Dinner Buffet

28062014

今日跟姑仔一家去了都會海逸食Buffet慶生, 可惜我和老公一人要湊一個, 結果戰鬥力相當之弱, 雖然最後都食得飽, 但就未及我倆食Buffet最瘋狂之時囉, 可惜可惜...  下次再去, 希望可以唔洗湊女 <--(發夢中), 那食得輕鬆之餘又可以真正品嚐一下美食嘛.

(趕住出門, 竟然忘了帶相機!! @@"  算...反正帶了, 相信我們都沒有多餘的手可以空出來)

跟家人一起吃一頓自助餐, 足以叫我大滿足, 今晚我真心覺得開心架, 所以話開心快樂就是這麼簡單.  其實人越大...再追求的亦只不過是希望能夠跟最愛的家人在一起.

今晚妹妹B瘋狂被爸爸和姑丈索油, 他倆大男人不停在狂吻妹妹B臉頰, 然後叫好滑好滑, 妹妹B在未懂反抗的情況下, 唯有就範嚕, 陰公豬~

另一邊廂...小B食飽後就痴著她最愛的表哥了.

 BTW...多謝姑仔請食Buffet和送我生日禮物. 

今年第一Cake

28062014

家中各人生日, 我們都例必會切蛋糕慶祝, 今年小B姨姨就親手造了這個芒果味Merry go around雪糕蛋糕給我喇.

雖然大家都一致認為好睇唔好食, 不過有心就好了!!  ^3^

小B一見到蛋糕就笑到見牙唔見眼, 還跟我們說是她生日呢, 好好好...媽媽唔同你爭, 蠟燭就由你代吹吧, 反正媽媽見到你倆姊妹開心就已經是最好的禮物喇.

Pre-Birthday Lunch @ Cambo

27062014

今日同事們請食生日飯, 由於大家都愛食辣, 所以就選了泰國菜.  不過公司附近的泰國菜選擇非常少, 最後同事揀選了The One的Cambo, 如無記錯的話, 九龍城好像都有一間, 幾年前的聖誕夜就跟老公去食過喇, 當時老公都大讚好味架... 

其實平時在商場內的食店, 即使是有名的, 但大部份都不及總店的好味, 而Cambo又出奇地ok啵, 難怪Lunch時間座無虛席之餘還要排隊等位啦, 幸好同事醒目一早已於網上訂位.

Set Lunch青咖哩牛腩飯 + 冬陰公湯粉真的超讚呀.

雖然要行遠一點, 但同事們已經說好了下次要再來啦, 今餐就多謝晒我的幾位好拍檔嚕, 哈哈!!  ^3^

妹妹出浴照

每個BB都總會被家人偷拍出浴照, 妹妹B又點會走得甩丫, 不過妹妹B似乎唔太開心俾姨姨偷拍啵!!

妹妹B: (目瞪口呆)...你地做咩事, 點解要捉住我?

婆婆: 你姨姨話想影你出浴照呀.

妹妹B: 點解要咁做?  你地有無問過我想唔想...

姨姨: 影一張咁多啦, 最多幫你遮住三點啦, 哈哈~

妹妹B: 非常無奈地無得反抗, 媽媽救我呀...

媽媽: 我都控制唔到姨姨喎.

妹妹B: 媽媽你出賣我, 點解仲要Post出黎俾大家睇, 嗚嗚嗚嗚...

學劵申請

相信好多媽媽都應該知道今年教育局又有新攪作, 要提早幫小朋友申請學劵, 而這張學劵亦是非常非常重要的, 因為是用作留位用, 所以當遲些收到學劵後一定要好好保管啊.  (嚴重地在提醒自己中)

至於我嘛...幸得一班媽媽資訊, 才得知原來7-8月就要入表申請.

而今日就更加知道, 原來已經可以上網dl表格添啵.

以下兩條Link, 希望可以幫到像我一樣朦查查的媽媽啦, 哈哈~

學生資助辦事處 - 學前教育計劃

教育局 - 學前教育計劃

雖然好像剛剛才忙完幫小B考N班, 但好快我又要再接再厲, 幫小B報K班啦, 看來我真的要用心一點去研究一下現今的教育制度才行喇, 唉!!!!!!!!

戒片大作戰 - Update (1)

戒片大作戰已經開始了差不多一個月, 暫時進度尚算理想, 不過小B還是要加油啊!!

