小B五歲生日BBQ

01.01.2017

不經不覺...我家小B已經5歲大, 回想起當日初出世時, 好像還不是很久以前的事, 但原來靜悄悄地小B已經變得大個女了.

今年生日媽媽無為小B安排生日會, 但又想小B生日當天過得開心, 所以就相約了幾位岩傾岩玩嘅同學仔一齊去BBQ喇, 就係咁幾個小朋友玩足一整日...大家都過得非常愉快.

雖然約去BBQ時媽媽無特別講係小B生日, 但同學仔們真係好有心呢, 因為佢哋竟然記得係小B正日生日呀, 而且仲為小B送上生日禮物, 好窩心啊!! 

小B同我能夠識到呢班朋友真心覺得好幸福好幸運... 

5小花~

小朋友玩起上黎周圍走, 要影靚相真係唔容易, 所以媽媽都懶得揀相, 放兩張就算了.  :p

爸爸媽媽祝小B 5歲生日快樂, 身體健康, 開開心心, 繼續保持你樂天開朗嘅性格, 做個人見人愛嘅可人兒.  今年大個女要變得乖乖, 唔好成日亂發脾氣, 要聽教聽話, 用功讀書, 快快戒掉所有壞習慣.





我們的Facebook專頁 - 小b與妹妹b之成長日誌

 

出風癩

當大家都已經放完假仍未收拾好心情返工返學之際, 妹妹就依然在放假中...皆因放假時媽媽照顧不周, 繼而令到妹妹在假期最後一天開始出風癩, 媽媽真心覺得過意唔去呢, 唉!!

今次醫生話妹妹出風癩, 好大機會係因食物而起,...

回想放假前兩天, 因為大家都想偷懶嘅關係, 所以一日三餐都以外賣或到餐廳解決就算, 雖然妹妹無食過任何新款食物, 但可能不同嘅餐廳相同嘅食物放入了不同嘅香料之類等因素, 因而令妹妹敏感而起風癩.

最初發現時因為只有Pat Pat位置紅腫, 所以初步懷疑係俾虱咬, 但隔一陣紅腫嘅位置竟然轉移到雙腳, 加上妹妹又不停叫好痕, 所以大概就知道應該係出風癩喇.  不過紅日醫生休息, 咁就唯有先搽藥膏, 拖到第二日先去睇醫生, 結果妹妹一整晚就因為身痕腳痕而無瞓過, 直至差不多天光先瞓著, 雖然我無得瞓個人已經好攰好憫, 但我又可以點喎, 都係要頂硬上返工, 做媽媽嘅總係有無窮嘅力量~

雖然妹妹尋日已經睇咗醫生食咗藥又搽咗藥膏, 理應一日半日風癩應該會減退 (小B當年好似係一晚就全部退去), 不過妹妹身上嘅風癩仍然係時好時壞, 明明尋日謝得8899只有少少紅亦已經唔痕, 點知今早起身又再出到全身都係, 就連眼, 咀, 耳仔都有, 真係睇見到都覺得心痛呀.

希望妹妹快快好番, 唔洗再受令佢痕爆嘅風癩困擾啦!!

PS: 唔講唔知, 醫生話原來鼻水藥係可以止痕架...今次真係又長知識了~  (不過大家千萬唔好亂試, 因為個個醫生開嘅藥唔同, 我哋睇開個醫生開嘅藥係唔代表其他醫生開嘅藥都係啊)





我們的Facebook專頁 - 小b與妹妹b之成長日誌

Happy New Year 2017

踏入2017, 首先祝各位Blog友新年快樂....

新一年事事順利, 開開心心, 家庭和睦, 最重要當然係身體健康啦!!

今年我應該會開始少寫Blog了, 因為小朋友開始大, 我覺得係時候要留番少少私隱俾兩姊妹, 免得日後兩姊妹大咗知我成日講佢哋就唔好嘛, 哈哈~

但當我有想分享嘅事, 我仍然會寫Blog分享. 

2017大家一齊努力, 繼續面對不同嘅新挑戰啊.

我們的Facebook專頁 - 小b與妹妹b之成長日誌

Bye Bye 2016

2016年終於都黎到尾聲...見我講得"終於", 大概都估到我嘅2016年過得有幾咁艱苦吧!!

工作方面:

首先年初放完農曆年假後, 公司進行大規模裁員, 各地辦事處及工廠都無一倖免, 而我哋香港Office首當其衝嘅部門竟然係我所屬嘅部門, 不過其實唔難理解嘅, 始終我哋Team人才鼎盛, 但訂單又唔多, 加上大家每日上網嘅時間比起工作嘅時間長, 而老闆喺通知我哋嘅一刻亦都表現得非常無奈, 因為佢都慘被總部頻頻照肺嘛, 就係咁我離開咗工作了快將滿6年嘅公司, 進入咗人生裡面嘅最低潮. 

