RAY蠶絲面膜

自從兩姊妹開始大, 理應我會有更多時間打扮自己, 但點解事實會係岩岩相反架?

好老實, 近呢一年半載, 媽媽我每日除咗返工放工就係要陪兩位小姐做功課溫習, 每晚實際屬於我自己嘅私人時間完全唔多, 所以我連女人最重要嘅敷Mask環節都已經放低咗一排, 不過前陣子天氣乾燥, 我塊面即刻出現脫皮現象表示抗議, 因此我就提醒自己, 宜家年紀開始大, 真係要好好保養, 如果唔係之後要補救就難啦...  就係咁, 暫時我都仲Keep到每星期敷一晚Mask架, 哈哈!!

至於揀Mask方面, 我主要都係揀深層補濕或抗皺Mask居多...年紀開始大嘛, 抗皺真係好緊要啊~

今次就同大家分享一下來自泰國嘅RAY蠶絲面膜啦.

RAY蠶絲面膜有金/銀兩色

<功效>
金色款: 修復痘痘, 痘印, 提拉緊緻, 美白淡斑, 提亮膚色
銀色款: 嫩膚抗皺, 深層補濕, 修復肌膚, 提亮膚色

一敷上面...真係好貼好薄, 面膜質地好軟身, 而且因為面膜沾滿好多精華液, 所以感覺好水潤好舒服.  我敷咗大約20分鐘, 完全感覺到皮膚好似飲飽水一樣, 嗰種感覺好正呀!!  敷完後再加以按摩, 好讓皮膚更加吸收, 之後再按正常程序塗上護膚品, 即時將水份鎖住.

敷完20分鐘後, 塊面膜都依然好濕潤~

用過之後, 真心覺得好好用, 黎緊我都應該會Keep住用佢.

雖然此面膜來自泰國, 但香港好多地方都有售, 所以想買絕對唔難買.

<容量>
一盒10片, 每片淨重35g

全線SASA, 全線阿布泰國生活百貨(約10間分店), 全線雅施, 各大連鎖店及藥房都有出售...  早兩日我就見萬寧售價約$78

你話係咪好抵用先, 抵用就唔在講, 最重要係真係好用丫嘛!!  ^^





我們的Facebook專頁 - 小b與妹妹b之成長日誌

Blog Blog Kids Gathering @ Mikiki Play House

09.07.2017

嘩...原來我好耐無寫Blog啦, 有無人掛住小B同妹妹先?!  :p

話說今日, 我哋一班Blog Blog Kids又再聚頭, 咁就當然要出Post記低佢啦.  今次都係要多謝小檬媽安排, 我哋呢班Blog Blog Kids先可以玩得咁開心, Blog Blog媽傾得咁盡興咋~

兩姊妹知道今日去Play House玩就梗係未出發先興奮嘛, 兩隻小豬未夠8點已經起身問我幾時出發...

一上巴士就更加係不停問住幾時先到... 

(其實你哋洗唔洗咁心急呀!!)

去Mikiki真係非常快同非常方便, 一架巴士點對點就到, 下次可以考慮再約朋友去玩喎.  ^^

到啦到啦, 兩隻小豬有得玩就完全唔洗理媽媽~

就係咁...媽媽今日可以安安樂樂咁傾計. 

仲記得之前幾次出黎玩, 我都要抱住妹妹, 又要陪住妹妹玩, 總之就總有一個囡全程係我左近啦.  宜家佢哋大咗, 可以自己玩, 家姐又會幫手照顧妹妹, 所以媽媽我終於都覺得帶兩姊妹去玩係件輕鬆事啦, 哈哈!!

由於今次我完全無理兩個囡, 所以無乜點影相呀, 好彩其他媽媽都有幫手影到兩姊妹, 媽媽睇相見到佢哋玩得好開心呢.

另外要讚一讚家姐, 因為大家都話見到家姐好照顧妹妹, 就算家姐要同大爺玩, 都係拖住妹妹咁追住大爺架, 哈哈!!  家姐確係好乖女又抵讚...

藍色嘅波波池, 媽媽我勁鐘意呀~

 

好明顯...兩姊妹係阻住大爺射波波啦.  :p

 

呢條橋媽媽行過好幾次, 但行到媽媽嘩嘩聲, 因為佢會郁架....  但係我兩個囡好似唔驚仲行得好快添啵, 勁~

妹妹真係大個女啦, 佢竟然唔怕羞坐小檬媽大脾?!  好感動呀...因為妹妹一向都好慢熱, 今次竟然唔喺媽媽視線範圍之下都肯跟小檬媽, 果然返學後係叻女咗.

今日Play House安排咗小食俾大家, 因為今日Party太早嘅關係, 其實我哋都無食早餐架, 所以我哋3母女都覺得D小食幾好味...唔知大家又點睇呢?!

多謝Litte K送公主戒子俾兩姊妹, 兩姊妹都話好好好鐘意呀, 因為佢兩個係公主迷囉~

雖然呢個場地方唔算好大, 但有人數限制, 所以都唔會話太迫太多人.  而衛生方面就更加要讚, 因為一入到去, 感覺已經覺得好乾淨, 另外我亦見到清潔姐姐會四圍清潔, 就算有人玩緊波波池, 清潔姐姐都會繼續消毒地方, 呢方面真係要讚架, 始終波波池太多小朋友玩, 所以衛生真係好緊要.

玩到尾聲, 最後就梗係要影番張大合照留念啦~

每次同你哋玩都玩得好開心, 期待下一次嘅聚會呢!!





