Heattech衫入手

昨天放工時於Uniqlo逛了一圈, 結果竟然俾我買到平嘢呀, 雖然最近天氣已經開始回暖, 但有見小童Heattect底衫減價至$19一件, 真的沒理由不買吧, 除非我跟錢作對, 寧願留待年尾冬天時才以正價入手啦.

今次少少地買了3件, 1件樽領Heattech是妹妹的, 2件圓領Heattech是家姐的, 由於貨源已經不多嘅關係, 但又不想同色買幾件, 所以今次只買得3件而已.

如果大家都要買的話就快手啦, 細Size(80, 90)只餘下少量, 大Size(100, 110, 120)款式亦已不多.

希望今次報料能夠幫到大家買到平嘢啦, 哈哈~





倆姊妹已經有Facebook Page Anke & Karena - 小b與妹妹b 有興趣的話就入黎Like一Like支持下啦!!  ^^

戒奶樽

印象中健康院姑娘指引, 好像是從歲半左右開始就應該要幫小朋友戒掉用奶樽飲奶嘅習慣, 不過我和婆婆卻一向都唔鐘意跟健康院指示, 認為到適當時候, 小朋友自己便會做適當嘅事, 就好像戒用奶樽飲奶一樣.

不過自我家妹妹出世後, 小B一直覺得自己跟妹妹一樣是BB, 所以飲奶方面又試變得瘋狂, 莫講話用奶樽飲奶, 就連飲少一餐奶都唔肯呢, 直至小B開始返學後才回復正常至早, 晚兩餐奶.  期間婆婆曾經嘗試叫小B不如試用杯來飲奶, 可惜飲了一啖後最終還是要轉回用奶樽, 之後我們免得麻煩就一直再無試用杯飲奶啦, 甚至月初時我更加幫小B換過全批新奶樽呢...

但想了又想, 想了又想, 其實小B已經3歲, 真的該是時候要把這個習慣戒掉才對, 一方面對小B牙齒好之餘, 另一方面我亦唔需要再花錢去換奶樽, 最重要係我可以洗少幾個奶樽嘛, 哈哈.  加上小B已經進化到連飲湯都指定要用奶樽, 有時無煲湯只係滾菜水都話要奶樽, 實在太麻煩太麻煩啦, 所以我終於拿出決心, 決定要幫小B戒奶樽.

於是昨晚我從網上找了一些爛牙相, 蛀牙相給小B看, 以小B愛靚嘅性格, 小B一定接受不了自己會有這樣的牙齒, 加上我再講兩句, 話大個女而且長滿牙齒嘅小朋友, 若然一直用奶樽飲奶飲湯, 牙齒好快就會變成這樣嚕, 結果...小B一睇完相就話唔再用奶樽啦, 而晚上飲奶時亦堅持唔用奶樽, 但用杯飲, 只飲了半杯就唔飲Lu, 既然係咁, 我會一直堅持, 或者可以順道幫小B戒埋奶添啵, 哈哈!!

小B加油, 大個女...你要決心同奶樽Say Goodbye啊~

倆姊妹已經有Facebook Page Anke & Karena - 小b與妹妹b 有興趣的話就入黎Like一Like支持下啦!!  ^^

年初四 - 同學仔新春團拜

22.02.2015

相識15載嘅同學仔, 新年流流當然要見下面啦, 今年因大家都忙未能夾啱時間食開年飯, 但還是要爭取少少時間出來短聚團拜.  ^^

看...我們嘅陣容開始強大起來啦, 祝願明年會再有更多新成員加入, 更加祝願我們繼續友誼永固, 恭喜恭喜!!

新春假期又到尾聲, 亦即代表明天開始又要努力工作嚕~





倆姊妹已經有Facebook Page Anke & Karena - 小b與妹妹b 有興趣的話就入黎Like一Like支持下啦!!  ^^

年初三 - 陳氏翁氏拜年之有驚無險"嚇"餐飽

21.02.2015

每年初三, 陳氏翁氏兩家都無懼赤口, 年年都相約飲茶拜年, 另加指定活動...去公園放電.  不過今日去公園放電時卻上演了一幕有驚無險走失記, 差點將爸爸嘅情人小B走失了......幸好最終安然無事, 否則我都唔知點算啦.

