑架.

唔知點解屋企人少時, 妹妹特別痴身, 總像一隻樹熊一樣, 唔攬實唔安樂, 大家無睇錯, 係要攬實先得.

又唔知點解妹妹只要一遇上唔合心意事嘅時候, 妹妹就會大發脾氣, 最叻就係坐喺地下Lur地.
(小B從未出現過這種Lur地情況, 就算出現過幾次, 都只係因為妹妹出世回家時, 小B未能接受大家對小B嘅忽略才出現過數次.)

又唔知點解妹妹出街食飯總係坐唔定, 要敲台敲櫈之餘又要落地行.  (不過始終我都接受唔到, 所以我寧願佢扭都唔會屈服, 最多真係喊得太厲害就抱妹妹出去行一圈.)

更加唔知點解妹妹總係話唔聽, 愛挑戰人家底線, 所以婆婆已經批出, 妹妹肯定仲要比小B難教.

究竟妹妹幾時先肯乖乖, 唔再做我們家嘅大麻煩呀?!  其實妹妹唔扭計時真係好可愛架, 媽媽真心希望你越大會變得越聽教.  雖然扭計同可愛嘅時候各佔一半, 但每天重覆面對住扭計嘅妹妹時, 我真係覺得好大挑戰囉.

倆姊妹已經有Facebook Page Anke & Karena - 小b與妹妹b 有興趣的話就入黎Like一Like支持下啦!!  ^^

Happy Sunday

有小朋友嘅我哋, 放假總唔能夠宅喺屋企, 之但係爸爸媽媽又真係好攰好想休息啵, 但媽媽又唔忍心要倆姊妹陪我哋悶喺屋企, 結果近近地就走咗去新城市Hae玩Hae行4粒鐘喇...

Window Shopping呢個活動只能滿足到爸爸媽媽, 絕對唔能夠滿足小B同妹妹, 所以行咗一陣, 小B就已經要求我哋帶佢去公園玩啦, 既然係咁就去Snoopy Land啦.

原本好眼訓好眼訓嘅妹妹, 一去到公園, 整個人馬上生猛起來...

識行識走但企唔定嘅妹妹好難影到靚相, 至於小B就氹到口水乾先影到一千零一張...仲要係唔望鏡頭, 真係吹漲~

鏡頭一轉, 倆姊妹已經唔受控制要去玩lu.

唔好以為爸爸喺度, 媽媽就可以輕輕鬆鬆呀, 其實我地係一人Mark一個架.

最後玩到爸爸頂唔順率先叫走人, 哈哈!!

之後去食個Tea, 行下Ikea再四圍攪攪震...

兩個玩琴玩到唔捨得走...

小B前排開始猛話想學琴, 但媽媽問過幾個朋友, 都建議叫小B 4歲先開始學, 所以請你耐心多等一年吧, 媽媽應承過就一定會俾你學, 只係最怕小B 3分鐘熱度咋.

認真嘅妹妹最可愛...

雖然今日無特別安排節目, 但見到倆姊妹一齊玩, 一齊笑, 爸爸媽媽就已經覺得好滿足啦.

開心就係咁簡單 ^^





倆姊妹已經有Facebook Page Anke & Karena - 小b與妹妹b 有興趣的話就入黎Like一Like支持下啦!!  ^^

檬茶控

不知從何年何月開始, 我這個奶茶怪突然變成了檬茶控, 由一日一杯奶茶, 變為了一日一盒檸茶, 雖然我知道飲得多唔好, 但係心癮真係好難止嘛, 不過最意想不到的是...連我兩個囡嘅口味都竟然跟我一樣勁愛飲檸茶囉, 哈哈!!

明明檸檬茶就係檸檬茶啦, 點解要叫檸茶呢?!  其實都係因為小B囉, 自小B習慣了叫檸檬茶做檬茶後, 我們一家就將檸檬茶嘅叫法改口做檬茶啦, 有時去茶餐廳食Lunch或Tea, 小B一見我哋落單, 小B好自然就會大聲同我哋或者侍應講, 我要飲凍檬茶.  :p

不過對於一個3歲多同一個剛滿1歲嘅小朋友來說, 又真係確實唔可以飲太多, 所以放假時媽媽都會盡量刻意唔飲.

今日見兩姊妹午睡時, 媽媽又以檬茶代水, 點知突然妹妹豬醒咗啵, 見到我盒檬茶後就梗係雙眼發光啦, 最後更被妹妹成功搶去...

妹妹: 媽媽, 你唔好諗住搶番呀, 我大喊俾你睇架.

結果見我遲遲未出手搶回, 妹妹立即放下戒心, 好好Enjoy.

