明日之星

小B從小到大都具有表演慾...而且看來好像越來越強, 所以媽媽我打算搜羅一下附近的跳舞班, 好讓小B跳過顛跳過夠, 反正小B就是喜歡跳舞嘛.

今日姨姨提議扶老攜幼去唱Lunch K, 雖然這才是小B的第一次, 但想不到小B竟然好Like K房這個地方呢, 或許好快K房就會成為小B和朋友仔的聚腳點了.  (我好像想得遠了一點, 哈哈!!)  不過如不是小B, 我想我都不會再踏足這地方, 因為朋友仔們都已經沒有了這些唱K癮啦, 而且大家都忙著湊小孩, 根本就沒多餘時間去玩, 而我...即使無10年大概都應該有8年未有去過唱K了, 超Out囉~

其實好多人都覺得小B是個好有音樂感的人, 每次聽到音樂小B都會聞歌起舞, 熟悉她的親戚朋友已經見慣不怪, 而且還好喜歡看她表演呢...因為有時真的好好笑嘛, 她會有好多自創舞步, 有機會真的要拍下來讓大家看看.

平時在家小B會要求我們開演唱會DVD給她看, 但每次小B都只揀勁歌熱舞部份來看, 如歌手只企定定站在台上唱歌, 小B就會顯得好沒趣.

究竟我將來有無機會做星媽呢?!  哇咔咔咔咔

(原本打算Upload小B唱歌跳舞短片娛樂一下大家, 可惜Upload多次仍未能成功, 算...我放棄.)

愛剪髮

小B一向愛美...所以只要我們浮誇一點讚她或跟她指出做什麼會變美時, 小B都一定會乖乖跟著做.  女孩子始終都是女孩子, 不論年齡, 所有女生都是愛美的, 哈哈!!

還記得當小B半歲左右, 我們就已經試過帶她到髮型屋剪頭髮, 因為爸爸有個髮型屋老闆朋友嘛, 所以每次經過附近我們都會好順便叫他幫小B修剪一下, 起初小B確實好乖坐定定任剪, 不過隨著小B開始長大, 懂得怕醜怕陌生人後, 就不肯再任人剪了, 結果有一排小B的髮型就改為由爸爸操刀喇, 雖然爸爸都曾經學過剪髮, 但始終屋企那幾把剪頭髮鉸剪都已經好多年而且變得有點鈍, 所以每次都剪得不太好.

直至新年前...小B的頭髮終於要大修一次, 我們便隨便帶她到附近髮型屋剪髮, 幸好那位髮型師哥哥好懂得氹小朋友, 所以小B扭扭捏捏下都叫順利完成, 自此就開始經常話"哥哥...剪髮髮...靚靚".  有時聽到我們大人說要剪髮, 她更會話她又要剪呢.

今日經開爸爸朋友附近, 我們又好不客氣地去找Yen叔叔啦, 當Yen叔叔話幫小B剪髮時, 小B竟然肯跟Yen叔叔, 還大方地任抱, 看來自新年前那次剪髮之後, 小B知道剪髮後會靚靚而愛上了剪髮啵...哈哈~

去公園放電

26.03.2014

小B精力超級旺盛, 如果閒時不帶她去放放電, 那湊她的人就辛苦了, 所以最近我一有時間就會帶她到公園跑跑跳跳, 然後回家吃過午飯再跟她午睡, 這樣我才有機會抖抖氣寫寫Blog, 不過這些快樂的日子好快就會過去, 因為媽媽我尚有一星期就要回到工作崗位啦, 見到小B跟媽媽去公園玩得咁開心, 真的好不捨得這麼快就要上班呢...唉!!

冧爆爸爸激嬲媽媽

我家可人兒又對爸爸發功啦...

事緣今早爸爸打來問小B在做什麼時, 小B竟然好快+好順口地答"掛住爸爸", 結果爸爸就當然甜入心啦, 還馬上回小B一句"爸爸都好掛住你".

