妹妹K班大作戰之有Offer

11月經過3場K班大作戰後, 妹妹嘅K班大作戰陸續有結果!!

今年少少地只報咗4間學校.

而今次喺等待通知信嘅期間, 媽媽心情非常平靜, 半點心急焦慮都沒有, 因為大概心目中已經有答案嘛...

而暫時結果跟我預期中完全一樣...暫有1 Offer, 1 Waiting (另有1間未知, 1間未考)

果然家姐間學校, 係上午班Offer呀, 所以妹妹終於都得償所願, 明年可以同家姐一齊手拖手上學去嚕, Yeah!!

唔知我哋仲有無機會轉讀其他學校呢?!  :p





我們的Facebook專頁 - 小b與妹妹b之成長日誌

田心消防局開放日

自從去過一次消防局開放日之後, 一直都好想再去多次...可惜等極都等唔到就近嘅消防局有開放日, 所以前陣子當知道屋企附近嘅田心消防局有開放日之後, 馬上已經決定要帶兩位小朋友去玩多次~~~

消防局嘅開放時間係12:30 - 5:00, 今次我哋一早12:35就去到, 但原來未夠12:30已經可以入局啦, 結果我哋去到時已經大排長龍, 爸爸見樣樣都要排隊當然唔高興啦, 但佢個囡堅持要排, 爸爸又可以點啵!!

首先我哋排隊換救護衫同電單車影相, 唔係講笑條隊唔算非常長, 但都排咗足足一個鐘, 我當然無乜所謂啦, 去得開放日就預咗樣樣都要排隊, 相反爸爸嘅面口就唔係咁好睇喇, 因為佢係一個極度討厭要排隊嘅人...黎緊下星期學校遊戲日又係要勁排隊玩遊戲, 我真係擔心到時爸爸又會變臉囉, 不過到時有咁多老師同學喺度, 爸爸實會好克制地變臉, 哈哈!

媽媽排隊時, 爸爸帶兩位小朋友周圍八下, 睇下有咩玩...順便影下消防車.

其實只要個囡開心, 排下隊又有咩所謂啵...

再黎跟救護員一起合照...

原本諗住叫埋妹妹一齊換救護衫影相架, 點知妹妹突然又唔肯影...

爸爸報告返黎話攤位遊戲唔太吸引, 而小B又竟然肯唔玩攤位遊戲, 就係咁我哋就去咗排迷官喇.  其實個迷官都幾無聊架, 排咗大約半小時, 入到去原來係黑麻麻, 伸手不見五指嘅, 純粹係憑感覺一直向前行, 然後轉咗兩個圈就到出口, 完~

兩點左右...爸爸已經嚷著要走, 而我見勢色唔對, 越黎越多人又真係唔太多嘢玩, 所以都選擇放棄!!

下次再有呢D活動, 我都係單拖約朋友去算喇, 唔好預爸爸...  :p

 

我們的Facebook專頁 - 小b與妹妹b之成長日誌

同學仔生日會@麥當勞

多謝同學仔邀請, 今日我家兩姊妹又有得去玩啦!!

知道有得去生日會, 兩姊妹出發時開心到呢...

小朋友大咗喺麥當勞開生日會都係一個幾唔錯嘅選擇, 因為有麥當勞姐姐陪玩, 咁大人就可以慢慢食慢慢傾喇...

每個星期見足6日-7日嘅好朋友, 唔知將來上小學後仲會唔會Keep到呢?!

另外仲有扭波波環節, 但小朋友又點會咁容易學識跟住扭丫, 所以當姐姐教完大家扭波之後, 最終都係要逐個逐個幫小朋友扭一次.

不得不讚嘅係, 當主角派汽球俾小朋友準備跟姐姐學扭波時, 家姐好乖咁問主角拎多一個汽球俾妹妹, 原來家姐玩緊都仲記得妹妹架, 乖女~

究竟成個Party, 妹妹去咗邊?  慢熱嘅妹妹咪就係全程痴實咗爸爸囉...  ~.~"

玩完一輪集體遊戲後, 突然又圍埋一堆, 原來準備切生日蛋糕呢~

似乎大家都好心急...

