妹妹B ~ 21個月

妹妹已經21個月大啦...^^

今個月妹妹在講說話方面進步神速, 最愛像錄音機一樣跟人講, 即使長長一句話妹妹都可以跟, 雖然唔係句句清楚字字清晰, 但肯講總比唔肯講好嘛, 而且妹妹開始會講句子, 跟家姐當年比較, 妹妹說話方面算係好, 應該係有家姐俾佢跟住嘅關係, 而且家姐有時都會主動教妹妹講嘢架, 只係妹妹比較有個性, 唔係你要佢講佢就一定肯講囉. 

有日我叫妹妹沖涼, 點知妹妹一支箭咁跑出廳, 我問妹妹去邊 (其實無諗住妹妹會答我), 但妹妹竟然答我, 我去攞野 (攞玩具沖涼). 當時媽媽真係覺得好驚喜, 仲問婆婆聽唔聽到, 不過原來婆婆話佢一早就識講好多嘢啦, 只係平日唔係經常講啫, 似乎媽媽我又Miss咗好多第一次囉, 唉~ 
**這就是Working Mum嘅弊處喇**

至於大小肌肉方面都唔錯, 妹妹會經常跟著家姐一起跑跑跳跳, 早幾個月前已經可以原地跳起, 宜家當然係越跳越高啦!!  而喺平衡方面亦明顯比之前有進步, 少咗跌跌撞撞, 媽媽亦總算無之前咁擔心, 曾經我有懷疑佢平衡差是否腦部發育出問題, 做媽媽...幾時都係多多憂慮嘅.  上樓梯都係越上越好, 完全唔俾人扶, 不過落樓梯就差少少喇.

食方面基本上樣樣都肯食, 但係佢同家姐爸爸都有個共通點, 就係唔食豆腐, 每次試食豆腐都必定吐出黎, 但豆漿, 豆腐花又肯飲又肯食啵, 總之呢三父女都係奇怪啦.  食晚餐仍然係好難攪, 我真係好想知點樣先可以令佢乖乖坐定直至食完一碗飯囉, 不過一開始已經養成嘅壞習慣, 應該都好難改得掉.

健康方面還算可以啦, 每次病都係俾家姐傳染多, 所以相信明年入學時抵抗力應該會變得比其他小朋友好.

月初時發高燒, 攰到自己瞓咗~

性格...非常霸道, 樣樣都要同家姐爭, 好彩家姐算肯讓妹妹, 呢點真係要讚一讚家姐.

唔鐘意俾媽媽刷牙, 每次要刷牙都好有博鬥Feel, 但妹妹鐘意自己刷, 不過佢只係咬住牙刷就當刷咗, 幸好妹妹嘅牙齒都尚算乾淨, 希望唔會因為咁而好快出現蛀牙情況啦.

大個女, 開始無咁容易呃...  以前要帶家姐出街, 只要氹妹妹入房, 我哋就好容易出門口, 不過宜家妹妹已經叻女咗, 唔會咁易俾我哋氹到啦, 所以好多時要出街就變咗好似走鬼咁, 然後未入Lift就會聽到妹妹爆喊, 好陰公架. 

(媽媽: 真心好想妹妹可以容易控制d, 咁樣媽媽先可以一拖二帶出街玩嘛, 所以妹妹你要乖乖呢)

我們的Facebook專頁 - 小b與妹妹b之成長日誌