妹妹B ~ 15個月

唔覺唔覺又一個月, 屋企有兩個小朋友, 時間真係過得特別快~~~

體重: 21磅 (上個月記錄, 今個月無磅)

食:
奶 ~ 2餐
早, 晚各180ml, 早上多數食剩, 因為妹妹掛住分享埋婆婆份早餐, 所以放棄奶奶.

下午就主要以麵包, 餅乾, 零食搭夠.

飯 ~ 2餐
繼續係午餐食得比較好, 晚餐同家姐一齊食反而食得好慢.
間中會食大人飯, 多數都係食飯仔, 不過妹妹似係比較鐘意食大人飯多.
蒸水蛋, 肉碎, 瓜, 菜全部都好鐘意, 最怕應該就係無得食...
最令人討厭嘅係唔等得, 佢一指住食邊樣就要即刻食到, 慢半秒放入佢口, 佢就會發脾氣扭計.
另外越黎越鐘意飲湯, 其實未夠5個月, 婆婆已經開始俾湯佢飲, 可惜當時妹妹唔太賞面, 每次飲兩啖就唔肯飲, 但到差不多一歲左右, 突然變成了湯精, 一見有湯飲就兩眼發光, 除咗花旗參唔飲之外, 其餘大多數湯都好肯飲, 讚!!

已經進展到幾乎完全跟大人食嘢, 當然太咸太味精都係唔俾啦, 雖然係就係快了點, 但確實方便好多好多.

便便每日都有一次, 而且激臭, 特別係呢個星期病要食藥, 完全係一陣酸臭味囉. ~.~"

訓:
早上約8:00起床, 午睡大約分別12:00及5:00 (最近有減少午睡迹象, 間中會改為一次午睡), 晚上10:30上床食奶訓覺, 有時晏少少約11點左右, 視孚媽媽我手腳快定慢喇, 因為要先趕家姐入房嘛.

活動能力:
活動能力大致正常, 可能有家姐喺度俾佢跟住, 所以學嘢好快, 見家姐原地跳, 妹妹好快又學識原地跳, 當然跳得唔高, 但家姐當年好似無咁快識跳.
已經學會上樓梯, 只要拖住佢手, 佢就可以自己一級一級行上樓梯.
唯一平衡力好像不是十分好, 經常跌倒, 當然有時係人為(俾家姐推撞)...

指令:
拜拜, 拍手, 請請, 飛吻, 鍚鍚等...
其實妹妹已經有9成聽得明大人講嘢, 叫佢做嘅事都幾乎可以全部做到.
例如:
- 丟垃圾識自己去打開垃圾桶.
- 叫洗手, 洗Pat Pat, 沖涼識自己行入廁所.
- 叫抹手識去攞抹手巾.
- 叫攞片片識自己行去放片位置.
- 識自己用紙巾抹咀.
等等等等...

講:
Mum Mum, 爸爸, 媽媽, 婆婆, 姐(家姐), 姨姨, 伯伯, 金金(金仔), 去街街, 揹揹, 碟碟(米奇DVD), 包包等...
另外單字會講食, 打, 係...之類.

表達方面,
妹妹算唔錯, 雖然未係好識講, 但從小到現在, 佢想做或佢要得到嘅佢都可以好明確表示出來.
另外, 擰頭點頭嘅意思都大致OK明白...
例如:
- 有時問佢仲食唔食, 佢會擰頭, 之後我再俾佢食, 佢真係唔再食架.

有次佢見家姐去廁所vee vee, 之後佢又摸住自己片片指住廁所, 我問佢係咪vee vee, 佢點頭, 結果我放佢上廁板vee vee, 點知妹妹又真係有得去啵.  不過只此一次半次, 玩嘢成份居多, 有時示意去廁所vee vee後, 點知坐極都無, 我再問佢有無vee vee, 佢就會擰頭, 然後要走.

(我唔信妹妹咁快Ready好戒片, 不過既竟佢示意去, 我哋都要同佢去, 否則遲些真係戒片時就麻煩.)

性格:
- 人少時, 需要人陪需要人抱, 算係痴身膏藥一名, 但近來終於有改善情況出現
- 好硬頸, 越阻止佢做嘅嘢佢就越要做
- 一唔鐘意就Lur地 (呢個行為好像有明顯改善, 媽媽已經無再見佢Lur地, 不過婆婆話下午時間經常會出現此情況)
- 愛模仿家姐

健康:
上星期家姐病倒了, 結果4日後妹妹亦照單全收, 究竟幾時先唔會再一齊病呀?!?!?!





倆姊妹已經有Facebook Page Anke & Karena - 小b與妹妹b之成長日誌 有興趣的話就入黎Like一Like支持下啦!!  ^^