言語治療 (三)

經過上星期嘅灰爆言語治療訓練後, 今堂終於有起色, 唔通最後小B都諗通咗, 寧願快快攪惦都唔想再拖時間?!  (如果係就實在太好啦 <--- 媽媽又在發夢中 :p)

今日治療師一開始就問我練習進度, 我好坦白話佢知, P音字比K音字情況有明顯進步, 但K音字則有待再練習, 然後治療師就自己再同小B重溫一次P音字喇, 結果...P音字今次真係一Take攪惦呀, 唔洗好似上次咁重覆又重覆練習浪費了一堂時間.  其實今次治療師見小B用氣方面有進步, 已經無再特別幫小B重溫多次K音字, 因為大家都實在唔想放太多時間喺同一個音字上, 只叫我平日再加以重覆練習便可.  雖然P音單字已經沒太大問題, 但只要併詞語一起讀, 所有字又會打回原形, 所以當P音單字發音成功後就要開始練習P音字嘅詞語啦.

小B你一定要繼續努力呀, 大家都會大大力支持你架!! 

另外上星期開始, 媽媽回家後就同小B練習郁動舌頭來發啦...囉...呢等音, 暫時進度亦算不錯, 而今次治療師更加入了L音字, 看似都比較順利, 相信經我再密集式練習一段時間, 應該好快就可以攪惦L音了.

而最令我鼓舞嘅係...小B終於糾正到YY(奶奶)呢兩個字啦, 從小到大每次小B想食奶都只會講食YY, 而近幾日小B終於唔再係講YY而係正確講出奶奶啦, 真係實在太令我感動呢, 哈哈.  雖然能夠正確發出奶奶音只係一件好少好簡單嘅事, 不過當我哋睇得出小B嘅進步後, 真係開心到難以形容~~~~~~

最後治療師見我地今個星期將會暫停一次上言語治療訓練, 所以另外都俾多咗練習我哋做, 希望再下一個星期去見治療師時又會有明顯進步啦.

加油~加油~加油~





我們的Facebook專頁 - 小b與妹妹b之成長日誌

English Art Lesson @ Appletree Creative Arts Centre

其實我一直都好想幫小B報畫班, 因為媽媽我喺呢方面完全係零天份, 為咗唔想倆姊妹似媽媽一樣, 所以無論如何我都會俾倆姊妹試下, 但奈何暫時仲未搵到合適嘅Arts Centre俾小B. 

至於爸爸就一直認為即使要幫小B報畫班, 都要小B自己有興趣先可以, 所以今次當媽媽收到Appletree嘅試堂邀請時, 即刻好開心咁馬上答應, 因為終於有機會試試小B嘅反應嘛.  ^^

今日除咗試堂開心之外, 最開心莫過於係可以同朋友仔一齊去試堂, 大家有個伴, 相信應該可以互相感染一下吧.

今次課堂用全英語教授, 其實我都怕小B會聽唔明架, 不過有小檬係度, 應該問題不大呱, 而且小朋友嘅語言天份比我們大人好, 所以儘管試試啦.  課堂會以一半故事形式, 一半勞作/畫畫形式進行, 相比起一整堂畫畫時間, 看似比較有趣.

一開始, 導師會先同小朋友講英語故事...

媽媽從課室外偷望到, 小朋友們好似幾認真咁聽故事啵~

大家都有望住導師, 應該真係認真去聽吧~

講英語故事時又想小朋友投入, 除咗夠生動, 最好當然係俾小朋友一同參與遊戲啦, 故事大概係講海洋生物, 故事講到尾段時導師就俾小朋友釣海洋生物喇, 順便等小朋友可以認識一下海洋生物嘅生字, 真係唔錯唔錯~

故事時間時, 原本以為只得小檬會識答導師問題, 但原來大爺都會架, 雖然導師用英文問, 大爺就用中文答, 不過已經好過小B多多聲, 因為小B點都唔肯開金口講英文囉, 應該係無信心嘅關係啦, 看來最應該報讀呢班嘅係小B啵...哈哈!!  希望呢3年幼稚園生活裡面, 有得接觸NET之後會漸入佳景啦.