我們的Facebook專頁 - 小b與妹妹b之成長日誌

育兒血淚史の如何處理壞情緒?!

假如3歲定80, 那麼妹妹長大後的性格一定好不令人討好, 皆因我家妹妹絕對有齊港女特質.

臭脾氣...硬頸...野蠻...不講理...基本上港女有嘅特質妹妹都有.

所以要同妹妹好好相處絕非係一件易事啊!!

之前覺得妹妹年紀尚少, 所以大部份時間我哋都會盡量遷就, 盡量忍讓, 但隨住妹妹開始長大, 我覺得有需要開始調較而並非事事遷就, 因此對住家中這位小惡霸, 我開始採用了強硬嘅態度, 不過原來硬碰硬只會令事情變得更糟糕, 更可怕, 大家嘅壞情緒只會一發不可收拾, 直至大家不歡而散.

經過幾天火星撞地球式嘅生活, 我知道我用強硬嘅態度去處理有情緒嘅妹妹, 大家只會變得唔開心, 傷感情.  但當我想以柔制剛咩, 妹妹就只會變本加厲, 所以面對住妹妹, 我不得不扯白旗投降. 

當然口講投降, 實際係要好好反思點去處理啦.  有時我會諗, 點解一張從白紙開始嘅小朋友, 喺管教上可以令人感到咁沮喪?!  究竟佢嘅態度, 佢嘅脾氣係點樣形成嘅呢?!  莫非係喺不知不覺間學咗我哋?!  但發脾氣時走入房呯門又係乜野玩法呢?!  我可以好肯定我哋無人有咁樣做過.  其實呢件事可以反應出如果我唔去糾正, 唔去處理, 再過10年8年後當妹妹發脾氣時呯門可能已經唔再係房門而係呯大門, 所以呢個問題真係刻不容緩.

媽媽自知EQ低, 希望從今日開始, 我會做到學習忍耐, 學習接受, 唔再跟妹妹硬碰硬, 盡量多解釋, 多講道理, 令妹妹明白媽媽只係想佢好, 從而慢慢令妹妹學會抒發自己嘅情緒, 唔好一哭二鬧三上吊.

當然撇除以上種種, 其實妹妹都係一個好SWEET好識氹人好可愛嘅小女孩黎, 所以對住佢我真係有愛有恨架.

P.S: 話說尋日佢激到我好嬲, 然後我使計激番佢, 最後我見到妹妹激到扎扎跳嘅樣真係覺得好好笑, 不過我唔希望我哋之間成日咁樣激黎激去, 所以媽媽會努力, 希望妹妹都要加油呢.

如果大家有更多情緒管理嘅資訊不妨介紹俾我...Thanks!!





我們的Facebook專頁 - 小b與妹妹b之成長日誌

學校親子旅行 - 馬灣公園, 科學園 & 大尾督

24.03.2017

今次係妹妹第一次參加學校旅行, 妹妹當然好期待啦, 11月秋季旅行時遇著爸爸媽媽有事未能參與, 所以媽媽話過今次春季旅行一定要同妹妹參加.

一大早準時返到學校集合, 小朋友們在等齊同學仔之際, 跟老師一起唱歌傾計, 爸爸媽媽們就好似睇小動物咁不停舉機影相, 場面好好笑.

好啦...我哋1號車齊人可以出發啦, 轉眼間仲已經到咗馬灣公園添啵.

 上鳥望台睇風景...

明明馬灣公園影相好靚, 可惜妹妹就係唔肯影相.  ~.~"

行完馬灣公園, 我哋就出發去科學園食午飯, 不過將近落車時妹妹就瞓著左, 同學仔媽媽仲擔心妹妹會瞓好耐無飯食, 點知...呢個時候妹妹話咁快就醒左Lu.  

食完飯有時間就梗係要四周圍行下啦...  (唔講唔知其實媽媽未黎過科學園架, 哈哈!!)

未夠鐘上車去下一個景點, 個個小朋友都在跑跑跳跳...

妹妹實在太可愛啦..啦..啦~

然後...轉眼間, 我哋就去到行程最後一站 - 大尾督!!

今日天氣唔錯, 去呢D郊區地方真係好舒服...雖然全日嘅行程坐車時間比較多, 而且唔係太多野玩, 但能夠有多一日嘅親子活動時間, 相信爸爸媽媽同小朋友都一樣好開心好滿足.

P.S: 雖然我唔知其他人會唔會同我有一樣想法, 但至少我好Enjoy囉...  ^^

我們的Facebook專頁 - 小b與妹妹b之成長日誌

《焗》牛角包

星期日嘅早上, 突然心血來潮想整野食, 但屋企嘅糧餉倉存實在有限, 最後只可以用上次剩餘嘅急凍酥皮做牛角包.

其實個牛角包食譜已經係簡易篇黎, 係之前燒腩媽SEND俾我嘅...所以若然咁簡單都失手的話, 我應該真係唔可以再作第三度嘗試.

雖然係就係好簡單, 而我亦都算係成功, 但原來用急凍酥皮做牛角包, 口感唔算好好.  不過我明白嘅, 因為就算自己去餐廳食, 都唔係每次都食到好食鬆軟嘅牛角包嘛, 更何況我只係用急凍酥皮做呢.  至於味道個人認為還算過得去, 起碼婆婆都肯嘗面丫, 哈哈~

新鮮出爐熱辣辣嘅牛角包...爸爸話個賣相似牛屎包喎.  -.-"

雖然我仲未做得出好好食嘅美食俾屋企人, 但我仍然會繼續嘗試架.





我們的Facebook專頁 - 小b與妹妹b之成長日誌