熱辣辣之玩水日

夏天都已經快過了一半, 剛過去嘅星期日終於都氹得惦爸爸帶倆姊妹去玩水啦, 唔知點解爸爸就係唔太鐘意去游水, 但我一拖二又好似太危險, 所以最後唯有出絕招, 哈哈!!

一早起身, 倆姊妹知道今日會去游水, 開心到不得了...

今次近近地去附近泳池, 下次先再出絕招叫爸爸帶我哋去沙灘玩~

公眾泳池唔俾影相, 唯有喺更衣室影兩張泳衣照就算~

兩個小可愛影相時越黎越古靈精怪, 媽媽實在忍唔住又要讚一讚倆姊妹好可愛.  :p

今日真係好熱呀, 室外泳池嘅水都變成熱水呢, 而且好曬好曬好鬼曬, 如果唔係去游水, 呢D天氣我同小B都一定會選擇留喺屋企嘆冷氣!!

(話說呢排天氣好熱, 太陽伯伯猛烈得好恐怖, 就連我家小B都會話, 咁熱咁曬點出街喎, 哈哈~)

如果每星期爸爸都肯陪我哋去玩水就好了...





我們的Facebook專頁 - 小b與妹妹b之成長日誌

暑假篇之與好朋友約會

暑假放咗兩星期, 媽媽終於有時間幫小B約好朋友見面啦, 無見短短兩星期, 呢兩個小可愛就已經成日話好掛住對方, 究竟係咪真係咁掛住架?!  不過佢兩個嘅友誼真係唔可以睇少, 就連班主任, 其他家長, 以及校外興趣班老師都睇得出佢地真係勁老友, 希望這份單純天真嘅友誼可以一直維持落去啦~

兩星期無見襯今個星期六有時間, 快快約出黎短聚一下...  不過因為要配合返小B學琴嘅關係, 所以只好約喺平時大家嘅午睡時間出黎聚聚, 結果當然係大家都有鬧情緒嘅時間出現啦, 但好彩都只在於大家未見到面前一刻發生, 而當大家一見面後就將扭眼瞓, 攰通通都忘記得一乾二淨, 勁呀.

既然未見到面時兩個小朋友都叫攰叫眼瞓, 咁不如先搵個地方Tea一Tea...

有Cake食, 貪食嘅小朋友就最開心~

妹妹都唔執輸已經食緊添啦, 哈哈~

食完就去影Tsum Tsum...

不過佢哋又點會咁順攤呀, 影咗幾張相就掛住玩唔肯影...好彩都總算有張全家福.

既然唔影相就順小朋友意思周圍閒逛一下吧...

嘩...附近嘅Tsum Tsum精品真係好靚呀, 媽媽勁想買晒返屋企囉, 不過最後都好理智咁忍手無買到, 因為唔係必須品嘛, 而且買咗返屋企後仲要搵位放又係麻煩.  :p

至於小朋友想要嘅就梗係要買啦, 所以爸爸一人買咗一架Tomica車仔俾三位小可愛, 最終仲順利取得小可愛們香吻幾個, 哈哈!!

之後因為小B今日學琴時俾老師大讚, 為咗鼓勵小B下次一樣要繼續努力, 所以就帶佢去反斗城探玩具...

順便揀咗份小小禮物以作獎勵...

話明係小禮物, 當然唔係呢d咁大件嘅玩具啦!!

我哋只係買咗兩盒小併圖, 順便當作訓練小B專注力咋, 咔咔~

開心嘅時間總係過得特別快, 咁又短聚咗三小時啦, 喺時候要講Bye Bye嚕!!





我們的Facebook專頁 - 小b與妹妹b之成長日誌

興趣班之趣味英文&輕黏土工作坊

等了又等...等了又等, 終於都等到中心Post新相啦, 雖然大部份相都係鬆郁矇, 不過能夠睇得番小B上堂時嘅相都已經好好了~

其實我一直都無留意原來我揀嘅興趣班當中係有一節教英文生字架, 等我仲以為係純玩添.  :p

不過都好...當學多少少囉.

 認真Mode嘅小B最可愛~

 

咩事咁肉緊呀?!