究竟口味呢樣嘢係咪有遺傳嘅呢?!  我總係覺得倆姊妹嘅口味跟我同爸爸大概有8成相似.





倆姊妹已經有Facebook Page Anke & Karena - 小b與妹妹b 有興趣的話就入黎Like一Like支持下啦!!  ^^

皮膚敏感

自去年10月開始, 小B雙手一直敏感, 時好時壞, 但每次我哋都無特別因為咁而去睇醫生.  只係有兩次小B咁啱病咗要睇醫生時, 媽媽多口問醫生兩句, 不過因為當時小B雙手已經好得7788, 所以醫生看吧後就只說是敏感而已, 但因咩事而敏感就唔知喇, 只係建議我哋唔好再用酒精搓手液, 其實我哋一直都無用架, 不過我知小B學校有囉, 所以我都有特別同老師講, 唔好再俾小B用.  原本以為停用酒精搓手液後, 事情就會告一段落, 點知小B雙手敏感情況反而更加厲害, 幾乎每隔一至兩星期就會起一次, 但每次搽過醫生開嘅藥膏兩至三日左右就會好起來. 

每次敏感時, 小B嘅手指位, 手腕及手背都會長滿粒粒, 而且泛紅, 嚴重時甚至會長出水泡呢...真係見到都心痛, 而小B就已經開始習慣了, 只要一覺手仔痕就會同我講話又敏感, 叫我幫佢搽藥膏.

這是早幾個月前敏感初起嘅手仔...

其實我係咪應該要搵個皮膚科醫生幫小B睇睇, 查明敏感原因呢?!

這是早一星期影嘅手仔, 經過幾個月反覆敏感後, 小B雙手已經變得又皺又鞋啦.

唔知嘅話仲以為係婆婆對手呢, 唉~~~~~~~~

大家有無好嘅皮膚科醫生介紹呀?  如果再係咁敏感, 我哋決定帶小B去睇醫生, 因為一直敏感其實都幾擾人架, 我哋心痛之餘, 小B又覺得痕喎, 總之就唔想大家辛苦啦.





倆姊妹已經有Facebook Page Anke & Karena - 小b與妹妹b 有興趣的話就入黎Like一Like支持下啦!!  ^^

妹妹B ~ 13個月

12.03.2015

有小朋友嘅日子總係過得特別快, 唔經唔覺又一個月, 今日妹妹B已經13個月大啦, 呵呵!!

妹妹從小到大都唔鐘意影相, 只要一見我高舉手機或相機, 笑容好快就會迅速收起, 有時明知我影相, 甚至會擺出一副好不屑嘅樣俾我影添啵.  算...還是放棄影你就好了.

體重: 半個月前去健康院打針有19.3磅

食:
奶 ~ 2-3餐
固 ~ 2餐
(婆婆話午餐食得比較好, 因為家姐返咗學無人騷擾.  相反晚餐時我餵飯就真係食得麻麻, 每次食到一大半我都已經好開心啦, 始終妹妹比較心野, 只要人多或者食飯時見到家姐玩玩具, 妹妹個心自自然然就會飛咗去家姐度, 所以夜晚餵飯我已經餵到有點心灰, 不過見妹妹平時乜都食, 所以即使晚飯食少咗, 我哋都唔會勉強迫佢食, 反而真係要諗諗計令妹妹食飯時要專心.)

便便每日都有一次, 偶然一整天無便便的話, 第二日就定必會爆屎.

對於食物選擇方面, 我承認係比較寬鬆嘅, 因為我哋真係敵唔過呢個為食妹妹, 有時明明食緊一D妹妹唔食得嘅野, 佢要食...我哋就會嘗試用第2樣食物解決佢, 可惜妹妹好聰明, 知道我哋耍佢, 佢就會擰頭+大叫+指住佢想要食嘅嘢, 所以好多時我哋都只好就範, 唯有俾妹妹淺嚐.

為食指數爆晒燈, 最近還學會了偷飲偷食, 有次妹妹見家姐食麥當當, 竟然快手將台上嘅薯條據為己有, 繼而放入口慢慢品嚐, 有次襯家姐行開去廁所, 偷飲家姐包檸檬茶, 但目擊事發經過嘅爸爸竟然未有出手阻止, 暈~  @@"

訓: 早上約8:00起床, 午睡大約分別12:00及5:00, 晚上10:30上床食奶訓覺.

活動能力:
基本上都符合發展進度, 但我總覺得妹妹有欠平衝力, 經常跌跌撞撞.
一知道要出街, 就會主動去著鞋著襪, 當然妹妹未識著啦, 但佢會嘗試著鞋著襪嘅動作, 我想應該係學家姐嘅行為.