然後姐姐叫舉高雙手...因為要準備開蛋糕盒~

當唱生日歌同切蛋糕一刻, 場面實在太混亂啦, 最終媽媽都被迫咗去後面...  ^_^"

話咁快生日會已經黎到尾聲喇, 同學仔們當然要影番張合照留念啦~

今日小B滿場飛, 玩得非常盡興, 如果唔知仲以為佢先係主角呢, 哈哈!!

祝同學仔生日快樂...開開心心.





我們的Facebook專頁 - 小b與妹妹b之成長日誌

賣旗小義工

賣旗呢個咁有意義嘅活動, 今年我哋終於有幸參與啦!!

想當年媽媽讀中五時才有機會接觸賣旗活動, 想不到幾十年後嘅今日已經發展到早於幼稚園階段就已經有機會接觸賣旗呢類咁有意義嘅活動呢...

今次活動除咗可以灌輸小朋友做善事之外, 亦可以訓練小朋友同陌生人接觸.

賣旗日之前, 老師已經同小朋友洗咗腦, 當然媽媽私下亦有向小B進行洗腦啦, 所以今次小B嘅賣旗表現都尚算令人滿意架, 起碼...佢都算肯主動問途人嘛.

賣旗活動7:30開始, 不過懶瞓嘅媽媽唔想咁早起身, 所以差不多近9:00才到達學校附近進行賣旗活動...

期待咗活動幾日嘅小B好醒神啵, 哈哈!!

我哋太晏開始, 去到學校附近已經滿街都係賣旗義工, 不過我咃一樣會努力!!

當行入商場搵同學仔時, 突然有個伯伯主動走過黎話幫我哋買旗, 雖然我知道商場係唔可以賣旗嘅, 但伯伯一番好意, 我實在難以拒絕, 好彩保安姨姨都見到唔係我哋做主動, 所以都無開聲話我咃, 就係咁...我哋嘅第一支旗成功賣出咗啦, 呵呵~

Join埋同學仔之後就一齊開始賣旗...

小B一直細細聲問, 可唔可以幫我買支旗呀? 

雖然有好多途人會回應無帶散紙或是望都唔望就走開, 但我仍然每一次都會同小B講唔緊要架, 人哋有權唔買, 我哋再問下一位啦, 免得小B嘅弱小心靈快快被打沉.  不過當日我哋都遇到唔少有心人士, 有幾位有心人士見4位小朋友一齊賣旗, 有心人士仲將錢分別放入4位小朋友嘅旗袋呢, 真係好值得讚呀!!

喺附近賣咗一陣, 賣旗義工越黎越多越黎越多, 最終我哋決定轉地方...

沿途都遇到唔少同學仔~

最後我哋由大角咀行咗去朗豪坊附近繼續賣...

賣到咁上下時間, 3位小朋友都大叫好肚餓, 無辦法啦...大家一早就掛住賣旗活動, 連早餐都無食嘛, 就係咁我哋選擇咗提早交還旗袋.

是次活動小B話好好玩, 明年一於繼續參與!!  ^^





我們的Facebook專頁 - 小b與妹妹b之成長日誌

K2觀課日

一年一度嘅觀課日又到啦, 今年媽媽依然係抱住好期待嘅心情去觀課, 仲記得去年嘅觀課安排同我想像中好唔同, 相反今年K2嘅觀課日學校又安排得幾好啵!!  ^^

跟去年一樣, 媽媽親自接送小B返放學, 有個小朋友開心到呢, 果然係小朋友都鐘意父母親自接送返放學嘅, 可惜我係一個Working Mum, 實在唔能夠日日都滿足到小朋友嘅要求, 亦因為咁只要能夠間中親自接送, 小朋友都會表現得特別開心特別興奮.

早咗到校, 同同學仔一齊等開門...

