Blog Blog Kids Gathering @ Mikiki Play House

09.07.2017

嘩...原來我好耐無寫Blog啦, 有無人掛住小B同妹妹先?!  :p

話說今日, 我哋一班Blog Blog Kids又再聚頭, 咁就當然要出Post記低佢啦.  今次都係要多謝小檬媽安排, 我哋呢班Blog Blog Kids先可以玩得咁開心, Blog Blog媽傾得咁盡興咋~

兩姊妹知道今日去Play House玩就梗係未出發先興奮嘛, 兩隻小豬未夠8點已經起身問我幾時出發...

一上巴士就更加係不停問住幾時先到... 

(其實你哋洗唔洗咁心急呀!!)

去Mikiki真係非常快同非常方便, 一架巴士點對點就到, 下次可以考慮再約朋友去玩喎.  ^^

到啦到啦, 兩隻小豬有得玩就完全唔洗理媽媽~

就係咁...媽媽今日可以安安樂樂咁傾計. 

仲記得之前幾次出黎玩, 我都要抱住妹妹, 又要陪住妹妹玩, 總之就總有一個囡全程係我左近啦.  宜家佢哋大咗, 可以自己玩, 家姐又會幫手照顧妹妹, 所以媽媽我終於都覺得帶兩姊妹去玩係件輕鬆事啦, 哈哈!!

由於今次我完全無理兩個囡, 所以無乜點影相呀, 好彩其他媽媽都有幫手影到兩姊妹, 媽媽睇相見到佢哋玩得好開心呢.

另外要讚一讚家姐, 因為大家都話見到家姐好照顧妹妹, 就算家姐要同大爺玩, 都係拖住妹妹咁追住大爺架, 哈哈!!  家姐確係好乖女又抵讚...

藍色嘅波波池, 媽媽我勁鐘意呀~

 

好明顯...兩姊妹係阻住大爺射波波啦.  :p

 

呢條橋媽媽行過好幾次, 但行到媽媽嘩嘩聲, 因為佢會郁架....  但係我兩個囡好似唔驚仲行得好快添啵, 勁~

妹妹真係大個女啦, 佢竟然唔怕羞坐小檬媽大脾?!  好感動呀...因為妹妹一向都好慢熱, 今次竟然唔喺媽媽視線範圍之下都肯跟小檬媽, 果然返學後係叻女咗.

今日Play House安排咗小食俾大家, 因為今日Party太早嘅關係, 其實我哋都無食早餐架, 所以我哋3母女都覺得D小食幾好味...唔知大家又點睇呢?!

多謝Litte K送公主戒子俾兩姊妹, 兩姊妹都話好好好鐘意呀, 因為佢兩個係公主迷囉~

雖然呢個場地方唔算好大, 但有人數限制, 所以都唔會話太迫太多人.  而衛生方面就更加要讚, 因為一入到去, 感覺已經覺得好乾淨, 另外我亦見到清潔姐姐會四圍清潔, 就算有人玩緊波波池, 清潔姐姐都會繼續消毒地方, 呢方面真係要讚架, 始終波波池太多小朋友玩, 所以衛生真係好緊要.

玩到尾聲, 最後就梗係要影番張大合照留念啦~

每次同你哋玩都玩得好開心, 期待下一次嘅聚會呢!!





我們的Facebook專頁 - 小b與妹妹b之成長日誌

育兒血淚史の如何處理壞情緒?!

假如3歲定80, 那麼妹妹長大後的性格一定好不令人討好, 皆因我家妹妹絕對有齊港女特質.

臭脾氣...硬頸...野蠻...不講理...基本上港女有嘅特質妹妹都有.

所以要同妹妹好好相處絕非係一件易事啊!!

之前覺得妹妹年紀尚少, 所以大部份時間我哋都會盡量遷就, 盡量忍讓, 但隨住妹妹開始長大, 我覺得有需要開始調較而並非事事遷就, 因此對住家中這位小惡霸, 我開始採用了強硬嘅態度, 不過原來硬碰硬只會令事情變得更糟糕, 更可怕, 大家嘅壞情緒只會一發不可收拾, 直至大家不歡而散.