指令:
拜拜, 拍手, 請請, 飛吻等

講:
Mum Mum (最叻問食時不停講Mum Mum)
爸爸, 媽媽 (試過發音, 但無意識地叫, 最近好少聽到)
街街 (近日開始講得最多嘅一句, 因為妹妹真係勁鐘意去街)
姨姨 (開始學會叫姨姨, 但爸爸媽媽卻甚少叫)
一大堆無人聽得明嘅BB話

性格:
- 人少時, 勁需要人陪勁需要人抱, 絕對係痴身膏藥一名.
- 好硬頸, 越阻止佢做嘅嘢佢就越要做.
- 一唔鐘意就Lur地 (呢個行為我完全接受唔到, 所以佢Lur地時一定唔會理佢, 等佢Lur到自己唔Lur為止, 因為最怕我地就慣咗佢之後, 將來出街都Lur地)

健康:
今個月總算過得去, 希望繼續健健康康, 無病無痛.  另外一歲針都已經打咗兩星期啦, 慶幸妹妹順利過渡這兩星期, 無發燒無出疹, 始終聞說一歲針都是比較惡的, 所以媽媽真係一直都好擔心架!!

妹妹13個月快樂!!





倆姊妹已經有Facebook Page Anke & Karena - 小b與妹妹b 有興趣的話就入黎Like一Like支持下啦!!  ^^

與媽媽的老師快樂聚餐

某日放工原本可以輕輕鬆鬆的跟朋友們去食晚飯, 不過有個小朋友知我要出街, 放學回家後就打電話俾媽媽話佢又要一齊去喇, 咁我放工後就唯有返屋企接埋佢去啦, 預早我已經同小B講明, 今晚我只係跟朋友食飯, 無小朋友同行, 問小B怕唔怕悶, 係咪真係要跟, 點知講黎講去都係要跟我去, 算...就帶埋佢去啦, 反正契媽同姐姐們都話掛住小B喎.

今日除左係同朋友們食飯之外, 難得的是朋友竟然約到媽媽中學時期嘅課外活動老師呀, 呢個老師雖然只係學校從外請回來教課外活動, 但我跟左佢6年, 佢對我們每一個都真係好好好好架, 所以畢業後我們間中都會有聯絡.

今次小B係第一次見媽媽這位老師, 雖然小B有點怕羞, 不過最後都好乖, 肯跟我們叫老師, 還逗得個個都好開心呢, 而且整晚表現都非常好, 原來只要一出老師兩個字, 小B或多或少都會有點怕, 所以話小朋友真係要等老師黎教先得架, 果然係"老師好嘢", 哈哈!!

開開心心一聚, 下次見面又唔知要等到何年何月啦~

倆姊妹已經有Facebook Page Anke & Karena - 小b與妹妹b 有興趣的話就入黎Like一Like支持下啦!!  ^^

N1上學期家長日

9月份剛開學嘅日子好像過了才不久, 轉眼間原來已經完成了整個上學期啦. 

這個學習曆程檔案就記載住老師每個月對小B嘅觀察及整個學期嘅評估報告喇. 
(想不到原來現今幼兒園嘅評估係咁仔細架, 印象中我小時候好像只有一份兩頁嘅成績表, 無相無太多評語, 只有等級)  

老師一見媽媽, 就話小B係個好活潑開朗愛笑嘅小朋友, 老師們每次見小B笑到變腰果眼時都會覺得小B好可愛. 

社交能力方面亦好好, 係個愛Social嘅小朋友, 除了班中有好多朋友仔之外, 就連N2 - N4班都有朋友, 難怪平日媽媽湊返學時, 間中會有高年班姐姐叫得出小B個名打招呼啦.  集體活動時, 小朋友們都會主動要求坐小B隔離, 真係估佢唔到啵, 哈哈.   

學習方面都算主動去認識新事物, 認讀字方面亦都無大問題, 唯獨專注力方面就有待改善喇, 但比初初返學時已經進步了不少.

美感方面評分亦係最高, 音樂方面會較好, 睇黎媽媽真係要繼續好好培養小B先得啦.

老師話小B其實好獨立架, 喺學校有好多事情都可以自己做, 唔需要依靠大人, 但係點解喺屋企就剛剛相反呢?!