由於今日爸爸要開工關係, 但友人又好想我帶晒倆姊妹出黎見面, 而且還特地遷就我到佐敦飲茶, 所以我就頂硬上嘗試挑戰一拖二喇, 反正一拖二這個問題我遲早都係要面對嘅.  其實一拖二去飲茶係無問題, 始終小B開始大, 而且又懂得自行進食, 加上有哥哥姐姐為伴, 所以飲茶時媽媽感覺尚算輕鬆, 而我亦只需負責照顧妹妹一個就可以.

飲完茶後, 因有4隻馬騮嘛, 指定動作當然係去公園放電啦, 不過自己知自己事, 正如我之前都有提及過, 九龍公園太大, 一拖二去公園玩對我來說絕對係越級挑戰, 但既然友人話幫忙照顧, 唔去嘅話, 相信大小朋友都會有點失望, 所以事前我已經千叮萬囑小B, 去公園玩時一定要乖乖跟住哥哥姐姐一起玩, 免得走失就麻煩, 而朋友又話會照顧3隻大馬騮, 所以我就專心負責同妹妹玩喇, 當然間中我都會眼望八方, 望望小B嘅蹤影啦. 

原本大家一直都玩得好開心好開心架...  (有相為証)

但可能越玩越顛嘅關係, 翁氏倆兄妹開始越跑越快, 最後小B亦因為跟唔上哥哥姐姐而走散了, 可能大家玩得耐咗, 開始有所放鬆, 而我就只繼續專心拖住妹妹周圍行周圍爬, 未有再加以望實小B, 就係呢個時候...當我再次擰轉頭四圍望一刻, 竟然見到有個女人拖住小B行緊去另一邊呀, 而我見狀後就梗係第一時間跑過去拖回小B啦, 雖然個女人話小B喊住話唔見左媽媽, 但我又真係見唔到小B喊緊啵, 所以一拖回小B後就馬上去找回友人喇, 最後個女人可能驚我誤會, 又再次走過黎同我講話小B喊要搵媽媽, 所以才拖住小B, 可惜呢個時候我已經慌到乜都聽唔入耳啦, 只想快快帶兩個囡離開, 完全無理會個女人...

好彩嘅係今次小B無俾人帶走, 但當我回想番嗰一幕時, 媽媽我真係好驚好驚架, 一方面唔可以怪朋友, 另一方面就不斷責怪自己只顧住照顧妹妹而疏忽照顧小B, 萬一今次小B真係俾人捉走, 我就無咗個囡啦.

總之受過今次教訓之後 (其實到我再寫番出黎呢刻依然驚魂未定), 我只可以講, 照顧小朋友真係絕對唔可以假手於人, 即使有朋友代為照顧, 但係如果喺自己視線範圍內能夠望到的, 眼睛亦一定要牢牢的盯住小朋友, 免得再有什麼意外.  而短時間內, 爸爸亦講明唔會再俾我一拖二去公園, 直至妹妹大一點, 當倆姊妹可以一齊玩時再算吧.

今個年初三真係有驚無險嚇餐飽呀~~~  





倆姊妹已經有Facebook Page Anke & Karena - 小b與妹妹b 有興趣的話就入黎Like一Like支持下啦!!  ^^

年初二 - 著得靚靚去拜年

妹妹: 家姐, 今日我哋著得咁靚靚, 會唔會逗得多D利是架?!
家姐: 梗係會啦, 我哋兩個咁得意可愛, 今年一定逗得好多好多利是者.  ^^

第一站先同婆婆一齊出發去太婆屋企, 今日太婆心情非常好, 連平日唔肯影相嘅太婆都竟然肯坐定定跟倆姊妹影相呀, 莫非倆姊妹著得太有新年氣氛, 哈哈~

咁開心嘅時刻, 又點少得太公啵...

太公太婆每次見到呢兩個小豆丁, 個口就笑到合唔埋, 真係好好笑!!

今日小B好乖巧呀, 自己同太公太婆講, 恭喜發財, 身體健康...難怪太公太婆咁鐘意你, 抵讚. 

喺太婆屋企坐一陣, 我哋一家四口又要起程去太嫲屋企團拜啦, 每年跟男家親戚見面就只靠年初二, 所以盡可能出席的都會出席.  雖然一年只見面一兩次, 但小B一樣可以跟大家玩得好開心, 短短兩三小時裡, 倆姊妹迅速放電大成功, 哈哈.