除了頭一星期婆婆話要日日抹地, 洗底褲仔之外, 跟住經媽媽單對單作戰了兩天後, 情況明顯得到大改善, 起碼瀨WeeWee在地上的次數經已減少至幾日才一次, 現在更加已經無再瀨WeeWee呢, 所以媽媽我真心覺得小B好叻叻.  原先媽媽覺得戒片是一件極度艱難+極高挑戰的任務, 但事實証明只要小B願意配合, 要成功戒片一點都不難.  雖然距離完全不用著片還需要多點時間, 但起碼現在小B無著片片時, 已經懂得自己叫去廁所WeeWee和PooPoo啦, 試過有幾晚小B飲完一大碗湯後, 一急WeeWee就大聲自己叫去廁所, 自此我們就知道小B心理上已經Ready好, 只是有時我們太懶寧願幫她著片而已. 

出街時, 雖然我們仍未敢幫小B唔著片, 不過小B間中在街上都會要求我們帶她到洗手間解決, 所以如果我們肯快快踏出這一步, 相信出街戒片都應該不會太難, 難就難在不是隨處可以找到洗手間吧.

至於半夜嘛...當然一定還要著片啦, 不過好多時小B睡至半夜都會自己叫去廁所WeeWee而片片是未有濕的, 所以如果當她願意嘗試唔著夜片的話, 我們儘管可以一試.

其實現在間中小B還是會要求著片, 不過好多時我們都會假裝忘記買, 之後小B就會以大人口吻說, 唉...陰公, 無片片著, 然後再死死地氣著底褲仔, 哈哈~

看來我們這一家還是要繼續努力幫小B戒片片, 希望小B可以快快不用再著片啦...  ^^

媽媽們, 大家一起加油吧!!

Pre-Birthday Lunch @ Hokahoka

6月份...又到了愛美媽媽的生日月, 至於愛美媽媽幾多歲就真係免問喇, 因為我唔認老, 所以往往唔會記住自己幾多歲, 多次要填個人資料時, 我都要慢慢計架, 哈哈!!

一如往年, 保險姐姐一定會請我食生日Lunch, 其實這個保險姐姐是數年前經好友介紹而認識的 (她是我好友的姑奶啊), 當時剛巧想轉保險經紀, 見是熟人親戚, 那就順理成章轉用了她喇.  一直以來...她都做得好好, 跟得好足, 所以我全家人的保險都轉了給她負責.  加上我倆公司又非常近, 所以時不時保險姐姐都會過來找我送禮或食Lunch, 好好笑~

我倆相約食Lunch, 多數是由她來選地點, 而今次她選的就是日本居酒屋Hokahoka喇.  這間居酒屋於去年生日時, 同事已經帶過我來, 不過因為當時才剛懷有妹妹B不久, 所以我未敢放肆食魚生刺身, 結果當同事們都在點刺身定食, 我只好假裝腸胃不適, 點天婦羅烏冬...

今次有機會再來, 當然要選刺生定食啦, 聞說這裡的魚生刺身都好新鮮嘛, 所以一定要試試看.

刺身定食 - 有蒸蛋, 雜菜沙律, 不知名前菜, 麵豉湯, 刺身及白飯, 算是豐富的一個Set, 而份量對於我來說亦剛剛好, Yummy~

蒸蛋超好味, 一打開蓋就聞到蛋香啦, 食完一碗真的想再來多碗.

麵豉湯不算太味精,  飲清光都未見有太口渴情況出現.

刺生有5款共10片, 厚度適中, 不太薄之餘亦非常新鮮, 只是八爪魚有點韌.

如有興趣一試, 記住要先訂位, 因為Lunch時間頗多人, 有的更是日本人呢.

今餐多謝啦!!  ^^

妹妹B ~ 4個月

妹妹B不知不覺經已4個月大啦, 可能因為有小B的關係, 時間過得好像特別快...

4個月的妹妹, 開始不再一舊飯, 經常要人陪, 要人抱, 要人傾計, 如果想好像之前般放她在床仔不理已經是沒可能的事, 所以最近在家的時間比起之前忙出一倍有多, 之前即使一個人都可以分別輪流照顧小B和妹妹B, 但不知從何時開始, 妹妹B已經變得茶煲了.

