坐叮叮

叮叮對於愛美媽媽黎講係一種充滿回憶嘅交通工具, 小時候於港島區讀書, 放學拍拖少不免當然會坐叮叮, 至於唔開心時愛美同樣都會選擇獨個兒坐叮叮架, 因為聽住歌黎吹吹風, 感覺總會令我變得舒服, 所以其實我對於叮叮呢種交通工具都算有種解不開嘅情意結, 只不過近年甚少過香港區, 所以已經好耐無坐過叮叮啦.

至於小B...媽媽我都真係估唔到原來帶小B去坐叮叮, 係會令小B變得咁開心, 咁期待, 咁興奮架!!!!!!

可能因為我地住九龍區無叮叮嘅關係, 加上我地又無特別為小B介紹過呢種交通工具, 所以小B其實3歲人仔都唔知道乜野叫做叮叮.  而今日媽媽就心血來潮, 見要過去銅鑼灣, 所以就特地帶小B去坐叮叮喇.  :p

我地坐船去到灣仔後, 行經叮叮路段一帶, 媽媽開始為小B介紹叮叮, 當小B知道電車就係叮叮時, 小B不禁大叫: 好多叮叮呀, 嘩...又黎啦又黎啦!!  完全好似個大鄉里咁, 非常失禮, 但又令人覺得好好笑啵.

上車後, 見樓下無人坐, 樓上亦有好多空位, 於是就帶小B上樓上後排位置喇.  小B見到後面架叮叮跟上前時, 唔知點解會好興奮, 而每當埋站之際, 當前後兩架叮叮距離得好近好近時, 小B又會緊張得大叫: 撞埋黎啦, 撞埋黎啦.  好彩係今日乘客唔多, 如果唔係一定會有好多奇異眼光望住我地.

就係咁, 小B終於都認識左叮叮呢種交通工具啦.

今次係小B第一次坐叮叮...好明顯表現出開心興奮之情.

亦都係妹妹嘅第一次...不過妹妹仲細, 唔會有特別感覺.

睇黎以後媽媽都要再多D帶小B呢個大鄉里出城見識下先得啦, 哈哈~





倆姊妹已經有Facebook Page Anke & Karena - 小b與妹妹b 有興趣的話就入黎Like一Like支持下啦!!  ^^