送返學後有半小時空檔, 又係襯機同媽媽們增進感情嘅早餐時間...  :p

然後準時9:30回校等校長老師安排觀課, 前半小時老師先安排小朋友上唱遊課, 估唔到小朋友見到有家長觀課, 上唱遊時都特別投入, 老師仲細細聲話...平時唔係每個小朋友都肯開口唱歌架, 相反呢幾日因為有家長觀課, 差不多每個小朋友都好大聲唱歌.  今年觀課...我覺得小B真係有少少進步, 因為佢無再好似K1時咁容易受我哋影響, 今年我見佢投入性大咗~

呢半小時, 家長們都睇得好開心, 老師亦令到小朋友同家長們有互動...讚呀!

接住後半小時就安排家長入課室睇小朋友上堂, 今年入課室後我選擇咗坐小B後面, 等佢唔洗掛住成日望我, 的確小B真係比起去年定性咗, 唔洗成日要老師提點住要坐好要留心, 而且小B上堂都算肯主動參與, 完全跟老師同媽媽講電話嘅情況相若.

雖然現今嘅幼稚園生活跟媽媽年代時比較應該辛苦了不少, 但慶幸小B仍然熱愛返學, 熱愛讀書, 希望小B可以繼續好好享受啦!  

我們的Facebook專頁 - 小b與妹妹b之成長日誌

♡親子活動●野餐@單車館公園♡

天氣涼涼地嘅週末, 媽媽突然靈感到想去野餐, 點知爸爸竟然無反對啵, 咁媽媽就梗係嗱嗱臨約朋友一齊去玩啦...

今次我哋揀咗去單車館公園, 成日都見朋友去呢度玩, 估唔到原來地方真係幾好啵, 又大又舒服, 下次一於再去呢度野餐先得!!

一去到梗係食野先啦, 不過小朋友有得玩又點會肯食, 最終我哋都唔理咁多啦, 大人們開餐小朋友們自己玩, 爽呀~

4個小朋友玩, 點都開心過兩姊妹自己玩嘅, 所以宜家一有時間, 我盡量都會約埋朋友一齊玩, 等兩姊妹可以開心過週末.

買咗N年嘅滑板車...終於可以帶去街玩, 我家大小姐好似有姿勢又有實際咁啵~

胃食嘅妹妹就梗係邊玩邊食啦...醒目~

其實去野餐嘅其中一個目的, 都係想爸爸多D跑動, 今次媽媽成功咗啦, Yeah~

 倆姊妹真係好鐘意同爸爸玩, 媽媽今日好輕鬆啊~

 帳篷都可以玩一大餐, 小朋友開心就係咁簡單~

玩咗兩個多小時, 大家都開始現疲態, 我哋又係時候要返婆婆屋企準備迎接忙碌嘅一週嚕.





我們的Facebook專頁 - 小b與妹妹b之成長日誌

妹妹K班大作戰 - 3rd Interview

黎到第3個Interview, 我真心要讚一讚妹妹!!

今次呢間幼稚園係一間傳統女校, 區內區外嘅家長都應該對學校嘅60個學位虎視眈眈, 雖然我都唔例外, 不過自己知自己個女嘅表現, 所以一心都預咗只係陪跑.

今年第1次報名, 但事前已經知道學校面試係需要小朋友自己入課室, 如果小朋友入課室一刻唔肯入或喊, 老師就會請小朋友同家長去冷靜區冷靜, 直至小朋友心情平伏先再入課室面試, 以妹妹嘅性格...媽媽真心好驚妹妹會唔能夠成功入課室面試架, 不過好彩經我一星期日哦夜哦, 再加上以買公主裙作利誘, 妹妹好成功咁自己入咗課室面試啦, 真係好感動呢~

首先一去到學校, 已經見到好多小朋友喺禮堂等面試, 我見大部份家長仲襯空檔教小朋友答問題, 反而我只係落力咁同妹妹玩, 因為我要放鬆妹妹嘅心情, 等佢分離一刻唔好喊...

