小眼晴看大世界之Hae遊清邁 @ Day 5

25.03.2016

去玩嘅時間真係過得特別快, 玩多大半日就要Say Bye Bye啦, 好唔捨得呀~~~~~~~~

今日11點左右Check Out後就出發再去食地道粉, 一人幾碗做早餐, 正呀...

然後就去動物園, 今次呢個動物園同夜間動物園係唔同架, 今次可以自己揸車喺動物園四周圍遊, 去到有動物嘅地方先慢條斯理地落車, 所以即使天氣再熱都唔算太辛苦.

出發...gogogo~

去到動物園幾個小朋友都玩得好開心呢, 所以即使突然改變行程去動物園而放棄去潮人街依然覺得係值得嘅.  (其實去旅行都係想小朋友開心者)

原本去到動物園門口, 想叫5個小朋友影張大合照, 可惜大家都好扭擰, 唔知係咪去旅行又熱又攰, 佢哋輪流扭計嘅次數係超多, 唉...

不過當一見到動物, 大家終於都變得生猛起來, 總算無去錯.

因為哥哥手上嘅一粒珍寶珠, 妹妹竟然同哥哥一人一啖, 為咗食妹妹仲俾哥哥拖住手仔行添啵(無眼睇), 哈哈!!

第一站...河馬, 其實河馬真係好臭, 但小朋友好鐘意餵佢哋食紅蘿白~

第二站...長頸鹿, 妹妹初時有D驚, 唔肯落地.

不過佢見家姐餵得好開心, 所以妹妹都去咗餵, 咁我同爸爸就影番張合照先啦, 哈哈~

其實家姐都有D驚架~

第三站...騎馬仔, 家姐好大膽呀, 騎咗兩次, 妹妹初初都話要騎, 不過最終係驚到唔敢上馬~

第四站...餵大象, 呢隻大象實在帶咗好多歡樂俾我哋.  (原因: 跟我哋其中一個團友有關, 哈哈)

實在唔抵得呢倆父女經常都咁恩愛開心影合照...

第五站...餵鹿仔, 因為有鐵絲網圍住, 所以大家都好大膽去餵.

妹妹完全唔驚~

然後仲有第六, 七, 八, 九站, 不過都已經無再特別去影相了.

去完動物園再一次去湖邊餐廳用餐, 湖邊餐廳四周環境優美, 就連3位小美人都忍不住要擺Pose影相, 哈哈!!

 太可愛了...

 真的太可愛...

之後再去多次Big C買手信, 然後我哋就要趕去機場準備回到呢個現實嘅香港啦!!

廉航機Delay機會率超高, 原本7時多機, 最終Delay至9時多, 唉~

上機前依然精力充沛...

 起飛後馬上搵周公子去...

下次帶小朋友去旅行, 真係唔好再搭夜機, 因為實在太辛苦啦.






我們的Facebook專頁 - 小b與妹妹b之成長日誌

小眼晴看大世界之Hae遊清邁 @ Day 4

24.03.2016

今日一早大家分成兩批活動, 有的留在酒店游水, 有的去素貼山拜佛... 

我哋一家當然係選擇去素貼山拜佛啦, 不過喺泰國拜佛實在有太多禁忌, 所以我哋都只係抱住去參觀嘅心態.  事前朋友已經告知入廟拜佛時, 女生一定要穿長褲或長裙, 而且不可露肩及露手臂, 所以我已經放棄要入廟了, 最終...我去到素貼山時就連車都唔需要落, 因為當抵達素貼山一刻我家倆姊妹竟然相繼暈倒, 為免我同爸爸要一人抱一個行幾十級樓梯上山, 我選擇留喺車上陪倆姊妹ZzzZzz...

小朋友真係爽, 去到邊瞓到邊...大人都好爽, 可以上山參觀金碧輝煌嘅廟宇同可以睇靚景, 至於我就當休息一下吧~

大約一小時後, 當大家回程上車時, 倆姊妹終於充滿能量啦...

之後我哋跟其他團友會合後就齊齊去湖邊餐廳食Lunch喇, 食完Lunch當然又係Shopping時間啦, 當女人Shopping, 男人就陪小朋友玩波波池, 我終於可以自由自在咁逛下啦...Yeah!! 