好啦, 上半部嘅故事時間完畢, 又到下半部嘅動手做勞作時間啦~

今次大家要做一個寶盒...開始時大家都需要自己動手剪紙皮.

其實媽媽一直都無俾小B用鉸剪架, 不過應該喺學校有用過, 所以有板有眼, 似模似樣.

然後導師再逐一協助小朋友用膠紙將1..2..3..4..5..6..嘅紙皮接合~

Yeah, 成功造出一個盒來啦~

其實完成品應該是這樣的, 但由於時間關係, 我們未有時間上色, 只能做出一個盒子.

最後3個小朋友當然要來張合照啦~

整體黎講, 呢堂English Art Lesson真係比較特別, 因為出面好多畫室都只係用廣東話教授, 而且亦唔會分一半故事時間, 一半勞作/畫畫時間咁, 所以今日大家都可以話係獲益良多架, 如果想小朋友對聽/講英語更加有信心, 真係不妨一試.

若然大家對English Art Lesson都有興趣, 可以直接打去Appletree問詳情, 宜家仲有免費試堂優惠呀!!

Appletree Creative Arts Centre
地址: 荃灣大河道99號99廣場1601室
**Miss Anna**




我們的Facebook專頁 - 小b與妹妹b之成長日誌

好鞋子

話說再過幾天就係小B契媽婚宴嘅大日子, 作為契女嘅倆姊妹當然要隆重其事著得靚靚啦, 為咗襯番兩條裙, 媽媽特地買兩對公主鞋俾倆姊妹著, 原本唔想淘想出街買, 但最近星期六日嘅行程實在排得比較緊, 喺無時間嘅情況下最後都係唯有"淘"...好彩又俾我淘到兩對好鞋子啵, 哈哈~

呢對家姐嘅 (原本揀咗嗰對好靚架, 點知俾晒錢先話無貨)

呢對妹妹嘅

經過上一次淘涼鞋俾小B而鞋碼錯到離晒譜之後, 其實我已經唔太敢淘鞋俾倆姊妹, 加上今次時間真係好緊迫, 所以一直都好擔心收貨時會貨不對辦, 幸好今日收貨時發現兩對鞋嘅質量都好好, 鞋碼正, 鞋底唔硬, 鞋身亦軟, 真係要讚一讚呀!!  ^^





我們的Facebook專頁 - 小b與妹妹b之成長日誌

言語治療 (二)

每星期一次嘅言語治療時間又到啦, 今次主要係重溫上星期學過嘅K音同P音, 原本假設小B今日能夠好好掌握這兩個發音後, 那就可以再多教一個音, 可惜小B今日表現好唔穩定呢, 用氣方面時得時唔得, 結果今堂治療師就要再花時間去幫小B對這兩個音加以練習喇!! 

唉...小B呀小B, 平日媽媽同你練習時你又唔肯認真, 晚晚練習幾乎都要鬧先肯認真一會, 但平日溫習學校書本或做功課又會變得好自覺同好乖巧架啵, 究竟言語治療練習對你來說是否真的好有難度呀?!  其實爸爸媽媽一直去迫你做言語治療訓練都只係為你好, 究竟你明白嗎?!

今個星期除了繼續練習K同P音之外, 治療師仲叫我開始要幫小B練習一下發"啦...囉...呢..."等嘅音, 好讓小B慢慢去適應發音嘅同時亦要運用舌頭. 

小B...請你認真加油, 盡快完成這個言語治療訓練好嘛?!  媽媽實在唔想因為要同你練習而有失感情呀~





我們的Facebook專頁 - 小b與妹妹b之成長日誌

Pizza Making Party @ APM Pizza Express

真係非常感謝肚B媽嘅安排...出錢又出力, 我哋呢班Blog媽Blog B又可以一齊去玩啦, 今次仲唔止玩咁簡單, 而係去整小B最愛食嘅Pizza呀.  今早當小B知道去整Pizza之後就變得好心急好期待喇, 明明未夠鐘出門都硬是要媽媽提早出門, 既然係咁媽媽一於帶小B去撐枱腳食個Lunch先啦, 之後再跟小情人大爺會合就齊齊去Pizza Express開Party嚕!!  ^^