最後回家前再跟契爺契媽於巴士站見面, 今日成功逗得好多好多利是啊, 呵呵~





倆姊妹已經有Facebook Page Anke & Karena - 小b與妹妹b 有興趣的話就入黎Like一Like支持下啦!!  ^^

羊年咩咩咩~~~

恭喜發財, 陳氏一家祝各位羊年發大財, 大吉大利, 萬事如意, 心想事成, 繼續每天添好運, 咩~~~

至於小B今年返學後都學會跟別人拜年, 近日小B講得最多的就是恭喜發財, 身體健康, 恭喜恭喜, 而大家送上利是一刻, 小B亦會連聲多謝多謝, 想不到學校教導果真有方, 還記得去年小B教極唔肯講, 但今年卻變得主動起來, 讚呀!!

希望新一年大家都好, 再無煩惱, 恭喜恭喜...  ^^

倆姊妹已經有Facebook Page Anke & Karena - 小b與妹妹b 有興趣的話就入黎Like一Like支持下啦!!  ^^

團年飯收穫

話說年廿八當晚跟親戚們去食團年飯, 剛巧爸爸媽媽有朋友竟然又係喺附近食團年飯啵, 咁就擇日不如撞日, 快快係商場碰個面啦, 反正飛哥哥經常都話想見倆姊妹, 但又難約岩時間嘛...

原本只打算碰個面, 傾幾句, 點知飛哥哥突然拖著小B話要去反斗城買玩具, 結果極迅速地 (應該不夠10分鐘), 小B和飛哥哥就帶了份大禮物回來嚕, 你話現今小朋友有幾咁幸福吖.

倆姊妹火速地愛上這架米妮豬仔車...整晚望住架車車就飽啦.

回家後, 當然又爭玩啦, 唉...

究竟這架豬仔車有何吸引之處, 竟然可以令倆姊妹愛不釋手玩不停呢?!

明明去食團年飯而已, 但卻竟然要令朋友破財, 哈哈.

Btw, 真係好多謝飛哥哥成日買玩具俾小B啊~~~~~~~~





倆姊妹已經有Facebook Page Anke & Karena - 小b與妹妹b 有興趣的話就入黎Like一Like支持下啦!!  ^^

情人節 2015

由幾年前榮升媽媽後開始, 情人節已經唔再屬於我一個人, 而係要跟女兒們共同分享的一個節日, 說實的...我當然無所謂啦, 反正我一向都唔係特別追求浪漫嘅人嘛, 而且個人還是比較喜歡熱鬧, 所以要跟兩女兒一起渡過情人節, 一樣覺得開心一樣覺得幸福.  至於爸爸就更加唔洗講, 明明由得我一個情人變為有三個情人, 當然倍感幸福, 特別係兩位小情人都愛黏著他, 還會經常主動獻吻, 真係幸福得令我羨慕呀.

今年我們四口子選擇了簡簡單單地渡過 - 情人節!!

一早起身先到竹林禪院還神, 然後就回家休息讓兩姊妹午睡, 再喺屋企食過豐富的壽司晚餐就出發去行花市.

今次近近地選了去沙田源禾道年宵市場, 雖然這個年宵市場不算大型, 但對於首次去行花市嘅妹妹來說, 真係無比興奮, 有個妹妹見到到處都是氫氣球, 開心得手舞足蹈大叫大跳, 非常好笑.  至於家姐已經不是第一年行花市了, 但對於行花市仍是十分期待, 當我們準備換衫出門時家姐已經不停問著什麼時候可以起行啦...  倆姊妹的心急, 期待, 興奮真係好好笑~

爸爸的第一號及第二號情人...

講到情人又點少得我呢個正印啵...哈哈.  XD

雖然愛美無花收又無去高級餐廳食大餐, 不過情人節呢日我地一家簡單得黎都過得好開心啊.

我們這一家祝各位情人節快樂, 繼續甜甜蜜蜜, 恩恩愛愛, 每天都像情人節一樣Happy Happy!!





