唉...我呢個媽媽真係懶, 原來一直以黎我都無特別去記低小B嘅成長, 直到近期想睇番先知原來我好久唔久先會記低一次半次, 相反妹妹就個個月都有記低囉, 但我絕對唔係大細超, 只係唔記得而已. :p
唔緊要啦, 繼續想寫就寫吧!!
見到佢呢個招牌唔見眼嘅笑容, 頓時被溶化了, 尤其係最愛佢嘅爸爸.
根據學校學生手冊記錄, 小B身高持續好幾個月仍然只有95cm, 體重14.5kg, 算是中等身材, 不肥不瘦不高不矮吧. 其實爸爸媽媽又唔係高, 小B唔矮已經要偷笑啦, 至於體重就更加唔洗點睇啦, 媽媽我食極唔長肉, 難道想小B可以變做肥妹仔咩.
食
少食多餐
小時候乜都食, 宜家大咗就開始會揀食, 當然食唔食都係好睇佢心情, 基本上除咗豆腐一定唔食之外, 樣樣都肯試.
最愛食魚, 菇類, 蔬菜, 水果, 三文魚刺身等, 其他肉類都會食, 但唔多. 零食方面越唔健康嘅越鐘意食, 吹漲!!
作息方面
午睡約兩小時
返學 - 12:30 ~ 14:30
放假 - 17:00 ~ 19:00 (視孚有無出街, 如果出街, 只靠搭車時小睡)
夜晚約10:30叫瞓覺, 通常11:00 - 11:15左右瞓著, 之前明明戒咗睡前奶, 但唔知幾時開始又再心癮起, 結果間中都會叫食奶架, 食奶與否視孚小B自己需要, 佢要食我會開, 佢唔叫食我唔會主動開.
其實自上N班後, 小B已經認識了好多好多新事物, 而且最叻就係跟媽媽鬥嘴, 所以都唔知點樣用文字去記低好了...
說話能力
除了發音帶點唔清晰之外, 基本上乜都識講, 而且仲好大人語氣, 超級勁老積.
例子一: 有時小B想食糖, 我會話聽日放工先買返屋企俾佢, 如是者, 第日放工小B就會馬上問我要糖, 然後當我唔記得買的話, 小B就會講: "小姐...你講大話啵, 又話放工買糖返黎俾我食, 咁不如宜家落街買啦"
例子二: 有時喺街(唔係喺馬路, 但絕對安全情況下), 我會鬆開小B手一會, 從手袋中拿紙巾或電話等之類物件時, 小B馬上又會拉住我講: 快D拖住我啦, 條街好多車好多人架, 一陣唔見咗咁點算呀, 咁樣會唔見咗爸爸個囡架.
係咪聽到O晒嘴呢, 真的一點都不像3歲小孩會說的話, 但又確係好好笑!!
有時如果小B唔乖, 我會鬧佢, 甚至會話你再係咁, 我就唔同你去街, 點知呢個人仔好快就會回我一句, 你先唔乖, 我叫邊個邊個唔好同你去街... 呢刻我真係無言, 點解我個囡3歲人仔就已經會開始同我鬥嘴架?! Help~~~~~~~~
見到佢個樣就覺得好鬼招積...
活動能力
大小肌肉方面都算發展良好, 跑跑跳跳絕對無問題.
另外學校又會配合利用蒙特梭利教具, 訓練佢哋大小肌肉, 所以呢方面都唔需要擔心.
如有特別, 老師會開聲叫家長跟進.
成隻馬騮咁款無時停...
自理能力
讀全日制學校嘅好處, 就係樣樣都要親力親為, 著鞋著襪扣鈕去廁所除鞋除襪除褲全部可以自己處理, 不過喺屋企就未必時時都肯自己做, 因為見妹妹有人幫嘛, 結果佢又唔抵得要人幫囉, 老師話因為佢都仲會呷醋, 所以大人間中就要配合下.
都係嗰句啦, 未學識時就爭住做, 到學識咗就點都唔肯做, 玩嘢~
性格
愛發脾氣, 硬頸, 易炆, 易喊, 愛大笑, 勁嗲爸爸...
知道自己係家姐, 間中會識保護妹妹, 唔爭玩具唔打交時, 小B可以表現得好鍚妹妹架.
大個女, 越黎越大膽, 連早幾個月好驚嘅馬馬都終於敢騎.
其實小B唔算太Trouble, 但硬頸性格好容易令身邊人火起, 有時我自己會諗, 其實呢樣佢都係學足我, 我又可以怪邊個呢, 唉... 相比起其他小朋友, 小B一定唔算好乖, 但爸爸就話跟佢自己小時候比較, 小B已經算係好乖巧啵. ~.~"
唯一不得不認嘅就係, 小B出街真係好少扭計, 同喺屋企簡直係判若兩人, 所以朋友們往往總係覺得小B好乖囉, 其實小B先係一個真正騙子啊.
倆姊妹已經有Facebook Page Anke & Karena -
小b與妹妹b之成長日誌 有興趣的話就入黎Like一Like支持下啦!! ^^