經過幾天火星撞地球式嘅生活, 我知道我用強硬嘅態度去處理有情緒嘅妹妹, 大家只會變得唔開心, 傷感情.  但當我想以柔制剛咩, 妹妹就只會變本加厲, 所以面對住妹妹, 我不得不扯白旗投降. 

當然口講投降, 實際係要好好反思點去處理啦.  有時我會諗, 點解一張從白紙開始嘅小朋友, 喺管教上可以令人感到咁沮喪?!  究竟佢嘅態度, 佢嘅脾氣係點樣形成嘅呢?!  莫非係喺不知不覺間學咗我哋?!  但發脾氣時走入房呯門又係乜野玩法呢?!  我可以好肯定我哋無人有咁樣做過.  其實呢件事可以反應出如果我唔去糾正, 唔去處理, 再過10年8年後當妹妹發脾氣時呯門可能已經唔再係房門而係呯大門, 所以呢個問題真係刻不容緩.

媽媽自知EQ低, 希望從今日開始, 我會做到學習忍耐, 學習接受, 唔再跟妹妹硬碰硬, 盡量多解釋, 多講道理, 令妹妹明白媽媽只係想佢好, 從而慢慢令妹妹學會抒發自己嘅情緒, 唔好一哭二鬧三上吊.

當然撇除以上種種, 其實妹妹都係一個好SWEET好識氹人好可愛嘅小女孩黎, 所以對住佢我真係有愛有恨架.

P.S: 話說尋日佢激到我好嬲, 然後我使計激番佢, 最後我見到妹妹激到扎扎跳嘅樣真係覺得好好笑, 不過我唔希望我哋之間成日咁樣激黎激去, 所以媽媽會努力, 希望妹妹都要加油呢.

如果大家有更多情緒管理嘅資訊不妨介紹俾我...Thanks!!





我們的Facebook專頁 - 小b與妹妹b之成長日誌

學校親子旅行 - 馬灣公園, 科學園 & 大尾督

24.03.2017

今次係妹妹第一次參加學校旅行, 妹妹當然好期待啦, 11月秋季旅行時遇著爸爸媽媽有事未能參與, 所以媽媽話過今次春季旅行一定要同妹妹參加.

一大早準時返到學校集合, 小朋友們在等齊同學仔之際, 跟老師一起唱歌傾計, 爸爸媽媽們就好似睇小動物咁不停舉機影相, 場面好好笑.

好啦...我哋1號車齊人可以出發啦, 轉眼間仲已經到咗馬灣公園添啵.

 上鳥望台睇風景...

明明馬灣公園影相好靚, 可惜妹妹就係唔肯影相.  ~.~"

行完馬灣公園, 我哋就出發去科學園食午飯, 不過將近落車時妹妹就瞓著左, 同學仔媽媽仲擔心妹妹會瞓好耐無飯食, 點知...呢個時候妹妹話咁快就醒左Lu.  

食完飯有時間就梗係要四周圍行下啦...  (唔講唔知其實媽媽未黎過科學園架, 哈哈!!)

未夠鐘上車去下一個景點, 個個小朋友都在跑跑跳跳...

妹妹實在太可愛啦..啦..啦~

然後...轉眼間, 我哋就去到行程最後一站 - 大尾督!!

今日天氣唔錯, 去呢D郊區地方真係好舒服...雖然全日嘅行程坐車時間比較多, 而且唔係太多野玩, 但能夠有多一日嘅親子活動時間, 相信爸爸媽媽同小朋友都一樣好開心好滿足.

P.S: 雖然我唔知其他人會唔會同我有一樣想法, 但至少我好Enjoy囉...  ^^

我們的Facebook專頁 - 小b與妹妹b之成長日誌

《焗》牛角包

星期日嘅早上, 突然心血來潮想整野食, 但屋企嘅糧餉倉存實在有限, 最後只可以用上次剩餘嘅急凍酥皮做牛角包.

其實個牛角包食譜已經係簡易篇黎, 係之前燒腩媽SEND俾我嘅...所以若然咁簡單都失手的話, 我應該真係唔可以再作第三度嘗試.