倆姊妹已經有Facebook Page Anke & Karena - 小b與妹妹b 有興趣的話就入黎Like一Like支持下啦!!  ^^ 

試用 - 全新百靈IRT 6520耳溫槍

最近流感肆虐, 尤其當知道流感死亡數字不斷上升, 真係人人都聞流感色變.  大家都各出其招去預防流感時, 就連小B學校都推出了一連串預防流感嘅措施, 除了定時定候洗手, 加強學校消毒, 每週派回床單被鋪回家清洗之外, 老師還會增加抽量體溫次數, 所以媽媽每朝早填嘅體溫表都要認真一點, 唔可以再老作...  之前媽媽貪快貪方便, 每朝出門前, 都只會老作體溫就算, 不過最近真係唔可以亂黎, 為了大家著想, 就係要認真一點, 幸好有經MyBB抽中嘅全新百靈IRT 6520耳溫槍幫我手, 以後出門前量體溫就靠晒佢啦.  ^^

相信對於百靈ThermoScan耳溫槍, 大家應該都不會陌生吧, 因為百靈牌一直都係最多醫生選用嘅耳溫槍品牌嘛, 所以唔識真係要打Pat Pat嚕~~~~~~~

拆盒後, 見到耳套連體槍可以同時放進保護盒裡, 方便收藏, 讚呀!!

小B話...老師都有呢款耳探槍喎.  (雖然未必係同一款, 不過小B話係大家就即管信啦.)

今次呢款新耳槍配備嶄新嘅AgeSmart年齡選擇功能, 採用了可隨年齡調節嘅發燒提示, 並會喺顯示幕以不同顏色顯示體溫狀況 - 綠色代表體溫正常, 黃色代表輕度發燒, 紅色即代表高燒.

由於係隨住不同年齡就會有不同嘅發燒提示, 所以真係岩晒我呢D蠢媽架, 因為我一向發燒嘅定義都係定喺38度以上先算係發燒嘛, 哈哈.  遲D月尾妹妹打完一歲針後, 媽媽我真係要好好利用呢枝耳溫槍監測住妹妹嘅體溫先得啦.   

今次由我家試用王小B先來試用...

小B已經3歲, 當然係揀36+啦, 量體溫後體溫槍顯示綠色, 不過我動作太慢, 結果當然係影唔到綠燈啦, 哈哈哈哈.

有個小朋友貪得意話要自己量喎...

另外我鐘意呢枝耳探槍有夜光功能, 岩晒半夜發燒監測體溫時用, 咁就唔需要開大燈整醒晒全房人啦...讚, 讚, 讚!!





倆姊妹已經有Facebook Page Anke & Karena - 小b與妹妹b 有興趣的話就入黎Like一Like支持下啦!!  ^^ 

Happy Birthday to 妹妹B

貶下眼, 我家妹妹B已經1歲啦, 回想當日入院生妹妹時就好像昨天才發生的事一樣, 但原來不知不覺間已經過了整整一年時間, 而呢一年裡面媽媽我亦每天都過得好忙碌好充實, 不過都要多得妹妹, 媽媽才得以感受到湊B係件苦差事, 可能之前家姐主力婆婆湊, 放假就爸爸湊, 到我敢自己湊時小B又已經開始大, 所以媽媽未覺太辛苦, 但多了妹妹後, 媽媽就無得再懶懶閒, 事事都要親力親為啦...  

雖然大家都覺得妹妹比家姐當年惡攪難湊又麻煩, 其實媽媽我都非常認同架, 但見你成日都咁鐘意痴住媽媽, 所以即使你有再多惡攪多難湊多麻煩, 媽媽對住你時都依然覺得好心甜. 

妹妹, 你今日1歲啦, 暫時你仲細, 我對你要求唔會太高, 爸爸媽媽只希望你天天快樂, 健健康康, 聽教聽話, 跟家姐和諧共處, 最重要當然係繼續食得瞓得又玩得, 唔好成日做扭計大喊包啦.

我的小小寶貝...生日快樂呀~~~~~~~~

妹妹: Yeah, 媽媽話我1歲大個女, 所以我都要盡量嘗試少D扭計, 日日大笑笑不停, 做個聽教聽話人見人愛嘅妹妹豬啊, 呵呵!!  ^o^

另外, 媽媽都祝妹妹嘅一班212兄弟姊妹生日快樂, 呢一年來多謝各位212媽媽每天在谷中互相支持互相鼓勵互訴苦水, 媽媽先可以捱過呢個年頭咋.
 




倆姊妹已經有Facebook Page Anke & Karena - 小b與妹妹b 有興趣的話就入黎Like一Like支持下啦!!  ^^ 

拉票..拉票

唔好意思, 又黎到倆姊妹嘅拉票時間啦 ^^

早前免費影了輯影樓相, 宜家有得於網上投票啦, 麻煩大家多多支持, 幫忙Click入下面張相條Link, 俾個Like倆姊妹丫. 

(越多Like越好, 只要有100個Like, 倆姊妹就可以得到豐富禮物啦...)