未齊人開始整Pizza前, 呢對小情侶就梗係要四圍玩下影下相先啦~

以下係Pizza Express嘅流程 (真心覺得Pizza Express安排唔錯啊, 而且職員都好友善, 讚呀)

15:00 - 15:10 歡迎客人蒞臨 / 客人享用飲品

15:10 - 15:20 簡介 / 清潔雙手 / 戴上圍裙及廚師帽

15:20 - 15:50 開始製作薄餅

15:50 - 16:05 生日蛋糕時間﹣一同唱生日歌及吹蠟燭

16:05 - 16:35 享用薄餅及果汁

16:35 - 16:50 享用生日蛋糕

16:50 - 17:00 派對總結及致謝

參加今次活動, 除咗小朋友們開心, 其實媽媽們都一樣咁興奮架, 有圖有真相, 哈哈~

好啦Party要開始啦, 開始前職員先逐一幫小朋友進行加冕 (戴上圍裙及廚師帽)~

小情人馬上變成了小廚師~

大人小朋友都準備好就正式開始啦...

雖然餅底事先已經整好, 但我哋自己都要落手拍拍拍, 拍番D空氣出黎同整番好個餅邊架~

你睇大家幾認真, 幾落力~

整好餅底, 之後再將餅底鋪滿茄汁 (呢個時候...點解小B會含情脈脈咁望住大爺爸嘅?!)

然後再將材料鋪滿餅面就大功告成啦...

(材料方面分別有火腿, 雞肉, 蕃茄, 蘑菇同橄欖, 仲有當然唔少得嘅就係芝士粒啦!)

話咁快我哋就完成咗個Pizza啦~

嘩...好多Pizza一齊去入焗爐呀, 我哋係No. 7~

當所有Pizza等緊出爐時, 另一邊已經玩到忘晒形, 今日小B係咁跟住大爺爸玩, 小B咁主動, 唔知大爺爸下次會唔會怕咗小B呢, 哈哈!!

Pizza一出爐, 大家都急不及待要試試自己親手造嘅Pizza, 小B試咗一件就話自己整得好好味喇, 其餘嘅當然要帶番屋企俾妹妹同婆婆試下味啦.  ^^

今次無帶小B妹出黎, 媽媽我終於都可以抱抱小檬妹啦, 呵呵~

好快...兩小時嘅Party已經去到尾聲, 臨走前當然要影張大合照嘛!!

今次活動安排真係好好, 再次期待下次嘅聚會啊!!

(P.S: 特別鳴謝肚B媽同燒腩媽嘅靚相 ^^)





我們的Facebook專頁 - 小b與妹妹b之成長日誌

妹妹B ~ 19個月

好快好快...妹妹B就19個月大, 已經唔再係BB啦, 嗚嗚嗚~

唔知點解, 雖然我對住妹妹嘅時間比起小B小時候多, 但其實妹妹有好多成長嘅部份我都係無親眼見證到架...  無辦法啦, 處理小B校務事已經好忙, 所以好多時就算喺屋企都會忽略咗妹妹, 但只要一有空閒時間, 我都會先理妹妹後理小B, 希望倆姊妹可以明白媽媽, 唔好介意時間上分配嘅問題.

今個月妹妹嘅發展好似都係咁上下, 實情係媽媽唔太清楚就真, 不過有樣嘢我都係見妹妹食藥時先知, 原來妹妹已經自己識用普通杯飲水啦, 仲要控制得好好甚少倒瀉, 相信應該係學家姐吧, 叻叻.