整體而言...個人認為妹妹B比起小B小時候還是好湊的.  而婆婆則說...妹妹B比起小B小時候好玩好多, 但就沒太多小B那些鬼靈精嘴臉.  (妹妹B千期唔好小氣, 要繼續保持乖巧及精靈可愛呀)

跟家姐一樣, 經常保持好笑容...同是個愛笑Baby, 哈哈~

4個月大, 又到了BB們最怕到健康院的時候啦, 因為今次又要左右脾拮兩針嘛, 不過妹妹B算叻叻, 拮完兩針一開門行出護士房已經收聲, 當年小B喊到拆天架, 直至離開健康院還在大喊中, 真醜. 

頭圍: 40.4cm  (如果媽媽沒記錯, 應該是40.4cm吧)

體重: 6.03kg  (合格, 保持住原先的生長線)

今次到健康院只是量頭圍, 體重, 見護士問食奶情況, 然後打針走人, 超Hae.  

食奶: 1日4-5餐, 每餐6安

訓: 午睡好一般, 唔識講, 因為日日新鮮.  早上就大多9時-10時起床, 晚上則11時-12時訓, 多數在床仔自然入睡, 因為媽媽要陪家姐訓, 所以無理妹妹.

4個月情況, 報告完畢, 希望6個月時妹妹B可以變得更肥美啦, 哈哈!!

陪我長大

一直以來都說有兄弟姊妹的比起獨生的好, 因為可以有人陪玩..陪笑..陪喊..陪食嘛, 如果唔係我都唔會生兩個啦, 哈哈~

眼見近來小B和妹妹越來越多亙動, 真的好期待她們倆一起在家中玩樂的情景呢.

倆姊姊睡在Platmat上玩了半小時, 妹妹不停咿咿呀呀在講BB話, 家姐則拖住妹妹講東講西, 好好笑.

 家姐剛睡醒食奶奶, 妹妹則在旁攪攪震.

時不時, 小B都會要求抱抱妹妹, 之前妹妹未太有力, 我們好怕小B會整親妹妹, 不過最近妹妹已經不再一舊飯啦, 所以小B抱抱妹妹時都放心好多了.

昨天小B抱住妹妹, 妹妹突然扭計喊, 小B好認真+唔開心地跟爸爸說, 妹妹唔鐘意我, 妹妹喊.  (看來年紀輕輕的小B都蠻緊張跟妹妹的關係啵, 哈哈!!)

簡單的畫面, 已經叫我覺得好溫馨, 希望妳們姊妹倆可以永遠相親相愛啦.  ^^

爸爸節快樂

剛過去的爸爸節...我們未有特別安排節目, 因為爸爸媽媽凌晨及清晨都要睇世界盃, 加上媽媽才剛病好, 小B則還在感冒中, 原本打算星期六一家四口到沙灘玩樂都被迫要取消, 再者天氣又焗又熱, 懶人爸爸話最好莫過於留在家中嘆冷氣享受一下家庭樂喎, 哈哈.

(明明未結婚前超唔痴家的男人, 當了爸爸後竟然變得超痴家.)

原本媽媽打算買蛋糕回來慶祝, 不過小B這幾天咳到肺甩, 爸爸唔想小B吃甜食, 所以叫我唔好買, 算...慳番!!

在爸爸心目中, 只要能跟兩位小可愛在一起, 那就天天都是父親節啦~  

雖然未有安排節目慶祝父親節, 但無論如何還是要外出吃頓晚餐吧!!

近近地+Hae Hae地, 元氣壽司是也.

爸爸格言...一家人開心健康才是最重要, 去邊...食咩, 根本就沒所謂.

(病了一星期, 小B明顯瘦了, 真的心痛死爸爸媽媽, 希望小B在婆婆照顧下, 快快長回多一點肉.)

Orifera清爽潔面泡沫

當家中的洗面奶快將用光, 而我又正苦惱要買那款潔面產品之際, 突然收到邀請試用Orifera清爽潔面泡沫...真好!!

對於市面上的潔面產品多的是, 應該如何選擇才對呢?  我想還是應該要先了解清楚自己的皮膚吧, 至於我自己由幾年前開始就一直只會選用洗面奶和潔面泡兩款, 因為兩者性質是眾多潔面產品中較溫和的, 用後不會令我原本已乾涸的肌膚變得更繃緊.  加上這支潔面泡又含有有機椰子油, 相信護膚保濕的功效應該會不錯. 

好...少說廢話了, 馬上試用才最實際~

Pump一Pump, 陣陣芳香薄荷味, 感覺好清新.

咦, 真的有效地除去化妝品, 清潔能力良好.

這支潔面泡整體表現尚算不錯, 用後肌膚感覺柔滑舒適, 沒有繃緊感覺, 怕乾的女生真的值得一試啊.  而屬於敏感肌的我, 用後亦未見有敏感情況出現, 讚!!