之後婆婆又問小B有否掛住媽媽, 小B想也不用想就答沒有.

這倆父女簡直完全無視我存在, 超過份呀...我決定唔理你倆父女, 你兩個繼續慢慢恩愛啦, 哼~~~

窮媽停產

我這個窮奶媽正式宣佈停產了!!

一直抱住餵得幾多得幾多的心態去完成自己短期目標, 好不容易終於捱上一個月, 之後因多種因素而決定減產, 結果一減產...窮奶媽奶量馬上再跌, 最後多捱9天終於都是要放棄, 這樣就結束了我39天的人奶路喇.  對於我自己來說, 能餵上39天人奶已經是件不容易的事, 雖然比起其他奶媽, 我是個超失敗例子, 但對於我自己來說已經算是好叻啦, 因為我本身就是個抗拒餵人奶的媽媽嘛.

從此...我的奶媽路就要畫上句號.

妹妹近況

妹妹話咁快已經43日人仔啦...暫時仍然係食訓痾階段, 不過已經學識扭人抱抱訓覺囉, 真係好曳豬!!

暫時婆婆話妹妹難湊過家姐, 但我就覺得家姐比妹妹難湊得多喇.  仍然好記得當年放產假期間湊小B, 我辛苦到差不多隔天就喊, 未滿月時已經寧願返工, 因為我真心覺得小B好惡攪, 雖然妹妹都屬於麻煩一族, 但有了湊小B的經驗後, 今次湊得尚算輕鬆, 起碼我仍未辛苦得寧願上班去, 相反還有點衝動想辭職留在家中對住兩個小魔怪呢, 哈哈.  (當然...我一定唔會做Ftm啦)

好, 先說回妹妹近況...

13.3.2014
剛於一個月回健康院檢查+打針時, 醫生話妹妹黃疸指數仍然偏高, 要即時轉介回QE抽血驗肝功能, 初初聽到確實有點擔心, 不過當問過2月媽媽會的媽媽後, 發覺原來有好多BB都有這個情況, 我才頓時安心不少.  但最難明白的是, 妹妹雖然一直有少許黃, 不過未至於要照燈嘛, 何解滿月時指數會是偏高呢, 算...健康院醫生沒有解釋, 只叫我盡快到QE約期, 那唯有到QE見醫生時再問.

17.3.2014
到QE見醫生, 醫生說妹妹不算太黃, 而且體重亦重得非常理想, 應該不大問題, 因有部份BB退黃是會比較慢, 但既然健康院轉介回來, 那就即管抽血+驗尿, 看看肝功能有否出現問題.

24.3.2014
驗血驗尿報告一切正常, 不過醫生話上星期的黃疸指數仍然高了點, 但就今日看來, 應該已經退得7788, 不過安全起見, 還是要抽血看看實際指數, 結果妹妹又被拮一針嚕, 陰公.

最後要待兩星期後再回QE覆診, 希望到時會是妹妹最後一次到QE啦.  不過從面色來看, 妹妹好像已經沒有黃了.

另外, 我們三母女襯爸爸放假, 已經回家兩次啦, 但妹妹好像有點不太習慣, 明明在婆婆家時睡眠質素算是不錯的, 可惜回家後...妹妹變得好醒訓, 又變得好扭計, 總之就難為了媽媽啦, 看來我們要多點帶她回家, 令她快點習慣才行喇, 唉...

週末去冒險

22.03.2014

繼早兩日的Happy Day之後...再來一個Happy Saturday...開心就是這麼簡單!!

今日姨姨得閒, 小B跟媽媽在家又無無聊聊, 而朋友早前轉贈了20個冒險代幣給小B, 給小B於枱上發現後, 有人就嚷著媽媽帶她去樂園玩喇, 既然如此那就一起去冒險吧.

其實只要小B乖, 媽媽一定會盡力去滿足你, 因為我真的好喜歡看見妳那甜美的笑容嘛, 哈哈!!  ^^

扮妹妹

你們倆實在太攪笑了吧!!