只可惜呢個商場我完全無收穫, 唉~

逛了半天, 玩了半天, 又係時候去食晚飯嚕, 原本打算再去食多次有機菜, 不過因為GPS嚴重出錯, 最終我哋遊咗接近三小時車河, 仲差點去到邊境上清萊, 真係嚇死.  最恐佈係GPS經常帶我哋行小路, 好多地方都好陰森恐佈, 幸好最終都能夠順利返酒店咋, 就咁...我哋就白白浪費咗好幾小時, 而最好彩嘅係友人媽咪知我哋迷路, 所以幫忙買定外賣俾我哋, 否則今晚晚餐就無著落了.

今日雖然沒有太多行程, 但實在太舟居勞頓, 所以一樣好攰.





我們的Facebook專頁 - 小b與妹妹b之成長日誌

小眼晴看大世界之Hae遊清邁 @ Day 3

23.03.2016

話咁快又去到旅程嘅第3日啦...雖然話係Hae遊, 但因為多小朋友嘅關係, 所以Hae得都幾辛苦下.  :p  而亦因為小朋友們都算細, 遷就得一個時又要遷就第二個, 結果有部份行程未能按照原定計劃進行或完成.

今日我哋嘅行程係去玩高卡車, 游水同行夜市~

一早...呢4位小朋友已經準備好出發啦~

當然要影張團友大合照先啦, 不過當中有友人唔鍾意影相, 所以全程無出過鏡.  -.-"

想一家4口影張相, 點知家姐發小姐脾氣, 小朋友真係越大越有自己性格, 唉~

到站玩高卡車, 因小朋友太細唔玩得, 點知...家姐又再顛過, 呢個Trip我真係幾孚每一日都想中佢囉, 超討厭.

爸爸就爽啦, 樣樣都有份玩~

如果我唔係要照顧倆姊妹, 我都好想落場玩番轉...

玩完又去食, 今次我哋去食炸雞, 不過堂食無冷氣, 最終食到大家身水身汗, 完全無胃口.

食飽終於有笑容...

妹妹熱到面仔都紅埋~

之後就到咗小朋友們最期待嘅環節...返酒店游水水喇, YEAH!!

好可愛呀... *3*

 終於影到一張全家福...

游完水梳洗好後又出發去食晚飯, 今晚食我至愛嘅海鮮餐呀, 正正正~

食完再去行夜市, 大家喺游完水勁疲累嘅狀態下逛了差不多兩小時, 雖然友人仲想繼續行, 不過大部份人都頂不住了, 於是齊齊返酒店休息...

而今晚我終於可以放下三父女, 跟友人一起去梳孚一下喇, 爽YY, 哈哈!!

我們的Facebook專頁 - 小b與妹妹b之成長日誌

小眼晴看大世界之Hae遊清邁 @ Day 2

22.03.2016

今日一早男人們就出發去釣魚, 剩下靚媽們+小豆丁們, 不過我哋都唔愁無節目架...但就一定無男人們咁精彩囉.

你睇爸爸幾利害~

嘩...釣到好大好大條魚呀~

原本佢哋應該玩足半日, 但天氣太熱太曬啦, 最終佢哋玩到12點左右就走咗.

至於我哋起身梳洗後就梗係喺酒店餐廳食埋早餐先啦, 然後再出發去行Big C.

泰國嘅商場真係唔錯, 有得玩波波池之餘仲可以有人幫忙照顧小朋友, 咁大人就可以靜靜地行街喇.  其實起初我都真係有擔心架, 但朋友話好安全, 因為佢每次返黎清邁都係咁樣俾小朋友玩 (佢係半個泰國人黎, 佢有泰國血統架, 而且每年都會返黎, 佢話放心應該都真係可以放心), 加上我見場內亦只得我哋幾個小朋友, 既然楠楠哥哥都可以幫忙睇住, 所以最終我都放低小B喺度玩!!

妹妹就因為太細唔可以留低, 要留低就要有大人陪同, 既然係咁...我唯有帶住妹妹行街, 不過妹妹無得玩就梗係扭計啦, 所以最後我喺Big C買得一D都唔痛快啊, 仲要買糖氹番妹妹添, 唉~

大約45分鐘左右, 小朋友玩波波池嘅時間快要完, 咁我哋就返去接小朋友喇.

原本行完Big C打算再去另一個商場Shopping, 點知突然接到男人們通知話正在回酒店途中, 所以我哋接番小朋友後就先返酒店同佢哋會合.

