小B遊澳門 - Day 1

今次是小B首次離港, 所以媽媽我好緊張呀...又怕小B會扭計, 又怕自己會幫小B帶漏什麼東東等, 幸好兩日一夜的澳門遊順利完成. 

一早7:00, 小B竟然自動自覺起床, 平日起碼睡至九時多的小B, 好像知道自己要去玩似的, 一早就起床.  但爸爸媽媽都好累呢, 點解你要那麼早就把我們吵醒?!  算...既然醒了, 就早點出門食早餐, 但一出門不久, 剛上火車那刻, 小B竟然又睡著了, 你...你...你真攪笑!! 

結果我們10:30已經到達信德中心啦, 於茶餐廳食住早餐等其他團友, 要有愉快的一天, 當然要先食過豐富早餐啦, 哈哈~

好快, 婆婆, 姨姨, 馬仔哥哥和舅父都到齊了, 至於小睡中的小B亦已經醒過來.

Yeah...準備入閘登船, 唔講唔知, 原來一歲以上已經要買船票, 我們當然無預先購買啦, 因為無人通知嘛. 

嘩...小B的來回船票要$290, 好貴呀~

今次係我第一次去澳門要拖行李箱, 平時兩袖清風拍拍籮柚就可以過大海, 今次帶住小B, 結果變得好大陣仗, 以防萬一帶多好過帶小, 哈哈.

船程一小時, 小B算是合作, 沒有太扭計, 只是有點不耐煩, 幸好當她感到不耐煩的時候, 我們已經悄悄到達澳門啦.  一落船...小B變得好興奮, 始終新環境新事物嘛,  最後快快過關, 到酒店Check In放低行李箱...

今次我們住的是Sheraton, 酒店於去年中才開業, 好新呀~

從房間望出去, 嘩...泳池呀, 小B見到好開心呢!!

快快迫小B食支奶奶, 我們就出發去搵食啦...  小B我知你好興奮, 但你要快快食完奶奶, 先可以去街街架.

一起行...小B好快又睡著了, 不過算啦, 媽媽知你今日早起, 又舟車勞頓, 你就即管訓啦.

首先我們到官也街一帶搵食, 原本打算買沛記出名的Cupcake給小B做Tea, 可惜星期日休息.

最後到了新好利食豬扒飽和燕窩蛋撻, 早前小儀都有介紹過, 但我們一行人等都只認為麻麻, 沒什麼特別好推介. 

食飽飽, 到附近晃記, 鉅記買手信時, 剛好小B就醒來了, 在無選擇的情況下, 我們於鉅記拿了些試食品給她做小食, 幸好小B對那些蛋卷, 加蛋餅之類都尚算滿意, 哈哈.

再行了不久, 我們又去了沙度娜食木糠布甸, 小B食到變了污嘴狗, 還食到停唔到口, 幸好那杯木糠布甸不算甜. 

食過下午茶, 買好手信, 又食過甜品, 時間仍尚早, 那我們就到了附近龍環葡韻住宅式博物館逛逛, 跟小B拍拍照.  (不過這兩天所拍得的相片都在馬仔哥哥的大相機中, 不知要等到何時才可拿回啦, 唔得...要快快叫姨姨催催他先, )

逛到差不多時候, 我們又出發到下一站, 位於媽閣的Pizzeria Toscana食晚餐, 這間意大利菜西餐廳地方較偏, 要不是姨姨去過, 我們一定好難找到那間餐廳. 

這頓晚餐真的好好味, 姨姨絕對無介紹錯, 圖中的菠菜飯是特地為小B而Order, 好彩小B肚餓, 加上又未到揀任擇食的時期, 所以她都好像蠻滿意般給我吃了兩碗仔, 叻叻~ 

食完晚飯, 回到金沙城中心逛了逛, 就回房間休息啦, 是晚小B於酒店房超High, 玩到12時多要關掉所有燈才肯乖乖去睡. 



第二天...待續!!