至於食方面, 除咗晚飯食得比較差, 其餘時間食對於妹妹來說都唔係一個大問題, 我想妹妹最怕應該係無得食就真, 哈哈!!  基本上妹妹由起身開始, 叫得最多嘅就係食, 真係由早就食到晚, 所以即使晚飯食得唔好, 我都唔會理, 反正一定唔會怕佢肚餓先嘛.  另外亦因為媽媽見妹妹由朝食唔停, 所以媽媽今個月開始已經再無俾睡前奶妹妹啦, 反正睡前妹妹都會飲湯同食生果, 加上佢對奶嘅渴求亦無小B咁嚴重, 所以就算我無開睡前奶, 妹妹一樣可以一覺瞓到大天光, 最重要係唔食睡前奶可以大大減低蛀牙機會嘛, 其實媽媽都係為倆姊妹好啫...

講嘢方面同家姐一樣都係比較慢, 但發音就明顯比家姐好, 所以爸爸媽媽都唔太擔心.  回想起家姐當年都好似係兩歲後先變得多嘢講, 宜家妹妹雖然唔太多嘢講, 但妹妹成日都會用BB話鬧人架, 真係好好笑.

活動方面, 妹妹已經可以自己上樓梯啦, 通常上樓梯我只會站在妹妹身後, 因為妹妹唔准我扶囉, 但我又怕妹妹會向後跌喎, 唯一只可以做就係從後跟貼才安心讓妹妹自己上樓梯.  相反落樓梯妹妹仲未係好得, 一定要拖住, 偶然落一級會變成落兩級, 所以妹妹對於自己落樓梯都未有太大信心架.  另外可能跟得家姐多, 已經可以原地跳起, 跑跑跳跳對妹妹來說完全無難度.  之前我同婆婆都覺得妹妹平衡唔太好, 好容易就會跌倒, 但最近又好像有明顯改善啵. 

性格方面非常難攪, 又惡又霸道又痴身, 叫佢小霸王絕對貼切佢行為.  雖然佢同家姐相處尚算融洽, 不過佢蝦家姐都蝦得好犀利架, 好彩小B大人有大量唔同妹妹計較, 有得比較之下, 真心覺得家姐好乖, 哈哈~

暫時記錄完畢, 希望妹妹可以再乖D, 再好湊D就好啦!!  :p





我們的Facebook專頁 - 小b與妹妹b之成長日誌

K1班親子燈籠創作

今年開學頭幾天就收到學校通告話要整親子燈籠/吊飾佈置學校, 當然唔係強迫性參與嘅, 不過為咗小B對新學校可以有份歸屬感, 所以媽媽即使毫無藝術天份都勢要做個燈籠俾小B帶返學...  (其實係媽媽自找麻煩就真, 哈哈!!)

最初收到通告知道要整燈籠, 真係好頭痕好頭痕, 剩係上網搵靈感都搵咗好幾日, 最終經同事提點下, 媽媽終於諗到要做一架校車燈籠俾小B...

其實光是想係唔難嘅, 但落手去做就係另一回事, 所以有咁好玩嘅嘢, 當然要預爸爸一份啦, 哈哈!!  點知當我通知爸爸要做燈籠, 而且講清楚我嘅構思之後, 爸爸竟然話無難度...  既然係咁, 咁就一於交俾爸爸負責嚕.

結果爸爸用了短短兩小時, 竟然真的把燈籠做出來啦, 嘩嘩嘩...好靚呀~

(當然媽媽我都有出力啦, 所有公仔頭, 車轆都係出自我手架!)

至於小B就梗係負責監督啦, 哈哈.

其實原本我已經覺得好靚, 可以說是大功告成, 不過爸爸話車身略嫌單調, 所以叫我再加工, 最後懶人媽媽出動貼紙叫小B幫忙貼..貼..貼..

登..登..登..登...完成後嘅燈籠多面睇.

正面

兩邊車身

最重要嘅就係...呢個燈籠仲可以著燈架!!

以後每年嘅中秋節, 我哋都可以響應環保, 叫爸爸自家製燈籠, 唔洗再浪費金錢每年買一個嚕, 嘻嘻.

你睇小B帶住自己有份幫手做嘅燈籠返學幾開心.  ^^

希望小B見到學校掛住自己有份做嘅勞作, 會對學校多一份親切感啦.