之後我哋去咗食泰國最地道嘅粉...呢碗牛丸粉真係超好味呀, 最終我一個人食咗兩碗半, 哈哈.  :p

食飽飽我哋繼續去番今朝打算去嘅商場Central festival, 呢個商場超大超好行, 至於收獲就...一般般啦, 因為去到商場某一層, 突然見到類似冒險樂園嘅地方嘛, 結果我哋就將大部份時間用咗喺呢度俾小朋友玩喇.

玩完一輪, 我哋再出發去夜間動物園, 去動物園時因GPS出錯, 結果明明好短嘅路程卻用了差不多個半小時, 唉...GPS真係唔可以盡信呢, 今個Trip因為GPS出錯而行錯路嘅次數真係超多!!

終於去到~~~

嘩...好近呀呀呀, 可惜小B唔敢摸隻梅花鹿, 反而瑤瑤就好大膽.

夜間動物園主要係坐車圍繞動物園遊走, 期間仲可以伸手出車餵動物, 其實都幾刺激好玩架, 因為偶然會有長頸鹿, 斑馬伸頭入車搵食嘛, 當有動物伸頭入車時會嚇得車上嘅人嘩鬼叫, 哈哈!

去完動物園已經差不多10點, 但我哋仲未食晚飯呀, 原來清邁呢度10點好多地方都已經關門, 幸好最終搵到間大棚檔, 總算叫做醫飽肚.

今日大人小朋友都好攰, 小朋友更連晚飯都無食就已經瞓咗, 不過返到酒店又變得生猛起來, 雖然我哋行程唔算多, 而且都幾Hae, 但我同爸爸都已經覺得好辛苦了, 如果下次可以倆口子去旅行就好啦 (發夢中).





我們的Facebook專頁 - 小b與妹妹b之成長日誌

言語治療(五)

經過兩堂健康院嘅言語治療訓練後, 媽媽再次搵番小檬媽介紹嘅黃姑娘做訓練, 事隔7個月再去上堂, 黃姑娘竟然讚小B進步咗好多呀 (其實問心, 我自己都覺得小B嘅發音真係比以前好架, 起碼宜家大部份人都聽得明小B講野嘛  :P), 所以今次媽媽決定要一口氣去做訓練, 直至小B完完全全掌握所有發音技巧及變得更加準確後才停止. 

由於黃姑娘有大半年時間無再跟進小B, 所以今日主要都係考之前教過小B嘅發音字, 而明顯今日小B亦真係表現得好好啵, 對於用氣字P音, K音等嘅單字或詞語都講得幾好, 只係偶然要提一提.  黃姑娘見小B對單字及詞語方面都算掌握到, 所以就集中訓練小B講句子.  句子嘅訓練係用多於一至兩組嘅P音或K音字組成, 看看小B能否做到講句子時都適當地用氣, 結果...還算可以, 至少黃姑娘好快就肯收貨囉, 哈哈!!

黎緊黃姑娘叫我哋喺日常生活對話中糾正小B, 只要一聽到有錯就去糾正, 等小B容易記得錯字, 咁樣好快小B就應該對用氣嘅字能夠完完全全掌握.

另外黃姑娘都有讚小B嘅L音已經改善咗, 唔需要再點樣執佢發嘅L音啦 (感動). 

最後媽媽真的不得不讚讚小B, 以前每次去搵黃姑娘做訓練, 小B都表現得唔太合作, 而且亦坐唔定 (因N班時唔太需要坐定, 可於課室任意走動), 但呢半年返咗K1, 黃姑娘讚小B表現合作咗, 而且亦有心學嘢咗, 呢一點真係超抵讚呀. 

黎緊三星後再去做訓練, 希望到時一樣聽到黃姑娘讚小B啦~





我們的Facebook專頁 - 小b與妹妹b之成長日誌

♡親子活動●科學館♡

一直都好想帶倆姊妹去科學館玩, 可惜遲遲未抽到時間, 終於等到爸爸今日放假可以去玩啦...點知爸爸又病咗, 不過爸爸今次好好呀, 為咗唔想掃興一樣照陪我哋去, 真係唔讚你係好爸爸都唔得, 抵錫!!  ^3^

一去到倆姊妹已經表現雀躍~

然後四周圍玩...四周圍探索...

不過週末去真係好多人...而且仲要係強國人, 佢哋嘅小朋友係唔會排隊, 仲會橫衝直撞, 所以真係睇少一眼倆姊妹都唔得, 結果又係影唔得多相, 唉!!

科學館呢個地方, 真係好適合小朋友, 下次有機會要平日再黎先得.






我們的Facebook專頁 - 小b與妹妹b之成長日誌