雖然係就係好簡單, 而我亦都算係成功, 但原來用急凍酥皮做牛角包, 口感唔算好好.  不過我明白嘅, 因為就算自己去餐廳食, 都唔係每次都食到好食鬆軟嘅牛角包嘛, 更何況我只係用急凍酥皮做呢.  至於味道個人認為還算過得去, 起碼婆婆都肯嘗面丫, 哈哈~

新鮮出爐熱辣辣嘅牛角包...爸爸話個賣相似牛屎包喎.  -.-"

雖然我仲未做得出好好食嘅美食俾屋企人, 但我仍然會繼續嘗試架.





我們的Facebook專頁 - 小b與妹妹b之成長日誌

妹妹驗眼@兒童護眼中心

09.03.2017

自從一年前得知小B有遺傳散光後, 宜家每半年我哋就要去驗眼一次, 幸好今次再去驗眼, 小B嘅散光度數暫未有改變, 而遠視度數亦未見再減淺, 小B方面暫時總算可以鬆一口氣. 

既然爸爸有家族遺傳散光, 家姐亦遺傳了爸爸, 相信妹妹都應該唔會走得甩, 於是媽媽就決定唔等4歲, 提早帶妹妹去驗眼.  其實妹妹才剛滿3歲, 未識認英文字及數字, 我都擔心會驗唔到架, 不過視光師話無問題, 咁就儘管一試啦. 

到達驗眼中心前, 妹妹剛在地鐵上睡著, 當時我已經覺得妹妹今日好大機會驗唔到眼了, 因為妹妹扭眼訓絕對唔係人咁品, 而去到驗眼中心後, 家姐去了驗眼妹妹才被婆婆叫醒, 妹妹見証唔到家姐驗眼一刻, 突然叫醒妹妹後就叫妹妹去驗眼, 妹妹又點會咁易肯就範喎, 不過...驗眼中心嘅職員都好好, 又好有耐性, 好快就成功氹到妹妹去用機驗眼喇. 

初步用機驗眼得出結果係...有散光呀.  >.<

雖然妹妹未能認出26個英文字母, 但妹妹識分辨形狀嘛, 所以今次視光師幫妹妹驗眼就用形狀去代替英文字母.  同妹妹聽下歌, 傾下計, 妹妹好似玩得都幾開心, 所以到滴藥水放大瞳孔檢查都相當順利.

最後結果...一隻眼125度, 一隻眼250度. 

雖然妹妹要帶眼鏡都已經係預料中事, 但到妹妹被確定有散光一刻, 媽媽真係有少少唔開心架.  而視光師就話妹妹仲係細, 可以再俾半年時間觀察, 不過如果可以當然儘早開始帶眼鏡比較好啦, 始終妹妹左右眼度數唔同, 拖得越耐只怕妹妹會習慣性用視力較好嘅一隻眼, 到時就有可能要做遮眼訓練.

既然係咁, 我哋都唔想再拖, 唯有快快帶妹妹去配眼鏡, 加入4眼妹行列.

好彩帶上眼鏡後嘅妹妹都仍然好可愛, 哈哈~

希望妹妹真係肯帶, 唔好再加深度數啦!!





我們的Facebook專頁 - 小b與妹妹b之成長日誌

《焗》蝴蝶酥

愛美一向唔入廚, 因為自覺無興趣加上零天份, 為免食痾自己又食壞人, 所以盡量都係唔好攪咁多嘢比較安全.  ^o^

不過前陣子愛美突然唔知痴咗邊條筋, 買咗個焗爐返屋企之餘仲不停上網睇食譜, 睇YOUTUBE片, 漸漸地對煮食嘅興趣都開始浮現緊出黎.

然後...有一日, 我竟然走去買材料整蝴蝶酥, 始終買咗個焗爐返屋企都要用下先得嘛, 而且向難度較低嘅食物入手, 總好過一開爐就選擇永久放棄來得化算.

好...非常簡單地將酥皮沾滿砂糖, 再摺摺摺, 焗得.