等咗大約15分鐘, 終於到我哋報到, 每批有18位小朋友, 共分為3組, 我哋係第1組.  喺等入課室期間, 家長義工好好人, 為咗舒緩小朋友嘅緊張情緒, 不停跟小朋友唱歌, 為咗分散小朋友對分離一刻嘅不安情緒, 不斷叫小朋友入課室玩煮飯仔時記得煮早餐俾爸爸媽媽食, 真心覺得家長義工們好有愛, 讚呀 .

老師開門一刻, 小朋友要入課室面試啦, 排第一位小朋友最終攬住媽媽唔肯入, 到妹妹時我好快手咁推咗妹妹入去, 之後第四位小朋友又係爆喊唔肯入, 就係咁...我哋組得番4位小朋友Interview.  其實推咗妹妹入課室一刻, 我好想偷望妹妹架, 不過如果呢個時候俾妹妹見到我, 妹妹一定會爆喊, 所以我唔敢偷望, 直至老師關上門後, 外面真係唔知課室入面嘅情況, 因為所有玻璃窗都被封住, 大約7分鐘左右, 面試完畢, 而開門時我見到妹妹眼濕濕囉, 當望到我時更加喊住叫媽媽, 雖然最終妹妹都係喊咗, 但起碼能夠成功入課室面試, 而面試時守住門口嘅家長義工就話課室入面好靜無小朋友喊, 所以我覺得妹妹已經好叻女...而我就當妹妹成功架啦.

面試結果大約12月中會知, 但媽媽完全唔敢抱有期望, 只覺得今次真係一個好好嘅面試經驗.

我們的Facebook專頁 - 小b與妹妹b之成長日誌

妹妹K班大作戰 - 2nd Interview

今次我哋去家姐間學校面試, 唔知係咪因為地方比較熟悉嘅關係, 今日妹妹表現比尋日好, 而且妹妹知道要去家姐學校面試後, 仲不停話要同家姐一齊返學添啵.  至於明年係咪真係有機會同家姐一齊返學...就要遲D先知啦~   

一去到學校例牌要去veevee, 唔通妹妹有面試前緊張症候群?!  (短短十數分鐘叫咗兩次要去廁所, 不過其中一次係報假案嘅.)

去完廁所出黎, 我哋就分組入課室玩玩具, 據我觀察所知, 喺課室玩玩具時即使有老師觀察小朋友, 但應該係唔計分嘅, 因為眼見老師除咗負責問小朋友名字, 核對資料之外, 並非每個小朋友都有埋身, 最多都只係同小朋友傾一句半句.

玩咗10分鐘左右, 我哋又轉去大堂等候, 今次面試時好好彩遇番家姐上年個副班主任呀, 妹妹企喺門口時, 老師已經認出妹妹了, 哈哈!!

面試開始, 老師問妹妹名字, 妹妹細細聲有答, 結果老師梗係話妹妹怕醜啦, 之後再問妹妹邊個帶佢黎, 妹妹又係細細聲答, 最終老師都忍唔住講, 家姐同妹妹完全唔同性格啵, 証明家姐喺學校係幾咁健談熱情架啦...  之後老師再叫妹妹拼圖, 然後分別將細至大嘅杯疊好, 最後俾幾幅圖畫妹妹睇再問問題, 就咁就完成咗今次嘅Interview啦...

接住就去另一個課室見校長, 校長派咗一盒餅餅同一份玩具, 再問妹妹名字, 妹妹開始唔想答, 不過喺媽媽鼓勵下, 妹妹最終都係有答嘅, 然後校長仲好似有問妹妹想唔想喺度返學之類, 不過妹妹無答, 之後見校長喺份表度寫..寫..寫, 今次真係見完走得喇.

是日表現, 媽媽俾妹妹90分, 果然喺無壓力嘅情況下面試, 大家都能夠保持好心情.

據同學仔媽媽透露, 有兄姊在讀嘅弟妹, 其實係必收嘅, 不過我亦曾經問過老師同樣嘅問題, 老師話唔係百分百, 最終結果一星期左右就會知, 到時再揭曉吧. 





