泰●梳孚

08.06.2016

自3月時去清邁梳孚過一晚後, 實在好掛住好掛住泰式按摩, 全因為只得一晚實在唔夠喉囉...

加上旅行後返黎轉的那份新工要經常外出工作實在太辛苦, 所以更加需要去Relax一下, 就係咁我終於可以出走一個晚上, 讓爸爸來照顧倆姊妹, 然後我自己同朋友去梳孚啦, 呵呵!!

誤打誤撞下找了一間泰式按摩, 估不到...出奇地舒服呢~~~~~~~~

雖然店舖面積狹窄, 而且位置在通菜街唐樓有點像去一樓一, 但只要你唔介意環境, 這家是絕對值得推介的.  這家全店只得7個床位, 但所有按摩師都係正宗泰國人, 所以手勢絕對有保証.

由於今次係第一次試按, 所以我只揀了60分鐘, 點知梗係唔夠喉啦, 因為真係太舒服太舒服嘛, 但因為晚上Booking太多, 好多打工仔放工後去按一按輕鬆一下, 所以今次實在無辦法加鐘了.  而當我和朋友在按摩時, 亦真的聽到有人Walk In被拒, 所以一定要先預約呀.

雖然我可以出走嘅晚上實在係唔太多, 但我一定會盡量安排再去梳孚架, 朋友們...你等我呀!!





我們的Facebook專頁 - 小b與妹妹b之成長日誌

言語治療(六&七)

前兩個月因轉工後比較忙, 所以連Blog都荒廢了好一陣子, 如今...再轉工後我又可以多點時間Blog啦, 呵呵!!

小B嘅言語治療訓練依然在進行中, 但上堂時間已經不再像之前般緊密, 現在大約三星期才一次, 而治療進度亦漸見理想.  之前一直訓練的P, K, H音已經進步了不少, 其實上咁多堂都係主力練習呢幾個音, 不過原來當能夠完全掌握P, K, H音後, 其他音字都會自動變得準確, 真的好神奇呢?!  難怪言語治療師不斷針對小B呢幾個音啦.

現在當要求小B讀P, K, H音嘅單字或詞語時, 準確度真係提升了不少, 但當一整句句子中有多幾個P, K, H音, 小B就會唔準, 即暫時協調上仍有少少問題, 不過言語治療師話只要媽媽肯在家不停練習, 協調方面好快亦會有改善 (意思即指媽媽懶啦  :p), 所以對於小B嘅發音問題媽媽已經唔太擔心了.

言語治療師話暫時要再觀察一下小B讀長句子嘅準確度, 當言語治療師覺得去到可以接受嘅水平後, 我哋就會學埋T音, 然後再重新做一次評估, 咁樣就知我哋仲需唔需要繼續上堂喇.

看來...我們距離唔洗上堂嘅日子又近咗一大步啦, 哈哈~

小B你一定要繼續加油呢!!





我們的Facebook專頁 - 小b與妹妹b之成長日誌

諸事不順的上半年

2016年已經過了差不多一半, 說真的這半年對我來說苦多過甜, 尤其係工作上...我想我呢半年應該都已經算係衰到貼地~

從畢業到現在, 大部份朋友都覺得我工作運好好, 而且算係非常順暢, 不過呢半年好運已經悄悄離我而去, 半年轉兩次工, 對我來說都已經係好經典, 唉!!

究竟我下半年仲要轉幾多份工, 先可以好似之前咁平平穩穩呢?!

除咗工作以外, 其實感情方面亦唔算太好, 不過當中細節就無謂講了, 總之若然當我有一日宣佈變成單親媽媽, 大家都不要太驚訝.

人大咗...心態唔同咗, 宜家唔想每事同人分享, 盡量自己吞下去就算.

放心...我還好的, 不用擔心我, 起碼我還有兩個小可愛, 哈哈~

呻完





我們的Facebook專頁 - 小b與妹妹b之成長日誌

K1 - 家教會親子旅行

22.05.2016

前陣子剛剛去完學校旅行, 今日我哋一家四口又再去家教會擧辦嘅親子旅行啦...

行程包括: 馬灣公園 --> 九龍灣展貿喜善午餐 --> 錦田鄉村俱樂部

今次唔係所有同學仔都有參與, 但小B都一樣玩得好開心, 重點當然係因為有爸爸媽媽妹妹陪玩啦, 所以親子旅行真係好重要呢!!

未出發兩位小朋友已經好興奮, 雖然由我哋屋企出發回校比平時還要早, 但倆姊妹就係喜歡放假時跟我們回家嘛, 究竟倆姊妹幾時先可以跟番我哋住唔洗寄居婆婆屋企呀?!  唉...答案當然就係未有答案啦~

原本天文台話今日天陰有雨, 結果竟然係陽光普照, 最後媽媽我當然又係做少了一層防曬功夫, 好彩事後倆姊妹都無曬燶咋, 哈哈.

第一站 - 馬灣公園

去到馬灣公園時好熱好曬, 我真係好有衝動留喺旅遊巴上涼冷氣, 到步後又係要影全體大合照, 不過人數實在太多, 所以最後係要按旅遊巴到達先後次序影, 好彩小B有個要好嘅同學仔同我哋同車, 如果唔係就無人陪小B玩了...

今次只係去馬灣公園而唔係去挪亞方舟, 所以基本上無乜特別野玩, 而領隊亦只預留了一小時左右喺呢度.

小朋友有得跑跑跳跳就自然開心...

甫士王上身~  ^^"

妹妹又跟...  真心覺得妹妹越大越可愛~

大熱天時, 都係玩水最舒服~

爸爸太有童真啦, 非常容易就投入到小朋友嘅世界, 所以小B好多同學都愛跟住小B爸爸玩架, 哈哈~

突然感覺妹妹大個咗好多~

周圍行下玩下影下相, 一小時好快就過去, 我哋又係時侯出發去食午餐了...

今日雖然又熱又曬, 但行程唔算好辛苦, 難怪有家長話家教會嘅安排比起上次學校旅行時好啦!!  :p

估唔到個團餐又幾豐富幾好味啵~

食飽飽又再玩, 小朋友真係精力無限.

大約兩點鐘, 我哋就向住錦田鄉村俱樂部出發, 呢程車領隊非常醒目, 因為佢見大部份小朋友靜晒就知道大家需要休息, 結果我同妹妹就瞓咗半小時喇, 爽~

到埗後又係先影張大合照, 然後就自由活動時間. 

上年小B學校親子旅行都係黎呢度, 所以對呢度都好熟悉...

首先都係餵下小動物~

餵下金魚~

玩下電動車~

隻熊貓行得好快, 爸爸不得不扶住啊~

最後連爸爸都坐埋一份, 哈哈~

玩到尾聲, 兩個小朋友話想踩單車, 爸爸當然又租俾佢哋玩啦, 爸爸喺度佢兩個真係要乜有乜~

我家妹妹真係好Sweet好錫家姐, 妹妹因為驚家姐曬...所以一直追住家姐幫家姐擋太陽, 你哋話妹妹係咪好細心呢?!  呢種愛的表現, 唔係人人做到架.

今日我哋一家都玩得好開心, 期待之後嘅親子旅行一樣可以玩得咁開心, 咁盡興.





我們的Facebook專頁 - 小b與妹妹b之成長日誌