Bye Bye 2016

2016年終於都黎到尾聲...見我講得"終於", 大概都估到我嘅2016年過得有幾咁艱苦吧!!

工作方面:

首先年初放完農曆年假後, 公司進行大規模裁員, 各地辦事處及工廠都無一倖免, 而我哋香港Office首當其衝嘅部門竟然係我所屬嘅部門, 不過其實唔難理解嘅, 始終我哋Team人才鼎盛, 但訂單又唔多, 加上大家每日上網嘅時間比起工作嘅時間長, 而老闆喺通知我哋嘅一刻亦都表現得非常無奈, 因為佢都慘被總部頻頻照肺嘛, 就係咁我離開咗工作了快將滿6年嘅公司, 進入咗人生裡面嘅最低潮. 

幸運地當我未到離職當日已經找到新工作, 但新工又不如理想, OT多到爆燈, 就連假期都要返工, 家人雖然唔敢出聲埋怨, 但間中亦會有幾聲微言, 總之就非常唔好受啦, 喺短短兩個半月我已多次出現辭職嘅念頭, 最終真係捱唔住要決定再轉工了.  就係咁...我就黎到宜家呢間公司喇, 雖然初初覺得呢份工都唔會做得長, 因為多種因素都係覺得唔太適合自己, 但慢慢習慣咗之後又覺得可以接受喎, 宜家已經做咗半年啦, 暫時自我感覺亦算良好.

今日諗番轉頭, 雖然都唔希望當日會被栽, 但轉工後人工卻比以前多了, 所以有時都慶幸當日嘅裁員潮包括咗自己架, 哈哈~

健康方面:

今年身體比較差, 真係好多病痛, 由6月開始至今, 我幾乎每月一病甚至兩病, 真係唔到2016年都唔知自己原來係咁孱弱囉, 唯有安慰自己小病是福啦....

2017年我真心希望自己, 家人及大家都身體健康無病無痛!!

家庭方面:

我們這一家總算平平淡淡地渡過了吧, 雖然6月時曾跟陳生嘈過大交, 亦有想過離婚, 但最終平心靜氣過後總算雨過天晴.

至於陳生眾親友, 今年真係超不順境, 中風嘅中風, 住院嘅住院, 離世嘅離世, 真係好不容易才走到年尾, 雖然往時一年才見一兩次面, 但今年就因為上述種種問題而見面多了, 真心覺得好難過, 希望他們的衰運亦跟隨2016過去吧.   

其實今年除了我自己覺得挺倒楣之外, 陳生亦不比我好很多, 佢嘅工作運時好時壞, 亦跟我一樣轉完又轉, 所以我倆對於這個2016年毫無留戀, 只希望新一年新一頁快快再重新展開.





我們的Facebook專頁 - 小b與妹妹b之成長日誌

妹妹學校聖誕聯歡會

就到聖誕就到聖誕lalalalalalalala......

相信參加小朋友學校聖誕聯歡會係大部份父母都期待嘅一個活動吧, 可惜並唔係每一間幼稚園嘅聖誕Party都會叫父母一同參與, 就好似家姐咁, 學校只會安排小朋友自己玩, 父母係無份參與架, 所以知道有份出席妹妹學校嘅聖誕聯歡會, 媽媽我當然期待啦!!

根據早年家姐N班時嘅經驗, 學校會安排小朋友上台表演, 但經我日問夜問妹妹之下, 妹妹都係話無表演啵, 其實妹妹係咪未明乜野叫表演呢, 哈哈~

今年學校換咗校長, 感覺呢個聖誕聯歡會唔及家姐當年有氣氛, 變得簡單咗, 節目亦無以前咁豐富, 但只要俾我有份參與, 我一樣都會好好享受.

一早全家總動員加婆婆去茶記食早餐, 然後再帶妹妹返學, 返學後我哋要先將妹妹交俾老師, 因為小朋友要準備表演嘛, 不過以妹妹嘅性格見我哋咁齊人喺度, 佢一定唔會肯離開我哋半步囉, 而我嘅想法亦絕對正確, 好彩老師好快手咁拖咗妹妹入學校咋, 不過我哋都未轉身行去禮堂就已經聽到妹妹嘅喊聲了, 呢個妹妹真係太痴身...但老師總有佢嘅辦法, 所以好快亦都無再聽到妹妹喊聲. 