多謝幫忙, 感激感激!!





倆姊妹已經有Facebook Page Anke & Karena - 小b與妹妹b 有興趣的話就入黎Like一Like支持下啦!!  ^^

妹妹一歲生日Home Party

07.02.2015

今日媽媽預早幫妹妹開咗個簡簡單單嘅生日Party, 跟家姐當年一樣, 絕對無大細超.  而家姐亦好明白事理, 知道自己生日已過, 而且媽媽又有幫佢開過生日會, 所以就算今日主角換轉係妹妹而唔係自己, 家姐都一樣好開心, 仲猛同姐姐們講...妹妹今日生日大個女啦, 正如大家所說, 有時我都覺得小B真係好可愛呢, 哈哈~

而妹妹可能知道自己今日係主角, 所以整天心情都好亢奮, 連午睡都唔肯瞓, 結果夜晚當大家到齊之後, 妹妹就開始扭計.  @@"  最後當然又要出動爸爸捉妹妹去瞓覺, 妹妹先肯瞓一陣咁多啦.

妹妹瞓左, 我地可以舒舒服服開餐...

簡簡單單都有蝦有魚有藍貝, 仲有雞翼, 菜心同叉燒, 雖然唔算好豐富, 但都總算好過食外賣吧.

今日真係辛苦爸爸, 又要買餸又要煮飯, 無辦法啦, 鬼叫大家都知愛美係地獄廚神+無飯煮婦咩, 所以為免大家食到肚痾, 今餐都係由爸爸出馬比較適合.

(老公, 辛苦你啦, 哈哈!!  ^3^)

登登登登...有請今日主角妹妹豬出場~

倆姊妹影張合照先, 不過妹妹今日唔夠瞓好痴身, 當家姐攬攬妹妹影相時, 妹妹竟然發爛, 最後唯有痴住媽媽先肯笑住影相, 攪到家姐有點無奈.

 最後當然唔少得影大合照啦~

其實契媽為了公平唔偏心, 今年早早就已經為妹妹豬訂了這個靚靚生日蛋糕啦, 好彩今次Cake Shop有期, 如果唔係契媽又會唔開心.

Donald Duck x 超人BB, 好味指數爆晒燈.

來一個近鏡吧, 每一個公仔都做得好仔細, 激讚.

妹妹: 我第一次就收到契媽買咁靚嘅蛋糕, 真係好開心好開心好開心啊~

另外...亦要多謝Cherry姐姐和Jade姐姐送上的生日禮物, 妹妹新年又有新衫著啦, 哈哈!!

BB生日會又何需太花巧呢, 簡簡單單都已經感到好幸福.  :p





倆姊妹已經有Facebook Page Anke & Karena - 小b與妹妹b 有興趣的話就入黎Like一Like支持下啦!!  ^^

去公園放電

相信爸爸媽媽們都應該知道, 放假去公園放電是常識吧, 否則爸爸媽媽們想休息一下就難了, 這一點就連小B姨姨都知道, 所以今日即使爸爸要返工, 姨姨都幫忙帶兩隻小魔怪去放放電.

原本之前都有想過, 若然媽媽我間中放假, 即使無人幫忙湊B, 應該都可以一湊二去公園玩吧, 不過經過今次之後, 我相信我唔會冒險, 因為去到公園, 倆姊妹竟然係一個向左走, 一個向右走, 所以為免走失其中一個, 媽媽都係唔想博, 你知啦...九龍公園真係好多人嘛, 除非平日去啦.

幾經辛苦, 終於將兩隻小魔怪捉返埋一齊影幾張相.

 

雖然媽媽好少帶妹妹去公園, 不過婆婆朋友成日都帶妹妹去公園玩架, 所以妹妹已經玩慣玩熟.

見妹妹輕易獨自爬上去就知啦...  (話你兩個係馬騮, 應該唔難令人相信吧)

妹妹一歲都未到就已經咁樣, 唉~ 

影完幾張相, 好快...倆姊妹又再分開玩.

家姐

妹妹

結果我同姨姨就一人追一個, 最終被放電的其實係我同姨姨才對吧.

玩了近一小時, 係時候要講再見啦, 但有人唔捨得走, 就整個豬咀出來以示不滿, 哈哈.

妹妹, 你實在太可愛了吧!!





倆姊妹已經有Facebook Page Anke & Karena - 小b與妹妹b 有興趣的話就入黎Like一Like支持下啦!!  ^^