秋高氣爽之大尾督BB蕉

重陽節假期, 梗係要約埋三五知己一齊去玩先開心嘛!!

今日換上姊妹裝出發去大尾督.

朋友介紹去嘅麥師傅燒烤場, 我真心唔推介大家去, 此家燒烤場食物質素好麻麻, 事後我同爸爸都腸胃炎呢, 至於兩姊妹就好彩無事, 因為佢哋掛住玩無食過野 (但其實小朋友高85cm就已經要收費, 所以今次兩姊妹真係好唔抵).

唔知仲以為佢哋好認真咁燒野食, 其實5分鐘後已經唔知行咗去邊度玩Lu~

哦...原來係去咗吹Bubble呢~

你吹...

 我又吹...

不過突然俾兩姊妹發現有得撈金魚, 結果我馬上又被召喚咗去陪玩~

$10 - 10分鐘, 一人一網唔洗爭!!

兩姊妹都好厲害啊, 每人都有撈到兩, 三條魚仔...

認真Mode...

有無限精力嘅小朋友, 轉眼間又去咗空地玩...

天光玩到天黑, 小朋友依然好精力.

5隻馬騮齊搶毽...  (有無人可以教我將Video轉番橫向呀?!)

今日小朋友們玩得好開心, 總之放假就一定玩到盡...我要用假期去玩黎彌補平日一至五對小B功課上嘅嚴苛.  :p





我們的Facebook專頁 - 小b與妹妹b之成長日誌

♡親子活動●中央公園♡

09.10.2016

一連幾日假期, 休息了一天後, 今日好陽光好天氣, 係時候要帶兩姊妹外出走走吸收一下維他命D啦, 而且我咃一家都順道要曬曬太陽殺下菌...自9月起我哋一家大細不停病, 真係睇醫生都睇到怕.

是日即興活動遊中央公園, 其實我哋住喺沙田區幾年, 都無去過中央公園架, 只係小B去年K1學校旅行先第一次去, 失禮失禮. 

呢個公園真係好大, 好多小朋友設施, 不過我哋正午時份去到, 所以兩姊妹都熱到無乜心機玩, 既然唔玩遊樂設施, 咁就四周圍行下啦. 

下次放假...我哋一家四口可以同姐姐們爭地方, 去中央公園野餐都得啵, 哈哈~

臨離開公園前, 我哋有個好重要嘅任務, 就係餵烏龜餵魚魚喇...

原先無人架...兩姊妹都不知餵得幾開心~

 不過好快就引咗好多小朋友埋黎一齊餵, 好熱鬧呢~

餵完一袋白麵包, 又係時候到我哋去餵飽兩姊妹喇...

原本食完下午茶打算返去租單車踩, 不過我家妹妹突然叫眼瞓, 話要返屋企瞓覺覺喎, 就係咁玩咗兩小時左右就打道回府.

其實想小朋友開心真係好容易, 簡簡單單帶佢哋去公園玩都已經可以好開心好滿足.





我們的Facebook專頁 - 小b與妹妹b之成長日誌

10.1國慶

是日國慶, 婆婆一早就已經問有無節目, 因為姨婆喺美國返咗黎話想去流浮山, 難得婆婆都想去, 咁我哋一家就梗係要奉陪到底啦.

去到流浮山剛好係午飯時間, 為咗驚兩隻小豬肚餓, 所以都係食Lunch先, 不過姨婆返黎呢兩個幾星期, 我哋實在食得太多餐好東西啦, 所以今餐決定唔食海鮮只叫小菜, 但味道依然無得頂呢, 除咗兩隻小豬之外, 我哋4個大人都食到lamlam脷呀. 

下次一於叫爸爸再帶我哋入去食餐好先得.

食完飯出黎, 原本打算周圍逛買海味嘅我咃, 竟然遇著落大雨, 最後婆婆同姨婆唯有快手喺海味街兩旁買少少海味就走了.

之後再漫無目的地遊下車河, 直至黃昏就返屋企小休, 待夜晚再出發去婆婆朋友嘅壽宴.

壽宴期間遇上放煙花, 兩隻小豬又嚷著要落街睇煙花, 皆因去酒樓時剛好警察封路, 所以兩隻小豬係知道有煙花睇嘅, 而我呢個間中順得人嘅亞媽就梗係要滿足下兩隻小豬, 帶佢哋落街湊湊熱鬧嘛...

雖然我哋喺佐敦睇得唔算清楚, 不過俾佢地聽下煙花嘅砰砰聲, 感受一下節日氣氛都已經好開心.

放假就係要開心~

我們的Facebook專頁 - 小b與妹妹b之成長日誌

玩..沙

暑假時去小檬屋企玩, 檬媽介紹咗盒玩具沙俾大家...3個小朋友玩到愛不釋手, 得知呢盒玩具沙喺台灣買平, 於是我又叫爺爺買返黎俾倆姊妹玩.  :p

明明叫爺爺買一盒, 但爺爺就驚倆姊妹唔夠玩, 結果買咗兩盒... 

 

早兩星期爺爺返港數天, 小B等咗好耐嘅玩具沙終於到手啦, 你睇倆姊妹玩得幾開心~

 日有玩...夜又玩...只要一有時間就要玩沙~

 玩沙有玩沙好, 總比玩泥膠乾淨嘛~

檬媽介紹嘅玩具沙真係唔錯啊, 起碼可以幫我家兩位小姐打發唔少時間, 哈哈!!





我們的Facebook專頁 - 小b與妹妹b之成長日誌