原來大家都整咗隻靚靚Minions  ^^

雖然唔知有幾多成係出自小B手自己做, 不過呢隻Minions真係整得好似. 

莫非小B都有丁點美術天份...哈哈哈!!

媽媽又要頭痕騰空個地方出黎儲起小B嘅作品啦~





我們的Facebook專頁 - 小b與妹妹b之成長日誌

興趣班之天才小廚師&小小科學家

雖然媽媽要返工未能親自帶小B去上興趣班, 亦因為只係興趣班嘅關係, 媽媽唔會打去中心問導師上堂情況, 不過中心真係好好呢...為咗滿足家長們嘅慾望, 佢哋係會將每日每班嘅上堂花絮逐一在Fb發佈, 所以呢...媽媽就更加放心囉, 哈哈!!

第一堂...齊齊亞戊整餅.

每個小朋友都有份落手參與, 難怪小B話好玩...

(媽媽常常在幻想, 假期時可以喺屋企進行這類親子活動就好了, 只可惜媽媽唔識整野食 :p)

 看來大家都真的好開心呢...

一人一件製成品...  (媽媽偷吃了一小啖, 味道確實很不錯)

 然後上小小科學家...

雖然唔知小B玩緊乜, 不過能夠不畏懼地跟著外藉老師指示做, 媽媽已經好開心了.

偷望隔離, 應該係對於手上嘅英文工作紙唔知亦唔明要做乜, 哈哈!!

我們的Facebook專頁 - 小b與妹妹b之成長日誌

跟媽媽朋友開心聚會

媽媽嘅一班中學同學自小B跟妹妹出世後, 久不久都會相約一起來我家跟倆姊妹玩, 幾個月無見友人們又好掛住倆姊妹嚕!!

以前小B見到哥哥姐姐們總係需要一段時間warm up才能夠跟大家玩作一團, 不過宜家大個咗已經唔再需要warm up啦, 相反妹妹就要喇. 

小B成晚仲不停主動撩人玩...

今晚最輕鬆嘅就當然係爸爸媽媽啦, 所以媽媽強烈要求大家有時間的話真係要多D黎同倆姊妹放電, 哈哈~

倆姊妹咁鍾意食蛋糕, 所以契媽又買咗蛋糕上黎.

唔知仲以為佢兩個又生日添啵...  (真心覺得倆姊妹好可愛 ^^)

其實係倆姊妹身後嘅我哋生日先岩, 唔係講笑, 我哋4個生日真係好近, 所以就順便一齊切個蛋糕開心慶祝~

暑假啦暑假啦, 要繼續趕緊約朋友玩啊!!





我們的Facebook專頁 - 小b與妹妹b之成長日誌

暑期興趣班

隨著暑假到來, 亦即代表暑期興趣班正式開始嚕~

愛美媽媽話明唔要做怪獸家長, 所以喺搵興趣班嘅時候都主要偏向玩方面多一點...

既然係暑期班, 即係又要麻煩婆婆管接管送啦, 為免大人小朋友都辛苦, 所以只搵婆婆附近嘅教育中心.  其實當小B一歲左右時我就已經睇中婆婆附近嘅一間教育中心啦, 因為佢推廣好多兩文三語嘅課程嘛.

雖然話係興趣班, 但我都希望喺玩嘅同時小B可以有得著, 所以今年就幫小B試報咗一星期兩日嘅英語興趣班喇, 雖然話無學術成份, 但係喺玩嘅過程中可以提升英語能力, 真係好合媽媽我心意呢, 哈哈!!  至於普通話嘅興趣班今年我無揀啊, 因為普通話比英文容易學, 而且學校亦有教, 所以我都係想主力訓練一下小B嘅英語能力先.

我揀咗星期二, 三嘅上午課堂, 每堂分兩部份, 一部份用英語教授, 另一部份則用廣東話教授, 等小B唔洗一整堂都唔知老師講乜.  :p

今日一開始放暑假就上我哋第一堂嘅興趣班啦, 雖然我唔知小B上Little Scientist時明唔明老師講乜東東, 但唔講大家應該唔知其實小B對於科學嘅野都幾有興趣架, 至於上天才小廚師用廣東話教就一定明啦, 婆婆仲話今日整咗個蛋糕仔返屋企添啵.

