5.1遊山頂

難得長假期爸爸有假放, 一家人當然要外出走走吸收一下新鮮空氣啦!!

姨公姨婆由美國遠道回來, 姨婆話想同小B上山頂行下, 嘩...乜咁浪漫呀, 所以即使明知5.1會迫爆山頂, 我哋一家都照樣奉陪到底.  無辦法啦, 姨公姨婆幾年先返香港一次, 就當陪下佢地嘛.

結果一行8人相約好12時多於纜車站會合, 點知去到附近就已經見到超長人龍啦, 經驗所得無個半鐘至兩個鐘, 應該都唔洗旨意搭到纜車上山頂, 最後我哋好明智地快速閃人離開纜車站, 然後轉往中環碼頭坐巴士.

由於媽媽無預計到上山頂需時, 所以忘了帶備麵包乾糧等食物, 結果妹妹有半程巴士都係扭肚餓, 真失禮.  最後一上到山頂, 當然要先搵間餐廳填飽兩位小姐個肚啦...

食飽飽後見整個山頂都佈滿人, 其實真係邊度都唔想再行落去, 但難得上到去, 見倆姊妹又大鄉里出巡咁勁爆興奮, 所以最後都喺山頂逗留至傍晚才離開.

今日小B學人化身做攝影大師, 四周圍影相, 點知最後竟然反被遊客影, 不過小B一於少理, 繼續你有你影佢, 佢有佢影你, 完全樂在其中, 哈哈~

攝於小B手中嘅媽媽與妹妹...

攝於小B手中嘅媽媽, 妹妹與爸爸...

初哥學攝影, 見樣之餘又無矇, 合格有餘, 絕對影得好過媽媽我啦~

四圍行了一會, 最終目的地係柯士甸山道公園, 務求要令倆姊妹放盡所有電, 去玩點少得去公園架...  :p

今次遊山頂, 我哋無去蠟像館, 無上觀景台, 更加無搭纜車, 只係簡簡單單四圍行下, 去公園放下電, 但就已經令到倆姊妹好開心好滿足喇, 所以話...假期真係要外出走走, 唔可以成日困喺屋企架.  (呢句說話我經常擺明講俾爸爸聽, 可惜佢每次都會扮聽唔到, 可惡!!) 





倆姊妹已經有Facebook Page Anke & Karena - 小b與妹妹b之成長日誌 有興趣的話就入黎Like一Like支持下啦!!  ^^