性格方面比較心急, 而且好硬頸(唉, 好似唔似, 兩樣都似晒媽媽), 所以如果當佢唔聽教時, 態度一定要比佢更強硬, 否則每次都俾小B贏, 將來就會更加難攪. 老師亦證實小B喺學校係間中會發脾氣架, 但每次小B都敵不過老師, 老師好嘢...哈哈~

整體而言老師對小B嘅評分唔錯, 而且一切都符合期望, 但有些地方依然要努力改進啊!!

唯一最差就係說話發音有欠清晰喇, 呢方面只得3分咋, 其實呢個問題一直都存在, 不過媽媽習慣左聽小B唔咸唔淡嘅發音, 所以識聽晒小B講嘢囉...  咁好老實, 小B講嘢又唔係全部唔清晰嘅, 一半一半囉, 呢方面真係要聽老師講, 俾小B咬多D野去練發音先得.

以下就係老師每月嘅日常小觀察...有相有事例有分析, 真係不得不讚!!

好老實, 媽媽真心覺得救世軍呢間學校好好,老師們亦個個都好有愛心, 唯一缺點係課程太淺, 否則我一定趕都唔走, 直至N4畢業.  ^^

之前媽媽有同老師提過小B喺屋企嘅一d曳行為, 老師竟然主動幫我改善左小B呀, 老師仲話每次有問題都可以同佢講, 佢會嘗試幫我喺學校教導, 你話老師咁樣, 我點可以唔大大力讚老師啵.

下學期希望小B繼續加油, 期待下一次家長日老師會有更多稱讚!!





倆姊妹已經有Facebook Page Anke & Karena - 小b與妹妹b 有興趣的話就入黎Like一Like支持下啦!!  ^^

6月之旅

Yeah...Yeah...Yeah...相隔一年八個月, 我們一家落實6月又飛去玩啦!!  今次同行除了我們一家四口之外, 還有婆婆, 亞父, 契婆同契姨姨, 絕對是個新組合呢, 雖然妹妹年絕尚少, 但有婆婆同行嘅關係, 所以媽媽完全唔擔心啵, 只擔心妹妹飲食方面問題而已.

我話過對倆姊妹要公平, 所以小B兩歲前去過旅行, 妹妹同樣都會喺兩歲前去旅行架.

而經過上次一家三口台北之旅後, 小B爸已經下令如果再帶小朋友去旅行的話, 一定要夠Hae, 皆因上次台北之旅行程編得太多太緊密, 日日早出晚歸, 結果去到旅程第3日我同小B爸就相繼病倒, 所以既然今次一家大細去旅行, 地點只可以選近一點和輕鬆一點的地方.  知道小B鍾意游水, 婆婆就想行下食下, 最後就決定去高雄+墾丁喇, 加上今次選擇包車遊, 相信應該可以輕鬆點呱.
 
希望今次又係由我來統籌嘅台灣之旅, 大家都食得開心玩得高興啦...

雖然還有3個月才出發, 但媽媽我一想起就已經好期待好興奮啦, 呵呵~





倆姊妹已經有Facebook Page Anke & Karena - 小b與妹妹b 有興趣的話就入黎Like一Like支持下啦!!  ^^

親子步行行大運

01.03.2015

今日小B學校舉辦了一個聯校親子步行日, 一共有17間救世軍幼兒學校參加, 場面非常之震撼呀, 不過小B嗰班就只得3個家庭參與(包括我哋).  今次活動地點係香港仔水塘, 一個我同爸爸都好熟悉嘅地方, 因為自小我們都算是在南區長大的嘛.

去程我哋選擇了跟學校車, 所以一早食過早餐就準時9:15回到校外等上旅遊巴出發喇...

由於步行活動開始前, 救世軍幹事及家教會會員會有個致詞及開步儀式, 所有參與人士均會先到水塘附近嘅培德書院集合, 這個時候小朋友們當然唔會聽致詞啦, 他們選擇了跟互不相識的小朋友交換友緣小卡, 大家會在友緣小卡上寫上就讀學校, 班級及姓名, 甚至畫些自己喜歡的圖案, 然後跟別的小朋友交換, 算是認識一下對方吧, 想不到...大部份走過來跟小B交換友緣小卡的竟然都是男生啊, 原來小B都尚算吸引異性架, 哈哈!!

出發前, 媽媽要求先影張相留念, 可惜有個小朋友突然Cool Baby上身, 點都唔肯笑...

出發啦, 未去到起點(水塘)就已經要先行一段大斜路...

幸好...沿途有你哋!!

3個同班的小鬼...

由學校經斜路上水塘, 大約要10-15分鐘左右, 但沿途3隻小鬼不停跑跑跳跳, 所以時間過得好像好快似的.

終於...終於都去到起點位啦~

正所謂有樣學樣, 恩恩同小B見謙謙用膠樽拍打塊起點板, 突然3個就一齊攪破壞喇.