最近小B有樣學樣, 硬是愛痴著妹妹, 目的就是要學妹妹來引我們發笑...  當然我們都知道小B是呷醋啦, 不過未見有扭計, 只是愛扮妹妹就算了吧, 反正我們都被她的行為惹到哭笑不得, 哈哈.

當我們放低妹妹在攬枕上時, 小B又要睡在Cushion上.

當我們用包被包著妹妹時, 小B又嚷著要用包被...

當我們幫妹妹帶上手套防止抓傷面仔時, 小B又嚷著要帶...

有時就連妹妹撐手撐腳的小舉動都跟到十足呢...

而最大鑊的就是連妹妹食奶奶時, 小B都要跟住一起食奶奶嘛, 結果...在奶粉上的開支又再大大提升了, 唉~~~

Happy Day

媽媽希望藉著餘下放產假的兩星期... 多點陪伴小B, 因為媽媽只想見到小B開開心心, 不要再因妹妹而呷醋, 所以今日見有時間, 一早起身就帶小B去公園玩喇.

其實自聽一班Blog友媽媽建議後, 我已經盡量抽時間陪伴小B, 所以小B好快已經回復正常, 沒有再大哭大鬧引我們注意, 見小B咁乖...難怪爸爸勁錫小B, 哈哈~

出發去公園玩啦, 開心笑一笑先!!

如果日日都可以帶小B去玩, 那就太好了, 可惜媽媽好快就要返工呢, 唉...

去完公園, 小B突然自己跟我說開心, 所以話想小朋友開心其實好簡單, 只要有爸媽陪玩就已經可以啦, 哈哈!!

小B...媽媽真的超愛你啊, 最愛就是見到你開心甜笑的樣子.  (只要你開心, 媽媽就心滿意足.)

我係妹妹

妹妹: 我要同大家澄清一件事......我千真萬確係一個女仔黎, 麻煩大家唔好再誤會我係弟弟啦, OK?!

說實話, 連婆婆..媽媽..姨姨都覺得妳長得像個男仔時, 又難怪街上的三姑六婆會誤當妳係男仔啵, 不過家姐小時候比妳現在長得更像男仔, 所以妹妹妳可以放心, 只要媽媽遲些幫妳打扮一下就無問題啦, 哈哈!!

新衫仔

嘩...這兩天妹妹收到好多衫仔做禮物呀, 多謝姨姨, 姐姐們一番心意.

妹妹: 我終於有新衫著, 唔洗執家姐二攤啦, 哈哈!!

老實說, 今次除了買過一件夾衣給妹妹滿月時著之外, 其餘全部都是家姐或朋友轉贈的舊衫來, 但這堆衣服已經多到可以著足大半個月啦, 所以我絕對不是大細超, 只是不想浪費而已.  :-P

我做得到

嘩..嘩..嘩..我的短期目標終於完成, 請以掌聲鼓勵鼓勵!!

對於我這個從前勁抗拒餵人奶的媽媽來說, 能夠足足捱上一個月, 實在難得.  再者自己奶量不多, 時間又不許可, 但我竟然能夠堅持以餵得幾多得幾多的信念來完成目標, 這應該都算對得住自己了.  雖然這一個月裡我曾多次想過放棄, 但幸好最後都能夠完成.

至於之後繼續餵人奶與否, 這個問題實在令我苦惱.  問心...我自己其實是想繼續的, 但我又好想可以有回多點時間, 加上產量不多令我感到好無癮, 可是另一邊廂就是自己不肯認輸的性格而驅使我去繼續, 唉, 你教我該怎樣做喇.  而上班後, 公司又無地方可以泵奶, 我真不想跟同事一起躲進廁所才泵奶呢......始終在廁所泵奶好像有欠衛生嘛.