產地
馬來西亞

成份 - 精純椰子油, 薄荷油, 水

售價: $195/150ml

售賣地點: 健怡坊  

病

自上星期三起, 突然感冒初起, 拿拿淋去睇醫生食藥打底, 誰不知唔食尤自可, 一食把鬼火, 由原先只是喉嚨痛的我, 將所有病徵一一迫出來, 結果直至今時今日仍未病癒, 超辛苦呢!!

星期三 - 喉嚨痛
星期四 - 沙聲
星期五 - 咳
星期六, 日 - 失聲 + 發燒
星期一 - 仍然發燒
星期二 - 嚴重鼻塞

看來我應該命不久矣...

最慘的是剛過去的星期五晚, 我還要湊兩個小魔怪回家.  雖然爸爸知我病已經全力著手照顧兩位小寶貝, 而我亦已帶上口罩做足防避, 就連訓覺都帶住, 只可惜...最終還是傳染了給小B.

原本以為帶住口罩, 又唔太近接觸兩個囡, 應該就會安全.  誰不知...星期日早上, 小B一醒來就已經發燒了, 接住食過幾啖奶奶後更連隔夜粥都嘔出來, 我們見狀當然快手快腳換衫先帶妹妹返婆婆家, 然後再帶小B去睇醫生啦.  今次小B被診斷感冒引發腸胃炎, 唉...都怪媽媽唔好, 把可惡的病菌傳染開去.

回家後...小B跟媽媽一起馬上食藥休息, 原本以為休息一會兒就會好轉, 結果小B未有退燒之餘還越來越高燒, 整日除了訓就是訓, 完全沒胃口+無精神, 爸爸媽媽當然非常擔心啦, 皆因自早上起一直就未有退過燒嘛, 直至星期一早上, 終於由高燒變回低燒, 再到中午...小B已經回復精神, 狀態大勇, 再探熱時終於無燒.

經過今次之後, 如果媽媽我再病, 下次我一定會自我隔離, 遠離兩隻小魔怪, 免得自己辛苦時, 她們又辛苦.

感謝爸爸忙著湊囡之餘還為我煮粥 ^3^

開始戒片大作戰

還有兩個多月左右小B就返N班啦...當前首要任務就是要幫小B戒片片喇.  雖然之前間中都會定時定候叫小B去廁所而又成功無濕片, 但就是因為只是間中嘛, 所以根本就算不上是戒片.

大約一星期前, 婆婆終於踏出了戒片這一步啦, 婆婆話由於唔想小B太過依賴片片而難戒, 所以寧願勁抹地, 勁洗地褲, 都唔會幫小B著住片來戒, 等小B嘗試感到瀨濕褲仔唔舒服而主動開聲去廁所.  頭幾天當我放工回家時, 眼見一屋都在晾曬著小B的底褲就知...戒片任務徹底失敗.  加上婆婆平日又要一打二, 實在沒太多時間可以專心幫小B戒片, 所以每日婆婆都只會抽幾小時來幫小B試戒.

算...反正戒片就是跟時間作戰, 唯有繼續努力.

剛過去的長週末, 因爸爸無假放, 所以我只帶了小B一隻魔怪回家, 既然單打單, 戒片行動當然一定要進行啦, 結果這幾天的戒片情況, 媽媽我非常滿意啵, Good Job!!

星期六
因去了下水禮而早出晚歸, 所以是日暫停戒片.

星期日
起初媽媽我都好擔心今日要不停抹地, 洗底褲, 但經我每小時都在提著小B要去廁所的情況下, 竟然全日都無瀨濕褲仔呀, 叻女.  而最意外的是, 因無著片關係, 小B Poo Poo時竟然主動問我去邊度Poo Poo, 平時小B Poo Poo會獨個兒躲在房裡不讓人家看, 但因為無著片, 媽媽當然叫小B去廁所才Poo Poo啦.  不得不讚讚小B, 第一次在廁所Poo Poo就已經成功, 媽媽我超感動呀.  晚上還急不及待將今日的戒片情況告知婆婆呢, 哈哈~

星期一
繼昨天進度理想的情況下, 今日再接再厲, 而結果亦是無瀨濕, 加能夠成功第二次在廁所Poo Poo, 勁勁!!