好, 出發行大運, 是次指定路線大約一小時三十分鐘便可完成, 去到上水塘位置條壩位大家就要回頭嚕.

出發Go Go Go...

整個步行活動, 小朋友們行到邊玩到邊...

最後輕輕鬆鬆地就行畢全程喇, 而因為活動開始時有少許延誤, 但學校又堅持12:30小朋友們就會肚餓要食午飯, 所以即使遲起步未行到去壩位的都要回程報到集合.

我哋早起步所以能夠順利行畢全程, 未行完的就行快兩步, 繼續加油啦, 哈哈~

去到終點, 拿過紀念章後, 我哋回程唔跟學校車的就可以自行散去, 繼續我們三口子的家庭樂.

是次學校舉辦這個活動真的好不錯, 除了可以親子之外, 還可以跟其他家長們認識, 讚呀!!




倆姊妹已經有Facebook Page Anke & Karena - 小b與妹妹b 有興趣的話就入黎Like一Like支持下啦!!  ^^

爸爸媽媽去拍拖

28.2.2015

一早爸爸媽媽帶妹妹去過健康院後, 接著家姐就跟姨姨去朋友家玩, 而妹妹就跟婆婆去飲茶拜年, 爸爸媽媽終於可以去行街拍拖睇戲啦, 呵呵~~~

為了增取時間, 由婆婆家出發最近一定係The One啦, 剛好去到戲院有即場飛買, 所以就睇完戲先再算喇.  原先我係想睇衝上雲霄架, 因為有我最愛嘅Sammi嘛, 不過有幾位朋友睇完後都話套戲好一般, 所以爸爸就堅持先睇發哥, 想不到...我竟然可以由開場笑到散場啵, 或許我個人笑點比較低啦, 而且又難得可以去戲院睇戲嘛, 所以心情非常之好, 但我真心覺得套戲係好睇嘅. 

睇完戲爸爸提議去食芝士撈麵, 這家店的芝士撈麵一向出名, 而且應該係明星效應嘅關係, 所以長期多人光顧, 印象中我對上一次食芝士撈麵應該都已經係5, 6年前嘅事啦, 如今一碗芝士撈麵已經加至$44一碗, 雖然有點少貴, 但間中去回味一下還是可以接受的.

食飽飽見時間尚早, 我倆非常增取時間地四周逛逛才回家...

行經Cotton On大減價, 見有$30一件Tee, 雖然款式一般, 但依然快手地掃了4件.

上面兩件是小B的...  ^^

下面兩件是媽媽在家做陳師奶時穿的...  :p 

之後再去食個糖水, 又要回家湊女嚕...

難得偶然可以放輕鬆, 媽媽我真的非常非常珍惜今日這數小時啊, 下次再有機會拍拖唔知又要等到何年何月了?!





倆姊妹已經有Facebook Page Anke & Karena - 小b與妹妹b 有興趣的話就入黎Like一Like支持下啦!!  ^^

健康院派成績

28.2.2015

臨近新年真係唔敢帶妹妹去健康院打針, 因為一次過要捱3針之外, 而且還好大機會會發燒和出疹, 所以為免妹妹要病住過新年, 媽媽一早就幫妹妹改期至月底才到健康院打一歲針喇.

出發前妹妹好開心, 大概以為一早起身就去街街玩, 哈哈~

體重 - 8.815kgs (19磅多)

根據生長線記錄來看, 姑娘話妹妹已經成功由細碼B變為中碼B嚕!!

今次姑娘無特別幫妹妹做測試, 只是拿了兩粒星星餅看妹妹會否用手指拎住, 至於妹妹一直嘅發展, 其實我們都不太擔心, 因為大部份跟家姐小時候都差不多嘛.  姑娘見妹妹用手指拎住星星餅, 還讚妹妹手指好靈活, 另外再隨便的問幾句話, 就話妹妹發展好理想喇, 所以容許我講句嘛...健康院真的好鬼Hae.

如果有睇我Blog, 應該都知道我最近才開始幫家姐戒用奶樽, 但健康院姑娘今次就已經叫我可以幫妹妹試戒奶樽啦, 還說可以的話連奶粉都不用飲, 改飲鮮奶或牛奶.  雖然我一向唔聽健康院指示做, 但聽到姑娘叫我可以開始試幫1歲BB戒奶粉戒奶樽, 真的未免太誇張了吧. 





倆姊妹已經有Facebook Page Anke & Karena - 小b與妹妹b 有興趣的話就入黎Like一Like支持下啦!!  ^^