預祝各位中秋節快樂, Yeah~





我們的Facebook專頁 - 小b與妹妹b之成長日誌

言語治療 (一)

跟上次評估相隔兩星期, 今個星期終於夾到時間去上言語治療訓練啦, 暫時我哋會先上4堂, 看看小B進展, 再去決定是否繼續上治療訓練.  雖然爸爸媽媽都覺得要小B去上言語治療訓練是必要的, 不過媽媽亦睇得出小B唔太鐘意啵, 唯有先上4堂試試, 希望小B唔好太抗拒就好了.

一開始...言語治療師為小B進行訓練, 今次要訓練嘅音係K音, 呢兩星期媽媽我日日喺屋企幫小B練習, 練習發P音之餘亦時常提點住小B要用氣, 幸好到今日正式上治療訓練時, 治療師話小B用氣方面開始有少少改善啦, 証明每日練習係唔會白廢嘅, 所以我哋一定要繼續加油啊!!

其實每次上治療訓練只得短短30分鐘, 我覺得30分鐘小B根本唔會從中學到D乜, 完全絕對係靠家長去記住技巧, 然後每日喺屋企幫小朋友練習, 但今次正式上治療訓練後, 媽媽發覺原來要教小B發正音係好難架, 唯有媽媽同小B一齊慢慢學, 慢慢練習, 希望小B可以快快掌握到個技巧啦...

今次用一星期時間去練習K音同P音, 希望儘快可以完成埋餘下8個音, 當然亦希望下次小B可以再專心D, 表現可以再好DD啦.

小B你真係要俾心機, 認真加油呀~





我們的Facebook專頁 - 小b與妹妹b之成長日誌

妹妹報N班

由前年開始, 報讀幼稚園嘅任務對我來說好像從未間斷過, 首先要幫家姐報N班, 接住報K班, 然後今年又再幫妹妹報N班, 明年再報K班, 真係一玩就玩足我4年...  不過咁, 因為已經有經驗, 而且一心只希望妹妹可以跟住家姐條路行, 所以目標非常明確, 只係最怕學校唔收妹妹啫.

說真的, 我自己比較主張妹妹返全日制N班, 因為妹妹好難湊, 所以只有返全日, 婆婆先可以暫且鬆一鬆, 加上家姐經過一年全日制N班後, 真的被老師訓練得獨立咗同自理能力好咗, 而這正是我對倆姊妹返N班嘅小小要求, 所以如果可以順利入番救世軍就當然最好啦, 不過今次妹妹報名籌號唔算太前 (雖然都係前), 之前校長話安全起見還是多報定一兩間做後備比較穩陣.

可能大家會問, 既然K班都打算再轉過去家姐間學校, 點解唔直接入去讀N班呢?!  好簡單...因為家姐間學校N班只得下午班, 而家姐就讀上午班, 如果一個返上午, 一個返下午, 婆婆肯定會鬧爆我, 所以免得麻煩, 還是K班才轉過去就好了.

另外由於妹妹實在太缺乏安全感同太痴身關係, 相信面試對於妹妹來說應該會係一個幾大嘅挑戰, 雖然媽媽我還是覺得妹妹好大機會可以入到救世軍, 但多報幾間學校俾妹妹去體驗一下面試亦未嘗不是一件好事啵, 就係咁...今年我哋應該只會報兩至三間, 你話係咪好Hae呢, 哈哈~ 

今年要報N班嘅小朋友, 大家一齊加油啊~





我們的Facebook專頁 - 小b與妹妹b之成長日誌

K班第一份功課

返學一星期, 小B都開始要做功課啦...

自新生家長會當日及新生適應日開始, 學校已經講明功課好快就會陸續有黎, 雖然係咁...但我哋一於無有怕, 因為K1功課只限於填色及畫線, 應該對於小B來說沒什麼難度.

暫時小B看似好喜歡做功課呀, 學校派功課紙回來後, 小B一等我下班回家就已經急不及待叫我立即同佢一齊做功課喇.  如果小B對於做功課這份熱誠可以一直持續下去, 相信接下來嘅功課量應該都不難應付.

看吧...認真做功課的小孩真可愛  ^^

對於跟我一樣毫無美術天份嘅小B來說, 填色填了不久後就叫媽媽幫手填, 當然媽媽我係唔會答應啦, 因為我要小B知道自己的事要自己做嘛, 尤其係學校功課.  

