小B驗眼@兒童護眼中心

早前去健康院驗眼時得知小B有散光和遠視, 原本健康院都有安排轉介我們去眼科醫院排期再驗, 不過要等到4月中旬才有期, 所以我就決定襯自己有假時帶小B去妹豬媽介紹嘅呢間陳罡眼科視光診所進行全面嘅視力測試喇.

說真的...我真心覺得呢間視光診所唔錯啊, 價錢合理之餘仲有不錯嘅服務, 真抵讚!!

首先職員先帶小B用機驗眼...

由於這是小B的第一次, 所以當然有少少緊張啦, 不過職員好好, 用好多玩遊戲嘅方式氹惦小朋友, 所以整個長達一小時嘅驗眼過程都進行得相當順利.

初步用機驗眼得出結果係2百多度散光~

然後職員及視光師再用其他遊戲為小B進行不同視力測試, 如散光, 遠視, 近視, 色覺等, 最後視光師更以變魔術順利氹得小B對他信任, 最後連幫小B滴藥水放大瞳孔檢查都相當順利.

雖然最終得出小B左右眼各有275度散光及100度左右遠視, 但眼底都算健康的, 未有發現弱視情況, 而以小B年齡黎講散光都算深了, 應該係遺傳自爸爸, 因爸爸有家族遺傳性散光, 所以真係無計, 至於遠視度數亦唔算太理想, 當遠視度數扣減至零時就會變為近視, 唉!!!!!!!!

視光師話目前只要keep住戴眼鏡, 問題應該都不大...

好快小B就要加入做4眼妹行列啦, 希望小B嘅散光唔好再加深, 近視亦唔好咁快出現, 等到18歲時快快可以做激光矯視啦.

其實媽媽真係未能接受, 不過好彩小B性格樂觀, 小B完全唔介意自己要做4眼妹, 仲好開心可以跟爸爸媽媽一樣戴眼鏡呢, 哈哈.

黎緊小B每半年就要進行一次視力檢查, 希望大頭蝦嘅媽媽會記得約期啦.  :p

眼睛係靈魂之窗, 大家一定要好好保護眼睛啊.





我們的Facebook專頁 - 小b與妹妹b之成長日誌