24.04.2015
小B學校嘅N班生活真係好多姿多采, 今日爸爸媽媽又有機會同小B去親子旅行啦, 今次學校安排咗旅行社幫手, 所以即使全校一齊去旅行, 老師同家長們都尚算輕鬆, 是次低年班N1, N2班去嘉道理農場同大埔海濱公園, 高年班N3, N4班就去元朗南生圍.
一早小B就好醒目咁自己起身, 因為有得去玩丫嘛, 換轉係平日返學, 媽媽幾乎要用鑊剷剷佢先肯起身架... ~.~"
9:15準時回到學校集合, 看來大家小朋友都好興奮, 好期待呢, 未夠鐘出發大家都已經提早返到學校向老師報到啦, 哈哈.
首先第一站係嘉道理農場, 一落車...當然要喺門口影張大合照先啦, 由於大合照係學校安排, 所以大合照就由家長義工攝影師負責喇, 至於我哋要睇相就要等學期尾完時先可以買回全年嘅相集DVD.
影完大合照, 領隊就帶領我們遊嘉道理農場嚕!!
呢兩位小女孩真係好可愛, 原來小B同佢係好好朋友黎架, 難怪我每日喺屋企都聽到憬琳呢個名啦. 佢兩個全程手拖住手,有傾有講, 真係好可愛好可愛好可愛呢~ 班主任話佢哋兩個加另一個同學仔都係好好朋友, 3個小女孩日日傾唔停, 難怪人家經常話3個女人一個墟, 原來3個女孩都已經係一個墟喇, 哈哈~ (可惜另一個同學仔無報名去旅行, 爸爸媽媽見識唔到呢個墟了)
剛開始時見到呢個畫面, 感覺好得意.
佢哋究竟睇緊乜呢?
知唔係...3隻大懶豬囉. ^^
今次親子旅行, 小B已經有自己朋友, 所以全程都無乜點理爸爸媽媽, 其他老師見呢兩個小朋友全程手拖手, 有傾有講, 好似小情侶拍拖咁無視我哋存在都忍唔住問佢兩個, 批唔批准老師一齊加入佢哋嘅小小世界, 而佢兩個當然亦好大方咁拖住老師一齊行啦!!
既然媽媽無嘢做, 唯有亂影一通, 今個月教學主題係動物, 或許會有用得著嘅時候呢!! :p
行到咁上下, 終於都到自由活動時間啦, 原先打算跟小B四圍行下影下相, 但兩位可愛嘅小朋友又點會捨得分開丫, 所以最後我哋齊齊選擇咗去有冷氣嘅地方坐下休息下, 好快又到集合時間準備上車去食飯嚕.
上車前, 呢幾位N1小朋友齊齊玩踩樹葉...最後玩到要俾爸爸媽媽們趕上車.
今日旅行社安排咗我地去嘉年華海鮮酒家食午餐, 對於團餐來說我向來沒要求, 只要食飽就好了, 加上大家都玩到肚餓啦, 所以都好快可以清枱.
食飽飽, 我哋下一站就去大埔海濱公園啦, 等上車前, 捉幾位好朋友仔影張相先...
影完相, 佢哋突然自發圍圈唱歌... 就連班主任都話, 佢哋平時都好齊心架.
鏡頭一轉, 我哋已經去到大埔海濱公園了.
黎到大草地, 每個家庭都會獲派發一隻紙鳶, 不過我哋放咗好耐都放唔起... 最後爸爸忍唔住話下次放假要再帶倆姊妹黎放紙鳶囉, 果然夠毅力, 哈哈~
最後小朋友們就轉咗去另一邊玩Bubble...而我就係負責拎住Bubble嗰個, 至於爸爸就梗係仲睇緊人哋放紙鳶啦, 所以都無再影相Lu. 其實我哋喺公園逗留嘅時間只有1小時15分鐘, 好快我哋就要Say Goodbye回程啦.
哎呀...原來我哋今日無影全家福呀, 就連同小B嘅合照都無呢, 嗚嗚嗚嗚~~~
不過唔緊要啦, 見小B同同學仔相處得咁好, 仲一齊玩得咁開心都已經好值得喇, 攪到媽媽我真係越黎越唔捨得轉校囉. 小B你放心啦, 媽媽會嘗試幫你Keep住呢班朋友仔架. ^^
倆姊妹已經有Facebook Page Anke & Karena - 小b與妹妹b 有興趣的話就入黎Like一Like支持下啦!! ^^