Lunch打電話返屋企問小B, 小B話上堂好開心好好玩...

似乎我揀岩咗暑期班俾小B呢, 哈哈~





我們的Facebook專頁 - 小b與妹妹b之成長日誌

K1下學期家長日

11.07.2016

10個月嘅K1生涯眨下眼就完結, 今日又係派成績表嘅時間啦, 今次因媽媽剛返新工只有半個月實在唔太方便請假關係, 所以家長日嘅重任就交由爸爸負責...

由於今早落雨, 所以爸爸未有帶同小B一起回校, 但出奇地竟然有同學仔認得小B爸啵, 明明小B爸一向都好少出現, 點解...同學仔及同學仔媽咪都會認得小B爸呢?!  唔通...小B同爸爸真係餅印到咁容易認得出嗎?!

對於小B下學期嘅表現, 爸爸話尚算滿意 (其實爸爸對小朋友要求唔高, 只要無被老師投訴已經可以順利過關, 皆因爸爸話小時候自己實在太曳太頑皮, 所以對自己小朋友要求都唔會定得太高 ~.~"), 我就話爸爸對住兩個女簡直就係慈父上身, 直情係"順得人"啦.

雖然老師對小B評價唔算差, 但都有話小B係一個比較心散嘅小朋友, 所以喺專注力方面真係尚有待改進呢, 當然專注力唔夠一直都係小B最大嘅問題, 但比起N班時已經算係有進步嘛, 唯有再慢慢幫小B改進, 希望下年老師會讚小B已經有改善啦.  不過慶幸老師話雖然小B較心散, 但學習方面就絕對無問題, 可能呢個就係大B嘅優勢, 因為之前老師都有講過始終小B喺班上係大B, 所以相對學習能力都算好. 

今次評估跟上次一樣, 做卷時都係有出錯, 但錯一個半個, 媽媽覺得可以接受, 其實我同小B爸都唔係讀書叻嘅人, 所以我哋都唔會要求兩個女一定要做到100分, 只要唔太離譜, 媽媽絕對係接受嘅, 況且一個半個交叉又唔代表小B真係唔識, 加上我唔想同人比較, 只要小B有盡力做, 爸爸媽媽又覺得滿意就已經足夠, 同人比較只會辛苦自己呢. 
(當我睇完贏在起跑線後, 我就同自己講, 我一定唔可以變做怪獸家長)

老師對小B嘅評語...

活潑好動, 具自信心 - 真係完全講中小B性格囉

學習有進步 - 這一點媽媽都認同架, 因為連媽媽都覺得下學期嘅小B比上學期時有進步嘛.

另外...今日除咗派成績之外, 仲派咗兩個獎~

第一個係早前畢業禮頒發嘅服務獎...

第二個係去年中秋節時參加嘅親子吊飾比賽 - 季軍... 

(真心覺得好意外, 下年爸爸媽媽會繼續努力, 哈哈  ^^)

中秋節親子吊飾 Blog文

另有一堆獎狀...

今年嘅K1生活小B過得相當愉快, 希望明年升上K2後一樣繼續愉快, 媽媽同小B都唔好因為學習及功課而令大家有壓力啦!! 





我們的Facebook專頁 - 小b與妹妹b之成長日誌

相親相愛

雖然自妹妹同家姐開始有互動後, 家裡不時都會傳出吵架聲~

之但係...好彩有一半時間或以上倆姊妹都尚算相處融洽.

其實小朋友年紀尚少, 有吵架有爭執實屬正常事, 所以只要唔過份, 我都好少會插手處理.

(大家可能會奇怪, 妹妹才兩歲多又點會爭執呀?!  咁你哋就錯啦, 妹妹講嘢真係好叻好叻, 聽佢講嘢絕對唔似一個未讀書嘅大BB, 我只可以講假如有其他小朋友蝦佢哋, 只要佢兩個夾埋一齊, 嗌交一定唔會輸.)

媽媽最鐘意見到嘅畫面...

其實做媽媽嘅都莫過於係想見到仔女相親相愛, 和平共處者!!