暫時我應該還是會繼續, 不過已經產量少的我會再度減產, 所以妹妹每日大概就只可食一餐人奶啦.  其實相比起家姐一啖人奶都無得落肚, 妹妹已經算好了, 哈哈~

倆小姊妹

今日一早小B就幫媽媽手餵妹妹食奶奶...其實小B唔扭計唔同我作對時, 真的算乖啊!!

見到這個畫面, 感覺好Sweet呢...  ^^

我的忙爆生活

湊兩個小朋友一點都不容易, 尤其當她們年紀相若而且都還少時, 所以我真的好佩服那些湊兩個小朋友而又沒有工人幫忙的FTM, 我...真心想要向她們致敬, 皆因自問一定一定不能做到.  假如有一天我迫於無奈真要做FTM的話, 我想我們一家好快便會上頭條, 哈哈!!

有人問我會否後悔那麼快就生第二個, 我想大概應該沒有吧, 因為我知道這是生兩個小朋友的必經階段, 所以即使是早是遲都應該不會差太遠, 但現階段我和爸爸都確實是辛苦的.  暫時住在婆婆家中都還好, 起碼夜晚還有姨姨, 亞父幫忙照顧, 但遲些當我們一家4口回自己家後, 我和爸爸就要一打一...打怪獸啦, 真的不敢想像到時的情景呢.

在這廿多天的坐月日子裡, 我每天就好像瘋婦般湊著兩隻小魔怪, 雖然話就話有婆婆幫手, 但婆婆忙著做家務之餘, 還要照顧我們各人起居飲食, 所以可以的話, 我盡量都不會叫婆婆出手.  最近婆婆不停幫我洗豬腳煲薑醋, 洗雞煮雞酒等, 洗到連手都爛時仍然毫無怨言, 我真心覺得婆婆對我太好啦, 試問見著她每日不停在忙, 又豈敢再去打擾她呢.  雖然我沒有開聲叫婆婆出手幫忙, 但婆婆仍是會主動幫兩隻小魔怪沖涼, 當然我都會去協助她啦, 另外有時婆婆見我累得睡著了, 還會自動自覺湊妹妹, 所以話...世上只有媽媽好, 有媽的孩子像個寶呀~~~~~~~~

我的黑暗日子究竟還有多久才能捱過去?!  這種生活比起上班還要忙, 還要累, 我快要累得一坐下來就可以馬上睡著, 我真沒有誇張啊!!

現在每天餵奶, 泵奶, 洗奶樽, Tum小B和妹妹訓覺, 幫手同兩隻小魔怪沖涼, 餵小B食飯, 陪小B玩...已經成為了我每日指定動作, 雖然一定要做, 但我都好想可以有回自己的小小私人時間, 可以嘛?!

肚風

大多數初生BB都會有肚風問題, 雖然肚風並非一種病, 但就一定會令BB肚仔唔舒服, 繼而扭計大哭, 哭得你會想一下就把她扑暈...

妹妹跟家姐小時候一樣好多肚風, 食飽奶超難掃風之餘, 又經常放屁, 食奶時肚仔還會發出咕咕聲呢, 難怪近一星期妹妹勁扭計囉.  雖然知道妹妹因為肚仔唔舒服才扭計, 但她那聲大如雷的喊聲實在令人煩厭, 而最慘的是妹妹大多數在半夜才出現這情況嘛, 連累我無覺好訓之餘, 還喊到我心都煩, 加上第二朝早人人都要上班, 結果半夜就只得我獨個兒在打怪獸, 超慘!!

其實朋友陪月早前已經介紹了這隻荳蔻花油給我, 不過我見好大陣鐵打酒味, 所以遲遲未有幫妹妹搽.

