臭脾氣...硬頸...野蠻...不講理...基本上港女有嘅特質妹妹都有.
所以要同妹妹好好相處絕非係一件易事啊!!
之前覺得妹妹年紀尚少, 所以大部份時間我哋都會盡量遷就, 盡量忍讓, 但隨住妹妹開始長大, 我覺得有需要開始調較而並非事事遷就, 因此對住家中這位小惡霸, 我開始採用了強硬嘅態度, 不過原來硬碰硬只會令事情變得更糟糕, 更可怕, 大家嘅壞情緒只會一發不可收拾, 直至大家不歡而散.
經過幾天火星撞地球式嘅生活, 我知道我用強硬嘅態度去處理有情緒嘅妹妹, 大家只會變得唔開心, 傷感情. 但當我想以柔制剛咩, 妹妹就只會變本加厲, 所以面對住妹妹, 我不得不扯白旗投降.
當然口講投降, 實際係要好好反思點去處理啦. 有時我會諗, 點解一張從白紙開始嘅小朋友, 喺管教上可以令人感到咁沮喪?! 究竟佢嘅態度, 佢嘅脾氣係點樣形成嘅呢?! 莫非係喺不知不覺間學咗我哋?! 但發脾氣時走入房呯門又係乜野玩法呢?! 我可以好肯定我哋無人有咁樣做過. 其實呢件事可以反應出如果我唔去糾正, 唔去處理, 再過10年8年後當妹妹發脾氣時呯門可能已經唔再係房門而係呯大門, 所以呢個問題真係刻不容緩.
媽媽自知EQ低, 希望從今日開始, 我會做到學習忍耐, 學習接受, 唔再跟妹妹硬碰硬, 盡量多解釋, 多講道理, 令妹妹明白媽媽只係想佢好, 從而慢慢令妹妹學會抒發自己嘅情緒, 唔好一哭二鬧三上吊.
當然撇除以上種種, 其實妹妹都係一個好SWEET好識氹人好可愛嘅小女孩黎, 所以對住佢我真係有愛有恨架.
P.S: 話說尋日佢激到我好嬲, 然後我使計激番佢, 最後我見到妹妹激到扎扎跳嘅樣真係覺得好好笑, 不過我唔希望我哋之間成日咁樣激黎激去, 所以媽媽會努力, 希望妹妹都要加油呢.
我們的Facebook專頁 - 小b與妹妹b之成長日誌
成日睇到啲相見到妹妹成日都笑笑口,估唔到原來係隻小辣椒:))
回覆刪除你俾佢呃左啦...佢喺屋企係另一個樣架
刪除大家個妹妹都不相伯仲呀，我個個又係，一有咩吾中意，喊，打人，掉野，樣樣做齊，雖然係最細個位，但佢其實已經3歲半，我覺得有好多野佢已經明同應該明，我都有時比佢搞到我噴火，我都諗緊應該點樣處理，大家加油呀！
回覆刪除唉...妹妹真係令我好頭痕
刪除其實4歲既Little K早排都令我好唔開心好洩氣, 我同你一樣諗係咪我自己做得唔好, 佢學左我??
回覆刪除有一次佢話:你都成日鬧我架啦..
果刻我好唔開心, 因為原來佢覺得我成日都鬧佢, 我係度諗...明明我咁鍚佢, 但得出黎係佢覺得我成日鬧佢, 於是我同我老公傾左好耐, 覺得都係要改變做法, 同埋係我自己情緒都唔好時, 我決定迴避下, 唔好硬碰硬, 最近好似好左D...
希望你都好快可以搵到最啱自己既育兒方法, 加油:D
妹妹都曾經有講過...話我成日鬧佢,但其實我好錫佢架,唉~
刪除硬碰硬多數都無好結果，我嘅失敗經驗都有好多，真係捱到宜家個仔四歲半開始懂性啲先好啲，我EQ高咗佢又合作咗，個個小朋友都唔同，希望你都快啲摸到個啱妹妹嘅方法出來啦
回覆刪除希望我可以快D搵到方法,唔洗成日同佢鬧交啦~
刪除