幸運地當我未到離職當日已經找到新工作, 但新工又不如理想, OT多到爆燈, 就連假期都要返工, 家人雖然唔敢出聲埋怨, 但間中亦會有幾聲微言, 總之就非常唔好受啦, 喺短短兩個半月我已多次出現辭職嘅念頭, 最終真係捱唔住要決定再轉工了.  就係咁...我就黎到宜家呢間公司喇, 雖然初初覺得呢份工都唔會做得長, 因為多種因素都係覺得唔太適合自己, 但慢慢習慣咗之後又覺得可以接受喎, 宜家已經做咗半年啦, 暫時自我感覺亦算良好.

今日諗番轉頭, 雖然都唔希望當日會被栽, 但轉工後人工卻比以前多了, 所以有時都慶幸當日嘅裁員潮包括咗自己架, 哈哈~

健康方面:

今年身體比較差, 真係好多病痛, 由6月開始至今, 我幾乎每月一病甚至兩病, 真係唔到2016年都唔知自己原來係咁孱弱囉, 唯有安慰自己小病是福啦....

2017年我真心希望自己, 家人及大家都身體健康無病無痛!!

家庭方面:

我們這一家總算平平淡淡地渡過了吧, 雖然6月時曾跟陳生嘈過大交, 亦有想過離婚, 但最終平心靜氣過後總算雨過天晴.

至於陳生眾親友, 今年真係超不順境, 中風嘅中風, 住院嘅住院, 離世嘅離世, 真係好不容易才走到年尾, 雖然往時一年才見一兩次面, 但今年就因為上述種種問題而見面多了, 真心覺得好難過, 希望他們的衰運亦跟隨2016過去吧.   

其實今年除了我自己覺得挺倒楣之外, 陳生亦不比我好很多, 佢嘅工作運時好時壞, 亦跟我一樣轉完又轉, 所以我倆對於這個2016年毫無留戀, 只希望新一年新一頁快快再重新展開.





我們的Facebook專頁 - 小b與妹妹b之成長日誌

妹妹學校聖誕聯歡會

就到聖誕就到聖誕lalalalalalalala......

相信參加小朋友學校聖誕聯歡會係大部份父母都期待嘅一個活動吧, 可惜並唔係每一間幼稚園嘅聖誕Party都會叫父母一同參與, 就好似家姐咁, 學校只會安排小朋友自己玩, 父母係無份參與架, 所以知道有份出席妹妹學校嘅聖誕聯歡會, 媽媽我當然期待啦!!

根據早年家姐N班時嘅經驗, 學校會安排小朋友上台表演, 但經我日問夜問妹妹之下, 妹妹都係話無表演啵, 其實妹妹係咪未明乜野叫表演呢, 哈哈~

今年學校換咗校長, 感覺呢個聖誕聯歡會唔及家姐當年有氣氛, 變得簡單咗, 節目亦無以前咁豐富, 但只要俾我有份參與, 我一樣都會好好享受.

一早全家總動員加婆婆去茶記食早餐, 然後再帶妹妹返學, 返學後我哋要先將妹妹交俾老師, 因為小朋友要準備表演嘛, 不過以妹妹嘅性格見我哋咁齊人喺度, 佢一定唔會肯離開我哋半步囉, 而我嘅想法亦絕對正確, 好彩老師好快手咁拖咗妹妹入學校咋, 不過我哋都未轉身行去禮堂就已經聽到妹妹嘅喊聲了, 呢個妹妹真係太痴身...但老師總有佢嘅辦法, 所以好快亦都無再聽到妹妹喊聲. 

喺禮堂等待聯歡會開始時, 咁岩又撞番家姐舊同學嘅家長...真係好有親切感呀!!

好啦...終於都到咗小朋友上台表演嘅時間啦, 可惜妹妹從後台行出黎時, 一見到我哋就即刻爆喊話要媽咪, 直至老師氹咗佢上台, 仍然係望住我哋.

你睇妹妹個樣幾慘豬...  (心痛死媽媽)

音樂響起, 大家開始唱歌跳舞, 結果整個表演妹妹都係呆站之餘仲要望住我哋喊, 後尾表演到中段時, 老師帶佢上前排一齊跳, 不過妹妹依然無反應, 最後連副校都忍唔住叫爸爸帶番妹妹落台, 好過比其他家長睇住妹妹喊, 真係失禮... 

事後老師仲專誠過黎安慰我哋添啵~

唔緊要啦, 性格嘅野真係好難講, 唯有當係一個經驗囉.

完成晒所有表演後, 老師就安排大家返課室玩集體遊戲同食聖誕餐.

妹妹咁慢熱嘅性格, 當然又變咗樹熊咁痴實媽媽玩啦, 好彩...都唔算係由頭痴到尾. 

老師話平時妹妹喺學校唔係咁, 係班中嘅大姐姐, 好識照顧小朋友架, 但只要有家人喺度, 妹妹又做番真●自己, 即係痴媽B囉, 哈哈~

臨走前...兩姊妹當然要同班主任影張相啦!! 

出年妹妹轉校後, 媽媽就再無機會參加學校嘅聖誕Party了, 嗚嗚嗚嗚~





我們的Facebook專頁 - 小b與妹妹b之成長日誌