妹妹B ~ 11個月

12.1.2015

又要講一句...時光飛逝, 今日妹妹B已經11個月大啦, Yeah~

妹妹B: 等我伸脷扮下可愛先!!  ^^

體重 - 留待下月回健康院時才得知數字, 不過可能最近穿得太多, 所以感覺好像又重了.

高度 - 無量, 但已到家姐膊頭位置, 相信好快可以追過家姐.

食:
奶 ~ 2餐 (每餐6安) - 因午睡時間亂了, 所以少了一餐
固 ~ 2餐 (午餐及晚餐均食到一碗爛飯仔)

便便每日都有一至兩次, 偶然一整天無便便的話, 第二日就定必會爆屎.

食物方面已試過好多款, 無特別記低, 連雞蛋都已經試食了, 幸好暫時未見有出現食物過敏情況, 希望繼續唔好中招!!  不過第二個小朋友, 媽媽確實放鬆好多好多, 所以姨姨經常串媽媽"家姐就照書養, 妹妹就當豬養", 哈哈~

訓: 早上約8時多起床, 午睡時間因早前放聖誕假而被爸爸媽媽打亂了, 現在婆婆每天都在投訴中, 希望盡快可以回復正常, 否則就連午飯時間都要繼續推遲到差不多2, 3點才食, 不過幸好夜晚算正常, 大約10:30訓, 每天都是在床上食奶然後自行入睡.

活動能力:
- 由訓變坐, 由坐變企
- 向前向後向左向右周屋爬
- 已經可以自行四圍行了, 連去街都要扭落地行
- 間中識反轉身落sofa, 亦開始知道要反轉身才可從大人床落地.

指令:
拜拜, 拍手
開始教請請, 為新年逗利是作準備嘛

講:
Mum Mum (最叻問食時不停叫Mum Mum), 奶奶 (見到奶奶又會不停叫奶奶)
爸爸, 媽媽 (試過發音, 但無意識地叫, 最近好少聽到)

性格:
- 人少時, 勁需要人陪勁需要人抱, 絕對係痴身膏藥一名.
- 比較懶惰, 唔太肯自己拎野食, 之前有意識自己放星星餅入口, 但最近只肯要人餵, 若然硬是要把星星餅放在妹妹手上, 妹妹馬上就會發脾氣然後將星星餅丟掉, 下個月去健康院如要考食星星餅一定肥佬, 唉~
- 比較慢熱, 但又超級愛玩, 一熟絡後更加會主動撩人玩.

健康:
今個月總算過得去, 希望繼續健健康康, 無病無痛.

11個月大, 媽媽真的好希望妹妹B可以變得越黎越好湊, 唔好再做大喊包, 日日都笑口常開, 拜託拜託!!

倆姊妹已經有Facebook Page Anke & Karena - 小b與妹妹b 有興趣的話就入黎Like一Like支持下啦!!  ^^