喺媽媽無出手協助嘅情況下, 再加上小B對美術嘅資質, 這份功課還算勉強過得去吧, 哈哈~    

看來媽媽有需要快快多買幾本畫冊回家俾小B練習練習啊~  ^^





我們的Facebook專頁 - 小b與妹妹b之成長日誌

校車初體驗

小B轉校後, 雖然新學校唔係好遠, 但為咗唔想辛苦自己又唔想辛苦婆婆, 所以最終我哋選擇咗坐校車, 不過原來坐校車卻辛苦了小B呢, 因為原本短短10分鐘車程嘅我哋, 搭校車竟然變成了首站上車, 結果每朝8:10小B就要上校車, 然後再行大約30-45分鐘大運才可到學校.

由於這回是小B首次自己坐校車, 所以感覺還算新鮮, 暫時每朝只要用校車唔等人嘅理由就可以將呢隻熟睡嘅豬仔叫醒, 不過相信呢招好快就會無效了...

小B話鐘意坐窗口位, 雖然我哋係第一站, 但因為有兩個小朋友上車, 所以老師會安排兩個小朋友平排而坐, 即係話第一個上車就可以坐窗口位, 第二個就要坐開面啦, 就係咁...呢幾日媽媽盡量都安排到小B第一個上車, 哈哈~

至於落車好彩唔洗再行大運, 因為我哋係頭站落車, 但始終宜家返學比之前返N班早起同早出門, 結果婆婆話見小B埋站時係呆滯樣囉.

其實我係咪應該寧願辛苦自己少少, 親自送返學之後再趕返工, 比起要小B搭校車好呢?!  但放學就要辛苦婆婆帶住妹妹去接小B, 咁樣好似又辛苦到婆婆啵, 唉~

暫時唯一最放心嘅就係校車上會有兩位老師跟車, 取代平時嘅褓姆姨姨, 喺安全性方面好像較有保証!!





我們的Facebook專頁 - 小b與妹妹b之成長日誌

試用 - GIO PILLOW超透氣護頭型枕頭

雖知道揀一個好用嘅枕頭真係好重要, 但究竟點樣揀先係最好呢, 我諗呢樣真係好睇用家個人感受吧, 不過如果枕頭揀得太高太扁太軟或太硬都一定會對身體造成不良影響, 最常見應該都係頸梗膊痛啦.

說實的...大人就話識得自己揀啱用嘅枕頭, 但小朋友又點識得揀自己啱用嘅枕頭呢?!  最後當然又係有勞父母代為選購啦, 所以買枕頭之前都不忘上網做做資料搜集. 

今次我哋用嘅係GIO PILLOW超透氣護頭型枕頭, 至於用家方面, 當然係我家試用專員 - 陳小B.

你睇...有新枕頭用開心得佢個樣~  ^^

呢款枕頭有3個唔同尺碼, GIO Pillow係根據亞洲BB月齡及頭圍發展而設計, 相比市面上單一尺寸嘅嬰幼兒枕頭, 能真正有效為小朋友管理頭型.

我哋呢款係L碼, 適合2-8歲小朋友使用.  (另有M碼6-24個月及S碼0-6個月)

另外枕芯及枕套材料, 絕對涼爽透氣, 非常適合我家兩個大汗怪.  :p

亦因為枕芯容易清洗及速乾關係, 所以可以避免塵璊及灰塵, 杜絕過敏源, 認真夠衛生.

產品特點:
- 專利認證, 能預防及改善因為睡姿引起嘅頭像變型
- <3D蜂巢立體透氣層>, 涼爽透氣不流汗
- Airmesh材料枕心, 降低嬰兒窒息風險
- 枕心可清洗與速乾, 杜絕塵璊過敏源

你睇小B瞓得幾甜?!  相信應該係個枕頭瞓得佢好舒服, 所以合埋眼都忍唔住笑出黎, 哈哈~

我們的Facebook專頁 - 小b與妹妹b之成長日誌