我們的Facebook專頁 - 小b與妹妹b之成長日誌

妹妹K班大作戰 - 1st Interview

說起來應該有點誇張, 因為今年已經喺我同兩個女連續第4年出戰幼稚園嘅面試賽啦, 黎到最後一年, 媽媽已經唔再緊張, 加上明年K1妹妹一定唔會無書讀, 所以大家都唔需要有壓力, 輕輕鬆鬆去Interview就可以.  而且我相信一切自有安排, 最終會唔會留校升K1, 稍後一定會有指引.  

第一個Interview係喺星期五下晝, 媽媽當然要請假陪妹妹去面試啦, 今次呢間學校我真係見足4年, 而幸運地去年妹妹係有上午班Offer架, 只係我哋覺得全日N班比較適合妹妹, 所以先放棄學位.

今年再報讀, 係因為有好幾個朋友嘅小朋友讀緊, 口碑返黎唔太差, 而且我覺得呢間學校比家姐間學校讀得輕鬆, 語境亦較家姐間學校好, 所以今年一於再試, 看看妹妹有無緣入讀.

妹妹: I'm Ready...我已經準備好出戰今年嘅面試啦~

面試時間係2:30, 妹妹應該開始眼瞓, 不過好彩妹妹無扭眼瞓啵, 只係去到學校初時有點呆呆豬, 喺大堂等候面試期間唔太肯玩, 但當每次有老師行過, 妹妹都有say Hi架, 好乖女.

直到去聽簡介會, 妹妹終於開始生猛起黎, 仲不停問走得未, 真係吹脹.

聽完簡介會好快就入課室面試, 一開始老師直接叫妹妹名, 問係唔係佢, 妹妹怕怕醜醜地點頭.  老師仍在準備面試教材時, 呢一刻妹妹唔肯自己坐硬要坐我大脾, 就連老師都忍唔住叫妹妹唔洗怕醜, 好彩我氹咗妹妹兩句, 妹妹就肯自己坐, 相信咁樣足以扣少少印象分吧. 

首先老師俾層層疊妹妹疊高, 然後再指住媽媽問妹妹我係邊個, 之後俾本圖畫書妹妹揭, 叫妹妹逐一講出答案, 最後再俾4張字母咭妹妹讀, 咁就完成咗首個Interview.  雖然妹妹今日未能夠做足100分, 但以妹妹今日嘅表現同對答, 媽媽已經覺得妹妹好叻, 加上返學後再去面試好像比去年有進步, 媽媽真心覺得值得一讚!!

面試完老師送玩具, 妹妹好開心呢......

3星期後會有結果, 希望有好消息啦~





我們的Facebook專頁 - 小b與妹妹b之成長日誌

K2 ~ 哈佬喂化妝舞會

一年一度哈佬喂又到啦, 今年一知道有化妝舞會後, 我已經問小B想扮乜嘢角色, 點知小B二話不說就答我要扮公主, 聽到自己個囡話要扮公主一刻, 我真心接受唔到囉...  但事實係佢快樂所以我快樂, 媽媽唯有實現佢所想.

原本媽媽打算淘一條Elsa裙, 但如果淘一條妹妹肯定會爭會呷醋.  幸好當我正心煩淘唔淘多條之際, 朋友知道小B話要扮Elsa, 馬上就話借出Elsa裙一條喇, 所以幾時都話, 朋友真係識多幾個都唔怕多, 哈哈!!

今日嘅公主...完全係未出發先興奮~

平時7:30先起身嘅小B, 今日7:30已經換好衫準備出門返學.  明明未夠鐘上校車, 但又堅持要早落街, 咁即係叫媽媽幫佢喺街影相啦...

 (原本話要帶埋個皇冠, 但帶完小B又話個皇冠令佢唔舒服, 所以唔帶.)

就係咁, 今日呢個小朋友好開心, 仲話自己係個靚公主添啵, 哈哈!  -.-"

P.S: 係咪所有女孩子都希望自己可以成為公主架?!  ^^





我們的Facebook專頁 - 小b與妹妹b之成長日誌