但有日見妹妹不停大哭大鬧, 婆婆摸她肚仔, 發覺竟然是凍凍的, 最後唯有出動這支荳蔻花油.  陪月教將雙手連油捽熱, 再在BB肚仔上輕輕按壓, 如是者按幾次便可.  雖然未知這油是否真的有效, 但我又覺得一試無妨, 反正外敷又不是內服, 應該不會有太大問題吧, 所以我已經連續幫妹妹搽了好幾天啦, 而妹妹又確實好了一點點, 起碼半夜沒有再無緣無故大哭大鬧, 只是早上偶然會扭抱扭眼訓.

我記得兒科醫生有講過, 如果BB無理定時大哭, 多屁放, 間中扭曲身體谷得面紅紅等都是因為肚仔唔舒服的表現, 這大概就是因肚風造成, 而這情況到BB大約3-4個月大左右就會得以改善, 難怪好多BB都會出現百日哭情況, 希望我家妹妹不是這種百日哭BB啦, 否則我應該好快會有精神病, 哈哈!!

妹妹: 媽媽...我唔係玩野架, 我真係唔舒服先喊咋, 你睇我大大滴眼淚就知啦~

我的親密戰友

對於奶泵一直沒有研究, 更沒有特別去考究...而朋友不介意地借出了Medela Swing給我, 那就順理成章用它, 沒再去找其他嚕.  原本有另一位朋友話借出Avent手泵給我, 可是大家都忙, 最後還是沒有約出來, 就在沒比較的情況下讓我講講我對我戰友的用後感吧!!

用過單泵後, 終於明白點解同事叫我買雙泵, 因為當一邊正在泵奶時, 另一邊就會不停漏奶, 對於一些窮媽媽來說, 真是滴滴眼淚啊, 起初頭幾次用時, 真的浪費了我不少奶呢, 幸好最後學精了...當一邊泵時, 另一邊就用杯仔來承接著, 那就不怕浪費喇, 但就有點麻煩囉.  若然滿月後我還能繼續人奶路的話, 或許我會多買一套配件, 將它變為雙泵用.  雖然好多人都話當Swing變做雙泵用時, 就會不太夠力, 但我又不想多花金錢去買個新泵嘛, 始終我未能預計自己那一天會完全放棄泵奶, 所以不想投資太多.  其實講力度的話, 我自己覺得還可以啦, 起碼我仍未需要調較到最大, 雖然力度確實有點不夠, 但較得太大的話又會痛喎, 所以我沒怎樣調較呀.

而單泵最大弊處, 就是在時間方面要多付出一半喇...不過由於時間關係, 我已經由一小時內完成變為半小時內, 務求不要塞奶就算.  但未知是否泵奶的時間太短關係, 感覺好像泵極唔清.

整體來說, 我對我戰友的滿意度還算可以, 但如果要我買的話...我寧願試試勁多人讚好用的那兩款韓國泵 - Spectra M1 / Spectra 9 Plus.

泵媽唔易做

對於餵人奶一事, 究竟我應該繼續還是放棄呢?!

今日已經是產後第19天了, 但自從上星期開始, 奶量就一直無再增加嚕, 每次只維持在30-50ml左右, 而我亦有每天不停飲代茶, 魚湯, 荳奶及多吃飯, 可是就是一直無進展, 結果妹妹一日六餐裡面就只得兩餐是人奶.  雖然我是在沒有壓力下餵人奶的, 但有時為了贏自己, 我還是會跟自己鬥氣, 努力泵奶, 真的好低B呢, 哈哈!!!  不過近幾天我開始有想放棄的念頭啦, 而之前好支持我餵人奶的老公同時都竟然叫我不如放棄...

其實我有想過今次失敗的原因, 大概是因為根本忙得連泵奶時間都沒有吧, 好多時當我一想泵奶, 不是小B扭計要陪玩, 就是妹妹扭抱扭眼訓, 結果一拖再拖.  明明最理想應該是2小時泵一次, 但我就好多時都變為5-6小時才泵一次, 那麼又怎能增加奶量丫, 唉!!  難怪好多媽媽都話第2胎只要盡過力就好了...

暫時短期目標是餵到滿月, 還有十多天, 希望可以頂得住啦!!