跳舞班 (試堂)

對於上興趣班, 媽媽我沒特地定下時間表給小朋友, 只是一直堅持住要3歲後才開始上興趣班嘅理念, 加上上興趣班嘅大前提係一定要按小朋友自己意願, 等小朋友自己揀最想學的才去學, 始終上興趣班係想小朋友開心, 目的其實都只係想小朋友可以喺佢自己嘅興趣上繼續好好培育發展嘛, 所以今次我係絕對按小B自己意願而去報名架...  ^^

其實小B一直都好喜歡音樂好喜歡跳舞, 但媽媽就一直都未搵到一間岩心水嘅跳舞學校, 所以遲遲未開始跳舞班, 幸好今次經其他媽媽介紹及安排之下, 我哋成功搵到呢間學校試堂.

試堂前我預先同小B講, 媽媽唔可以入課室, 但可以喺課室後嘅大玻璃窗望到我, 起初小B都有話會驚驚, 因為始終都係第一次嘛, 不過去到跳舞學校後, 見到前一班小朋友未落堂, 個個好開心好認真地隨住音樂跟住Miss跳舞後, 小B就同我講一陣可以自己入去上堂喇, 抵讚!!

到小B上堂時, 小B果然好叻可以自己入課室, 自己跟住Miss教嘅動作, 雖然間中都會望出黎搵我, 但後段我嘗試唔俾佢望到, 佢都可以繼續上堂, 真係叻叻.

落堂後, 助教姐姐跟Miss都有讚小B, 話小B第一次上堂一D都唔怯場, 而且又肯聽指令, 跳舞時跟得好好, 好有音樂感.  其實媽媽一直都有睇到小B嘅表現架, 見小B又真係上得幾開心, 所以我都有問小B係唔係真係好想學, 最後見小B自己話想繼續學, 又話真係好鍾意跳舞, 所以媽媽就決定報名喇, 而小B人生嘅第一個興趣班就由呢度開始咗啦, 將來如果一直繼續學的話, 學校還會安排好多商場出Show表演嘅機會俾小朋友.

希望小B認真地學, 唔會三心兩意學幾堂就話唔學啦...

今次媽媽偷拍到少少小B上堂嘅片段, 屋企人睇完個個都話小B係屬於舞台嘅, 真係想笑死人咩, wakakakaka~

倆姊妹已經有Facebook Page Anke & Karena - 小b與妹妹b 有興趣的話就入黎Like一Like支持下啦!!  ^^