喺禮堂等待聯歡會開始時, 咁岩又撞番家姐舊同學嘅家長...真係好有親切感呀!!

好啦...終於都到咗小朋友上台表演嘅時間啦, 可惜妹妹從後台行出黎時, 一見到我哋就即刻爆喊話要媽咪, 直至老師氹咗佢上台, 仍然係望住我哋.

你睇妹妹個樣幾慘豬...  (心痛死媽媽)

音樂響起, 大家開始唱歌跳舞, 結果整個表演妹妹都係呆站之餘仲要望住我哋喊, 後尾表演到中段時, 老師帶佢上前排一齊跳, 不過妹妹依然無反應, 最後連副校都忍唔住叫爸爸帶番妹妹落台, 好過比其他家長睇住妹妹喊, 真係失禮... 

事後老師仲專誠過黎安慰我哋添啵~

唔緊要啦, 性格嘅野真係好難講, 唯有當係一個經驗囉.

完成晒所有表演後, 老師就安排大家返課室玩集體遊戲同食聖誕餐.

妹妹咁慢熱嘅性格, 當然又變咗樹熊咁痴實媽媽玩啦, 好彩...都唔算係由頭痴到尾. 

老師話平時妹妹喺學校唔係咁, 係班中嘅大姐姐, 好識照顧小朋友架, 但只要有家人喺度, 妹妹又做番真●自己, 即係痴媽B囉, 哈哈~

臨走前...兩姊妹當然要同班主任影張相啦!! 

出年妹妹轉校後, 媽媽就再無機會參加學校嘅聖誕Party了, 嗚嗚嗚嗚~





我們的Facebook專頁 - 小b與妹妹b之成長日誌

荒失失奇兵聖誕馬戲團 @ 奧海城

臨近聖誕節, 各大商場都有不同主題佈置及活動, 經同學仔相約之下....我哋一連兩星期就去咗奧海城嘅荒失失奇兵聖誕馬戲團玩喇.

呢個主題嘅遊戲都算幾好玩幾吸引, 小朋友可以化身成為馬戲團嘅一份子, 挑戰4個雜技體驗項目...

包括 1. 勇猛跳火圈
         2. 驚險飛刀
         3. 攀山越嶺 (攀石)
         4. 空中飛人彈彈床

最終我家小B就唔敢玩攀越嶺疊羅漢, 因為有人怕高囉, 而且佢話見到人哋要綁住條繩爬上去覺得好危險, 實情係有人驚會跌落黎先真, 哈哈!!

對於越黎越細膽嘅小B, 都係簡簡單單嘅遊戲比較適合佢~

完全無難度嘅跳火圈...

邊行邊轉碟扮耍雜技...

小B飛刀...唔係講笑, 佢竟然刀刀都中.

玩完儲夠印仔, 3隻鬼靈精一齊去換爆谷...

原本打算玩埋空中飛人彈彈床, 但今日我哋實在太晏去啦, 結果下一輪派籌嘅時間已經係要到6點, 咁...唯有第2個星期再黎玩啦!

呢兩個小朋友, 為咗玩彈彈床, 靜靜地排咗一小時都無扭計, 乖女~

女孩子的甫士...

好啦好啦, 望到頸都長, 終於到我哋玩啦...

一直口口聲聲話唔會驚, 剛被吊起一刻, 依然笑得開心...

就咁睇, 好似幾有姿勢...

其實當叔叔一開始彈起佢時, 有個小朋友嚇到呆一呆唔識笑架, 不過之後又玩得唔錯喎, 雖然小B話自己唔驚, 但佢個樣已經好明顯地出賣咗佢, 哈哈~

其實妹妹兩日都有一齊去玩架, 不過妹妹真係勁細膽, 完全唔肯玩, 既然妹妹唔玩, 咁就襯大家排隊時跟媽媽去短暫Shopping一下啦~

我們的Facebook專頁 - 小b與妹妹b之成長日誌