雖然大部份時間都要我們定時定候提住, 但間中小B想去Wee Wee時都會主動出聲 (10次大概會有1次吧 :p), 希望小B快快能夠在不用提的情況下, 主動出聲話去廁所啦.  至於今日Poo Poo就真是有驚無險啦, 事緣我在廚房整野, 突然聽到小B唔唔聲, 一望之下有人竟然想Poo Poo落底褲仔呀, 幸好媽媽我來得及帶小B去廁所, 否則Poo Poo在褲仔上, 我真的不知洗好還是丟好了.  基於有人怕尷尬, 所以在廁所Poo Poo時, 媽媽我是不用理她, 可以繼續做自己野, 直至小B Poo完就會大叫我.

這兩天的情況暫時就是這樣, 希望小B能夠快快成功戒片...   

小B愛Shopping

正所謂女人天生都是愛Shopping這句話真的沒錯...

今次小B更以行動來証明了愛Shopping的女人是無分年齡呢, 哈哈!!

端午節假期無事幹, 姨姨就提議帶小B去Shopping喇, 因為小B今年長高了好多, 去年的衫褲鞋襪大多數都已經不合身了, 所以媽媽我大有理由不停幫小B買..買..買, 而令爸爸無得投訴. 

原本媽媽只打算幫小B置新裝, 而妹妹就著家姐的舊衫, 誰不知小B竟然連Shopping都掛住留在家中的妹妹啊, 不停把架上的衣服放進籃子中, 然後說這是買給妹妹.

說真的...當小B正常的時候 (在沒扭計+心情好的情況下), 確實是一名乖乖女, 一個好家姐, 如果小B正常的時間可以長期持續, 那媽媽我就可以去還神啦.

下水禮

31052014

這個夏天真太熱, 雖然爸爸要上班, 但難得有姨姨, 馬仔哥哥陪, 當然要帶小B去游水啦...  而且小B開始大個女, 去幾遠都已經不成問題, 只要有得玩, 絕對難唔到媽媽我, 加上小B一大早知道有得去游水, 表現都非常配合, 乖女~

我和小B跟哥哥一起由大圍出發到將軍澳會合姨姨, 再吃個豐富早餐就向銀線灣進發啦...

去到沙灘, 小B好心急...連泳衣都未換就猛話要落去游水喇.

雖然小B並非首次到沙灘, 但第一次去沙灘時小B只得半歲大, 而且當時更因為一號風球天陰大風而未有下水, 想不到再去沙灘小B已經兩歲多啦.  原本我和姨姨都好擔心小B會因為怕沙吉腳而唔肯落地, 但似乎我們的擔心都是多餘的, 因為行多兩步, 小B好快就已經習慣了, 適應能力極高, 哈哈~

倆母女先來張合照...

好熱呀..好熱呀..快快落水消消暑.

曬到連眼睛都不見了~

媽媽打算中場休息, 但突然小B好像搬水工人上身般, 不停要媽媽陪出去打水.

驟眼看來, 小B都有丁點睇頭 (我指肉地方面), 哈哈!!

倒呀倒...倒呀倒...

手拖手的畫面, 其實蠻溫馨.

有人覺得自己唔怕沙又唔怕水, 好勁勁囉, 哈哈~

有得玩, 小B可以唔洗飲水唔洗食野, 媽媽怕小B肚餓, 所以一早買定包包, 零食, 只可惜人家唔領情囉, 直至離開沙灘等車之際...有隻餓鬼突然上身.

玩了近三小時, 雖然小B唔願走, 但有人精力已經耗盡了8成, 結果上車後還不到5分鐘就已經快速暈低.

送舊迎新

唔講唔知...原來我個人可以好長情架, 長情到竟然一個散子包用上了十年有多, 真的不得不佩服自己那份長情+專一!!

這個童子軍Logo散子包就是其中一件跟了我十年有多的隨身物喇...

如非突然發覺內裡開始甩皮甩骨, 我本是沒有換新的打算, 因為我向來對散子包都沒什麼要求, 加上散子包又不會刻意拿出來給人家看, 再者又是好友當年送我的生日禮物, 所以就一直用著.  直至前幾天於Zalora買手袋送給婆婆時, 突然心血來潮到處遊走, 才買了這個新的散子包來取替.

雖然外表看起來跟舊有的差不多, 但我就是喜歡這些啪啪款嘛, 而且還很便宜呢, 不過Size方面好像大了點.  沒打緊啦...反正都是放在袋裡嘛.

大家又來猜猜看這個散子包可以跟隨住我多少個年頭嚕, 哈哈.