我們的Facebook專頁 - 小b與妹妹b之成長日誌

求其自家影

相信大家都應該有留意到...我哋一直都好少Post妹妹相吧.

其實唔係我唔想Post, 只係妹妹一直唔太鐘意影相, 所以就好少幫妹妹影相囉.

將來大咗, 唔知妹妹會唔會怪我哋無同佢留倩影呢?! 

係直至最近期, 妹妹先開始對鏡頭有少少敏感, 見到相機會自動自覺擺Pose, 不過咁樣唔等於妹妹愛上影相啊, 因為妹妹係無耐性嘅, 只要知我哋影多兩張就會避走鏡頭, 總之就好難攪啦.

今次當要準備幫妹妹自家影學生相一刻, 我已經知道會好有難度, 結果....

早上影+晚上影, 前前後後大約影了半小時有多, 大概應該都接近影咗50-60張相吧, 而妹妹就不停問得未得未, 所以最終我好快就宣佈放棄!!  :p

基本上...上圖早上影的, 全部都有光暗問題, 幸好晚上爸爸影時還算可以接受, 總之我就唔浪費咁多時間啦...

至於爸爸就更加Hae話求求其其揀張正正常常交回學校就算, 哈哈~

其實點樣先可以令妹妹愛上影相呢?!





我們的Facebook專頁 - 小b與妹妹b之成長日誌

K1 - 畢業典禮 の 領獎生

K1生涯已經去到尾聲...今年小B有幸分得豬肉獎一個, 所以於剛過去嘅7.1假期就要出席學校舉辦嘅畢業典禮喇.

雖然小B只係陪襯, 不過因為學校非常隆重其事畢業典禮嘅舉行, 所以事前一日已經用了數小時將兩間學校嘅學生安排一齊去綵排, 然後到畢業典禮嘅當日所有結業生及領獎生又要提早兩小時到達場館準備, 但當我準時帶小B去到伊館一刻, 真心覺得場面相當混亂呢, 大概係太多家長都唔聽指示先行離開, 將伊館大堂塞得滿滿, 雖然畢業典禮不設劃位大家也好擔心未能找得最佳位置, 但其實未夠鐘硬是要把大堂塞滿也未必能找到最佳位置吧, 結果我只係將小B交俾在場老師都用上好一段時間才完成, 真係辛苦過去搶奶粉呀.

好不容易終於都可以進入場館啦, 可能因為唔係小B畢業, 所以媽媽我未見有太大感覺 (我以為).

小B被安排坐在台前附近位置...如果唔係有同學仔媽媽做家長義工報料, 我哋應該未必搵到小B.

畢業典禮終於都開始啦, 不過個人認為校監同嘉賓嘅致詞實在太長, 結果有部份項目竟然臨時被抽起, 而因為太長篇嘅演講, 亦令整個典禮Overrun.  當一開始全體起立唱校歌一刻, 唔知點解媽媽我竟突然眼濕濕, 看來到小B K3畢業時, 我一定喊到變豬頭都似, 咔咔.

但又好彩今次有份出席畢業典禮啵, 等我知道原來我哋學校同新油天真係有少少關係架, 只不過有關係都未必一定會入到新油天咁解囉, 因為每年我哋奧運校都只係得百分之十嘅學生可以成功入讀新油天, 唉~

距離升小學還有兩年, 都係講番今次畢業典禮好了...  :p

好快...所有結業生, 領獎生都被安排到台上領取畢業証書及獎項, 今次好明顯小B所分到嘅係一個豬肉獎, 因為原來每班都佔咗一半學生有獎攞, 擺明就係開開心心分豬肉啦, 哈哈~

眾裡尋她...大家搵到小B嘛?!

俾多個近鏡大家啦!!  (成班K1仔  ^^)

今日主要目的就係黎睇小B領獎, 不過一迅間就完成咗呢個過程, 好彩最後仲有其他小朋友精彩嘅表演, 就連我家妹妹都睇到眼定定話好睇呢...

小朋友辛苦用兩個月時間綵排, 我哋做觀眾嘅當然要落力拍掌以示鼓勵嘛.

希望兩年後嘅畢業禮, 我唔會喊到變豬頭啦!!





我們的Facebook專頁 - 小b與妹妹b之成長日誌