(真係容易到無朋友, 連小B都識做架) 

入焗爐後好快就開始發大, 仲傳出陣陣香味.

  Yeah...20分鐘後就大功告成!!

連我家兩姊妹都非常俾面大讚好味呀, 哈哈~

下次開爐又焗D乜嘢零失敗機會嘅簡單食物好呢?!





我們的Facebook專頁 - 小b與妹妹b之成長日誌

妹妹三歲生日趴地 @ 212 Party

由妹妹出世開始, 我跟幾位212媽媽漸漸成為好友, 今年3歲生日, 我哋幾位212 Buddies當然要一齊慶祝啦...

人少少開生日Party, 感覺比之前一大班人一齊玩得較輕鬆, 自在.

今日真係麻煩晒有份出力嘅媽媽啊 (至於我就當然係每次都只係帶個人出現啦).  :p

今次開Party嘅場地真係要讚, 收費平之餘, 仲好岩大人小朋友玩, 但地點就有少少唔方便囉, 不過如果揸車去嘅就無呢個問題喇, 至於我...單拖就梗係搭的士嘛, 哈哈~

妹妹返學之後, 出街玩嘅表現越黎越好, 宜家妹妹已經唔會太痴身, 每次只需花少少時間熱身就可以玩得好投入, 所以話讀N班學獨立真係好重要架, 特別係對付妹妹呢D較痴身嘅小朋友.

原本今日嘅Party係10點開始, 但太早啦...結果我就梗係遲到啦, 得番3個鐘玩, 妹妹竟然玩到唔願走, 仲話下次一定要帶埋家姐一齊黎玩添啵.

好...廢話少講, 去相啦!!

妹妹今日真係玩得好開心呀....

 仲肯同其他小朋友一齊玩...叻叻!!

 

越黎越愛笑, 而且越笑越甜嘅妹妹...

 3歲啦...

 我的甜心寶貝...生日快樂!!

7位壽星小朋友...

 開心嘅時間過得特別快, 又到影大合照要散Band嘅時間啦~

今日真係多謝幾位媽媽嘅安排, 我哋個生日會好順利啊!!





我們的Facebook專頁 - 小b與妹妹b之成長日誌

妹妹學校生日會

自從有兩個小朋友之後, 時間一直都過得比想像中快, 當我每日都忙住要分身俾兩位小朋友嘅同時, 原來小朋友喺我身邊已經靜悄悄地長大啦.

唔經唔覺...我家妹妹已經3歲, 唔再係一個小Baby, 媽媽真心覺得好唔捨得呢.

而學校亦非常窩心地安排咗一個小小生日會俾妹妹, 適逢今日又係妹妹農曆生日, 難怪妹妹一整天都心情大靚.

一早起身換上便服, 妹妹已經急不及待要返學嚕... 

差不多到茶點時間, 媽媽就帶住家姐一齊到學校為妹妹慶祝生日喇.  雖然生日會只得短短半小時, 但我相信妹妹喺學校嘅生日會能夠有媽媽, 家姐陪住, 妹妹一定會覺得好開心好滿足.

剛好午睡排洗完, 準備入課室開生日會~

當妹妹望到我同家姐一刻, 妹妹突然走上前跟同學仔講, 我媽咪同家姐到咗啦...  (証明妹妹真係好開心啵) 

其實能夠見到妹妹咁燦爛嘅笑容, 媽媽都覺得好開心架...

一個搭一個膊頭, 現場感覺好好笑~

然後小朋友一齊為妹妹大唱生日歌...妹妹對眼完全無離開過支蠟燭呀~

好啦...我們仨一人吹一支, 祝妹妹3歲生日大快樂!!

倆姊妹一齊切蛋糕...

 希望你兩個一直可以相親相愛...

老師話今日妹妹全日都好好笑容.

妹妹你大個女啦, 希望你唔好再成日扭計, 要聽教聽話, 唔好成日以喊黎表達你嘅不滿, 知道嘛?!

爸爸, 媽媽, 家姐, 婆婆永遠都愛你啊!!





我們的Facebook專頁 - 小b與妹妹b之成長日誌